Read Karaja Lukas 6 Bible Online

Lukas 6 - Karaja bible

Lukas 6

¹Judeu elehydỹỹnymyhỹreny txu kia idi rekoarenyre maixõmoho‑di. Ierydỹỹna mahãdu rimyra maixõmo, maixõmo, debò‑di riroxitytxiwimyhỹ riymy idi rare.

²Fariseu mahãdu tuu robire. Tamy rỹỹraxire: —Aõherekibo kia wese tewinyteri. Kiamy heka iwidỹỹõmyke bede ywina rybe rarybemyhỹre judeu elehydỹỹnymyhỹrenytxumy.

³(3-4) Jesuisi tamyreny rarybere: —Ihetxiu Davi tamahãdu‑wany rama risareu, Deuxu dohodỹỹna hetowo‑ò rirònyre. Tai Davi xiwena rỹsỹnale taijoi‑wana rirỹsỹre. Xiwena wahidỹỹdule heka irỹsỹdure, inywitxira ta aõkõ.

⁴(-)

⁵Jesuisi ritỹnynyre tamy: —Hãbutyhyhykỹ jiarỹ rare, Deuxu Riòre wahe. Kiata sabado wedu jiarỹ rare, elehydỹỹnymyhỹrenytxu wedu wahe.

⁶Ixityre ralore dohodỹỹna mahãdu heto‑ò ròbedeerydỹỹkemy. Hãbuõ tai rare tebò rabinamy.

⁷Tahe fariseu mahãdu Jesuisi‑ò retehere. Riteyteynykemy kia hãbu webinadu judeu elehydỹỹnymyhỹrenytxu. Rexiwodohonanyre. Kiatxuu tii riwinyrekeki tahe ribinanyke judeu elehydỹỹnymyhỹrenytxu, riwinykeki wahe.

⁸Jesuisi rierymyhỹre aõmybo tiiboho raraykynyrenyreri. Jesuisi tamy ryryre, —Aõma hãbu debòbina‑ò: —Mynyike ini, ityareny‑txi.

⁹Tahe fariseu mahãdu‑ò Jesuisi rarybere: —Arỹỹraxikre inihe adeereny, awire adee ka hãbu debò ariteytenyke sabado txuu. Aõbo adeereny awire sabadotxu widỹỹ. Aõwihikỹwidỹỹmy aõbo ada aõbina widỹỹmy. Rubu‑ò wahidỹỹ aõbo ada rubu‑ribi itarasa aõbo.

¹⁰Retehere! Ibutu‑ò idi hãbu‑ò rarybere: —Ebò inihe biditeòsinyke. Tiu hãbu tebò riteòsinyreu tahe, reytere.

¹¹Reburerenyre heka. Timybo Jesuisi risỹnyrenykemy rexinohõtinyrenyre.

¹²Idi tahe Jesuisi heka hãwãlòratyy‑ò rare ixitòedỹỹmy Deuxu‑ò. Rureherehemy heka tamy rexitòenymy bede idi rỹire.

¹³Txuijaramy tahe ludu mahãdu‑ribi waòinatxi reurò taheludutyhy mahãdu ritare. Tarybemy rybedumy rininirenyre.

¹⁴Sohoji ijõ heka, Simaõ inire, Pedromy idi ranire, ijõ tahe Andre rare, iseriòre. Idi Txiau, Joaõ, Filipi, Bartolomeu.

¹⁵Mateu, Tome, Tadeu Txiau, (Kia Txiau heka Afeu riòre rare.) Ijõ Simaõ Kana bedeluduõ rare, tasubedeluudure.

¹⁶Juda Txiau riòre, ijõ Juda Isariò tahe Jesuisi tyhedỹỹdu rare.

¹⁷(17-18) Jesuisi dobehede bedero‑ò hãwãlò‑ribi. Tahe sõwemy iny iheludu mahãdu tii‑wana rỹimyhỹ. Judeia bede mahãdu Jerusalẽ hãwã mahãdu. Tule Kalileia bede, Tiro hãwã, Sidõ hãwã mahãdu. Tiiboho wii ributunymy hãwã mahãdu Jesuisi‑ò roholakemy idi reytekemy. Kia tai ròteytedỹỹmyhỹ.

¹⁸(-)

¹⁹Ibutumy Jesuisi tyky‑ò tamy adereximy risỹnymyhỹre adeytena iribi ròhònymyhỹ.

²⁰Tamyreny retehere tai ibutumy rierynanyrenyre: —Kaiboho aõkõrenyre‑ki, beysebenyke. Deuxu Òlòna dori ahõrõreny rare.

²¹Rama arasareri‑wana beysabenyke. Bihydymy dori mabekre. Tule tahinyteri wana beysakre ihewo‑ribi.

²²(22-23) Beysamy butxuenykre, inyõ umy radònykeki tule. Kaiboho dori Deuxu Riòre tetyhynytenyte jiarỹ tiire, Hãbutyhyhykỹ Riòre wahe. Kia mahãdu eramy ijira Riòre rỹikeki beysake. Beysa tyhyki tai. Biu‑ki dori aõwiwihikỹ bitakre. Deuxu rybemy rybedu mahãdu tule rotỹỹnyrenyre iòraru‑ki.

²³(-)

²⁴Kobe làhàxe kaiboho ityhy mahãdu abedesanareny dorihe rexihura.

²⁵Kobe làhàxe ahàdyreny mahãdu, aramasanareny dori rehemynyre. Kobe làhàxe abedesareny, ahinanareny dori abrunareny rehemynyre.

²⁶Kobe làhàxe atyhydỹỹ sõwereny tule dori. Ilabiereny rybemy rybedutyhy aõkõ rityhynyrenyre.

²⁷Warybe‑ò taholatenyteriki inihe ararybekre. Aòludu luumy atxibenyke amykyaradureny‑di, awimy idi mabeke.

²⁸Ibinamy aõma umy rarybekeki aõbinahakỹ riwinykeki, tamy bexitòenykre Deuxu‑ò.

²⁹Aòsỹny‑ribi anahatenykeki iyre‑ribi iwyòdỹỹmy tamy bexirahòreke. Inyõ atyky riwykeki tule tamy arahana biwahinyke.

³⁰Iwese aõtxiu aõna inyõ adee rexitòenykeki, tamy biwahinyke ixyby iribi iwydykõkemy.

³¹Aõbina inyõ adee riwinykõkemy atximahãte. Iwese tiu kia aõhõkỹmy inyõ isỹdỹỹõmykre.

³²Kai aluu mahãdu sohojile iluuõmyke; òrarudu mahãdu dori tuu rỹimyhỹre.

³³Kai aery mahãduòle tawotòemahãte, timyki Deuxu‑ribi aõ atarasaõna. Iny itxỹte iehehe mahãdu dori widee rawotòemyhỹre.

³⁴(34-35) Òrarudu mahãdu heka widee rihuòtemyhỹre. Iribi tahe iwesele ixiby kidiwykemy idi riwisỹnymyhỹ. Kai ta buhuòtemyhỹke idi tehuòtete ixyby iraròsòkõmyke. Tukõkeki ta Deuxu‑ribi aõ atarasaõna. Aòludu luumy atximahãbenyke. Tai Deuxu‑ribi aõwiwihikỹ bitakre. Tai Deuxu wihikỹ riòremy mabekre. Tii dori inywi‑ò inybina‑ò awire.

³⁵(-)

³⁶Awimy kaiboho boibeke, iwese boreny awimy biu‑ki ratximyhỹre wese.

³⁷Inyõdee kyarakõmyke tai Deuxu adee rakyarananyheny. Inyõ taòraruna biixãwididỹỹnyõkeki, Deuxu tahe aòraruna riixãwididỹỹnyõkre.

³⁸Ainytyhyke inyõdee imyna Deuxu adee rainytyhynanyhyykre. Deuxu ibutumy aõwi adee riwahinykre. Tiwesebo tòwahite wesemyna idi Deuxu adee ròwahikre.

³⁹Aõmybo ribedeerynyre ijyyõmy relyyre: —Inyõ ruetà heka riwiòhenanyõtyhy iwitxira iny ruetà. Tukeki heka hãloo‑txi wiwana resekre.

⁴⁰Ierysỹdỹỹ iòrysydỹỹdu, kia ratyre aõkõ ratximyhỹ. Kia uladu ratyyritinyre nihikỹmy tahe erysydu tiu taerysydỹỹdu ratyre ratxiõmyhỹre.

⁴¹(41-42) Òwòrukre nihikỹ aruety‑ki roire. Aõherekibo aseriòre ruety‑ribi òwòru rỹnysiõ tarasamy tewisỹnyteri. Kia heka itxenadỹỹdu tate. Juhuu òwòrukre aruewo‑ribi bitakre. Idi tahe betehemy iruewo‑ribi aõsõmo bitakre.

⁴²(-)

⁴³(43-44) Òwòru wihikỹ tiu bederaty binaõ riwahinyõhyymyhỹre. Tule òwòru binahakỹ bederatywimy raratynyõmyhỹre. Òwòru raerymyhỹre iraty‑ò itxere rỹimyhỹreu, beraty‑ò retehemy awire ada ibinare aõbo beraty‑ò retehemy awire ada ibinare aõbo. Figoraty uvaraty tiu iwitxira òwòru‑ribi raheõmyhỹre.

⁴⁴(-)

⁴⁵Hãbuwi heka aõwimy rotỹỹnymyhỹre iwo‑ki tuu rỹimyhỹremyna. Tule hãbu bina aõbinamy rotỹỹnymyhỹ iwomy tuu rỹimyhỹremyna aõbina bina. Inyõ dori aõmy raraykymyhỹremyna rarybemyhỹre.

⁴⁶Kai rarybere boholaõkeki aõbo biwinykeki. Uritere wanidỹỹõmy. Wanyrỹmy tiwaninimyhỹtenyte tahe warybemynamy atxõhyylemyhỹtenyte.

⁴⁷Tiwese hãbu warybe riywinyre wese adee ararybekre. Tiu heka ariteòsinykre.

⁴⁸(48-49) Hãbuõmy akoreny arelyykre. Tii warybe‑ò roholare idi imynany rotỹỹnyre. Tii kiata taheto riwinyre manadelemy ria‑di. Beòra iheto reseõhyyre manatyre‑ki relereki wahe. Ikõmyta warybe‑ò roholakõre, kawese rotỹỹnyre. Taheto uritere sukile riwinyre. Beòrau ta, urile resere. Ikyhynakõreki wahe. Kiamyta rotỹỹnyre warybe tyhydỹỹdu‑ò idi ityhydỹỹdukõ‑ò.

⁴⁹(-)