Read Karang Mbete Matiye 18 Bible Online

Mbete Matiye 18 - Karang bible

Mbete Matiye 18

¹Ke sa̧wseh-u-aw nzuk-dih fal yeri loh gi ta̧w ye ɓahri : « Mí kaŋaw ba, a ge gaŋ mí ɓa ŋgernzuk ké puh lakna a nunmbam le ? »

²Zezu ɗi gun a lele gi ƴo haŋsekle woyri.

³Mí ke ɓahri : « Í ko gunay. Mi ƴo ɓah ɓayay hi̧ wuri. Gelke i sɔɓ kerɓay woiri ya, i el hi̧ law woiri na kandɔk law gun a lele-ay ya dale, i ta rih ɓil lák mbay a nzuk nunmbam ya.

⁴Kaŋaw mí nzuk a suŋ suŋ ké tu mun ye ɓa ko̧hko eŋ gun a kandɔkay le, nzuk ra mí ɓa ŋgernzuk a luki ké ɓil lák mbay a nunmbam.

⁵Gelke nzuk mgba gun a kandɔkayri ma law ye ɓay tul riŋ bi le, a bi mí ke mgba mi-aw.

⁶Mí nzuk a a̧y ké hɔl ndaw lihna le, ŋgá̧h baw kasaw ké sol ye mbi ni vbu ɓil mahmbih mí su, koseh ye-aw su mba poŋ ni ké mgba gun a mah gelu ké kan law tul bi ɓá saŋ riŋ bi.

⁷Ɓeɓna ɓa a tukala ɓay hɔlna ndaw lihna nzukri, ɓayu ké ndaw lihnari ta ɔh ké tukala ya. Keni-aw kara koseh ɓa a nzuk ké hɔl ndaw lihna-u.

⁸Ɓa ra ndɔk wo mini ɓa ra bɔk wo mí ɓa ndaw lihna hi̧ mu saŋ riŋ bi le, mú kuŋ vbu kpah. Hú ɓa kpere si kaɓ ke ɔkna su mba hú ke ndɔk seɗe mini ke bɔk seɗe si kaɓ ɓil hɔrɔ ké na sew ke sew ɓa ŋgɔh.

⁹Ɓa ra nun wo mí ƴo hi̧ mu lih ɓil ndaw le, mú lur ku̧ kpah[74]. Hú ɓa ra̧w si kaɓ ke ɔkna su mba hú ke nun wo seɗe mbɔk si kaɓ ɓil hɔrɔ ké ri-rimna ya.

¹⁰Ko-ko ɓay í mgba gun a mah gelu ɓa kɔk fe. Mi ƴo ɓah hi̧ wuri ɓahri se, gun a suŋ suŋ le ƴo ke tem nzak pihna ké ko tul ye ko tul ye, mí tem nzak pihna gunu ƴo ke riŋu riŋu ké pol bah bi ké nunmbam.

¹²I ker ani le ? Gelke nzuk mbew ƴo ke sami ɓa sɔɗ, mí mbew zi le, ke ɓay poŋ sami a bon toŋndɔk mbew falu toŋndɔk mbew (99) ké gel-ƴah lakna, ke él si ƴah sami ké zi ra, kaŋ ya le ?

¹³Ke ziŋ sami ra dale, mun rihna ƴo ri. Mun rihna ƴo ri gaŋ, mi ƴo ɓah hi̧ wuri ɓahri se, mun rihna tul sami a mbewu-aw ɓay kal mun rihna tul sami ké bon toŋndɔk mbew falu toŋndɔk mbew (99) ké zi ya ra ka-kal.

¹⁴Kaŋ pi mí bah woiri ké nunmbam sa ɓay hi̧ gun mbew ké sakra gun a mah geluri ɓá zi ya.

¹⁵Gelke nzuk-si misoŋ ziŋ mu laɓ suya[76] dale, mú si ziŋ ni, tul woiri seɗe yaŋ. Í kaɓ, mú ndar lakna ɓay ye. Ke lah ɓay wo le, mu ziŋ yi̧n wo da.

¹⁶Mí ke sa lah ya le, mú si ta̧w ye ɓah ɓay ra ɓáy mí mu hi̧ nzuk-si misoŋ mbew mini seɗe ɓá si ziŋ mu pi ɓay hi̧ nzak nzukri seɗe ya le, say ɓá te-teh ɓay ké i ɓah hi̧ ɔh tɔr ɓayu ɓá ƴo gelu.

¹⁷Ke sa lah ya bale, í si ke ɓay ra ké gel-goŋ Ŋgerzah sa̧w nzuk Ŋgerzahri. Mí ke sa lah niri ya pi le, mú ko ni ɓa sa̧w nzuk a ɓoru ya le, ɓa nzuk-te sa̧w ye[77].

¹⁸Ɓa ketina gaŋ, mi ƴo ɓah ɓayay hi̧ wuri, ɓay a suŋ ké i ŋga̧h ké tusiɓa, ɓa ɓay ké ŋga̧-ŋga̧h ké nunmbam. Ɓay a a̧y ké i sel ké tul nzuk ké tusiɓa, ɓa ɓay ké se-sel ké nunmbam.

¹⁹Mi ɓahri se, gelke sa̧w nzuk Ŋgerzahri mbu̧h hani ɓay vbi ɓay a suŋ suŋ ké ta̧w Ŋgerzah, mí ké sakra woiri ra nzukri seɗe ziŋ ɓay ké law woyri si mbew ké tusiɓa-ay le, bah bi ké nunmbam ɓay hi̧ ɓay ra ti̧h hi̧ sa̧w nzuk yeri,

²⁰ɓayu ké nzukri seɗe mini say ké sakra woiri ké gel-goŋ Ŋgerzah ra ɓay woyri mbu̧h mbew gi ke riŋ bi ma law woyri, sa gelu-aw mí mi ƴo haŋsekle woyri. »

²¹Wara mí Piyer loh ma ta̧w Zezu, mí ke ɓahri : « Gaŋ wah, bɔk ka̧h ani mí-i sél yi̧n bi ké laɓ mi suya le ? Bɔk toŋndɔk say le ? »

²²Zezu ɓahri : « Bɔk toŋndɔk say ya. Wara le bon toŋndɔk say gel toŋndɔk say.

²³Sa̧wu mí fe laɓna lák mbay a nunmbam na kandɔk fe laɓna mbay a hani mbew. Mbay ra yih ɓay sor mbɔl ye ké tul gun-laɓ pihna yeri.

²⁴Nam ké-e ti sor mbɔluri bale, ku maŋ nzuk a hani ké mbɔl mbay ra na tul ye gi pol mbay. Mbɔlu ɓa talaŋ sɔɗ sɔɗ boh gel sɔɗ sɔɗ boh (1.000.000)[78].

²⁵Puh mbɔlu mba ni mba-mba dale, mbay hi̧ kú mgba ni ke wu̧y ye ke gun yeri gbam si yeh, kú fa̧h fe yeri gbam si yeh pi ɓay puh mbɔl ra ke lari-u.

²⁶Bale gun-laɓ pihna ra lih huk siɓa ké pol mbay. Ke ɓahri : “Gaŋ bi, í ik law woiri ge. Mi ɓay puh mbɔl woiri ra riw gaŋ.”

²⁷Law bahgaŋ ye sa̧h ké tul gun-laɓ pihna ye-aw, mí ke sel gun-laɓ pihna ra, ke el lu mbɔl ké tul ye.

²⁸Gun-laɓ pihna ra ti̧h bale, ke ti̧h tul bɔh pihna ye a hani. Mbɔl ye ndi̧ na tul ya̧h-u ra. Ke fu̧h sol ye veɗe ɓahri : “Mú puh mbɔl bi ra.”

²⁹Mí ya̧h ye ra huk pol ye. Ke vbi ni law vohna ɓahri : “Ya̧h, mú ik law wo ge. Mi ɓay puh mu mbɔl wo ra ɓáy.”

³⁰Mí ke sa-a. Ke sek ni hi̧ ku mgba ni vbu vul mgbal, ké kaɓ ri kpu̧ru si ka̧h nam ké-e puh mbɔlu ɔh riw.

³¹Bɔh pihna ye a ɓoruri ko fe ké kal ra, mí kerɓay ziŋ niri bale, ku si ki̧ fal ɓay fe laɓna yeri hi̧ bahgaŋ woyri lah ke bamu bamu gbam.

³²Wara mí bahgaŋ ye pih si ɗi ni gi. Ke ɓah hi̧ ni ɓahri : “A wo-ay, mu ɓa gun-laɓ pihna law a pipiri-u. Mi lu mbɔl bi ké tul wo ɗeɗ kandɔk ké mu vuh ké pol bi.

³³A wo kara mú mah mgba in ziŋ mbaŋ wo kandɔk a bi ké mi mgba in ziŋ mu kaŋ pi ya le ?”

³⁴Law mbay fa̧h ni, mí ke mgba ni ndoh ndɔk nzuk-laɓ nzukri koseh, kú laɓ ni koseh kpu̧ru ka̧h nam ké-e puh mbɔlu ɔh.

³⁵Kandɔkaw mí gelke a woiri mbew mbew gbam i sa sel yi̧n woiri ya le, bah bi ké nunmbam ɓay laɓ kandɔk mbay ra ziŋ wuri pi. »