Read Karang Mbete Matiye 14 Bible Online

Mbete Matiye 14 - Karang bible

Mbete Matiye 14

¹Ke sewu-aw, riŋ Zezu ya̧ gelri hi̧ ɓayu toh suk mbay Eroɗ dale,

²ke ɓah hi̧ nzuk yeri ɓahri : « Nzuku-aw ɓa Za̧h batisi mí ti̧h ke puh záh. Sa̧wu mí ke ƴo ke ŋgerna-laɓ fe saŋri-aw. »

³Fe ké hi̧ Eroɗ ɓah ɓay tul Za̧h mí na-ay : Eroɗ ya̧ Herodiya wu̧y yi̧n ye Filiɓ ké ƴo ke nun ɓáy, mí Za̧h toŋ ɓah hi̧ ni ɓahri : « Bolkusol Ŋgerzah hah yá̧ wu̧y yi̧n wo ké hu ya ɓáy. » Sa̧wu mí Eroɗ mgba Za̧h ŋga̧h ni si mbih ɓil vul mgbal.

⁵Eroɗ yih ɓay i Za̧h, mí ke laɓ hȩkme nzukri ɓay fe le, ku tu Za̧h ɓa gun nzak pihna Ŋgerzah.

⁶Nam a hani-u mbew dale Eroɗ laɓ yi̧hna nam mbuŋna ye. Gun Herodiya ké ɓa tikla gi nda nday ké pol gahruri, mí ndayu ndɔh nun Eroɗ.

⁷Bale ke hah mun ye gbaɗ gbaɗ, ke nzak ye ke ɓahri se, fe a suŋ suŋ ké tikla-aw vbi ni le, ke ɓay laɓ hi̧ ni.

⁸Tikla ra ya̧ ɓay ké mah ye ɓaŋ ndoh law ye, mí ke el keni si ɓah hi̧ Eroɗ : « Aŋay gaŋ í hi̧ mi tul Za̧h batisi kan ɓil pala. »

⁹Law Eroɗ rih mba. Ɓay tul fe hahna ké-e hah ké pol gahruri, mí ke pih bolnzak hi̧ kú kuŋ tul Za̧h ra gi hi̧ ni.

¹⁰Gun nzak pihna ye si vul mgbal mí hi̧ ku kuŋ tul Za̧h batisi.

¹¹Ku ɓaŋ tul Za̧h kan pala gi keni hi̧ tikla ra. A ye ba, ke ya̧ si hi̧ mah ye.

¹²Nzuk-dih fal Za̧hri si mbi hulu. Ku gɔr, mí ku el si sɔk ɓayu hi̧ Zezu lah.

¹³Ɓay ké Eroɗ ɓah ra ɓá toh suk Zezu[61] bale, ke rih ɓil kumbon, mí ku tɔr si gel a ɓoru ké nzukri ta ri ya. Daɓa nzukri lah ɓay tɔrna ye, mí ku dih doro ye. Ku ur ke bɔk ke puhri ɓoɗ ɓoɗ si ka̧h gelu pol.

¹⁴Ti̧hna ye ke kumbon, ke ko daɓa nzukri ké ŋgi̧ mbamba-aw. Ke ko niri baseh, mí ke gah nzuk sena woyri.

¹⁵Seh na nzȩh bale nzuk-dih fal yeri loh ma ta̧w ye. Ku ɓahri : « Gelay ɓa ɓil suy. Seh ɓay riŋna. Mú sel daɓa nzukri-ay ɓá tɔr si puhri. Kú yeh fe su̧na, kú su̧. »

¹⁶Dale Zezu ɓah hi̧ niri ɓahri : « Uwa, ku tɔ́r ya. A woiri gaŋ, í hi̧ niri fe su̧na, kú su̧. »

¹⁷Mí ku ɓahri : « Nah ta ke fe su̧na ya. Sa ɓa peŋ ndiɓi ke nzuy seɗe mí na-ay. »

¹⁸Mí ke el ɓahri : « Í gi keni hi̧ mi. »

¹⁹Ke hi̧ daɓa nzukri ra mgba hani kaɓ siɓa zuɓ zuɓ. Ke ya̧ peŋ ké ndiɓi ke nzuy ké seɗe ra. Ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra hi̧ nzuk-dih fal yeri wal hi̧ nzukri su̧.

²⁰Nzukri riw su̧ fe mbah ɓil woyri poŋ tɔru. Ku mbu̧h tɔr fe su̧na ra mbah tɔlɔ ɓa boh falu seɗe.

²¹Nzukri ké su̧ fe ra, ku ki̧ ɓa wo̧rori mí laɓ sɔɗ sɔɗ boh gel ndiɓi (5.000) dan ki̧ wu̧yri ke gunri.

²²Ku mbu̧h tɔr fe su̧na dale, Zezu hi̧ bolnzak hi̧ nzuk-dih fal yeri, kú rih ɓil kumbon, kú tɔr pol ma kala mbih sa̧. A ye ba, ke toŋ fal ƴo vbar nzukri ɓá tɔr.

²³Bale ke hil si tul kasaw ƴo ɓah ɓay ziŋ Ŋgerzah. Seh riŋ ni gelaw, ke toŋ ke hȩk ye.

²⁴Nzuk-dih fal yeri ba, si ke kumbon ɓa ɗih-u ka̧h haŋsekle mahmbih. Ɓay kú ka̧h kala mbih sa̧ se-se ɓay baw kuna ké ku. Kuna nzɔh nun woyri mí fa̧h mbih vba̧ kumbon gbɔksɔ gbɔksɔ hah niri sina.

²⁵Tipele toŋ ɗih ya, mí Zezu si sina tul mbih ma ta̧w woyri.

²⁶Nzuk-dih fal yeri ɓá ko ni ké-e si sina tul mbih dale, tul woyri fa̧h zikiki zikiki. Ku ɓahri se, záh mbih munu. Ku vba̧ nzak kululu kululu ke hȩkme dale,

²⁷Zezu ɓah hi̧ niri ɓahri : « Í su̧h law. A bi munu. Í laɓ hȩkme ya. »

²⁸Piyer ba, ɓahri : « Ŋgernzuk, ɓa a wo gaŋ le, mú hi̧ mi, mí si tul mbih, mí ka̧h ta̧w wo. »

²⁹Bale ke ɓahri : « Mú gi. » Mí Piyer ɗer ke ɓil kumbon. Ke si sina tul mbih ma ta̧w Zezu.

³⁰Piyer ɓá ko kuna ké ku tul mbih le, hȩkme laɓ ni, mí ke ƴo riŋ mbih. Ke el vba̧ nzak ɓeleŋ : « Ŋgernzuk. Mú ya̧ mi. »

³¹Ke gah-u mí Zezu ndar ndɔk mgba ni. Ke el ɓah hi̧ Piyer : « Ani mí law wo kehr seɗe le ? Law wo yo-yok tul bi. »

³²Ku hil kaɓ ɓil kumbon, mí kuna tuk.

³³Bale nzukri ké kaɓ ɓil kumbonaw ra huk pol ye ɓahri : « Ketina, mu ɓa gun Ŋgerzah gaŋ. »

³⁴Ku ka̧h kala mbih ké tusiɓa Genesareɗ.

³⁵Nzuk Genesareɗri ɓá ko ni ɓa a ye Zezu bale, ku pih nzak pihna si puhri gbam ké ɗoŋ niri. Mí nzukri fa̧h sena woyri gbam gim keni ma ta̧w ye.

³⁶A ge ge le ɗi ni ɓay ké hi̧ nzuk sena ɓá za nzak gar ye. Nzuk sena a suŋ suŋ ké za nzak gar ye le, ti̧h ke ndɔk hul.