Read Karang Mbete Matiye 1 Bible Online

Mbete Matiye 1 - Karang bible

Mbete Matiye 1

¹Ɓay Ŋgermbay Zezu[1], ke ɓa gun zih Abaraham, ke ɓa gun zih ŋgermbay Daviɗ. Sa̧w in ye mí na-ay :

²Abaraham mbuŋ Isak, Isak mbuŋ Zakoɓ, Zakoɓ mbuŋ Zuda ke yi̧n yeri.

³Zuda mbuŋ Peres ke Zara, mah woyri ɓa Tamar[2]. Peres mbuŋ Heserom, Heserom mbuŋ Aram.

⁴Aram mbuŋ Aminadaɓ, Aminadaɓ mbuŋ Nasoŋ, Nasoŋ mbuŋ Salmoŋ.

⁵Salmoŋ mbuŋ Bowaz, mah ye ɓa Rahaɓ. Bowaz mbuŋ Obeɗ, mah ye ɓa Ruɗ[3]. Obeɗ mbuŋ Zeseh.

⁶Zeseh mbuŋ Daviɗ a ye ŋgermbay. Daviɗ ba, mbuŋ Salomoŋ, mah ye ɓa wu̧y kaŋpele Yuri[4].

⁷Salomoŋ mbuŋ Robowam, Robowam mbuŋ Abiyah, Abiyah mbuŋ Asaf.

⁸Asaf mbuŋ Zosafaɗ, Zosafaɗ mbuŋ Zoram, Zoram mbuŋ Oziyas.

⁹Oziyas mbuŋ Zotam, Zotam mbuŋ Ahaz, Ahaz mbuŋ Hezekiya,

¹⁰Hezekiya mbuŋ Manase, Manase mbuŋ Amos, Amos mbuŋ Zosiyah.

¹¹Zosiyah mbuŋ Zekoniyah ke yi̧n yeri. Ke sew lák mbay Zekoniyah a ye mbay ziɓri, nzuk Babiloŋri fa̧h gun Izarayelri-aw ɓa mgbal si tusiɓa woyri.

¹²Fal fá̧h gun Izarayelri si puh mgbal ké Babiloŋ mí gun Zekoniyah[5] mbuŋ Salatiyel, Salatiyel mbuŋ Zorobabel.

¹³Zorobabel[6] mbuŋ Abiyuɗ, Abiyuɗ mbuŋ Eliyakim, Eliyakim mbuŋ Azɔr.

¹⁴Azɔr mbuŋ Sadɔk, Sadɔk mbuŋ Akim, Akim mbuŋ Aliyuɗ,

¹⁵Aliyuɗ mbuŋ Eliyazar, Eliyazar mbuŋ Matan, Matan mbuŋ Zakoɓ.

¹⁶Zakoɓ mbuŋ Zezeɓ wah Mari, Mari mbuŋ Zezu a ye ké riŋ ɗina Ŋgermbay kan tul ye.

¹⁷Kaŋ mí kí̧ fal zih yeri ur ke tul Abaraham si ka̧h tul Daviɗ, ku ki̧ ɓa boh falu niŋ. Ur ke tul Daviɗ si ka̧h sew kú-u fa̧h gun Izarayelri si mgbal ké tusiɓa Babiloŋ, ku ki̧ sa̧w zih yeri ɓa boh falu niŋ. Ur ke sew kú-u fa̧h gun Izarayelri ɓa mgbal si tusiɓa Babiloŋ si ka̧h tul Ŋgermbay, ki̧na-u ɓa boh falu niŋ.

¹⁸Ɓay mbuŋna Ŋgermbay Zezu ti kandɔkay : Mah ye Mari ɓa wu̧y mbana Zezeɓ. Dara kú ya̧ hani le, Mari ya̧ ɓil. Sa̧wu ɓa Tempuki.

¹⁹Zezeɓ ba, tu sa̧w-ya̧ ɓil Mari ya. Ke ɓa nzuk ké tu Ŋgerzah ɓa záh ye, mí ke sa ten ɓay yá̧ ɓil Mari ké gel daɓa ya rɔkɔ ké ɓaŋ su̧hru kan nun Mari. Kaŋ mí ke lek ɓay poŋ ni ɗeŋ.

²⁰Zezeɓ ɓá ker ɓayaw bale, í ko, tem nzak pihna Gaŋ tul feri riw ti̧h nun ye ɓil lɔlɔ mí ɓahri : « Zezeɓ gun zih Daviɗ, mú laɓ hȩkme yá̧ Mari ɓa wu̧y wo ya ɓayu ké sa̧w gun ké na ɓil ye ɓa Tempuki. Gunu ɓa nzuk lawpuki.

²¹Mari ɓay mbuŋ gun wo̧ronzuk. Mu tú riŋ gunu ɓa Zezu ɓayu ké gunu ɓay ya̧ sa̧w in ye ziɓri a woyri gun Izarayelri hi̧ kú ti̧h ke ɓil suya. »

²²Fe laɓna-uri gbam ti̧h hi̧ ɓay ké gun nzak pihna Ŋgerzah vbeh lewsa̧ laɓ ƴo gelu.

²³Nzak pihna ra ɓahri, í ko, gun wu̧y tikla ɓay ya̧ ɓil, ke mbúŋ gun wo̧ronzuk, ku tú riŋ ye ɓa Emanuyel[7]. Emanuyel yih ɓahri, Ŋgerzah ƴo ziŋ na.

²⁴Mí Zezeɓ tom ke nam. Ke ya̧ bolnzak tem nzak pihna Ŋgerzah ra. Ke ya̧ Mari ɓa wu̧y ye.

²⁵Ke na ziŋ ni ya kpu̧ru ka̧h nam ké wu̧y ye mbuŋ gun ra. Mí ke tu riŋ gunu ɓa Zezu.