Read Karang Mbete Matiye 17 Bible Online

Mbete Matiye 17 - Karang bible

Mbete Matiye 17

¹Falu laɓ nam tɔtɔklɔ, mí Zezu fa̧h Piyer, Zak ke toŋnafal ye Za̧h. Ku laɓ niŋ. Ku hil kasaw ké gaŋ zeŋleŋleŋ ke hȩk woyri.

²Ké nun Piyer-ri mí mun Zezu sɔɓ na ɓoɗ. Nun ye ndu̧y kandɔk ndu̧yna seh. Gar ye ba, su nda̧w nda̧w kandɔk hɔrɔ-teh gel.

³Mí í ko. Moyiz ke Eli gun nzak pihna Ŋgerzah a lewsa̧ri ti̧h nun woyri gi ziŋ Zezu. Ku ƴo lu mberem ziŋ ni.

⁴Piyer ba, ɓah hi̧ Zezu ɓahri : « Ŋgernzuk, gel ké nah ƴo ri-ay su-su. Mu hi̧ na náh pɔr vulri ɓa say. A mbew ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. »

⁵Piyer ƴo ɓah ɓay kɔɓ ɓáy, í ko, ɗikmambam[69] ndu̧y ɓa puki gi guɓ tul woyri gbukru bale, kusol ti̧h ke ɓilu ɓahri : « A ye-ay, ke ɓa gun sana bi. Ke rih law bi mbamba. Í lah nzak ye. »

⁶Nzuk-dih fal yeri ɓá lah kusol ké mgbe ra le, ku lih gba̧y guɓ siɓa. Tem mun woyri ti̧h kereŋ.

⁷Zezu ba, loh ma ta̧w woyri. Ke za mun woyri, mí ke ɓahri : « Í ur síɓa, í laɓ hȩkme ya. »

⁸Ku ɔr nun woyri bale, ku ko nzuku ya. Sa ɓa Zezu ke hȩk ye mí toŋ.

⁹Ɗerna woyri ke tul kasaw ra, Zezu hah niri ɓáh ɓayu. Ke ɓahri se : « Í ɓah ɓay feri ké ti̧h nun woiri-aw hi̧ nzuk ɓá lah ya. Gun nzuk pirmatul ɓá ti̧h ke puh záh ke pa̧ymun a foyu dara í ɓah ɓayu ɓáy. »

¹⁰Mí nzuk-dih fal yeri ké sayaw vbi ni ɓahri : « Mí-aw ba, ɓay fe mí nzuk-sɔk mbete bolkusol Ŋgerzahri ɓahri, Eli a lewsa̧ ɓay gi pol dara Ŋgermbay ɓay gi ɓáy ra le ? »

¹¹Ke yih nzak woyri ɓahri : « Eli ɓay gi-gi gaŋ ɓay ké lek gel ɓá ƴo gelu hi̧ Ŋgermbay[70].

¹²Mi ƴo ɓah hi̧ wuri ɓahri, Eli gi da, mí ku tu ni ya. Wara le ku laɓ ni kandɔk kú-u yih. Gun nzuk pirmatul ɓay ko seh ké ndɔk nzukri-aw kaŋ pi. »

¹³Wara mí nzuk-dih fal yeri tu ɓahri, Zezu ɓah ɓay tul Za̧h batisi.

¹⁴Ku si ka̧h ta̧w daɓa nzukri bale, nzuk mbew ti̧h ké sakra woyri gi huk siɓa ké pol Zezu ɓahri : « Ŋgernzuk, mú mgba in ziŋ gun bi-ay ɓay fe le, sena kuku ƴo laɓ ni mo̧r mo̧r. Kpatara sena ra ƴo mgba ni ndih ni ɓu hɔrɔ ya le, ndih ni ɓu mbih.

¹⁶Mi maŋ ni si keni ta̧w nzuk-dih fal wori, mí ŋgerna woyri mah gah ni ya. »

¹⁷Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, nzuk pirmatulri ké kerɓay woiri ra̧-ra̧h, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Í gi ke gun ra hi̧ mi. »

¹⁸Zezu hah záh ra hi̧ záh ti̧h poŋ gun ra, mí ke ziŋ mun gahna ɓa suki.

¹⁹Wara mí nzuk-dih fal Zezuri loh ma ta̧w ye. Ku ɓah hi̧ ni ɓahri : « Ɓay fe mí ŋgerna wah mah ni̧h záh ra ya le ? »

²⁰Bale Zezu ɓah hi̧ niri : « Ɓay tul kanlaw woiri ké kehr seɗe. Ɓa ketina, mí-i ƴo ɓah hi̧ wuri ɓahri, law woiri ƴo mbew ke law Ŋgerzah mí eŋ ti̧hri ŋgahla le[71], i ɓay ɓah hi̧ baw kasaw ké na-aw ɓahri, kasaw ɓá loh ke gelaw si na sa̧ le, baw kasaw ra ɓay loh-u gaŋ ba. Ɓay tul law woiri ké ƴo mbew ke law Ŋgerzah mí fe mbew ké ɓay mba wuri ta-a. »

²²Zezu ke nzuk-dih fal yeri si mbu̧h hani ké Galile bale, ke ɓah ɓay hi̧ niri ra ɓáy ɓahri, zah le, ku ɓay ndoh ni ye gun nzuk pirmatul ndɔk nzukri.

²³Ku í ni. Nam a sayu dale, ke ɓay ti̧h ke puh záhri ke pa̧ymun a foyu. Mí ɓayu hi̧ law nzuk-dih fal yeri sa̧-sa̧h.

²⁴Ku ka̧h Kapernayum bale, nzuk-mbu̧h lampoh ɓay vul kani Ŋgerzahri[73] gi ta̧w Piyer, mí ku ɓahri : « Metere woiri ra ta puh lampoh vul kani Ŋgerzah ya le ? »

²⁵Ke ɓahri, ke pu-puh. Piyer ɓá rih ɓil vul bale, Zezu kuŋ ni ɓahri : « Piyer, mu ker ani le ? Mbay tusiɓari ya̧ lampoh ké ta̧w gun puh woyri mini ké ta̧w nzuk a kalari le ? »

²⁶Ke ɓahri : « Ké ta̧w nzuk a kalari. » Bale Zezu ɓahri : « Kandɔkaw gaŋ dale, ɓay lampoh yiŋ tul gun puh-uri ya.

²⁷Mí ɓayu ɓá ti̧h ɓa ndaw lihna hi̧ nzukri-aw ya le, mú si ɓu ɓoy. Nzuy ké mu mgba ra, mú ɗah haw ye. Mu zíŋ ri lari, mú si puh keni lampoh tul wah ke hani. »