Read Kaqchikel 1 Sam 7 Bible Online

1 Sam 7 - Kaqchikel bible

1 Sam 7

¹Xebe k'a ri aj-Quiriat-jearim y xbekik'ama' ri káxa richin ri jikibel-tzij. Xbekiya' kan pa rachoch ri jun achin rubini'an Abinadab ri k'o pa jun ruwa-juyu'. Rija' k'o jun ruk'ajol rubini'an Eleazar y re ala' re' xkicha' k'a richin ja rija' nichajin ri káxa ri'.

²Y xq'ax yan k'a juwineq juna' chi tapon ri káxa pa Quiriat-jearim. Y konojel ri israelita kan janila nikirayij nikikanoj ri Jehová.

³Y ri Samuel xch'on k'a kik'in konojel rije' y xubij: Wi kan qitzij rik'in ronojel ik'u'x yixtzolej-pe rik'in ri Jehová, kan ke'iwelesaj k'a el konojel dios y chuqa' ri ixoq dios Astarté ri niya' ruq'ij rix. Kan tijacha' k'a ri iwánima chire ri Jehová. Kan xaxe k'a rija' xtiwilij y rija' kan xkixrukol pa kiq'a' ri aj-Filistea, xcha'.

⁴K'ari' ri winaqi' israelita xekelesaj-el ri Baal y chuqa' ri Astarté y k'ari' xkisamajij kan xaxe ri Jehová.

⁵Y ri Samuel xuteq koyoxik konojel ri israelita richin tikimolo-ki' pa tinamit Mispá y rija' xkerujech pa ruq'a' ri Jehová.

⁶Kan xkimol k'a ki' chiri' pa Mispá. Xkelesaj ya', y xkitix pan ulew chuwech ri Jehová richin jun sipanik. Kan man xewa' ta ri q'ij ri' richin chi konojel xkik'ut chi kan qitzij xtzolej-pe kik'u'x y xkibij: Kan qitzij na wi oj makuwineq chuwech ri Jehová, xecha'. Y ja ri Samuel xq'aton-tzij pa kiwi' ri israelita chiri'.

⁷Toq xkak'axaj ri aj-Filistea chi ri israelita kimolon-ki' pa Mispá, jari' toq xejote-q'anej ri aj-labal, richin nibekibana' labal kik'in. Toq ri israelita xkak'axaj chi ri aj-Filistea e peteneq, rije' janila xkik'en rukiy.

⁸Jari' toq xkibij chire ri Samuel: Tabana' utzil, man katane' chuk'utuxik chire ri Jehová ri qa-Dios richin yojrukol pa kiq'a' ri aj-Filistea, xecha'.

⁹Y ri Samuel xberuk'ama-pe jun ti karne'l ri k'a nitz'uman na. Xukamisaj k'a richin kamelabel y xuporoj chijun chuwech ri Jehová. Y xch'on pa kibi' ri ruwinaq y kan xak'axatej-wi roma ri Jehová.

¹⁰Rokik ri Samuel nusuj ri kamelabel, jari' toq ri aj-Filistea xe'apon richin chi nibekibana' labal. Jak'a ri Jehová xuya' jun nimalej koqolajay pa kiwi' ri aj-Filistea y kan janila k'a xkixibij-ki'. Chupan k'a ri q'ij ri' ri aj-Filistea, xech'akatej pa kiq'a' ri aj-Israel.

¹¹Y xe'el k'a el rije' pa Mispá y xekitzeqelibej-el ri aj-Filistea. E k'iy k'a xekikamisaj pa bey y xe'apon-qa pa tinamit Bet-car.

¹²K'ari' ri Samuel xberuk'ama-pe jun abej y xuya' pa k'ulba't chire ri tinamit Mispá y ri tinamit Sen. Y xuya' rubi' re abej re' y xubini'aj Eben-ézer roma ri ch'abel ri' nel chi tzij: K'a re wawe' oj ruto'on-wi ri Jehová.

¹³Xech'akatej k'a ri aj-Filistea koma ri aj-Israel y kan man jun bey chik xkimej ri kiruwach'ulew, rokik k'a k'es na ri Samuel, roma kan ja ri Jehová xbanon ri oyowal kik'in ri aj-Filistea.

¹⁴Ri israelita xkikol chik k'a kan ri kiruwach'ulew pa kiq'a' ri aj-Filistea y ri amorreo, ri nitiker-pe pan Ecrón y napon k'a pa Gat. Y kan xk'oje' k'a uxlanen kik'in.

¹⁵Y ri Samuel chijun k'a ruk'aslen xq'aton-tzij pa kiwi' ri ruwinaq.

¹⁶Y ronojel k'a juna' napon chupan re tinamit re': Pa Betel, pa Guilgal y pa Mispá richin nuq'et-tzij pa kiwi'.

¹⁷Y toq nitzolin-pe chi kitz'etik re tinamit re', k'ari' napon pa tinamit Ramá, roma chiri' k'o-wi ri rachoch. Y chiri' nuq'et-tzij y chiri' xuben-q'anej jun porobel richin ri Jehová.