Read Kaqchikel 1 Sam 8 Bible Online

1 Sam 8 - Kaqchikel bible

1 Sam 8

¹Toq ri Samuel janila chik ri'j, jari' toq xeruya' ri e ka'i' ruk'ajol richin xe'ok to'onela' pa ruwi' ri tinamit Israel.

²Ri nabey ruk'ajol rubini'an Joel y ri ruka'n rubini'an Abías. Ja rije' ri xe'ok to'onela' chiri' pa tinamit Beerseba.

³Jak'a rije' man xkiben ta achi'el xuben ri kitata'. Rije' xa ja ri méro ri xkirayij ruwech y xekik'ul ri sipanik ri man ruk'amon ta richin nikik'ul y keri' xkiq'ej ri ruchojmilal ri k'aslen.

⁴Roma ri' xkimol k'a ki' konojel ri e aj-raqen chikikojol ri e rijatzul ri Israel, y xebe pa Ramá richin yebech'on rik'in ri Samuel,

⁵y xkibij chire: Rat janila chik at ri'j, y ri ak'ajol man nikiben ta achi'el naben rat. Roma ri' wakami niqajo' chi nakanoj jun qa-rey richin nuq'et-tzij pa qawi', achi'el kibanon ri ch'aqa' chik ruwach'ulew, xecha'.

⁶Jak'a ri Samuel man xqa' ta chuwech toq xrak'axaj ri xkibij chire chi tukanoj jun ki-rey y roma ri' rija' xch'on rik'in ri Jehová.

⁷Y ri Jehová xubij k'a chire: Tanimaj kitzij ri tinamit rik'in ronojel ri nikibij chawe, roma man ja ta rat ri yatkimalij kan, xa ja yin ri yinkimalij kan richin man ninq'et ta chik tzij pa kiwi'.

⁸Kan keri' kibanon-pe kan xaxe toq xenwelesaj-pe pan Egipto, k'a re wakami in kiya'on kan. Y xa xekisamajij ch'aqa' chik dios y kan keri' chuqa' nikiben awik'in rat.

⁹Wakami k'a tanimaj kitzij xaxe k'a taq'alajirisaj chikiwech, ri achike k'a xtuben ri rey kik'in toq xtik'oje' pa kiwi', xcha' ri Dios chire ri Samuel.

¹⁰Keri' ri Samuel xubij k'a ronojel ri xubij ri Jehová chire, chike ri ruwinaq.

¹¹Y xubij k'a: Ri rey xkeruk'uaj k'a el ri ik'ajol y xkeruya' richin nikiben oyowal pa taq carruaje, o xkeruya' richin xkebe chuwech ri ru-carruaje rija' pa labal.

¹²Xkerukusaj richin xke'ok aj-raqen pa kiwi' ri aj-labal y chuqa' xkerukusaj richin xtikisamajij ri rulew y xtikimol ruchi' ri rutiko'n. Chuqa' xkerukusaj richin xtikiben kamisabel richin labal y ronojel samajibel ri k'atzinel chire ri ru-carruaje.

¹³Chuqa' xkerukusaj ri imi'al richin xtikiben jubulej taq aq'om y xke'ok banoy taq q'utun y banoy kaxlan-wey.

¹⁴Keri' chuqa' xtuk'en kan ri más jebel chire ri iwulew y chire ri itiko'n richin uva y ri itiko'n richin olivo y xtuya' chike ri e rusamajela' rija'.

¹⁵Xtrelesaj chiwe ri jun chire ri lajuj chire ri jalajoj ruwech iwixin y xtuya' chike ri aj-raqen y chike ri e rusamajela' rija'.

¹⁶Xkeruk'en-apo ri isamajela' ri e yuqul pa samaj iwik'in chi achi'a' chi ixoqi', ri alaboni' ri jebel kuchuq'a' y chuqa' ri ibur, y rik'in ri' xtiban ri rusamaj.

¹⁷Xtrelesaj chuqa' chiwe ri jun chire ri lajuj chire ri ikarne'l, y rix xkixyuqe' pa samaj rik'in.

¹⁸K'ari' rix xkixsujun chik chuwech ri Jehová, jak'a rija' man xkixrak'axaj ta chik, xcha' ri Samuel chike ri ruwinaq.

¹⁹Jak'a ri winaqi' man xkajo' ta xkak'axaj ri ruch'abel ri Samuel y xkibij: Ni, roj niqajo' jun qa-rey richin nuq'et-tzij pa qawi'.

²⁰Richin keri' roj chuqa' xqojok achi'el ri ch'aqa' chik ruwach'ulew. Ri qa-rey xtuq'et-tzij pa qawi' y chuqa' rija' ri xtik'o-el chiqawech chupan ri labal, xecha'.

²¹Y ri Samuel xrak'axaj k'a ronojel ri xkibij ri winaqi' y xuq'axaj ri kich'abel chire ri Jehová.

²²Jak'a ri Jehová xubij chik chire ri Samuel: Tanimaj kitzij y taya' jun ki-rey richin nuq'et-tzij pa kiwi', xcha'. K'ari' ri Samuel xubij chike ri achi'a' ri k'o kiq'ij chikikojol ri e rijatzul kan ri Israel chi kebiyin chi taq kachoch.