Read Karang Mbete Matiye 11 Bible Online

Mbete Matiye 11 - Karang bible

Mbete Matiye 11

¹Zezu hi̧ bolnzak hi̧ nzuk-dih fal ye a boh falu seɗeri ra ɔh bale, ku tɔr si ka-kah ɓay gina lák mbay Ŋgerzah ké puh gun Izarayelri. A ye kara ke si puh ke puh ƴo firma gun Izarayelri ɓay lák mbay Ŋgerzah pi. Ke ka-kah ɓayu hi̧ niri ku lah.

²Za̧h batisi ba, na vul mgbal, mí mberem fe laɓna Ŋgermbay toh suk ye. Dale ke pih nzuk-dih fal yeri si ta̧w Zezu, mí vbi ni ɓay ɓahri : « A wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra, ké ɓay gi lák mbay tusiɓa gbam mini nah geŋ nzuk a ɓoru le[42] ? »

⁴Zezu yih nzak woyri ɓahri : « Í si ɓah hi̧ Za̧h ɓá lah ɓay feri-ay ké i lah ke suk woiri, ké i ko ke nun woiri ɓahri se,

⁵ra̧wri ko gel, kpereri si sina, mun nzuk ndɔɓeri teh mí saŋna-si gel kani Ŋgerzah lu ké tul woyri, mbikiri lah ɓay, hulri el kaɓ ke nun, ko̧hkori lah ɓaysuki Ŋgerzah ma law[43].

⁶Pol tehna teh tul nzuk ké riŋ bi ti̧h ɓa ndaw lihna ye ya. »

⁷Nzuk-dih fal Za̧h batisiri tɔr ba, mí Zezu ɓah ɓay tul Za̧h batisi hi̧ daɓa nzukri ɓahri : « Sina woiri ɓil lawkɔraw, i si ɓay ko fe le ? I si ɓay ko sihri ké kuna laŋ mgba̧ya mgba̧ya lo ?

⁸Uwa. I si ɓay ko fe le ? I si ɓay ko nzuk ké ndoh gar lari a ndu̧yu mgbelek mgbelek le wo ? Í ko. Nzukri ké ndoh gar lari a kandɔkaw kaɓ kerpuh mbayri.

⁹Uwa, i si ɓay ko fe le ? I si ɓay ko gun nzak pihna Ŋgerzah le wo ? I si ɓay ko gun nzak pihna Ŋgerzah gaŋ. Mí-i ƴo ɓah hi̧ wuri ɓahri se, Za̧h ra ke mba tul gun nzak pihna Ŋgerzah a ɓoruri mba-mba.

¹⁰A ye ra Ŋgerzah vbeh ɓay tul ye hi̧ zih woiri ɓahri, í ko, ke pih gun nzak pihna ye ƴo pol woiri[44] ɓay lek ful geŋ ni[45].

¹¹Ɓayaw ɓa ketina, mí-i ƴo ɓah hi̧ wuri ɓahri se, ké sakra nzuk pirmatulri kú-u mbuŋ niri ké tusiɓa gbam, nzuk mbew ké mba tul Za̧h ta-a. Mí gun a mah gelu ké ɓa gun puh lakna a nunmbam mí mba ni.

¹²Ur ke sew Za̧h batisi ka̧h guri-ay, lák mbay a nunmbam ra nzuk law mgbɔrɔri[46] mí ƴo nah-u ke ŋgere ŋgere[47].

¹³Ɓay ra Ŋgerzah hi̧ Moyiz vbeh ɓil mbete lewsa̧, ke hi̧ gun nzak pihna ye a lewsa̧ri vbeh ɓil mbeteri pi gi ka̧h sew Za̧h batisi, ke hi̧ ni ka-kah ɓayu pi.

¹⁴Mí i mgba ɓahri, Za̧h ra mí ɓa Eli gun nzak pihna Ŋgerzah a lewsa̧[48] ké-e ɓay gi-u dara Ŋgermbay ɓay gi ɓáy ra le, su-su.

¹⁵Nzuk ké ƴo ke suk-lah ɓay le, ké lah.

¹⁶Sam nzuk a suŋri mí-i mgba tuh ke gun tukala-ayri le ? Ku eŋ gunri ké kaɓ ndiseŋe ƴo yi̧-yi̧hna. Ku ɗi haniri ɓahri : “Nah ul ti̧w, mí i sa nda nday ya. Nah ɗi siŋ rew hul, mí i sa vba̧ law woiri zaɗ zaɗ ya.”

¹⁸Kaŋaw mí Za̧h gi. Ke lak huru ya, ke nzo yim ya, mí nzukawri ɓahri, eh ɗuk ni.

¹⁹Gun nzuk pirmatul ba, gi. Ke su̧ fe, ke nzo fe le, ku ɓahri, í ko, ke ɓa bahu̧hmi, ke ɓa nzuk-ta yim. Ke mgba ya̧h ziŋ nzuk-mbu̧h lampohri ke nzuk suya a ɓoruri pi. Mí pihna laɓna sa̧w ru̧na Ŋgerzah teh ɓay ketina sa̧w ru̧na ye. »

²⁰Wara mí Zezu tȩhre nzuk puh a a̧yri kú-u ko daɓa fe saŋri ké-e laɓ ɓay fe le, ku sa mbi law woyri ké tul suya ma fal el kan law tul ye ya ɓahri :

²¹« Kúy, gun Izarayelri a woiri ziɓri ké Korazin, ké Beɗsayda, koseh ƴo geŋ wuri ɓay fe le, sa̧wnzuk a ɓoruri ké Tir ke Sidoŋ[49] a lewsa̧ ku ko ra fe saŋri ké ƴo laɓ ké ɓil Korazin ke Beɗsayda le, nzuk Tir-ri ke Sidoŋri-aw ɓay ndoh gar seh, ku ɓay buklu mun woyri ɓil seh hɔrɔ, ku mbí law woyri ké tul tukala ma fal el kan law tul bi.

²²Keni-aw gaŋ kara mi ƴo ɓah ɓayay hi̧ wuri, nam-kuŋ salɓay a luki le, salɓay suya ké ku̧ tul woiri nzuk Korazinri ke nzuk Beɗsaydari ra ɓay kpuh mba salɓay suya ké ku̧ tul nzuk Tir-ri ke Sidoŋri mba-mba.

²³A woiri nzuk Kapernayumri, i ker ɓahri, tul woiri ɓay gaŋ kal tul a ɓoruri si ka̧h nunmbam ley ? Hay. Tul woiri ɓay gɔr malak ma puh Hulri ɓay fe le, nzuk a lewsa̧ri ké Sɔdɔm[50] ko ra fe saŋri ké mi laɓ ké sakra woiri nzuk Kapernayumri le, ku ta ziŋ ɓeɓna ya, mí ku ɓay ƴo ri ka̧h guri-ay.

²⁴Keni-aw gaŋ kara mi ƴo ɓah ɓayay hi̧ wuri ɓahri se, nam-kuŋ salɓay a luki le, salɓay suya ké ku̧ tul woiri nzuk Kapernayumri ɓay kpuh mba salɓay suya ké ku̧ tul nzuk a lewsa̧ri ké Sɔdɔm mba-mba. »

²⁵Sa̧wseh-u bale Zezu el ɓahri : « Baah, a wo ké mu ɓa Gaŋ tul feri gbam ké nunmbam pi, ké tusiɓa pi riŋ ɗina wo mgbe ké nzak bi ɓay fe le, mu mu̧h ru̧na wo ké nun nzuk ru̧nari, ké nun nzuk kerlawri pi. Gunri ba, mu hi̧ ku tu sa̧wu.

²⁶Riŋ ɗina wo mgbe ké nzak bi gaŋ ɓay fe le, baah, mu ko fe laɓna-u su-su ké nun wo.

²⁷Bah bi ndoh feri riw ɓil ndɔk bi. Nzuk mbew ké tu gun tu ta-a, sa ɓa baah mí tu gun ye. Nzuk ké tu baah tu ta-a, sa ɓa gun mí tu ni. Nzukri ké gun ƴo ke law rihna ɓay kú tu baah, mí ku tu ni.

²⁸Í gi wuri ma ta̧w bi, a woiri ké i ta̧h kpu̧y, ké sukna yih kal tul woiri. A bi mi hí̧ wuri í mgba ta̧hma.

²⁹Í gi mbi zuk bi suk ziŋ mi. Í tih wuri si sina ziŋ mi ɓay fe le, law bi voh lɔm, mi ɗiŋ tul, mí i ɓay mgba ta̧hma. Zuk bi ra ɓa fe-ti̧h suk. Sukna bi yih ya tafalaw. »