Read Karang Mbete Matiye 23 Bible Online

Mbete Matiye 23 - Karang bible

Mbete Matiye 23

¹Wara mí Zezu el sɔɓ mun ye ɓah ɓay hi̧ daɓa nzukri ke nzuk-dih fal yeri ɓahri :

²« Nzuk-sɔk mbete bolkusol Ŋgerzahri ke fariziri, ku kaɓ gel kaɓna metere firma nzukri bolkusol Ŋgerzah ɓil mbete vbehna Moyiz.

³Kaŋaw mí ɓay Moyizri riw kú-u ɓah hi̧ wuri ra, í laɓ, í ƴo tulu. Mí í mbi siŋ sina woyri ya. Ɓay Moyiz ké ti̧h ke nzak woyri ra ku ƴo tulu ya.

⁴Ku ƴo ŋga̧h sukna a yih-u dik dik ɓu tul nzukri mí gun ndɔk mbew kara ku sa laŋ ɓay ɗer keni ya.

⁵Fe laɓna woyri-aw riw, ku laɓ ké nun nzukri hi̧ ku ko kona ma tul woyri. Ku ƴo sa̧h bolkusol Ŋgerzah ɓa gazi[103] ah gbaɓla gbaɓla ŋga̧h nzak pol woyri hi̧ nzukri ko niri ɓa nzuk-tu ɓay Ŋgerzah. Ku hi̧ sal ké na nzak gar woyri kara na tuksa tuksa pi[104].

⁶Ku yih kaɓ gel kaɓna riŋ ɗina ké gel ti̧hmbih. Ku yih kaɓ gel kaɓna ŋgernzukri ké vul misoŋ.

⁷Ku yih ɓay hi̧ nzukri ɓá vah niri ndɔk seɗe seɗe ké gel daɓa. Ku yih ɓay lah nzukri ɓá ɗi niri, “Metere bi, metere bi wo”.

⁸Mí a woiri ba, í hi̧ nzukri ɓá ɗi wuri ke riŋ ɗina “metere” ya, ɓayu ké metere woiri ɓa mbew yaŋ. Gbam woiri i ɓa yi̧nri, i ɓa sa̧w mbew.

⁹Í ɗi nzukri ke riŋ ɗina “bah” ya, ɓayu ké bah woiri mbew yaŋ ɓa a ye nzuk nunmbam.

¹⁰Í hi̧ nzukri ɓá ɗi wuri ke riŋ ɗina “nzuk-nda pol” ya ɓay fe le, Ŋgermbay mbew yaŋ mí ɓa nzuk-nda pol woiri.

¹¹Ŋgernzuk ké sakra woiri le, ke ná ɓa gun-laɓ pihna hi̧ wuri.

¹²Nzuk a suŋ suŋ ké ɔr tul ye le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa.

¹³Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, lakele-rih ɓil lák mbay a nzuk nunmbam na ndɔk woiri, mí i dar nzakful gbik ké nun nzukri ɓayu ké a woiri i rih ri ya pi, i gboh ful rihna nzuk a ɓoruri ké yih rih ri pi.

¹⁵Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ha̧rma tusiɓa gbam, mí i kal tul mahmbihri ke lawkɔr-ri ɓay ziŋ sa̧w nzuk a ɓoru ké ɓay sɔɓ mun ye ti̧h ɓa nzuk misoŋ eŋ wuri. Nzuku ti̧h ɓa nzuk misoŋ bale, ke el ti̧h ɓa nzuk-si ɓil hɔrɔ mah hani ziŋ wuri bin.

¹⁶Koseh ɓa nzuku a woiri, i ɗi mun woiri ɓa nzuk-mgba ka̧w ra̧wri, mí i ɓa ra̧w. I ƴo ɓahri se, nzuk hah mun ye ke riŋ vul kani Ŋgerzah le, fe hahna ye ɓa fe hahna a ndikpo. Mí nzuk hah mun ye ke riŋ lari lɔr kú-u roŋ fe pihna nzuk fe puhnari ké na ɓil vul kani Ŋgerzah le[106], nzuku ɓá laɓ kandɔk ké-e hah gaŋ ba.

¹⁷A woiri i ɓa kɔk nzukri, i ɓa ra̧wri gaŋ. Ké sakra lari lɔr ke vul kani Ŋgerzah ké hi̧ lari lɔr pu mah nun Ŋgerzah ra wa, fe a suŋ mí mba tul a ɓoru le ?

¹⁸Mí i el ɓah ra ɓáy ɓahri se, nzuk hah mun ye ke riŋ gel kani Ŋgerzah le, fe hahna ye ɓa fe hahna a ndikpo. Mí nzuk hah mun ye ke fe puhna kú-u puh tul gel kani le, nzuku ɓá laɓ kandɔk ké-e hah gaŋ ba.

¹⁹Ra̧wri, ké sakra fe puhna ké na tul gel kani ke gel kani ké hi̧ fe puhna pu mah nun Ŋgerzah ra wa, fe a suŋ mí mba tul a ɓoru le ?

²⁰Kaŋaw mí nzuk hah mun ye ke riŋ gel kani Ŋgerzah le, ke hah mun ye ke riŋ gel kani pi ke fe puhnari gbam kú-u puh tul gel kani pi.

²¹Nzuk hah mun ye ke riŋ vul kani Ŋgerzah le, ke hah mun ye ke riŋ vul kani pi ke riŋ Ŋgerzah nzuk ké kaɓ ɓil vul kani-u pi.

²²Nzuk hah mbam le, ke hah mbam ke riŋ bohro mbay nunmbam ra pi, ke hah mbam ke riŋ Ŋgerzah ké kaɓ ɓa mbay bohro ra pi.

²³Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ƴo hal gay-kar feri ké mah gelu ɓoɗ ɓoɗ[107], i ƴo ŋga̧h ke gelu gelu ɓa gel boh boh, mí i mbi mbew mbew dim keni Ŋgerzah, mí mahɓay Ŋgerzah ké ŋger mba ɓay a ɓoruri-aw le, i poŋ ma fal. Sal in ké Ŋgerzah ŋga̧h ra, i ƴo tulu ya. Mgbá in ziŋ nzukri, i sa-a. Ƴó ziŋ Ŋgerzah ke law mbew, i ƴo tulu ya. Dím Ŋgerzah ke fe ziŋna-uri su-su le, póŋ mahɓay Ŋgerzah ma fal ɓá ta-a pi.

²⁴I ɓa ra̧w ké mgba ka̧w ra̧wri gaŋ. I ƴo ɗɔk mbih dara mí i nzo rɔkɔ kay ɓá rih ɓil woiri. Mí i ƴo tu̧h zɔŋzɔŋ[108] ke kuɓru-u ƴɔɗ ma ɓil woiri.

²⁵Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ƴo wɔk fal koɓ ke fal tasawri ɓa teh-u kaɗ kaɗ, mí fál ɓilu bale, mbah ɓa law si̧hna ke law bahu̧hmi.

²⁶Farizi, mu ɓa ra̧w. Mú wɔk ɓil koɓ ɓa teh-u kaɗ kaɗ dara fal koɓ ɓá teh hi̧ mu ɓáy.

²⁷Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i na kandɔk tupal kú-u roŋ falu ke laso hi̧ pu kpa̧h kpa̧h. Falu su kona, mí fál ɓilu bale, mbah ɓa huhru a puŋuri ke sam feri ké fa̧h mun zir zir.

²⁸Kaŋ pi mí a woiri i ƴo sɔk mun woiri ɓa nzukri ké tu Ŋgerzah ɓa záh woiri mí ɓil law woiri le, ɓay woiri mu̧h na ɓoɗ, i ɓa nzuk-poŋ bolkusol Ŋgerzah.

²⁹Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i mboh tupal gun nzak pihna Ŋgerzahri ké zih woiri i lewsa̧, i zel tupal nzukri ké tu Ŋgerzah ɓa záh woyri pi.

³⁰I ɓahri se, i ƴo ra ziŋ ziihri ke sew kú-u i gun nzak pihna Ŋgerzahri-aw le, i ta mbu̧h ɓil ɓay woyri ɓay i nzukri-aw ya.

³¹Kaŋaw mí nzak woiri te-teh ɓay tul woiri ke mun woiri ɓahri se, i ɓa gun nzuk-i gun nzak pihna Ŋgerzahri ra.

³²A woiri gaŋ mí í ɔh wuri pihna zih woiri ké toŋ ra.

³³A woiri mi̧hri soy, i láɓ ani ɓay hi̧ salɓay hul ɓá lu ké tul woiri le ?

³⁴Sa̧wu mí mi ƴo pih gun nzak pihnari ke nzuk nun a mgbururi ke nzuk-sɔk mbete bolkusol Ŋgerzah a ɓoruri, í ko. Ké sakra woyri, i ɓay i a haniri, i ɓay ɓar a ɓoruri ké tul kpuh vbatay. A haniri ba, i ɓay vboŋ niri ké vul misoŋ woiri. I ɓay faŋ fal nzuk a ɓoruri ke puh puh ɓay laɓ niri koseh.

³⁵Kaŋaw mí hul nzuk a lewsa̧ri ké ƴo mbew ke Ŋgerzah ra titilu ke tul Abel ké tu Ŋgerzah ɓa záh ye kpu̧ru ka̧h tul Zakari gun Barasi nzuk a lewsa̧ ké i i[109] ni ɓil ila vul kani Ŋgerzah ké haŋsekle gel fe puhna ke vul kani Ŋgerzah ra, salɓayu mbu̧h gbam mí mgba tul woiri.

³⁶Ɓa ketina, mi ƴo ɓah ɓayay hi̧ wuri, ɓay hul nzukri-aw gbam mgba tul gun tukala-ayri.

³⁷Zurusalem, Zurusalem wo, a wo puh ké Ŋgerzah hi̧ vul ye kan ri, mí gun wori ƴo i gun nzak pihnari ké Ŋgerzah pih niri, ku vbuk nzuk a ɓoruri ké Ŋgerzah pih niri ke kasaw i pi. Bɔk ka̧h ani mí-i yih ɓay mbu̧h gun wori kandɔk mah ndoy ké ƴo mbu̧h gun yeri, mí ku sa-a.

³⁸Í ko. Ŋgerzah poŋ gel kani ye ndikpo ɓa kaŋpele wara.

³⁹Ɓayu ké mi ƴo ɓah ɓayay hi̧ wuri, i ta ko mi mba kpu̧ru ka̧h seh ké í tu mi ɓahri, mgbɔkɔ Gaŋ tul feri riw ku̧ tul bi ké mi gi ke riŋ ɗina ye. »