Read Karang Mbete Matiye 2 Bible Online

Mbete Matiye 2 - Karang bible

Mbete Matiye 2

¹Mbuŋna Zezu laɓ ké Beɗlehem ké tusiɓa Zude sew ké Eroɗ lak mbay ké tusiɓa-aw. Í ko. Nzuk fe konari ur ke tusiɓa a fál tí̧h seh gi ka̧h Zurusalem bale, ku vbi nzukri ɓay ɓahri : « Mbay ziɓri kú-u mbuŋ ni ké Zurusalemay wa, ke na fál suŋ le ? Nah ko gunwu̧y nunmbam ti̧h ké fál tí̧h seh sɔk na ɓay ye, mí nah gi ko ni ɓay dim ni. »

³Mbay Eroɗ ɓá lah ɓayaw bale, law ye ke law ŋgernzuk ziɓri gbam ké Zurusalem lu ɗuŋ ɗuŋ.

⁴Ke el mbu̧h ŋgernzuk fe puhna Ŋgerzahri ke nzuk-sɔk mbete bolkusol Ŋgerzah hi̧ gun Izarayelri, mí ke fakla sa̧wɓayu. Ke vbi niri ɓay gel mbuŋna Ŋgermbay ké mbete sɔk ra.

⁵Ku ɓahri, gel mbuŋna ye ɓay laɓ ké Beɗlehem ké tusiɓa Zude ɓayu ké gun nzak pihna Ŋgerzah vbeh lewsa̧ ɓahri : A wo Beɗlehem puh ké sakra puhri ké tusiɓa Zude, mbay tusiɓari-aw ta ɗi mu ɓa gun puh ya ɓayu ké nzuk-hɔl sami ɓay ti̧h ke ɓil wo. A ye mí ke hɔ́l sa̧w bi gun Izarayelri[8].

⁷Wara mí Eroɗ ɗi nzuk fe konari si duh gel. Ke goso niri ɓay lah sa̧wseh ké gunwu̧y nunmbam ti̧h ra bale, ke poŋ niri tɔr si Beɗlehem. Ke ɓahri : « Í si wuri Beɗlehem. Í fakla ɓay gun ra, í tu te-teh. I ziŋ ni dale, í pih nzak pihna gi sɔk mi. Kaŋ le a bi kara mi si dím ni pi. »

⁹Ku lah bolnzak mbay ra ba, mí ku ur tɔr. Í ko. Gunwu̧y nunmbam ra el ti̧h maŋ niri mí si ta̧h ƴo síɓa ké gel nam gun ra.

¹⁰Ku ko gunwu̧y nunmbam ké ƴo ra bale, ku zo zakra zakra ke mun rihna.

¹¹Ku rih si ɓil vulu, ku ko gun ke mah ye Mari. Ku huk siɓa pol gunu, mí ku dim ni ke lari lɔr ke rekna kpuh ké ba̧ri-u fu̧ buy buy ke sa̧wkpuh mir[9].

¹²Ku tɔr si na nam bale, Ŋgerzah bak niri ɓil lɔlɔ ɓahri, ko-ko kú el ke ful a ta̧w Eroɗ. Mí ku mbi mahful a ɓoru ka̧h tusiɓa woyri keni.

¹³Ku tɔr dale, í ko, tem nzak pihna Gaŋ tul feri riw ti̧h nun Zezeɓ ɓil lɔlɔ ɓahri : « Ur síɓa. Mú fa̧h gun ra ke mah ye. Mú ɗuk ziŋ niri si tusiɓa Eziɓte. Mú kaɓ ri geŋ nam ké mi ɗí mu ɓay mú el gi, ɓayu ké Eroɗ ƴah ful ɓay i gun ra. »

¹⁴Mí Zezeɓ ur síɓa bale, ke fa̧h gun ra ke mah ye ke suŋu-aw, mí ke ɗuk ziŋ niri si tusiɓa Eziɓte[10].

¹⁵Ku kaɓ ri ka̧h nam hul Mbay Eroɗ. Fe laɓna-u kal hi̧ ɓay ké gun nzak pihna Ŋgerzah vbeh lewsa̧ ra laɓ ƴo gelu. Ɓayu ɓah kandɔkay : Mi ɗi gun bi ti̧h ke Eziɓte.

¹⁶Eroɗ tu ɓahri se, nzuk fe konari mba ni ke law wara mí law ye si̧h kpereŋ. Ke el pih soze yeri si Beɗlehem ke puh a ɓoruri ké ɗoŋ ri, kú i gun wo̧rori gbam ur ke tul gunri ké mbihmbam woyri laɓ seɗe el ka̧h gun a peŋuri. Mbihmbam gunri-aw si ke sa̧wseh ti̧hna gunwu̧y nunmbam ké Eroɗ goso ɓayu ké nzak nzuk fe konari.

¹⁷Kaŋ mí sozeri laɓ fe-u. Wara mí ɓay ké Zeremi gun nzak pihna Ŋgerzah a lewsa̧ vbeh laɓ ƴo gelu. Fe vbehna-u na kandɔkay :

¹⁸kusol nzukri mgbe goɗi goɗi ké Rama ɓa rew hul gololo. Záh Rasel ƴo vuh ɓay gun yeri. Ke sa gɔlna ya ɓay fe le, gun yeri ta mba[11].

¹⁹Eroɗ hu bale, í ko, tem nzak pihna Gaŋ tul feri riw ti̧h nun Zezeɓ ɓil lɔlɔ ké Eziɓte ɓahri :

²⁰« Ur síɓa, mú fa̧h gun ra ke mah ye. Mú el ziŋ niri si tusiɓa gun Izarayelri. Nzukri ké ƴah ful ɓay i gun ra hu da. »

²¹Mí Zezeɓ ur síɓa ba, ke el fa̧h gun ra ke mah ye el ziŋ niri si tusiɓa gun Izarayelri.

²²Ke gi lah ɓahri, Arselo soh bol bah ye, mí lak mbay ké tusiɓa Zude bale, hȩkme káɓ tusiɓa Zude laɓ ni. Ŋgerzah bak ni ɓil lɔlɔ, mí ke kal si tusiɓa Galile.

²³Ke ka̧h puh a hani ké riŋu ɓa Nasareɗ ké tusiɓa-aw, mí ke laɓ puh ye ké ri. Kaŋ mí ɓay ké gun nzak pihna Ŋgerzahri ɓah lewsa̧ laɓ ƴo gelu. Ɓayu ɓahri, ku tú ni ɓa gun Nasareɗ.