Read Karang Mbete Matiye 22 Bible Online

Mbete Matiye 22 - Karang bible

Mbete Matiye 22

¹Zezu ba, el ɓah lawɓay a ɓoru hi̧ niri ɓáy[97].

²Ke ɓahri : « Mi ƴo mgba ɓay mbay mbew tuh ke ɓay lák mbay Ŋgerzah. Mbay ra laɓ ti̧hmbih-ya̧ hani wu̧y gun ye.

³Mí ke pih gun nzak pihna yeri si ɗi nzukri ké-e wahɓay ziŋ niri pol ra, kú gi su̧ fe ti̧hmbih wara. Mí ku sa gi ya.

⁴Mbay el pih gun nzak pihna ye a ɓoruri ɓáy ɓahri : “Í ɓah hi̧ nzukri ké mi wahɓay ziŋ niri pol ra ɓahri se, í ko, fe su̧na ti̧hmbih lek da. Nday biri ke guy biri ké hu̧h taɓ taɓ ké ɓa numu numu ra, mi vbeh da. Fe su̧nari riw ku̧ ndekle ndekle geŋ niri. Kú gi gel ti̧hmbih-ay wara.”

⁵Mí nzukri-aw deh ɗina-aw. Nzuk a suŋ suŋ le, tɔr si gel-laɓ pihna ye, laɓ pihna ye. Nzuk a haniri tɔr si waka woyri, nzuk a ɓoruri ba, tɔr si gel-ƴah lari woyri.

⁶Tɔr nzuk a ɓoruri ɓáy, ku mgba gun nzak pihnari ra laɓ fe-se su̧hru ziŋ niri pi, ku i nzuk a ɓoruri pi.

⁷Mbay ziŋ haŋ fa̧hna. Ke pih soze yeri si i nzukri ké i gun nzak pihna yeri-aw. Ku nzuh puh woyri ke hɔrɔ gbɔlɔk gbɔlɔk pi.

⁸Wara mí mbay ɓah hi̧ gun nzak pihna yeri ɓahri : “Ti̧hmbih-ya̧ hani wu̧y ke gun bi lek gbam da. Nzukri ké mi wahɓay ziŋ niri pol ra, ku mah gi gel ti̧hmbih-u ya.

⁹Kaŋaw ba, í mbi zelfulri ké ka̧w puhri. Nzuk a suŋ suŋ ké i ziŋ niri le, í sɔk niri ɓay ti̧hmbih-ay, kú gi mbu̧h ndɔk woyri ziŋ mi.”

¹⁰Kaŋ mí gun nzak pihna yeri si ke zelful ɓil ka̧w puhri ka-kah hi̧ nzukri, kú gi. Nzuk law piri-uri ke nzuk law sukiri, ku gi mbah gel ti̧hmbih ra mer mer gaŋ ba.

¹¹Bale mbay gi gelu ɓay mgba gahru yeri ɓa suki. Mí ke ko nzuk mbew kaɓ ri. Nzuku saŋ ndoh gar ti̧hmbih kú-u hi̧ ni ra[98].

¹²Mbay ɓah hi̧ nzuk ra ɓahri : “Ya̧h, ani mú-u gi kaɓ ba, mí gar ti̧hmbih le, mu saŋ ndoh-u le ?” Gelɓay mba nzuk ra.

¹³Wara mí mbay ɗi gun-laɓ pihna yeri ɓahri : “Í mgba ni, í ŋga̧h bɔk ye ke ndɔk ye, í mbi ni vbu kala ɓil tirima ké na nduŋ. Gelaw, ke vúh rew ke mbihnun, ke sú̧ sel ye ŋger ŋger.” »

¹⁴Kandɔkaw mí daɓa nzukri lah ɗina mbay, mí nzukri ké-e lu niri ké sakra daɓa nzukri ra ŋgi̧ ya.

¹⁵Wara mí fariziri mbu̧h nzak woyri mbew, ku hɔl ndawɓay ɓay mgba keni Zezu,

¹⁶mí ku pih nzuk-dih fal woyri ke nzuk mbay Eroɗri si ta̧w Zezu ɓahri : « Metere, nah tu ɓahri, i ɓa nzuk a ketina. I firma nzukri sí siŋ sina Ŋgerzah ke fulu fulu. I lu nun nzuk ya ɓayu ké hȩkme nun nzuk se wuri ya.

¹⁷Kaŋ dale í sɔk na kerɓay woiri, náh lah. Ŋgerzah hi̧ na gun Izarayelri ful ɓay puh lampoh hi̧ ŋgermbay sa̧wnzuk a ɓoruri kandɔk sezar mini ani le[99] ? »

¹⁸Zezu ba, tu ɓay a pipiri-u woyri ra, mí ke ɓahri : « Ɓay fe mí i gi ndoh law bi ke ɓay kandɔkay le ?

¹⁹Nzuk-mu̧h ketinari, í ten lari ké nzukri puh keni lampoh ra hi̧ mí ko. » Ku ten lari-u hi̧ ni.

²⁰Mí Zezu el ɓahri : « Tem nzuk a suŋ mí ku vbeh kan ri-ay le ? Riŋ nzuk a suŋ mí ku vbeh kan ri-ay le ? »

²¹Ku ɓahri : « Temu ɓa tem sezar. Riŋu kara pi. » Wara mí ke ɓahri : « Kaŋ dale fe sezar le, í hi̧ sezar. A wo nzuk pirmatul ké Ŋgerzah laɓ mu ɓa fe tem ye le, mú hi̧ Ŋgerzah gaŋ ba[100]. »

²²Gosoɓay zi niri zi-zi hi̧ ku kaɓ silili, mí ku poŋ ni, ku tɔr.

²³Namu-aw sadusiri gi ta̧w Zezu. (A woyri-aw, ku ɓahri, nzuk hu le, záh ye ta-a. Ke ta ziŋ pa̧ymun a foyu ya pi.) Mí ku vbi ni ɓay ɓahri : « Metere, Moyiz vbeh ɓil mbete bolkusol Ŋgerzah ɓahri, gelke nzuk ya̧ wu̧y mí ke hu dan mbuŋ gun le, yi̧n ye ɓá ya̧ wu̧y kaŋpele ra, ké mbuŋ keni gun ɓa mi̧hri yi̧n ye ké hu-aw.

²⁵Dale ké sakra wah-ay, nzuk ɓil mahri ɓa toŋndɔk say ƴo ri. Ŋgernzuk ya̧ wu̧y bale, ke hu dan mbuŋ gun. Mí toŋnafal el ya̧ wu̧y kaŋpele ra.

²⁶Ke hu dan mbuŋ keni gun. Nzuk a sayu ya̧ wu̧y ra. Ke hu dan mbuŋ keni gun pi. Fe-u laɓ kaŋ kaŋ ka̧h tul yi̧n a toŋndɔk sayu pi. Gbam ku hu dan mbuŋ gun ɓa mi̧hri yi̧n woyri.

²⁷Ɔh tɔru bale wu̧y ra hu pi.

²⁸Kaŋaw ba, seh ké záhri ɓay ziŋ pa̧ymun a foyu ra wa, wu̧y ra ɓay na ɓa wu̧y nzuk a suŋ le wo ? Ɓayu ké nzukri ké toŋndɔk sayaw ya̧ ni ke gel woyri mbew mbew gbam. »

²⁹Zezu ba, ɓah hi̧ niri ɓahri : « A woiri-ay i reh ful kandɔk ké i sa tu sa̧wɓay ké na ɓil mbete Ŋgerzah ya, ké i sa tu ŋgerna Ŋgerzah ya pi.

³⁰Seh ké záhri ziŋ pa̧ymun a foyu le, yá̧ hani ɓay ta-a. Wara le ku káɓ ké nunmbam ɓa ŋgɔh kandɔk tem nzak pihna Ŋgerzahri.

³¹Ɓay ti̧hna záhri ke pa̧ymun a foyu ra wa, gel ki̧na a a̧y ké Ŋgerzah ɓah ɓayu hi̧ na, i ki̧-ki̧, kaŋ ya le ?

³²Ke ɓahri se, a ye, ke ɓa záh zih woiri Abaraham, Isak, Zakoɓ. Kandɔkaw mí Ŋgerzah ɓa záh nzuk a huluri ya. Wara le ke ɓa záh nzuk a ƴo ke ɔknari ké kaɓ ke pa̧ymun a foyu sew ke sew ɓa ŋgɔh. »

³³Daɓa nzukri lah fe firma ké Zezu firma niri ra, mí gosoɓay zi niri zi-zi.

³⁴Fariziri ɓá lah ɓahri, Zezu mgba nzak sadusiri ke ɓay dale, ku mbu̧h hani ke sadusiri[101].

³⁵Ku pih nzuk goso fe tuna mbete bolkusol Ŋgerzah mbew ké haŋsekle woyri gi ndoh law Zezu ke ɓay ɓahri :

³⁶« Metere, ké sakra ɓayri ɓil mbete bolkusol Ŋgerzah ra wa, ɓay a suŋ mí ŋger mba ɓay a ɓoruri gbam le ? »

³⁷Zezu ba, ɓahri : « Miƴori ɓa Ŋgerzah wo, mu sá ni ke law wo gbam ke mun wo gbam ke kerɓay wo gbam.

³⁸Ɓayay ɓa ɓay a luki, ɓa tul ɓay ké kal tul ɓayri gbam ɓil mbete bolkusol.

³⁹Ɓay a seɗe-u ƴo ri ké si mbew ke tul ɓayay mí na-ay : Mu sá nzuk mbaŋ wo eŋ mun wo kaŋ.

⁴⁰Ɓayri ké seɗe-ay mbu̧h ɓayri gbam ké na ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri. »

⁴¹Zezu ba, el vbi fariziri ra ɓahri : « Í sɔk mi kerɓay woiri, mí lah. Ŋgermbay ra wa, ɓa gun zih ge le ? » Ku ɓahri : « Ŋgermbay ɓa gun zih ŋgermbay Daviɗ. »

⁴³Ke ɓahri : « Mí-aw ba, ani mí Tempuki mgba tem ŋgermbay Daviɗ hi̧ ni ke ɗi gun zih ye ɓa Ŋgermbay tul ye ɓáy le ?

⁴⁴Ke ɓahri se : Miƴori ɓah hi̧ Ŋgermbay bi ɓahri, ké kaɓ ɓel ye Miƴori ɓa ndɔk lakna ye, ke ƴo ɔh ŋgerna nzukbaa yeri hi̧ kú ti̧h ɓa gel-ku̧ bɔk ye[102].

⁴⁵A ké ŋgermbay Daviɗ ɗi gun zih ye ɓa “Ŋgermbay” ye ra ba wa, ani mí Ŋgermbay ɓa mi̧hri ŋgermbay Daviɗ ɓáy le ? »

⁴⁶Ke mgba nzak woyri ke ɓay. Nzuk mbew yih nzak ye ya. Ur ke seh-u-aw, nzuk mbew ké hi̧ tul ye ɓay vbi Zezu ɓay ta mba.