Read Karang Mbete Matiye 15 Bible Online

Mbete Matiye 15 - Karang bible

Mbete Matiye 15

¹Wara mí nzuk-sɔk mbete bolkusol Ŋgerzahri ke fariziri ur ke Zurusalem gi ta̧w Zezu. Ku ɓah ɓayay hi̧ ni :

²« Ɓay fe mí nzuk-dih fal wori zo tul fe laɓna sa̧w ziihri le ? Ku toŋ su̧ fe dan wɔ́k ndɔk woyri hi̧ ku teh ya. Lú suya dara kú su̧ fe ɓáy ra, ɓayu ko niri ya ley ? »

³Zezu ba, ɓah hi̧ niri ɓahri : « Ɓay fe mí a woiri i zo tul ɓay Ŋgerzah ɓay kaɓ tul sa̧w fe woiri le ?

⁴Bolkusol Ŋgerzah ɓahri : “Mú hȩk bah wo ke mah wo. Nzuk ɓah ɓay a suya-u ziŋ bah ye mini mah ye le, kú i ni.”

⁵Mí a woiri i el ɓahri, gun ta hȩk nzuk-mbuŋ ni ya, gelke gun ɓah hi̧ bah ye mini mah ye ɓahri : “Fe ziŋna-ay ké mi ɓay so wuri keni ra, mi mbi hi̧ Ŋgerzah da.” A woiri i mbi bolkusol Ŋgerzah sɔɓ ɓa fe a kɔku ɓay tul fe sa̧w woiri.

⁷Nzuk-mu̧h ketinari, ɓay ké Ŋgerzah ndoh ké nzak Ezay gun nzak pihna ye lewsa̧ mgba tul woiri ɓa ketina :

⁸“Gun Izarayelri-ay, ku hȩk mi ke nzak, law woyri le ɗi-ɗih ziŋ mi. Ku dim mi gɔr. Fe firma kú-u firma nzukri le ɓa kerɓay nzuk pirmatulri.” »

¹⁰Mí Zezu ɗi daɓa nzukri gi ta̧w ye, ke ɓah hi̧ niri ɓahri : « Í lah ɓayay ɓa teh-u, í hi̧ ɓayu ɓá guh law woiri.

¹¹Fe ké nzuk su̧ si rih ɓil ye ta sih law nzuku ké nun Ŋgerzah ya. Wara le ɓay ké nzuk ɓah ke nzak ye mí hi̧ Ŋgerzah ko ni ɓa fe a kala. »

¹²Wara mí nzuk-dih fal Zezuri loh ma ta̧w ye ɓahri : « Mu tu-tu gaŋ le ? Ɓay ké mu ɓah-aw ra mí hi̧ fariziri mgba mu ɓa kɔkɔ. »

¹³Bale ke ɓahri : « Kpuhri gbam ké bah bi ké nunmbam ma̧ ya le, ke ɓay lur ku̧ kpah.

¹⁴Í poŋ niri ma sa̧. Nzuk-sɔk ful Ŋgerzah hi̧ nzuk a ɓoruri-aw, ku ɓa ra̧w. Ra̧w mgba ka̧w ra̧w mbaŋ ye le, seɗe mbɔk woyri ku lih ku̧ ɓil lɔkɔ. »

¹⁵Bale Piyer ɓahri : « Mú ten sa̧w lawɓay ké mu ɓah ra hi̧ na, náh lah. »

¹⁶Mí ke ɓahri : « Ka̧h aŋay, a woiri gaŋ kara guh law woiri ya pi le ?

¹⁷I tu ya lo ? Fe su̧na a suŋ suŋ gbam ké nzuk su̧ kal rih ɓil ye mí el ti̧h ɓa vbi̧ri ku̧ kpah.

¹⁸Ɓay ké ti̧h ke nzak nzuk ba, sa̧wu ur ke law nzuk. Kaŋ mí suya ké nzuk ɓah mí hi̧ Ŋgerzah ko nzuku ɓa fe a kala.

¹⁹Sa̧w kerɓay a pipiri-uri ti̧h ke ɓil law kandɔk í nzuk, mbí wu̧y wo̧ro, láɓ nunpuki, ríh riɓa, kúŋ ɓay ku̧ nzak nzuk, ɓáh suya ke riŋ nzuk.

²⁰Feri-aw mí hi̧ Ŋgerzah ko nzuk ɓa fe a kala. Ta ɓa sú̧ fe dan wɔk ndɔk mí hi̧ law nzuk sih ké nun Ŋgerzah ya. »

²¹Zezu ur tɔr ma fál Tir ke Sidoŋ ké tusiɓa Kana[62].

²²Mí í ko wu̧y tusiɓa-aw gi ta̧w Zezu. Ke vba̧ nzak ɓeleŋ ɓeleŋ ɓahri : « Gaŋ a luki, gun zih Daviɗ, kɔkrɔya, mú mgba in ziŋ mi ge. Gun bi a wu̧yu mí záh ƴo laɓ ni mɔr mɔr. »

²³Zezu fer ɓay ya. Nzuk-dih fal yeri ba, loh ma ta̧w ye, a ge ge le, gi ke kerɓay ye kerɓay ye ɓahri : « Mú ni̧h wu̧yay ɓá tɔr ɓay fe le, ke toŋ vba̧ nzak tul wah. »

²⁴Bale Zezu ɓahri : « Nzuk-pih mi pih mi si ta̧w sa̧wnzuk a ɓoruri ya. Ke pih mi si ta̧w sa̧w bi gun Izarayelri kú-u ɓa samiri ké zi-zi. »

²⁵Wu̧y ra loh ma ta̧w Zezu, mí ke huk siɓa ɓahri : « Gaŋ a luki, í ya̧ ta̧hna bi ge. »

²⁶Zezu ba, ɓahri : « Mbí fe su̧na gunri vbu siɓa hi̧ gun gayri suya. »

²⁷Bale wu̧y ra ɓahri : « Gaŋ a luki ɓah ketina ɓayu ké gun gayri dam bukma fe su̧na ké ga̧y ku̧ siɓa ké gel fe su̧na gaŋ woyri. »

²⁸Wara mí Zezu yih nzak ye ɓahri : « Wu̧y, soko wo. Law wo ké te sa tul bi ŋgi̧ mbamba. Fe-u ɓá laɓ kandɔk ké mu yih. » Kaŋ mí záh ra ti̧h poŋ gun wu̧y ra hi̧ ke tu mun ye ke sa̧wseh-u-aw.

²⁹Zezu poŋ tusiɓa ra si ke ɓel mahmbih Galile. Ke hil tul kasaw, mí ke kaɓ siɓa.

³⁰Daɓa nzukri ɓa ŋgi̧-u fa̧h senari gi keni ma ta̧w ye. Ku gi ke kpereri, ra̧wri, nzukri ké ndɔk woyri hu yɔh, mbikiri, sam senari ɓoɗ ɓoɗ ɓa ŋgi̧-u kara ku gi keni ku̧ pol Zezu. Mí ke gah niri.

³¹Daɓa nzukri-aw ko mbikiri ɓah ɓay pi, lah ɓay pi, kpereri si sina, nzukri ké ndɔk hu yɔhri el kpuh kpaŋ, ra̧wri ko gel. Fe-u na niri ɓa saŋ, mí ku loŋ riŋ Ŋgerzah záh gun Izarayelri.

³²Zezu ɗi nzuk-dih fal yeri gi bale, ke ɓahri : « Law bi sa̧h mi ɓay tul daɓa nzukri-ay ɓay fe le, laɓ nam say wara kú-u ƴo ziŋ mi dan sú̧ fe. Mi sa hi̧ niri kú tɔr ɓil ɗaka ya rɔkɔ kú lih ɗaka ké ful. »

³³Mí nzuk-dih fal yeri ɓahri : « Gelay ɓa ɓil suy. Ké fál suŋ mí nah ɓay ziŋ peŋ ké ɓay mah gel ɗaka nzukri-ay le ? »

³⁴Mí Zezu ɓahri : « Peŋ ka̧h ani mí na ta̧w woiri le ? » Bale ku ɓahri : « Peŋ ɓa toŋndɔk say ke nzuy ndi̧. »

³⁵Zezu hi̧ nzukri kaɓ siɓa.

³⁶Ke ya̧ peŋ ké toŋndɔk say ke nzuy ra. Ke el ke tumbɔl hi̧ Ŋgerzah, ke haw, mí ke hi̧ nzuk-dih fal yeri wal hi̧ daɓa nzukri ra.

³⁷Nzukri gbam su̧ peŋ ra mbah ɓil woyri. Tɔr fe su̧na toŋ, mí ku mbu̧h mbah tɔlɔ a baw baw ɓa toŋndɔk say.

³⁸Tul wo̧rori ké su̧ peŋ ra ɓa sɔɗ sɔɗ boh gel niŋ (4.000) dan ki̧ wu̧yri ke gunri.

³⁹Zezu poŋ daɓa nzukri ra tɔr ba, mí ke rih kaɓ ɓil kumbon. Ku tɔr si fál kɔr Magadan.