Read Karang Mbete Matiye 16 Bible Online

Mbete Matiye 16 - Karang bible

Mbete Matiye 16

¹Fariziri ke sadusiri gi ta̧w Zezu. Ku fah ni, ku vbi ni ɓay ké laɓ fe saŋ ké sɔk ɓahri, sa̧w ŋgerna ye ur ke nunmbam hi̧ niri kú ko.

²Zezu ba, ɓah hi̧ niri ɓahri : « [Gel ɓa bɔklew mí seh na nzȩh[63] le, i ƴo ɓahri, pele le gel ɓay teh ɓa suki.

³Gel tipele, i ko ɗikmambam a si̧h-u ke a piri-u zukru hani hi̧ gel na gbukru le, i ɓahri, guri-ay, mbam ɓay to-u. Fe ké ti̧h nun woiri ké nunmbam, i ko-ko ra wa, ani mí sa̧w feri ké sɔk ɓahri, Ŋgermbay ti̧h tul woiri da ra ma, mí i tu ya le wo ?][64]

⁴Gun tukala-ayri, ku poŋ Ŋgerzah, ku ti̧h kala si mbi záh a ɓoru. Ku nzah ɓay ko fe saŋ. Mí fe saŋ le ku ɓay ko ya. Sa ɓa fe saŋ a a̧y ké laɓ Zonas[65] gun nzak pihna Ŋgerzah a lewsa̧ kú-u ko-aw. » Mí ke sɔɓ fal hi̧ niri, ke tɔr ma kala mbih.

⁵Tɔrna woyri-aw, nzuk-dih fal yeri yȩkre peŋ.

⁶Mí Zezu ɓah hi̧ niri ɓahri : « Í ko-ko, í ru̧ ke mun woiri ɓay is fariziri ke ɓay is sadusiri. »

⁷Bale ku fah ɓay ké haŋsekle woyri ɓahri : « Ɓay tul peŋ ké nah fa̧h ya mí ke ɓah ɓayaw. »

⁸Zezu tu kerɓay woyri bale, ke ɓahri : « Ani mí i ƴo fah ɓay ke haniri le ? A woiri nzukri ké law woiri kehr seɗe, i ƴo ɓahri, ɓay peŋ ké i fa̧h ya ɓayu mí-i ɓah ɓay is fariziri ke sadusiri-aw le ?

⁹I tu ya ɓáy lo ? Law woiri ker ɓay ya le wo ? Peŋ ndiɓi ké nzukri sɔɗ sɔɗ boh gel ndiɓi (5.000) su̧ ra wa, i fa̧h tɔru mbah tɔlɔ ka̧h ani le ?

¹⁰Peŋ toŋndɔk say ké nzukri sɔɗ sɔɗ boh gel niŋ (4.000) su̧ ra ba wa, i fa̧h tɔru mbah tɔlɔ ka̧h ani le ?

¹¹Ani mí i tu ya le ? Mi ɓah ɓay peŋ a su̧ ma ɓil ya. Mi ɓahri se, í ru̧ ke mun woiri ɓay tul is fariziri ke sadusiri. »

¹²Wara mí law woyri guh. Ta ɓa ɓay is a tɔ́k peŋ mí Zezu ɓah ɓayu ya. Wara le ke ɓah ɓay fe firma ké fariziri ke sadusiri firma nzukri.

¹³Ku ka̧h fál kɔr Sezareh-Filiɓ bale, Zezu nzah nzak nzuk-dih fal yeri ɓahri, a ye gun nzuk pirmatul ra wa, nzukri ɗi ni ɓa sam nzuk a suŋ le ?

¹⁴Ku ɓahri, nzukri ɗi ni ɓa Za̧h batisi, nzuk a ɓoruri ba, ɗi ni ɓa gun nzak pihna Ŋgerzah a lewsa̧ kandɔk Eli mini Zeremi mini gun nzak pihna Ŋgerzah a hani ɓáy ké ti̧h ke puh záh.

¹⁵Zezu el ɓahri se : « A woiri ba, i ɗi gun nzuk pirmatul ɓa sam nzuk a suŋ le ? »

¹⁶Bale Simu Piyer yih nzak ye ɓahri : « A wo mú-u ɓa Ŋgermbay a ye gun Ŋgerzah ké ɓa Ŋgɔhnzuk. »

¹⁷Zezu ba, ɓahri : « Simu, gun Zonas, pol tehna Ŋgerzah teh tul wo ɓay fe le, ta ɓa nzuk pirmatul mí ten sa̧wɓayay hi̧ mu ya. Wara le ɓa bah bi ké nunmbam mí hi̧ mu tu.

¹⁸A bi le mi ƴo ɓah hi̧ mu ɓahri se, a wo ra, mi tu mu ɓa gun kasaw[66]. Mí ké tul kasaw a bawu-ay[67] mi ɓay mboh ri vul bi. Vulu ɓa nzukri kú-u ɓa sa̧w in bi. Tuhru nzak vul Hul ta mbih in biri ɓa mgbal ya.

¹⁹Mí mi hí̧ mu lakele nzak vul ké rih ɓil lák mbay a nzuk nunmbam. Ɓay a suŋ ké mu ŋga̧h ké tusiɓa, ɓa ɓay ké ŋga̧-ŋga̧h ké nunmbam. Ɓay a a̧y ké mu sel ké tusiɓa, ɓa ɓay ké se-sel ké nunmbam. »

²⁰Wara mí Zezu ɓah ɓa teh-u hi̧ niri ɓahri, kú ɓah ɓay riŋ ɗina Ŋgermbay ye ra hi̧ nzuk ya.

²¹Ur ke sa̧wseh-u-aw dale, Zezu titil sɔk ɓa teh-u hi̧ nzuk-dih fal yeri ɓahri se, na ani ani gaŋ kara a ye ke sí Zurusalem, ke kó seh ké ndɔk ŋgernzuk puh woyri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri, ke hú hul. Nam a sayu le, ke tí̧h ke puh záh ke pa̧ymun a foyu.

²²Piyer ba, ten Zezu bale, ke hah Zezu ɓahri : « Gaŋ wah, Ŋgerzah ɓá kɔr mu rɔkɔ fe-u ɓá ti̧h tul wo. »

²³Zezu sɔɓ fal hi̧ Piyer, mí ke ɓahri : « Mbay záh tukala a wo nzukbaa, mú el ké ta̧w bi ma fal. Mu ɓa gburka ɓay nde mi ɓay fe le, law wo mbi kerɓay Ŋgerzah ya, wara le ɓa kerɓay nzukri. »

²⁴Wara mí Zezu el ɓah hi̧ nzuk-dih fal yeri ɓahri : « Nzuk yih dih fal bi le, ké poŋ kerɓay tul ye ma fal, ké mbi kpuh vbatay hul ye, ké suk, ké dih keni fal bi,

²⁵ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi le, ke ɓay ziŋ ɔkna.

²⁶Fe ziŋna fe mí ɓay ti̧h suk hi̧ nzuk a a̧y ké su̧ tukala hu̧m hu̧m mí ɔ́h ɓay ye ɓa kɔk fe le ? Uwa. Fe ziŋna fe mí nzuku ɓay mbi soh keni tul ye le wo ?

²⁷Ɓayu ké nam toŋ ŋgi̧ mba ɓay gun nzuk pirmatul ɓá gi ke tem nzak pihna yeri ɓil riŋ ɗina bah ye. Ur ke seh-u-aw ke ɓay el hi̧ nzuk mbew mbew gbam kpaŋndɔk pihna ye pihna ye[68].

²⁸Ɓa ketina, mí-i ƴo ɓah hi̧ wuri ɓahri, nzuk a haniri ké sakra wah-ay, hul ta ɗi riŋ woyri ya ɓáy, mí ku kó gina gun nzuk pirmatul ɓil lák mbay ye ke nun woyri. »