Read Karaja Matthäus 13 Bible Online

Matthäus 13 - Karaja bible

Matthäus 13

¹Itxu taheka Jesuisi rare heto‑ribi Kalileia aho ijà‑ò. Tahe tai ronyre. Tahe rexiterenyre Jesuisi iny ribedeerynymy.

²Tai ibututyhymy heka iny wirotyre. Tai tahe Jesuisi rexitareny urihimyò hãworo‑ò ronymy rexitaranyre. Iny sõwehekỹ mahãdu tahe aho ijàkile heka roholamy rỹimyhỹre.

³Tii heka relyymyhỹre aõma ijyyõ relyyre: —Aõna aõna wese ijyy rawesenanyre. Hãbu alòbòròmy rara. Tii heka alòbòròna dehudu rare.

⁴Ijõ heka idi rehumyhỹu heka ijõ ryro‑txi resere. Nawii heka riròmyhỹre riore heka.

⁵(5-6) Ijõ tahe rejuxunyre aõma manarutysu‑txi. Tii tahe raumynyre aõwesele. Iraruxiõlemy heka rỹimyhỹ suu ibutureki. Idi bedetòtee rimoedỹỹnyre. Idi tahe rurure.

⁶(-)

⁷Òwòrudỹỹ resere edey‑txi. Idi ta ruhunyre edewanale. Idi tahe ede riòdesedỹỹnymyhỹre. Tai heka raratynyõlemyhỹre.

⁸Ijõ tahe resere suwitxirawihikỹ‑txi. Tai tahe sõwemy raratynyre. Sohoji òwòruty‑ribi tahe 30my raratynyre iraty wahe. Ijõ 60my raratynyre iribi. Ijõ ta 100my raratynyre.

⁹Tahe Jesuisi heka rarybere: —Kia boholatyhymy bonyke. Õhõtirenydikeki boholabenyke.

¹⁰Tai tahe ierydỹỹna mahãdu Jesuisi ritỹỹraxinyre: —Aõherekibo kai ijyy‑di bierynanykemy atxiteri, rawesenanyreri wahe.

¹¹Tai tahe dirawyònyde: —Kaiboho aõmybo Deuxu reerynanyre kaiboho bierybenyke. Ijõ mahãdu tiu ijyy rieryõtyhy. Kaiboho dori Deuxu Òlòna teerytenyte.

¹²Hãbuõ iaõdikeki ijõ heka iratyre tamy ariwahinyke. Tai tahe sõwemy tamy rauhenyke. Tahe hãbu ihoõkeki ibutelemy ijõdikeki heka kiale iribi ibutumy aritakre.

¹³Retehemy ihãre tahe robiõhyymyhỹrenyre tahe ririõhyymyhỹre. Tai heka ijyy‑di reerynanymy watxireri.

¹⁴Iwese Isaia tyyriti‑ki roire wese heka tiiboho ihỹrenyre: <PI>—Roholamyhỹre, roholamyhỹre ihãre tahe rieryõhyymyhỹre. Retehemy ihãre tahe tiu robiõhykymyhỹre.

¹⁵<PI>—Irayky tererenyreki wahe rieryõre heka. Õhõtireny heka ritòbònymyhỹre ta ijohonana‑ribi. Tarue ribrenymyhỹre robike lau. Tahe wadee ròòseõtyhy. Aõkõre heka ariteytenykemy idi watximyhỹre. Tibo heka terareny aõkõre.<CL>

¹⁶Jesuisi ijõ relyymyhỹre tamyreny: —Kaiboho heka eysamy atxitenyteri. Kaiboho heka bobibenyke tahe bierybenyke. Aõmybo kaiboho tabitenyteri heka, taholatenyteri wahe.

¹⁷Ihetxiu mahãdu, hỹỹna mahãdu wahe, tuu lobiximy riwisỹnymyhỹre. Aõma aõwobo kaiboho taholamyhỹtenyteò heka roholakemy riwisỹnymyhỹre tahe roholaõhyymyhỹre.

¹⁸Tahe boholake heka adee aritỹnynyke aõbo ijyy rare.

¹⁹Òwòruty ryro‑txi resemyhỹre heka iny ijoireny wesemy ihỹre. Ijohona tuuwesemy wahe. Tibo roholamyreny ihỹre tahe rieryõhyymyrenyre. Aõma Satanasi heka nade tai tahe warybe heka iribireny ritamyhỹre.

²⁰Ijõ manarutysu‑txi resemyhỹ mahãdu tahe ijõ ijohonadu wesemy heka roire. Tiiboho heka deysana‑di roholamyhỹrenyre.

²¹(21-22) Tai tahe urihimyòle rityhynymyhỹrenyre aõhõkỹmy dỹỹnana kanakeu tahe aõwesele riatyke ririmy reake. Kia edey‑txi resera tasỹ aõma ijõ ijohonadu mahãdu wesemy heka rare. Tiiboho heka aõma 1000 nierule aõnityhymy idi rõhõtinymyhỹrenyre nierudile. Tai tahe rexibedewonymyhỹrenyre. Tiu heka Deuxu aõmydỹỹna riwinyõhyymyhỹre, Deuxu Rybe riwiòhenanyrenyre.

²²(-)

²³Kia suwitxira wihikỹ‑txi resera wana tahe iwitxira ijohonadu mahãdu wesemy heka rare. Tiiboho heka roholamyhỹrenyre rityhynymyhỹre sõwemy Deuxu dee roholamyhỹreny heka. Ijõ 100my wesemy raratynyre. Ijõ 60my raratynyre ijõ 30my raratynyre. Iny sohoji sohojiõ heka Deuxu‑ò aõ riwinyrerimy ihỹre.

²⁴Idi tahe iwitxira ijyymy relyyre Jesuisi tamyreny: —Deuxu Iòlòna heka kia wesemy ihỹre. Oworudu heka aõma alòbòròna wihikỹõ ritòbrònymyhỹre taoworuro‑ò.

²⁵(25-28) Tahe iòluduõ rumy heka tamy nade. Tahe iu ibutumy iny rõrõmyhỹreu, asibinaty‑di tamy rehure. Tai tahe alòbòròna asibina‑wana ruhunyre kia aõma ede wana wimy urilemy. Taiki tahe kia aõma oworudu kia aõmysỹdỹỹdu mahãdu. Tuu heka ijyy‑di nade tuu ijyymy. Idinodu rarybere: —Aõma waòludu heka kia riwinyre wadee. Idi oworudu narybede: —Aõhebohe arotỹỹnyrenykre? Ta idile aõbohe arisiherenykre araxirenyre. Tai tahe rirawyònyre:

²⁶(-)

²⁷(-)

²⁸(-)

²⁹(29-30) —Aõkõre wahe, kia ibutumy alòbòròna rirarutxinykre. Ixinamy heka ratybienykre tii‑wana wiurilemy kia maixõmo arixina bededỹỹnamy bede relerekeu tahe iribi raarike. Ararybekre heka tamy kia aõma oworu‑di raaõmysỹdỹỹkreò. Juhu delemy asi arisykre. Tahe ritoonykre. Idi tahe maixõmo heka riarikre kia maixõmo hetowo‑ò riyrubunykre.

³⁰(-)

³¹Tahe Jesuisi ijõ ijyy witxiramy relyymyhỹre: —Aõma Deuxu Iòlòna heka aõma alòbòròna sõmo sõmo wesemy ratximyhỹre.

³²Aõma raumynyreri heka aõma òwòru iyjatyhymy ibutumy òwòruty‑ribi rariewesele relemyhỹre. <PI>Taiki tahe kia nawiile tuu rỹtỹnymyhỹre kia òwòru‑ò.

³³Uri paõ uri ixiòlòdỹỹna heka Deuxu Iòlòna wesemy heka kia ihỹre. Hãwyy heka paõ riwinymyhỹreu, riurinymyhỹreu tahe ibutumy raubỹtỹmyhỹre kia ibemy.

³⁴Tai tahe rexiòlònymyhỹre Jesuisi heka sõwemy tuu relyymy raremyhỹ. Iu iny ribedeerynymy raremyhỹu. Tiiemy heka Jesuisi relyyhyy raremyhỹ iu ròbedeerydỹỹmy raremyhỹu.

³⁵Deuxu rybedu dori ihetxiu rarybere: <PI>—Jiarỹ ijyy‑di rebedeerynymyhỹre. Aõma tuu relyymyhỹre heka ierykõna rare. Tiuhe rieryõhyymyhỹre. Iu bede rexideelenyrauhyyle.

³⁶Idi tahe Jesuisi rexitare iny sõwey‑ribi rexitare. Hetoõ‑ò heka ralore. Tai tahe aõmybohe wakoreny inihe bedelyyke. Aòludu inybo arasỹnyremy. Kia ijyy heka aõma hãbu ede‑di rehure ioworu‑ò, taòludu oworu‑ò. Kia inihe wadee bitỹnynyke aõbo rare wahe. Kia ijyy telyyté.

³⁷Tai tahe Jesuisi tii dirawyònyde: —Kia hãbu alòbòròna wihikỹ ribòrònyre heka Deuxu Riòre Hãbutyhyhykỹ, rare wahe.

³⁸(38-39) Ioworu heka ibutu bede heka roimyhỹ wesemy roimyhỹre. Aõma alòbòròna wihikỹre heka ityhydỹỹdu iwese rỹirawesemy rỹira. Asi tahe kia ityhydỹỹdukõdu mahãdu wesemy heka ihỹre. Aõma kia iòludumy rarybereri tahe kia Satanasile heka ihỹre. Kia iyresynamy rarybereri aõbo bedekonana heka tuu rininimy heka tuu rarybereri. Kia ỹju heka iyresydumyhỹ tuu rarybereri. Kia rimykre ede riorokremy rarybereri heka aõma ityhydỹỹdukõdu mahãdu heka tuu rininimy rarybereri.

³⁹(-)

⁴⁰Ritakre heka rihitxinykre. Heòty bedehekỹ heka idi rehukre risõkre iu wahe. Iwesele taheka bedekonana heka rarakre.

⁴¹Deuxu Riòre, Hãbutyhyhykỹ heka aõma ỹju riteònykre ibutu iny ributunykremy. <PI>Ityhydỹỹdukõdu mahãdu ijõ iny òraruna‑txi rityhedỹỹdu mahãdu heka ibutumy ributunykre widee. Ibutumy aõbina bina widỹỹdu wahe.<CL>

⁴²Idi tii rihukre. Tai tahe ryrykre aõkỹmy rotỹỹnykre tai. Robumyhỹre taju.

⁴³Kiau aõma <PI>Deuxu hõrõ mahãdu tahe Waha Iòlòmy ronymyhỹre kie ronykre. Tiiboho loosòny wesemy heka ritoosònanykre txuu loosòna wesemy.<CL>Õhõtirenydikeki ibutumy heka boholabenyke.

⁴⁴Deuxu Iòlòna tahe nieru wesemy ratximyhỹre. Aõma nieru heka hynaõ‑ki rahara nieru‑di tỹximy aõma surawo‑ki idi hãbu ixyby riwore. Tai tahe tii reysatyhymy ròòsere. Kia ibutumy taaõmydỹỹna‑di heka rohonyre. Kia bedero riwykremy.

⁴⁵(45-46) Ijõ tahe tule Deuxu Iòlòna wesemy ka ratximyhỹre. Iwese ixiura wydydu ihỹre wesemy heka Deuxu Iòlòna ihỹre. Iwydydu heka iijese iijesemy riwymyhỹre. Aõwi riererimy riererimy heka tai rahamyhỹre iruxera‑ki tii tahe riwymyhỹre. Kiau tahe tai rahare aõ òwyhykỹõ‑ki heka rahare. Tii idi tahe rohonyre ibutumy taaõmydỹỹna‑di idi tahe kia iwydymy idi ratxireriò riwyre.

⁴⁶(-)

⁴⁷Riàõ wese heka tule Deuxu òlòna ihỹre. Aõma rià‑di iny rehumyhỹre wana heka ibutumy utura rimymyhỹre.

⁴⁸Kia aõma idi tahe idi raixỹnymyhỹre riarimyhỹre iky‑ribi. Aõma awi‑di awihe riarirerimy iky‑ribi. Ibinare rihitxinymy iribi.

⁴⁹Kia bedekonanau tahe iweselemy heka rarekre. Kia aõma ỹju heka riarikre awi heka ibinau‑ribi riarikre.

⁵⁰Rehukre heòty bedebinakỹ‑ò wahe. Tai ki tahe rirajuamyhỹkre ta aõhõkỹmy rotỹỹnymyhỹkre. Txuu rikyinymyhỹkre

⁵¹Tahe Jesuisi tamy rỹỹraxire: —Kiamy ibutumy teerymyhỹtenyte? Tiiboho riraòwònyrenyre: —Kohe, reerymyhỹrenyre.

⁵²Idi Jesuisi rarybere: —Inyõ bede ywina bedeerydỹỹna heka rityhynyreu, waheludu rarekreu wahe. Tii tahe iwese hãbu butudỹỹdumy ratximyhỹre wese heka ronymyhỹre. Tii heka ibutudỹỹna heto‑ribi ritamyhỹre, tasỹ mahãdu‑ò riwahinykemy. Aõ tyby aõ tỹmyra. Ibutumy heka ritamyhỹre.

⁵³Tahe iribi Jesuisi rexitareu,

⁵⁴tahe tahãwã‑ò ròòsere. Judeu dohodỹỹna heto‑ki ribedeerynyre. Tahe ibutumy ribedeòtiidỹỹnyre. Tiribibo heka tii bedeeryna rierymyhỹre: —Timyrekibohe aõwiwihikỹ rierymyhỹre. Tii kỹny heka aõma òwòru besedỹỹwidỹỹdu riòre heka rare.

⁵⁵Jyje riòre wahe. Marie heka tule rare ise wahe. Txiau, Simaõ, Jyje, Judasi‑wana iseriòre ihỹre tule wahe inatyhy?

⁵⁶—Iseriòre hãwyy heka tule kaki rasỹnymyhỹre inatyhy. Timyrakibohe aõna aõna ikõkõ rierymyhỹre.

⁵⁷Tahe rityhynyõhyymyhỹre heka tai wahe. Jesuisi tamyreny rarybere: —Deuxu Riòre Hãbutyhyhykỹ heka tiu tauludu wijirana hãwã‑ki inyõ rityhynyõtyhy rybeduõ ihetomy ijirana‑ki.

⁵⁸Tai tahe aõna aõna wiwihikỹ heka tai riwinyõhyyre, rityhynyõmyhỹreki.