Read Karang Mbete Matiye 19 Bible Online

Mbete Matiye 19 - Karang bible

Mbete Matiye 19

¹Kandɔkaw mí Zezu ɓah ɓayri-aw ɔh dale, ke poŋ tusiɓa Galile mí si tusiɓa Zude ké na fál kala mbih Zurdeŋ.

²Daɓa nzukri ɓa ŋgi̧-u si fal ye, mí ke gah nzuk senari ké ri.

³Fariziri ba, gi ndoh law ye ke ɓay. Ku ɓahri : « Bolkusol Ŋgerzah hi̧ nzuk ful ni̧h wu̧y ye ɓay tul ɓay a suŋ suŋ le ? »

⁴Zezu ba, ɓahri : « Ke titilu da̧y ké Ŋgerzah laɓ nunmbam ke tusiɓa ra, ke laɓ nzuk pirmatul ɓa wo̧ronzuk ke wu̧ynzuk. I ki̧-ki̧, kaŋ ya le ? »

⁵Ke el ɓahri se : « Sa̧wu mí wo̧ronzuk ɓay poŋ bah ye ke mah ye. Ku yá̧ hani ke wu̧y ye. Ku ɓa nzuk ké mbew,

⁶ku ɓa nzukri seɗe mba. Wara le ku ɓa nzuk ké mbew yaŋ. A a̧w ké Ŋgerzah mbu̧h niri ɓa nzuk pirmatul mbew ra, nzuk ɓá kehr niri ya. »

⁷Fariziri ɓahri : « Mí-aw ba, ɓay fe mí Moyiz hi̧ bolnzak ɓahri, nzuk ké yih ni̧h wu̧y ye le, ké vbeh mbete-ni̧h wu̧y ndoh ndɔk wu̧yu dara ké ni̧h ni ɓáy le[79] ? »

⁸Zezu ɓahri : « Ɓay fe le law woiri kpu-kpuh mí Moyiz poŋ ful hi̧ wuri ɓay ni̧h wu̧y woiri. Ke titilu da̧y le, ta kaŋ ya.

⁹Mi ƴo ɓah hi̧ wuri ɓahri se, wu̧y ti̧h mbi wo̧ro a ɓoru ya, mí wah ye ni̧h ni mgbum mí el ya̧ wu̧y a ɓoru soh gelu le, salɓay nunpuki ta tul nzuku. »

¹⁰Nzuk-dih fal yeri ɓahri : « Ké sakra wu̧y ke wo̧ro, ɓayu na kandɔkaw le, kaɓ ɓa iw dan yá̧ wu̧y mí su. »

¹¹Bale ke ɓah hi̧ nzuk-dih fal yeri ɓahri : « Ta ɓa nzukri gbam mí mgba ketina ra ya. Wara le ɓa nzukri ké Ŋgerzah hi̧ niri kaɓ ɓa iw kaŋ, mí mgba ɓayu.

¹²Nzuk a haniri kaɓ ɓa iw ɓay ndi̧w woyri ké hu sa ɓil mah woyri sa̧. Iw a ɓoruri-aw kaɓ kaŋ ɓay fo̧hro ké nzuk a ɓoruri lu. Nzuk a haniri bale, gboh mun woyri. Ku mbi mun woyri hi̧ Ŋgerzah lak mbay tul woyri. Ku sa ya̧ wu̧y ya. Nzuk ké mah mgba ketina ra le, ké mgba, ké kaɓ ɓa iw dan ya̧ wu̧y. »

¹³Wara mí nzukri ƴo gi ke gunri ma ta̧w Zezu ɓay ké lu mgbɔkɔ[80] ku̧ tul gunuri, ké goŋ Ŋgerzah ɓay tul woyri. Mí nzuk-dih fal yeri hah gina woyri.

¹⁴Zezu ba, ɓahri : « Í poŋ gunri ɓá gi ta̧w bi. Í gboh gina woyri ya, ɓayu ké lák mbay a nunmbam na ɓay sam gun a kandɔkayri. »

¹⁵Fal mgbɔkɔ ké-e lu ku̧ tul gunri ra ke poŋ gelu, mí ke kal ma pol.

¹⁶Í ko. Nzuk mbew gi ta̧w Zezu, mí ke ɓahri : « Metere, fe suki fe mí-i láɓ ɓay mí ƴo ke ɔkna sew ke sew ɓa ŋgɔh le ? »

¹⁷Mí ke ɓah hi̧ ni ɓahri : « Ani mú-u vbi mi ɓay tul ɓay fe suki le ? Fe suki mbew yaŋ. Mu yih ƴo ke ɔkna sew ke sew ɓa ŋgɔh le, mú ƴo tul ɓayri ké-e ŋga̧h ziŋ ziihri. »

¹⁸Nzuk ra el ɓahri : « Bolkusol a ani-uri le ? » Mí Zezu ɓahri : « Ɓay a a̧yayri : mu í hul ya, mu mbí wu̧y nzuk mbaŋ wo ya, mu ríh riɓa ya, mu kúŋ ɓay ku̧ nzak nzuk ya.

¹⁹Mú hȩk bah wo ke mah wo, mu sá nzuk mbaŋ wo eŋ mun wo kaŋ. »

²⁰Nzuk ra el ɓahri : « Mi ƴo tul ɓayawri gbam. A fe mí toŋ mi ɓáy le ? »

²¹Dale Zezu ɓah hi̧ ni ɓahri se : « Mu yih ɓay ƴo tul bolkusol gbam ke gelu ɓa nzuk pirmatul ké eŋ Ŋgerzah kandɔk ké-e laɓ ra le, mú si fa̧h fe ziŋna wori, mú yeh. Mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi. »

²²Ke lah ɓay ké Zezu ɓah ba, law ye rih ni mba, mí ke tɔr ɓayu ké ndɔk ye ah ŋgi̧ mbamba.

²³Mí Zezu el ɓah hi̧ nzuk-dih fal yeri ɓahri : « Law nzuk fe ziŋna ra kuŋ ni kuŋ gaŋ. Mi ƴo ɓah hi̧ wuri ɓahri se, kpuh mbamba ɓay hi̧ nzuk va̧na ɓá hi̧ mbay ké nunmbam ɓá lak mbay ké tul ye.

²⁴Mi el ɓah hi̧ wuri ra ɓáy, ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay hi̧ nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »

²⁵Nzuk-dih fal yeri lah ɓay ké Zezu ɓah kaŋ bale, gosoɓay zi niri zi-zi, ku ɓahri : « Mi-aw ba, nzuk a suŋ mí mah kaɓ ke ɔkna le ? »

²⁶Zezu ko niri zi̧h bale, ke ɓahri : « Káɓ ke ɔkna le mba nzuk pirmatul. Ŋgerzah mí mah ɓay hi̧ nzuk kaɓ ke ɔkna. »

²⁷Wara mí Piyer el ke ɓay ɓahri : « Mú ko. A wah nah poŋ feri riw, mí nah dih fal wo-ay ra ba wa, ɔh tɔr wah ɓay na ani ɓáy le ? »

²⁸Bale Zezu ɓah hi̧ niri ɓahri : « Ɓa ketina, i dih wuri fal bi gaŋ. Mi ƴo ɓah ɓayay hi̧ wuri ɓahri, ké i dih fal bi ra, sew ké nunmbam ke tusiɓa ɓay laɓ ɓa foyu, ké gun nzuk pirmatul ɓay kaɓ gel kaɓna mbay ɓil riŋ ɗina ye le, a woiri kara i káɓ tul arŋgaw ké boh falu seɗe ɓa nzuk-nda pol[81] hi̧ sa̧w gun Izarayelri ké vba ɓa boh falu seɗe.

²⁹Nzuk a suŋ suŋ gbam ké poŋ sa̧w ye, yi̧n yeri, in yeri, bah ye ke mah ye, gun yeri, waka yeri ɓay tul riŋ ɗina bi le, ke ɓay ya̧ fe baah ké ɓa ɔkna a ké na sew ke sew ɓa ŋgɔh. Fe ziŋna ye ɓay ro sɔɗ kal nzuku a pol.

³⁰Kandɔkaw mí daɓa nzukri ké ƴo pol ɓay el si sar fal mgbaɗ. Daɓa nzukri ké ƴo fal ba, ɓay kal ma pol.