Read Karang Mbete Matiye 10 Bible Online

Mbete Matiye 10 - Karang bible

Mbete Matiye 10

¹Kandɔkaw, Zezu ɗi nzuk-dih fal ye a boh falu seɗeri gi ta̧w ye. Ke hi̧ niri ŋgerna ɓay mba tul záh tukalari hi̧ kú ni̧h záhri ké tul nzukri, kú gah sam senari ɓoɗ ɓoɗ pi. Kaŋ mí ke pih niri.

²Riŋ gun nzak pihnari ké boh falu seɗe ra mí na-ay : titil ki̧na-u ke tul Simu kú-u ɗi ni ɓa Piyer ke yi̧n ye Andere, Zak gun Zebede ke yi̧n ye Za̧h, Filiɓ ke Bartelemi, Toma ke Matiye nzuk-mbu̧h lampoh, Tade ke Zak gun Alfe, Simu nzuk-ri̧h si̧w ɓay tusiɓa woyri ke Zudas ké Isikariyoɗ a ye ké-e te Zezu.

⁵Zezu pih gun nzak pihna a boh falu seɗeri ra ke bolnzak ɓahri : « Tusiɓa nzukri ké sa̧w woyri ɓoɗ, í si ri ya. Tusiɓa nzuk Samariri kara í si ya pi.

⁶Wara le í si ta̧w gun Izarayelri kú-u ɓa sami biri mí ku zi-zi.

⁷Sina woiri-aw, í ka-kah hi̧ niri ɓahri, “lák mbay a nunmbam ka̧h da.”

⁸Senari le, í gah. Hulri ba, í tom. Nzuk ndɔɓeri, í gah niri hi̧ saŋna-si gel kani Ŋgerzah ɓá lu ké tul woyri. Í ni̧h záhri ké tul nzukri. Ŋgerna-laɓ fe-ayri, i ya̧ ndikpo le, í laɓ hi̧ nzukri ndikpo pi.

⁹Í ya̧ lari lɔr ya, í ya̧ lari a puki ya, í ya̧ lari a si̧h-u ya pi.

¹⁰Í mbi ɓɔl ɓay goŋ fe ké gel gahru woiri ya. Í ya̧ gar a ɓoru dɔm tul gar ké i ndoh ya, í ya̧ sabɔk a ɓoru dɔm tul sabɔk woiri ya, í ya̧ ka̧wkpuh sina a ɓoru dɔm tul ka̧wkpuh woiri ya pi. Ɓayu ké fe su̧na gun-laɓ pihna ra, ke su̧ ké gel pihna ye mí mah ni seeh.

¹¹Ɓa ra puh a luki mini gun puh mí i si ri le, í fakla nzuk ké ɓay mgba nzak pihna woiri ma law ɓa teh-u, mí í na kerpuh ye ka̧h nam tɔrna woiri.

¹²Gelke i rih ɓil puh gahru woiri le, í vah nzuk kerpuh-uri ke ɗeŋ.

¹³Law nzuk puh-uri ɓa law ɗeŋ le, mgbɔkɔ ɗeŋ woiri ɓay kaɓ ziŋ niri. Mí kerpuh-aw mah ya̧ ɗeŋ woiri ya le, mgbɔkɔ woiri ɓay el ƴo ziŋ wuri.

¹⁴Kerpuh ké sa mgba wuri gahru ya, puh ké nzukri sa lah nzak pihna woiri ya, mí tɔrna woiri le, í kpoh kasal bɔk woiri sɔk ɓahri, salɓay suya woyri mgbahla wuri ya.

¹⁵Ɓa ketina, mi ƴo ɓah ɓayay hi̧ wuri, nam-kuŋ salɓay le, salɓay suya ké ɓay ku̧ tul nzukri ké puh-aw ɓay kpuh mba salɓay suya ké ku̧ tul nzuk a lewsa̧ri ké Sɔdɔm ke Gɔmɔr mba-mba.

¹⁶Í ko, a bi mí-i ƴo pih wuri ɓa samiri ma sakra gaykoyri. Dale í si siŋ sina ru̧na kandɔk siŋ sina soy ké ru̧ kaŋ. Í tu suya ya kandɔk mbɔre ké tu suya ya kaŋ.

¹⁷Í ru̧ ke mun woiri ɓay nzukri. Ku ɓay mgba wuri si pol ŋgernzuk misoŋri hi̧ ku kuŋ salɓay ku̧ tul woiri. Ké vul misoŋ ku zɔ́r wuri ke ndehdɔŋ.

¹⁸Ku ɓay kɔklɔ wuri si pol guvener-ri pi, pol mbay tusiɓari pi ɓayu ké i ƴo tul riŋ bi. Fe-u ɓay laɓ hi̧ wuri í te-teh ɓay bi ké pol ŋgernzuk tusiɓari pi, ké pol sa̧wnzuk a ɓoruri pi.

¹⁹Gelku-u mgba wuri ndoh ndɔk nzukri le, í hi̧ law woiri ɓá lu ya. Í nzah ɓay ké i ɓah-u ké pol nzukri ra ya. Ɓayu ké Tem bah woiri Ŋgerzah ɓay hi̧ wuri ɓayri ké i ɓay ɓah-u ke sa̧wseh-u.

²⁰Ɓayri ké ƴo ti̧h ke nzak woiri ta ɓa ɓay woiri ya. Wara le ɓa ɓay Tem bah woiri mí i ɓah hi̧ nzukri-aw.

²¹Nzukri ɓay fu̧y wuri ɓayu ké i ƴo tul riŋ bi. Nzuk ɓay te yi̧n ye hi̧ kú i, bah gun ɓay te gun ye hi̧ kú i. Gun ɓay ur ziŋ nzukri ké mbuŋ ni ɓay i niri. Mí nzuk ké su̧h law ye tul riŋ bi kpu̧ru ka̧h hul ye le, ke ɓay ti̧h ke ndɔk hul.

²³Gelke ku faŋ bol woiri ɓil puh mbew le, í ɗuk si puh a ɓoru. Ɓa ketina, mi ƴo ɓah ɓayay hi̧ wuri, se-se ɓay í ka̧h puhri gbam ké tusiɓa gun Izarayelri dara gun nzuk pirmatul ɓá el gi.

²⁴Gun likɔl mba tul metere ye ya. Mgbal kara mba tul gaŋ ye ya pi.

²⁵Mah ɓay gun likɔl ɓá eŋ metere ye. Mgbal kara ɓá eŋ bahgaŋ ye pi. Ku ɗi riŋ mbay záh tukala kan tul nzuk puh ɓahri, “Belzebul” ra wa, ani mí ku ɓay ɗi gun puh-uri ke riŋu ɓáy le wo ?

²⁶Dale í laɓ hȩkme nzuk-laɓ wuri koseh-awri ya, ɓayu ké ɓayri gbam ké mu̧-mu̧h ɓay ti̧h kala. Ɓayri gbam ké mu̧h nun nzukri ra, nzukri ɓay tu-u.

²⁷Ɓay ké mi ɓah hi̧ wuri ké gel a mu̧h-u le, í ɓah ɓayu ké gel a teh-u. Ɓay ké mi ɗakla ké lɔkɔ suk woiri le, í ka-kah ɓayu ma síɓa síɓa.

²⁸Í laɓ hȩkme nzuk-i hulri ya. Ku ta ke ŋgerna ɓay za tem woiri ya. Í laɓ hȩkme Ŋgerzah ma. A ye ke mah zi mun ke tem woiri seɗe mbɔk ké ɓil hɔrɔ.

²⁹Nzukri ƴo yeh ti̧tihri seɗe ke tere gursu, kaŋ ya le ? Ti̧ti̧h mbew mbew gbam ké lih hul le, bah woiri Ŋgerzah tu-tu.

³⁰A woiri ba, Ŋgerzah ki̧ pirmatul woiri mbew mbew gbam dale,

³¹í laɓ hȩkme ya. I mba tul ti̧tihri le, el mba ra ɓáy.

³²Nzak nzuk a suŋ suŋ gbam ké ɓah ketina bi[41] ké pol nzukri le, nzak bi kara ɓay tu riŋ nzuku ké pol bah bi ké nunmbam pi.

³³Nzuk a a̧y ké saŋ riŋ bi ké pol nzukri le, a bi kara mi ɓay saŋ nzuku ké pol bah bi ké nunmbam pi.

³⁴Í lu kerɓay ké ɓahri se, mi gi ɓay hi̧ ɗeŋ ɓá ƴo tusiɓa. Mi gi ke ɗeŋ ya. Wara le mi gi ke mahwu̧y.

³⁵Mi gi kúŋ sal ké sakra gun wo̧ronzuk ke bah ye, ké sakra gun wu̧ynzuk ke mah ye, ké sakra wu̧y wo̧ro ke mahfay ye.

³⁶Nzukbaa nzuk ɓa nzuk ɓil kerpuh yeri.

³⁷Nzuk yih bah ye mini mah ye poŋ mi le, nzuku mah nun bi ya. Nzuk yih gun ye, ɓa ra a wo̧ro-u mini a wu̧yu poŋ mi le, nzuku mah nun bi ya.

³⁸Nzuk sa mbi kpuh vbatay hul ye suk dih fal bi keni ya le, nzuku mah nun bi ya.

³⁹Nzuk ké tu su̧ tukala le, tul ye ɓay zi-u. Nzuk ké poŋ kerɓay tul ye ɓay tul bi le, ke ɓay ziŋ ɔkna.

⁴⁰Nzuk ké ya̧ wuri le, a bi mí ke ya̧ mi-aw. Nzuk ké ya̧ mi le, ke ya̧ nzuk-pih mi.

⁴¹Nzuk ya̧ gun nzak pihna Ŋgerzah ɓayu ké-e tu ni ɓa gun nzak pihna Ŋgerzah le, nzuku ɓay ziŋ kpaŋndɔk a gun nzak pihna Ŋgerzah. Nzuk ya̧ nzuk ké tu Ŋgerzah ɓa záh ye ɓayu ké-e tu ni ɓa nzuk ké tu Ŋgerzah ɓa záh ye le, nzuku ɓay ziŋ kpaŋndɔk a nzuk ké tu Ŋgerzah ɓa záh ye.

⁴²Nzuk a a̧y ké laɓ suki a mah gelu, ɓa ra mbih nzona mí ke kah hi̧ gun a mah gelu ɓayu ké-e ƴo dih fal bi le, ɓa ketina, mi ƴo ɓah ɓayay hi̧ wuri, kpaŋndɔk nzuku ta zi ya. »