Read Karaja 1 Johannes 4 Bible Online

1 Johannes 4 - Karaja bible

1 Johannes 4

¹Waluuna mahãdu, ibutumy rybe bityhynybenyõke inihe ityhydỹỹrenyõmy. Tai biurihike iny rybe Deuxu‑ribi inatyhy aõbo ada aõkõre aõbo. Sõwemy rybedu mahãdu ròhònymyhỹre. Tahe inatyhymy Deuxu rybemy rybedu aõkõ rare.

²Kiamy Deuxumy rybedu mahãdu inatyhymy bierykre, inyõ rarybekeki: Jesuisi Kristu hãbu wesemy nade, tii inatyhy Deuxu mahaduõ ihỹre.

³Inyõ kiamy rarybeõkeki, tii Deuxu mahãdu aõkõ ratximyhỹre. Kia Kristu òluduõ rare. Tamy taholamahãte kanakreò, tahe, kia ratximyhỹre.

⁴Wariòre wese, kaiboho Deuxu mahãdumy toite. Rybedu inatyhy aõkõ rare, kia ruru tetatenyte. Deuxu dori aworeny‑ki ratximyhỹre Deuxururu, Diabo ruru ratyre rare.

⁵Inatyhymy rybedu aõkõ aõmydỹỹnana binamy relyymyhỹre. Tii dori ka bede aõmydỹỹnana bina mahãdu rare. Tahe ityhydỹỹdukõdu mahãdu tamy roholamyhỹre.

⁶Inyboho Deuxu mahãdu roire. Inyõ Deuxu rierykeki, inydeereny roholamyhỹre. Inyõ Deuxu rieryõkeki, inydeereny roholaõtyhy. Kiamy rikierymyhỹrenyke inatyhyna mahãdu inatyhyna aõkõ mahãdu.

⁷Waluuna mahãdu, wiluumy rakatximyhỹreny. Luuna dori Deuxu‑ribi nade. Inyõ luukeki, Deuxu‑ribi tibie rare. Iny Deuxu rieryre.

⁸Inyõ luuõkeki Deuxu rieryõre. Deuxu dori luuna rare.

⁹Kiawese inyboho rieryrenyre Deuxu inyluuremy ratxire. Deuxu Tariòre sohojile diteònyde bede‑ò inyboho Iriòre‑ki umy tỹmyra‑ki rahakemy.

¹⁰Kia heka luuna rare. Juhuu Deuxu iny tuu aõkõ rare. Tii tahe inyluure. Tule tariòre diteònyde inyòraru òwy òwydỹỹnanykremy.

¹¹Waluuna mahãdu, Deuxu inyluurenytyhyreki, tai tahe inyboho wiluumy rokoireke.

¹²Tiu Deuxumy inyõ robiõhykyre. Inyboho wiluumy rỹikeki, Deuxu inywo‑ki ratxike. Tai tahe inatyhymy Deuxu luuna inywo‑ki ratximyhỹre.

¹³Deuxu iny‑ò Tatyytyby riwahinyre. Kiamy tahe inyboho rieryrenyre tamahãdu‑ki ratximyhỹre. Tule rierymyhỹreny tii iny‑wana ratximyhỹrenyre.

¹⁴Deuxu Riòremy inyboho robirenyra Tulobixidumy inyboho roire. Tuu adeereny relyyreri. Deuxu Tariòre diteònyde iny tarasadumy rarekemy.

¹⁵Inyõ rityhynykeki idi rarybekeki: Jesuisi Deuxu Riòre rare, tii Deuxu‑di tawo‑ki ratxireri. Tii Deuxu‑wana ratxireri.

¹⁶Inyboho rieryrenyre Deuxu inyluurenyre. Kia iny rityhynyrenyre. Duexu heka luuna rare. Inyõ luuna‑ki ratxihyykeki Deuxu tii‑wana ratxihyyke. Tii Deuxu‑wana ratxihyymyhỹke.

¹⁷Iny luunareny Deuxu‑ò rauhenyõreri. Tai tahe Deuxu wiribi ritxuakre kia txuu inyboho kiatxulau ruberuõtyhy. Iwese tii ratximyhỹre wese inyboho kabede‑ki ratximyhỹrenyre.

¹⁸Inyõ luuna‑di ratxityhykeki, tii ruberuõtyhy. Luunatyhy brebuna‑di rehumyhỹre. Aõhõkỹmydỹỹnana brebuna kidiwahinyleke. Inyõ brebuna‑di ratxikeki, tamy aõhỹkỹmy dỹỹnana kanakre.

¹⁹Juhuu Deuxu inyluurenyre, tai tahe inyboho iluurenyre.

²⁰Inyõ rarybekeki: —Jiarỹ Deuxuluure. Tai tahe tii ityhydỹỹdu seriòre luuõkeki, tii ruidu rare. Inyõ taityhydỹỹduseriòre luuõkeki, timykibo Deuxu luumy rarekemy iximy rõhõtinyke Deuxu dori tiu tuu robiõhyymyhỹre, taseriòremy tahe robihyky ihỹre.

²¹Kia bede ywina rybe heka Kristu inydeereny riwahinyre: Iny Deuxuluumy ratxikeki, tule tii taityhydỹỹdu seriòre luumy ratxikre.