Read Karaja Lukas 3 Bible Online

Lukas 3 - Karaja bible

Lukas 3

¹Tiberiò heka waiyre beòramy iòlòmy raremyhỹ. Poncio Pilato heka Judeia bede dinodu. Ijõ heka Herodi inire. Inataõ inymy heka bede dinodumy raremy. Herodi heka Kalileia bede dinodu. Iseriòre, Filipi tahe Itureia bede, Traconite bede‑wana dinodu rare. Ijõ iny tahe Lisỹnia inire. Tii Abileni bede dinodu rare.

²Anasi, Kaifa‑wana heka inatxi hãbu roire. Tiiboho wiwana xiwena wahidỹỹdu wedu raremyhỹ. Kia bedeu heka Joaõ rehemynyre bedero‑txi. Tii iny‑ò Deuxu rybe tỹnydỹỹdu rare. Zacaria riòre rare.

³Tii kia bede ibutumy rybe ritỹnynyre, Jordaõ beroweramy ibutumy wahe. Kia wesemy rarybere: —Aòraru‑ribi bòhònyke. Maratisebenyke. Tahe Deuxu aòraru riixãwididỹỹnykre.

⁴Iwese Isaia ròritidỹỹre wesemy heka wiji rỹire. <PI>Inyõ heka ryrymyhỹ bedero‑ki.<CL>Kia: <PI>—Inynyrỹry bexiywinybenyke. Ryòbitihikỹ biwinybenyke. Hãloo bitỹxinybenyke wimyny biijaranybenyke. Iry iòweòwena ramyhỹre heka, biòbitinybenyke.<CL>

⁵Iratòratòkeki, wimyna biijaranybenyke.

⁶Ibutumy iny heka Deuxu biu‑ò henamy robirenykre.

⁷Sõwemy iny nade riratisebenykremy Joaõ‑ò. Tahe tii tamyreny rarybere: <PI>—Kaiboho hemylalaweselemy toite. Deuxu ykarana‑ribi bexitabenyke, aõwiwihikỹ.

⁸<PI>Uritere kawese ryberenyõmykre: —Abraõ dori iny labiereny rare. Tai tahe ibutumy awityhy rare inydeereny.<CL>Jiarỹ dori adeereny ararybekre: —Deuxudeewikeki, Tii kia manadile iny riwinyke. Abraõ dee ijõ riòreõmy kia manadile riwinyke.

⁹Woma heka òwòruraruti riòròmyhỹre. Kia raratynyõkeki heka, raòròkre. Heòty‑di wòmy ririradỹỹnymyhỹke.

¹⁰Tai tahe iny rỹỹraxire Joaõ‑ò: —Timybohe rakatxirenykre.

¹¹Tai tahe rarybere: —Inyõ tõre inatximy ijõdikeki, sohoji iny ijõ‑ò riwahinyke. Irỹsỹnadikeki, tule ritxuatxuake ijõkõ mahãdu‑ò.

¹²Iny witxiraõ Joaõ‑ò rehemynyre. Tiiboho nieru tarasadu mahãdu rare bede dinodu‑ò. Tai rỹỹraxirenyre: —Timybo aõhebo rokotỹỹnyrenykre.

¹³Joaõ rirawyònyre: —Uritere aõnihikỹmy itarasarenyõmykre. Bede ywidỹỹna tyyriti myna ta tuukre.

¹⁴Tai tahe soldado tamy rỹỹraxire: —Inyboho tahe aõhebo rokotỹỹnyrenykre. Joaõ rirawyõnyre: —Inyõ biteranyõtyhy adee nieru kanakemy. Inieru dori ahõrõ aõkõ rare. Beysake, adinodu‑ribi tiwesebo nieru tetamahãte‑di.

¹⁵Tahe kia iny mahãdu raraykynyre Joaõ‑di. Kowa aõbo hãbu Kristu ihỹre.

¹⁶Tai heka Joaõ rarybere: —Jiarỹ heka bedi araratisebenyreri. Ijõ wahewo‑ribi kanakre tahe woratyre inihikỹ rarekre. Tii heka awityhy rare. Jiarỹ heka raixỹruwãhãre iwataana aritake lau. Tii heka akanaratisebenykre Deuxu Tyytybytyhy‑di. Heòty‑di tule wahe.

¹⁷Iti tebò‑ki ratxireri. Maixõmo ruxity hitxina‑di wahe. Tii heka ritakre. Maixõmo riyrubunykre ihyna‑ò. Iruxityy tahe ritoonykre. Kia heòty heka tiu ruriõtyhy.

¹⁸Aõ heka Joaõ rarybere. Sõwemy aõna aõnamy iwesele rarekemy. Dohodỹỹna wihikỹ‑di tamyreny rarybera.

¹⁹Bede dinodu Herodi heka taseriòre riòrese‑wana roire. Aõbina binahakỹle riwinyre kia. Tai tahe Joaõ tamy rarybere: —Kia awi aõkõ rare. Ibina heka rare. Sõwemy aõna aõna bina tule tii riwinyre.

²⁰Tai Herodi heka Joaõ mynymy riteranyre ròtenawo‑ki roikemy.

²¹Joaõ ixiwesehyyle rexitỹmyranymy iny riratisebenyre. Tahe tule iny witxirahe‑ki Jesuisi riratisebenyre, Jesuisi rexitòenyreu, biuwetyhy rarayre.

²²Biuwetyky‑ribi tahe Deuxu Tyytybytyhyle dobehemy nade bòtòerurà wesemy. Biu‑ribi rybeõ‑ò iny roholare: —Kai heka Wariòre tate. Aluure heka jiarỹ wadeysatyhyre.

²³Jesuisi 30 beòramy raremy taaõmysỹdỹỹna tyhy ritelenyreu, iny heka Jyje riòrelemy rõhõtinymyhỹre.

²⁴Jyje heka Eli riòre rare. Matate, Levi, Maki, Janai, Jyje, ibutumy labiehekỹ Jyje rare.

²⁵Ijõ tahe Matatias, Amos, Naum, Esli, Nagai,

²⁶Maate, Matatias, Semei, Jyje, Joda,

²⁷Joana, Resa, Zorobabe, Salatieli, Neri,

²⁸Meki, Adi, Cosã, Elmadaõ, Er,

²⁹Josue, Eliézer, Jorim, Matate, Levi,

³⁰Simeaõ, Juda, Jyje, Jona, Eliaki,

³¹Melea, Mena, Matata, Natã, Davi,

³²Ijese, Obede, Boasi, Sala, Nasaõ.

³³Aminadabe, Adimim, Arini, Esraõ, Peresi, Juda.

³⁴Ijaò, Ijai, Abraõ, Tera, Nakò,

³⁵Serui, Raau, Faleki, Eber, Sala,

³⁶Aina, Arfaxade, Sem, Noe, Lamei,

³⁷Metusalẽ, Enoi, Jarete, Maleleel, Aina,

³⁸Enosi, Sete, Adaõ. Tii tahe Deuxu juhuu riwinyre iriòre wese.