Read Karang Mbete Matiye 21 Bible Online

Mbete Matiye 21 - Karang bible

Mbete Matiye 21

¹Zezu ke nzuk-dih fal yeri ɗih mba ke Zurusalem. Ku ka̧h Beɗfaze. Puh-u na ɓel kasaw ké kpuh Olivehri na ri[84]. Wara mí Zezu pih nzuk-dih fal yeri seɗe si Zurusalem.

²Ke ɓahri se : « Í si puh ké na pol woiri sa̧-aw. Ka̧hna woiri dale, i ɓay ko mah bamnde kú-u ŋga̧h ƴo. Gunu ƴo ɓelu. Í sel mah bamnde ra rah keni gunu gi hi̧ mi.

³Nzuk vbi wuri ɓahri, ani mí i sel mah bamnde ra le, í ɓah hi̧ ni kandɔkay : “Gaŋ bamnde-uri mí yih ɓayu.” Dale ke ɓay poŋ hi̧ wuri í gi keni. »

⁴Fe-u laɓ kaŋ hi̧ ɓay ké gun nzak pihna Ŋgerzah a lewsa̧ ɓah ra laɓ ƴo gelu.

⁵Ɓayu ɓah kandɔkay : « Í ka-kah hi̧ nzukri ké Siyoŋ ɓahri, kú ko, Mbay woyri ƴo gi ke ɗeŋ. Law ye voh lɔm. Ke kaɓ tul gun bamnde ƴo gina [85]. »

⁶Bale nzuk-dih fal yeri ké seɗe ra si gi ke bamnderi kandɔk ké Zezu pih niri.

⁷Mí ku mbala gar ku̧ tul bamnde-uri, mí Zezu kaɓ tul gunu.

⁸Dale daɓa nzukri ɓa ŋgi̧-u ŋgi̧-u gim gi. Nzuk a haniri fih gar woyri ku̧ ke ful ful, nzuk a ɓoruri ba, haw gay kpuhri, mí ku fih ku̧ mahful pi.

⁹Nzuk a haniri si pol, nzuk a ɓoruri ba, si fal. Ku vba̧ nzak le, ku vba̧ ra ɓáy ɓahri : « Gun zih ŋgermbay Daviɗ, mú ya̧ na[86]. Mgbɔkɔ Gaŋ tul feri riw ku̧ tul wo ké mu gi ke riŋ ɗina ye. Mú ya̧ na, riŋ ɗina wo mgbe si ka̧h nunmbam a síɓa sa̧. »

¹⁰Zezu ɓá rih ɓil Zurusalem le, nzuk puh-uri si tul hani hali hali. Ku ɓahri se : « A ge mí ƴo-ay le ? »

¹¹Daɓa nzukri ƴo ɓah hi̧ niri ɓahri : « Ke ɓa Zezu gun nzak pihna Ŋgerzah ké Nasareɗ ké tusiɓa Galile munu. »

¹²Zezu si rih ɓil ila vul kani Ŋgerzah. Ke el ni̧h nzukri ké kaɓ ke fe hɔlnari ɓay hi̧ nzukri ɓá yeh ɓa fe puhna woyri, ke ni̧h nzukri ké ƴo yeh fe hɔlnari-aw kara pi. Tabele nzuk-kom lari ŋgomna ke lari misoŋri[87], ke sɔkrɔ mgborvboŋ mgborvboŋ ku̧ siɓa, ke sɔkrɔ gel kaɓna nzuk-yeh ndoy mbɔreri[88] pi.

¹³Ke ɓahri se : « Ŋgerzah ɓah ɓil mbete ye ɓahri, nzukri ɓay tu vul ye ɓa vul-ɓah ɓay ziŋ ni[89]. Mí a woiri-ay ba, i sɔɓ gelu ɓa hoh nam riɓari. »

¹⁴Ra̧wri ke nzuk kpereri[90] gi ta̧w ye ɓil ila vul kani Ŋgerzah, mí ke gah niri.

¹⁵Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ko fe saŋri ké-e laɓ, mí ku ƴo lah bula gunri ké mgbe ɓil ila vul kani Ŋgerzah ƴo ɗi siŋ, « gun zih ŋgermbay Daviɗ, mú ya̧ na ge » bale, ku ziŋ law fa̧hna.

¹⁶Mí ku ɓah hi̧ Zezu ɓahri : « Siŋ ké gunri ɗi-aw, mu lah gaŋ ley ? » Zezu ba, ɓahri : « Ɓa teh-u. Gel ki̧na-ay, i ki̧-ki̧, kaŋ ya le ? Dimna ké ti̧h ke nzak gun a leleri ke nzak gun nzak pamri ra Ŋgerzah mbar riŋ ɗina ye ɓilu[91]. »

¹⁷Zezu sɔɓ fal hi̧ niri, mí ke ti̧h ke puh a luki ra si Beɗtani.

¹⁸Tipele-u, Zezu ƴo el ma puh a luki-aw dale, ɗaka i ni.

¹⁹Ke ko kpuh nzu̧y mbew ƴo ɓel ful, mí ke reh si bɔk kpuh nzu̧y ra. Ke ziŋ lehna-u ya, ɓa gayuri kaŋto. Mí ke ɓah ɓay hi̧ nzu̧y ra ɓahri : « A wo nzu̧yay[92], ndɔk wo ta leh lehna mba wu̧m wara. » Kpuh nzu̧y ra ho̧k wɔh gaŋ ba.

²⁰Nzuk-dih fal yeri ko fe ké kal, mí na niri ɓa saŋ. Ku ɓahri : « Ani mí kpuh nzu̧y ra ho̧k wɔh sa sari-ay le ? »

²¹Bale Zezu ɓahri : « Nzu̧y ra ho̧k wɔh ɓa ketina, mi ƴo ɓah ɓayay hi̧ wuri, law woiri ƴo mbew ke law Ŋgerzah, mí fahɓay ta law woiri ya le, i láɓ kandɔk ké mi laɓ ke kpuh nzu̧yay kaŋto ya. Wara le i ɓah ra hi̧ baw kasaw ké na sa̧-aw ɓahri, kasaw ɓá loh ke gelaw si vbu ɓil mahmbih le, fe-u ɓay laɓu gaŋ ba.

²²Ɓay fe a suŋ suŋ gbam ké i vbi Ŋgerzah, mí law woiri ƴo mbew ke law ye le, ke láɓ fe-u hi̧ wuri. »

²³Zezu si rih ɓil ila vul kani Ŋgerzah ƴo firma nzukri ɓay lák mbay Ŋgerzah bale, ŋgernzuk fe puhna Ŋgerzahri ke ŋgernzuk puh woyri gun Izarayelri gi ta̧w Zezu ké gel fe firma ye. Ku ɓahri : « Ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »

²⁴Zezu ba, yih nzak woyri ɓahri : « A bi kara mi vbi wuri ɓay mbew. Í yih vbiɓayu hi̧ mi mí lah dara mí-i sɔ́k wuri ke bolkusol ge mí-i ƴo laɓ pihna biri-ay ɓáy.

²⁵Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatulri le ? » Mí ku fah ɓay ké sakra woyri. Ku ɓahri : « Nah ɓah ra ri se, sa̧wu ɓa nunmbam le, ke él vbi na, ɓay fe mí nah sa ya̧ ɓay ké Za̧h ɓah ra ya.

²⁶Mí náh ɓahri, sa̧wu ɓa nzuk pirmatulri le, nzukayri riw ɓay i na. » Hȩkme nun nzukri tuh nzak ŋgernzukri-aw ɓayu ké daɓa nzukri riw tu Za̧h ɓa gun nzak pihna Ŋgerzah.

²⁷Mí ku yih nzak Zezu ɓahri : « Nah tu sa̧wu ya. » Le Zezu el ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi.

²⁸A woiri í sɔk mi kerɓay woiri, mí lah. Nzuk mbew ƴo ke gun wo̧rori ɓa seɗe. Ke ɓah hi̧ gun pol ɓahri : “Gun bi, mú si waka viyȩh bi, mú laɓ ri pihna.”

²⁹Gun pol ra yih nzak bah ye ɓahri : “Mi sí ya.” Zah le law ye nzah ɓay hi̧ ke kaɓ ke kerɓay, mí ke tɔr si waka.

³⁰Bah gun si ta̧w toŋnafal gun pol pi. Ke ɓah ɓay ra hi̧ ni. Toŋnafal yih nzak bah ye ɓahri : “Mi lah wuri lah, mi si-u.” Mí ke si ya dih.

³¹Ké sakra gunri ké seɗe-aw ra wa, gun a suŋ mí laɓ fe ké bah ye yih ɓayu le ? » Ku ɓahri : « Gun pol mí laɓ fe ké bah ye yih ɓayu. » Zezu el ɓahri : « Gelu munu, mi ƴo ɓah hi̧ wuri ɓahri se, nzuk-mbu̧h lampohri ke wu̧y nunpukiri ƴo ti̧h ɓa gunri ké Ŋgerzah lak mbay tul woyri poŋ wuri ɓayu ké Za̧h gi te-teh ɓay mahful-ƴo ke Ŋgerzah ɓa záh woyri hi̧ nzukri lah ɓayu, mí i sa lah ni ya. Nzuk-mbu̧h lampohri ke wu̧y nunpukiri ba, ya̧ ɓay ye. I ko pi. Mí yá̧ ɓay ye ra, ɓayu se law woiri mbew ya.

³²

³³Lawɓay a ɓoru ké na-ay, í lah wuri, í sɔk mi kerɓay woiri, mí lah. Nzuk mbew laɓ waka kpuh viyȩh[93]. Ke vba̧ kpaŋ ɗoŋ ri gbik gbik. Ke laɓ gel-ha̧h mbih lehna kpuh-u ké ɓilu. Ke laɓ gel ƴona nzuk-kɔr wakari ɓa gaŋu dara mí ke ndoh waka ra hi̧ nzuk-laɓ pihna-uri ɓáy. Ke tɔr si gahru ɓa ɗih-u.

³⁴Few-hal lehna kpuh ka̧h dale, nzuk waka pih gun nzak pihna yeri si ta̧w nzuk-laɓ pihna wakari ɓá fa̧h lehna kpuh-u gi keni hi̧ ni.

³⁵Mí nzuk-laɓ pihna wakari ra mgba gun nzak pihnari-aw. Ku vboŋ nzuk a hani-uri, ku i nzuk a ɓoruri, nzuk a haniri ba, ku vbuk ke kasaw i-i.

³⁶Nzuk waka el pih gun nzak pihna ye a ɓoruri ɓa ŋgi̧-u ɓáy, mí nzuk-laɓ pihna wakari ra laɓ niri mah hani ke nzuk a polri.

³⁷Ɔh tɔru bale, ke pih gun sana ye si ta̧w nzuk-laɓ pihna wakari ra. Ke ker ɓahri, ku ɓay hȩk gun ye.

³⁸Nzuk-laɓ pihna wakari ɓá ko gun nzuk waka ƴo gina bale, ku lek ɓay mbew ɓahri : “A ye ké-e gi-aw ra, ke ɓa gun-ya̧ fe bah ye munu. Náh i wuri ni dale, waka-ay ɓay ti̧h ɓa fe wahri.”

³⁹Gun ra ka̧h ba, mí nzuk-laɓ pihna wakari mgba ni, ku kɔklɔ ni si fal kpaŋ, mí ku i ni. »

⁴⁰Zezu el ɓahri : « Kaŋaw ba, nam ké nzuk waka ra gi le, ke láɓ ani mí ziŋ nzuk-laɓ pihna wakari-aw le ? »

⁴¹Ku ɓahri : « Ke í nzuk a suya-awri ra, mí ke él ndoh waka kpuh ra hi̧ nzuk a ɓoruri. Gelke few-hal lehna kpuh ka̧h dale, ku hí̧ ni lehna-u. »

⁴²Zezu el ɓah ra ɓáy hi̧ niri : « Ɓay ké na ɓil mbete Ŋgerzah-ay, i ki̧-ki̧, kaŋ ya le ? Kasaw ké nzuk-mboh vul kani Ŋgerzahri poŋ kan kpah ra, kasawu mí el ti̧h ɓa mah kasaw-mboh diŋ vulu [94]. Miƴori mí hi̧ kasaway el ti̧h ɓa mah kasaw, mí ɓa fe saŋ ké nun wah [95].

⁴³Sa̧wu mí-i ɓah ɓay ra hi̧ wuri ɓahri se, Ŋgerzah ɓay nah ŋgerna lák mbay ye ké ndɔk woiri. Ke ɓay el ndoh ndɔk sa̧wnzuk a ɓoru ké laɓ pihna hi̧ waka ra leh lehna-u.

⁴⁴[Nzuk ké ɓe kasaway mí lih le, ɓay gur mun ye rukruk. Mí nzuk a a̧y ké kasaway toh tul ye le, ɓay naŋ nzuku ɓa som ri̧nini[96].] »

⁴⁵Ŋgernzuk fe puhna Ŋgerzahri ke fariziri lah lawɓayawri, mí ku tu ɓahri, lawɓayuri tuŋ tul woyri.

⁴⁶Ku ƴah ful ɓay mgba ni, mí hȩkme daɓa nzukri laɓ niri kandɔk ké nzukri tu ni ɓa gun nzak pihna Ŋgerzah.