Read Karang Mbete Matiye 20 Bible Online

Mbete Matiye 20 - Karang bible

Mbete Matiye 20

¹Ɓay nzukri ké ƴo pol ke nzukri ké ƴo fal ra, mi ƴo mgba nzuk waka kpuh viyȩh tuh keni lák mbay a nunmbam. Nzuk waka kpuh viyȩh ƴah nzuk-laɓ pihnari. Nzuk waka ti̧h ke tipele za̧y si ƴah nzuk-laɓ pihnari ɓay kú si laɓ pihna ké waka ye.

²Nzuk waka ziŋ nzuk-laɓ pihnari, mí ke lek ɓay puh niri lari ké mah lari pihna nam mbew[82]. Kaŋ mí ke pih niri si waka ye ra.

³Seh zaŋ ndi̧ mah sa̧wseh toŋndɔk mbew, mí ke el ti̧h ra ɓáy. Ke ko nzuk a ɓoruri ké gel daɓa ƴo ƴah pihna.

⁴Mí ke ɓah hi̧ niri ɓahri : “A woiri, í si waka kpuh bi laɓ pihna-u. Mi púh wuri lari mah gel pihna woiri.”

⁵Bale nzukri ra tɔr si waka ye. Nzuk waka ti̧h ra ɓáy ke sa̧wseh midi pi, ke sa̧wseh say pi. Ke ziŋ nzuk a mbaŋuri, mí ke pih niri si laɓ pihna waka ye pi.

⁶Nzuk waka ti̧h ra ɓáy ke sa̧wseh ndiɓi, seh toŋ ɗih ya ɓay riŋu, mí ke ziŋ nzuk a mbaŋuri ɓáy. Ke ɓahri : “Ani mí i ƴo gelay ke tipele sa̧ ka̧h aŋay dan láɓ pihna le ?”

⁷Ku ɓahri : “Ɓay fe le nzuk ɗi na si laɓ pihna ya.” Ke ɓahri : “Í si wuri waka bi laɓ pihna-u.” Mí ku tɔr si waka ye ra.

⁸Seh na nzȩh bale, nzuk waka-u ɗi ŋgernzuk-ko tul pihna-u. Ke ɓahri : “Mú ɗi nzuk-laɓ pihnari ra ɓá gi titilu ke tul nzukri ké gi pihna aŋay ka̧h tul nzuk a gi polri. Mú puh niri.”

⁹Ŋgernzuk-ko tul pihna ra ɗi nzukri gi. Nzukri ké gi pihna sar fal, a ge ge le ziŋ lari mah lari pihna nam mbew mbew.

¹⁰Nzuk a titiluri ra ba, gi. Ku ker ɓahri, a woyri le ku ɓay ziŋ lari kal mbaŋ woyri. Mí ku ziŋ mah hani gba̧y.

¹¹Ku ya̧ lari woyri ra, mí ku el su̧h ɓay ziŋ nzuk waka ra ɓahri : “Nzukri ké gi fá-fal, ku laɓ pihna ka̧h sa̧wseh mbew ya dih, mú-u mgba niri mah ke a wah ké nah laɓ ŋger pihna-aw ɓil birbiŋ seh.”

¹³Dale nzuk waka ɓah hi̧ nzuk ké sakra woyri ɓahri se : “Ya̧h, mi gɔɓrɔ mu ya. Nah lek ɓay ɓahri, mi púh mu lari mah lari pihna nam mbew, kaŋ ya le ?

¹⁴Mú ya̧ lari wo, mú si ɓa suki. A bi le, mi hi̧ kpandɔk hi̧ nzukri ké gi fal kandɔk ké mi yih. Mi hi̧ mu kpandɔk kandɔk ké mi yih kaŋ pi.

¹⁵Mi ƴo ke ful ɓay laɓ fe ké mi ƴo keni kandɔk ké mi yih, kaŋ ya le ? Uwa. Nun wo sih tul fe bi ɓay law suki bi ley ?”

¹⁶Kandɔkaw mí nzukri ké ƴo sar fal mbaɗ ɓay kal ma pol. Nzukri ké ƴo pol ba, ɓay si sar fal mgbaɗ. »

¹⁷Zezu ƴo hil ma Zurusalem, mí ke fa̧h nzuk-dih fal ye a boh falu seɗeri ɓoɗ. Sina woyri ké ful ra, ke el ɓahri se : « Í lah, nah ƴo hil wuri ma Zurusalem, mí nzuk ɓay ndoh gun nzuk pirmatulay ndɔk ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri. Ku ɓay kuŋ salɓay hul kan tul ye.

¹⁹Ku él ndoh ni ndɔk sa̧wnzuk a ɓoruri hi̧ kú sak ni, kú zɔr ni ke ndehdɔŋ, kú ɓar ni ké tul kpuh vbatay. Nam a sayu dale, ke tí̧h ke puh záhri ke pa̧ymun a foyu. »

²⁰Wara mí wu̧y Zebede fa̧h gun woyri seɗe gi pol Zezu. Ke huk siɓa, ke yih vbi ni ɓay mbew.

²¹Mí Zezu ɓahri : « A fe mú-u yih ɓayu le ? » Wu̧y ra ɓahri : « Mú wahɓay hi̧ mi, gun biri ké seɗe-ay ku káɓ ɓa gɔŋrɔŋ mbay wo ké puh lakna wo. Nzuk a mbewu ɓá kaɓ ndɔk lakna wo, nzuk a ɓoru ba, ɓá kaɓ ndɔk kperu wo. »

²²Zezu ba, ɓah hi̧ gunri-aw ɓahri : « Fe ké i goŋaw, i tu ya. Koɓ koseh[83] ké mi ɓay nzo-u ra, i mah ɓay nzo pi le ? » Ku ɓahri : « Nah ma-mah. »

²³Zezu el ɓahri se : « Fe nzona ké na ɓil koɓ ra i ɓay nzo-u gaŋ. Mí ɓay hi̧ nzukri ɓá kaɓ ndɔk lakna ke ndɔk kperu bi ra ɓa fe bi ya. Wara le ɓa fe bah bi ké lek gel kaɓna-aw ɓay hi̧ niri. »

²⁴Tɔr nzuk-dih fal Zezu a bohri lah goŋna ra mí haŋ woyri fa̧h niri ké tul gun ɓil mahri ké seɗe ra.

²⁵Bale Zezu ɗi nzuk-dih fal yeri gi ma ta̧w ye, mí ke ɓahri : « A woiri i tu-tu. Mbay tusiɓari ƴo lak mbay tul nzuk woyri ke ŋgerna. Nzuk a lukiri ƴo pih bolnzak woyri hi̧ nzukri laɓ.

²⁶Mí a woiri le, i ná kandɔk nzuk riŋ ɗinari-aw ya. Wara le nzuk a a̧y ké yih ti̧h ɓa ŋgernzuk tul mbaŋ yeri le, ke ná ɓa gun-laɓ pihna hi̧ mbaŋ yeri.

²⁷Nzuk a suŋ suŋ ké yih na ɓa tul ké sakra mbaŋ yeri le, ke ná ɓa mgbal mbaŋ yeri.

²⁸Kaŋ gaŋ mí gun nzuk pirmatul gi tusiɓa ɓay hi̧ nzukri ɓá laɓ pihna hi̧ ni ya. Wara le ke gi ɓay laɓ pihna hi̧ nzuk mbaŋ yeri. Ke gi ɓay poŋ mun ye ɓa fe puhna ɓay sel daɓa nzukri ke ndɔk hul. »

²⁹Zezu ke nzuk-dih fal yeri ƴo ti̧h ke Zeriko, daɓa nzukri ɓa ŋgi̧-u dih fal ye pi.

³⁰Mí í ko, ra̧wri seɗe kaɓ ɓel mahful. Kú-u lah ɓahri Zezu mí ƴo kalna bale, ku vba̧ nzak ɓeleŋ ɓeleŋ : « Gun zih ŋgermbay Daviɗ, í laɓ law in ziŋ na ge. »

³¹Daɓa nzukri-aw pom niri ɓay kú tuh nzak. Mí ku toŋ vba̧ nzak ɓa mgbe-u ma síɓa síɓa : « Gun zih ŋgermbay Daviɗ, í laɓ law in ziŋ na ge. »

³²Zezu ta̧h ƴo, mí ke ɗi ra̧wri ra gi. Ke ɓahri : « A fe mí i yih ɓay mí laɓ hi̧ wuri le ? »

³³Ku ɓahri : « Gaŋ wah, nah yih ɓay í hi̧ nun wah ɓá ko gel. »

³⁴Law Zezu sa̧h, mí ke ndar ndɔk za nun woyri. Dale nun woyri teh hi̧ niri ku ko gel, mí ku dih fal ye.