Read Karang Mbete Matiye 13 Bible Online

Mbete Matiye 13 - Karang bible

Mbete Matiye 13

²mí daɓa nzukri ɓa ŋgi̧-u gi mbu̧h hani mer mer ké ta̧w ye. Kaŋ mí Zezu hil ɓil kumbon ziŋ gel kaɓna. Nzukri-aw gbam ba, ƴo nzak mahmbih.

³Mí ke ɓah lawɓayri ɓa ŋgi̧-u hi̧ niri. Ke ɓahri : « Í lah, nzuk mbew si waka ɓay mi̧h mi̧hri.

⁴Ke ƴo mi̧h mi̧hri bale, mi̧hri a haniri ku̧ mahful, mí gundoyri gi te mi̧hri-u ɔh riw.

⁵Mi̧hri a ɓoruri ku̧ gel ké siɓa ŋgi̧ ri ya ɓay kasaw ké na diŋu bale, fe pay ra ti̧h ɓa gah-u ɓay siɓa ké ŋgi̧ ya.

⁶Seh ɓá zaŋ le, fe pay ra ri̧h mí el ho̧k wɔh ɓay sa̧wu ké ɓar siɓa ya.

⁷Mi̧hri fe pay a haniri ku̧ gel ŋgatukru. Fe pay ra ti̧h. Ŋgatukru kara ti̧h pi, mí ŋgatukru kaŋ tul fe pay ra kiɗik kiɗik fu̧h fe pay ra hi̧ ŋgu̧-ŋgu̧h.

⁸Mi̧hri a ɓoruri ba, ku̧ siɓa a suki. Fe payri ra ti̧h mí leh ɓa suki. Sa̧wu mbew le, leh sɔɗ, a ɓoru leh bon tɔtɔklɔ, a haniri ba, leh bon say.

⁹Nzuk ké ƴo ke suk-lah ɓay le, ké lah. »

¹⁰Nzukri ké dih fal Zezu loh ma ta̧w ye, mí ku ɓahri : « Ɓay fe mú-u ɓah ɓay hi̧ nzukri ke lawɓay le ? »

¹¹Bale Zezu yih nzak woyri ɓahri se : « Ɓay fe le a woiri ra Ŋgerzah ten sa̧wɓay lák mbay a nunmbam ké mú̧-mu̧h hi̧ wuri i lah. Nzuk a kalari ba, sa̧wu mu̧-mu̧h ké ta̧w woyri.

¹²Nzuk a suŋ suŋ ké ƴo ke suk ké lah ɓay le, ke ɓay lah ɓay a mbaŋuri ŋgi̧ wɔrɔk wɔrɔk kal a pol ra ɓáy. Nzuk a a̧y ké ta ke suk-lah ɓay ya le, ɓay a ndi̧ ké-e lah-aw ɓay zi wu̧m.

¹³Sa̧wu mí-i ƴo ɓah ke lawɓay ɓay fe le, nzuk ko ke nun kara na nun ye da̧h. Ke lah ke suk kara na ni ɓa tuku. Ɓayu guh law ye ya.

¹⁴Ké ta̧w woyri le ɓay ké Ezay gun nzak pihna Ŋgerzah ɓah ra mgba tul woyri kȩk. Ke ɓahri, nzukri-ay lah ke suk woyri la-lah, mí ɓayu guh law woyri ya. Ku ko ke nun woyri ko-ko, mí ku ko da̧h.

¹⁵Nzukri-aw, ku hi̧ law woyri kpuh. Ku mbih suk woyri liɓ liɓ rɔkɔ kú lah. Ku u̧m nun si̧h si̧h rɔkɔ kú ko le, law woyri ɓá guh hi̧ ku el gi ta̧w bi ɓay mí gah niri.

¹⁶A woiri ba, pol tehna Ŋgerzah teh tul woiri ɓay fe le, nun woiri ko-ko, suk woiri lah ɓayu lah.

¹⁷Pol tehna ƴo ziŋ wuri gaŋ. Mi ɓahri se, daɓa gun nzak pihna Ŋgerzah a lewsa̧ri ke daɓa nzuk a lewsa̧ri kú-u tu ni ɓa záh woyri, ku taw ɓay ko fe ké i ko-ay, mí nun woyri ko ya. Ku taw ɓay lah ɓay ké i lah-ay, mí suk woyri lah ya.

¹⁸Kaŋaw le í lah sa̧w lawɓay nzuk-mi̧h mi̧hri fe pay ra wara.

¹⁹Nzukri gbam ké lah ɓay lák mbay a nunmbam kú-u hi̧ ɓayu guh law woyri ya ra, záh law a pipiri-u gi lu ɓayu ké law woyri. A woyri ra ku ɓa mahful ké mi̧hri fe pay ku̧ ri.

²⁰Gel ké siɓa ŋgi̧ ya ɓay kasaw ké na diŋu ra ɓa nzukri kú-u lah ɓay Ŋgerzah bale, ku ya̧ ɓayu ɓa gah-u ke law rihna.

²¹Mí ɓayu ɓar sa̧w ya. Kal ɓa kuna. Fe-leh law ziŋ niri mini nzuk laɓ niri koseh ɓay tul ɓay lák mbay Ŋgerzah ra le, ɓayu el ti̧h ɓa ndaw ké nun woyri.

²²Gel ŋgatukru ké mi̧hri ku̧ ri ra ɓa nzukri ké lah ɓay lák mbay Ŋgerzah, mí kerɓay tukala ke kuŋɓay fe ziŋnari ri̧h law woyri. Fe-uri kaŋ tul nzukuri-aw kiɗik kiɗik. Ku hi̧ Ŋgerzah lak mbay tul woyri ya. Ku ŋgu̧-ŋgu̧h, ku le-lehna ya.

²³Siɓa a suki ké mi̧hri fe pay ku̧ ri ra ɓa nzukri ké lah ɓay lák mbay Ŋgerzah, mí ɓayu guh law woyri. Ku hi̧ ɓayu leh lehna kandɔk sa̧w fe pay mbew le, leh sɔɗ, a ɓoru leh bon tɔtɔklɔ, a ɓoru ba, leh bon say. »

²⁴Zezu ɓah lawɓay a ɓoru hi̧ nzukri, ke ɓahri : « Lák mbay a nunmbam na kandɔkay : nzuk a hani mbew si ruh naŋ a suki ɓil waka ye.

²⁵Suŋ sih, nzukri na nam dale, nzukbaa ye gi ruh kɔk naŋ ku̧ ɓilu, mí ke tɔr.

²⁶Naŋ a suki hu̧h, sel, laɓ ti̧hri ba, kɔk naŋ ra sel pi.

²⁷Gun-laɓ pihna yeri ɓá ko kɔk naŋ ra bale, ku si vbi bahgaŋ woyri ɓahri : “Mbay, naŋ a suki mí i ruh ku̧ waka woiri wa, ani mí kɔk naŋ ti̧h ri pi-aw le ?”

²⁸Ke yih nzak woyri ɓahri : “Nzukbaa bi mí laɓ fe-aw.” Gun-laɓ pihna yeri el vbi ni ɓayay : “Mí le, náh lur kɔk naŋ ra ku̧ kpah le ?”

²⁹Bale ke ɓah ɓay kandɔkay : “Í lur aŋay ya rɔkɔ í lur ke naŋ a suki pi.

³⁰Í poŋ naŋ a suki ɓá nze. Few-vbeh naŋ dale, mi ɓáh hi̧ nzuk-vbeh naŋri ɓá vbeh naŋ a suki dale, kú mbu̧h ti̧hri naŋ bi ku̧ ɓil pul. Kɔk naŋ ba, kú nzuh ke hɔrɔ.” »

³¹Ke ɓah lawɓay a ɓoru ɓáy : « Lák mbay a nunmbam na kandɔk mi̧hri fe pay a hani[59] ké nzuk mi̧h ké waka.

³²Mi̧hri ra hu̧h ya kalak kaŋto. Hu̧hna-aw mah ke mi̧hri fe a ɓoruri ya. Gelke fe pay ra ti̧h mí hu̧h dale, laɓ kpuh ké hu̧h mba tul fe pay a ɓoruri gbam. Ndɔkuri vba gbah gbah, mí gundoyri gi laɓ ri vul. »

³³Ke ɓah lawɓay a ɓoru ra ɓáy : « Lák mbay a nunmbam na kandɔk is ké wu̧ynzuk wa̧h ɓil som kilo bon seɗe. Is ra rih ɓil som ya̧h ya̧h mí ur som mbah fe ɓaɗ ɓaɗ. »

³⁴Ɓayawri gbam ké Zezu ɓah hi̧ daɓa nzukri-aw ɓa lawɓay. Lawɓay ta-a le, ke ɓah ya.

³⁵Fe laɓna-aw hi̧ ɓay ké gun nzak pihna Ŋgerzah a lewsa̧ ɓah ra laɓ ƴo gelu. Ɓayu ɓahri, haw ye ah ti̧h ke lawɓay. Sa̧wɓayri ké mu̧h ke sew ké Ŋgerzah laɓ nunmbam ke tusiɓa ke titilu da̧y ra, ke ten na gel a teh-u.

³⁶Wara mí Zezu poŋ daɓa nzukri ra tɔr, mí ke el si rih vul. Dale nzuk-dih fal yeri loh ma ta̧w ye. Ku ɓahri : « Metere, mú ten sa̧w lawɓay kɔk naŋ ra hi̧ na náh lah. »

³⁷Ke yih nzak woyri ɓahri : « Nzuk-ruh mi̧hri naŋ a suki ɓa gun nzuk pirmatul-ay.

³⁸Waka mí ɓa tusiɓa ke nunmbam ké Ŋgerzah laɓ. Mi̧hri naŋ a suki ɓa nzukri ké ɓa gun puh lakna a nunmbamri. Kɔk naŋ ba, ɓa nzukri ké ɓa gun mbay záh tukalari a ye záh law a pipiri-u.

³⁹Nzukbaa ké ruh kɔk naŋ ra ɓa mbay záh tukala. Few-vbeh naŋ ra ɓa ɔ́h nam tukala. Nzuk vbeh naŋri ba, ɓa tem nzak pihna Ŋgerzahri.

⁴⁰Kandɔk kɔk naŋ kú-u nzuh ke hɔrɔ ra, kaŋaw mí ɓa ɔ́h nam tukala.

⁴¹Gun nzuk pirmatul ɓay pih tem nzak pihna yeri. Ku lúr sam ndaw lihnari ké ɓil puh lakna ye gbam ké hi̧ nzukri saŋ Ŋgerzah, ku lúr nzuk-poŋ Ŋgerzahri pi.

⁴²Ku fá̧h fe-awri-aw ke nzukuri-aw gbam vbuk ku̧ ɓil hɔrɔ. Gelu-aw mí ku ɓay vuh rew ke mbihnun darara darara. Ku sú̧ sel woyri ŋger ŋger.

⁴³Wara mí nzukri ké tu Ŋgerzah ɓa záh woyri le, ku ɓay ndu̧y ɓil lák mbay bah woyri kandɔk seh ké ndu̧y kaŋ. Nzuk ké ƴo ke suk-lah ɓay le, ké lah.

⁴⁴Lák mbay a nunmbam na kandɔk fe ziŋna a luki ké mu̧h ké waka. Nzuk ziŋ fe-u. Ke el mbi si mu̧h ma pol. Ɓay law rihna tul fe ziŋna-u, ke si puh mí ke fa̧h fe yeri riw yeh dara mí ke el lari-u si yeh keni waka ké fe ziŋna mu̧h ri ra.

⁴⁵Lák mbay a nunmbam ra ɓáy, lák mbayu na kandɔk nzuk fe yehna ké ƴah zaw lari a ŋgeru.

⁴⁶Ke ziŋ zaw ra mbew bale, ke si puh mí ke fa̧h fe yeri riw yeh dara mí ke el lari-u si yeh keni zaw lari a ŋgeru ra.

⁴⁷Lák mbay a nunmbam ra ɓáy, lák mbayu na kandɔk kȩke ké nzuk sa̧h ɓil mbih. Ke mgba keni nzuyri ɓoɗ ɓoɗ gbam.

⁴⁸Kȩke ra mbah tuɓ tuɓ dale, ke kɔklɔ ti̧h kala. Ke san nzuy a sukiri. Nzuy a suya-uri ba, ke poŋ ku̧ kpah.

⁴⁹Kaŋaw mí ɓa ɔ́h nam tukala. Tem nzak pihna Ŋgerzahri ɓay ti̧h ke gelri gbam ké tusiɓa, ku sán nzukri ké tu Ŋgerzah ɓa záh woyri.

⁵⁰Nzuk a a̧yri kú-u ɓa gun záh law a pipiri-u ba, ku vbúk niri ku̧ ɓil hɔrɔ. Gelu-aw mí ku ɓay vuh rew ke mbihnun darara darara, ku sú̧ sel ŋger ŋger. »

⁵¹Zezu el ɓahri : « Lawɓayri ké mi ɓah riway wa, i la-lah gaŋ le ? » Ku ɓahri : « Nah la-lah. »

⁵²Ke el ɓah hi̧ niri ɓahri : « Sa̧wu mí nzuk a suŋ suŋ gbam ké sɔk ɓay mbete bolkusol Ŋgerzah mí ke tih ke lák mbay ye ra, ke na kandɔk nzuk puh. Fe a ta̧wuri ke fe a foyuri ŋgi̧ ké ta̧w ye, mí ke ten wal hi̧ nzuk kerpuh-uri. »

⁵³Zezu ɔh firma nzukri lawɓay yeri, mí ke loh ma gel a ɓoru.

⁵⁴Ke si ka̧h puh ké-e hu̧h ké ri, mí ke firma nzuk puh yeri ɓay lák mbay Ŋgerzah ké vul misoŋ. Law nzukri na niri ɓa saŋ. Ku ɓahri se : « Sa̧w ru̧na ye ur ke fál suŋ le ? Sa̧w ŋgerna ye ɓa fe le ?

⁵⁵Bah ye ɓa nzuk-ɓar kpuh ya wa ? Mah ye ɓa Mari ya le ? Zak, Zezeɓ[60], Simu, Zuda, ku ɓa yi̧n yeri ya le wo ?

⁵⁶Manah yeri ƴo ziŋ na-ay pi ya le ? Mí-aw ba, sa̧w feri-ay ur ke fál suŋ le ? »

⁵⁷Ɓay Zezu zɔr law woyri. Zezu ba, el ɓahri : « Gelri ɓoɗ ɓoɗ, ku ƴo hȩk gun nzak pihna Ŋgerzah. Sa ɓa nzukri ké puh ye ke yi̧n yeri, mí ku hȩk ni ya. »

⁵⁸Kandɔkaw mí Zezu laɓ fe saŋri ŋgi̧ ya ké puh ye ɓay law woyri ké ta ziŋ ni ya.