Read Karang Mbete Matiye 24 Bible Online

Mbete Matiye 24 - Karang bible

Mbete Matiye 24

¹Zezu ti̧h ke ɓil ila vul kani Ŋgerzah ƴo tɔrna bale, nzuk-dih fal yeri loh ma ta̧w ye sɔk ni ke ko vulri ké na ɓil ila vul kani Ŋgerzah ɓahri, fe mbohna-u ndu̧y su mbamba[110].

²Mí Zezu el ke ɓayu hi̧ niri ɓahri : « I ko ra ko-ko gaŋ le wo ? Kasaw-mboh vuluri ké su kona luki-aw ra, mi ƴo ɓah ɓayay hi̧ wuri, nzukri ɓay haw riw ku̧ siɓa. Kasaw mbew ké ɓay toŋ síɓa ta-a. »

³Ku ka̧h tul kasaw Oliveh. Zezu kaɓ siɓa bale, nzuk-dih fal yeri loh ma ta̧w ye. Ku ɓahri : « Mú ɓah tehɓayu hi̧ na, náh lah. Seh suŋ mí vulri-aw ɓay ɓeɓu le ? Fe sɔkna fe mí ɓay sɔk na gina wo le ? A fe mí ɓay sɔk na ɓahri, sew a ɔh tɔr sewri ka̧h da le ? »

⁴Zezu yih nzak woyri ɓahri : « Í ko-ko rɔkɔ nzuk ɓá hi̧ wuri í reh ful,

⁵ɓayu ké nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Mí ku ɓay ra̧h keni daɓa nzukri.

⁶I ɓay lah ɓay ŋgermuri ma gini ma sa̧. Í ko tul woiri. Í hi̧ law woiri ɓá lu ya. Na ani ani gaŋ kara ŋgermu ɓay laɓu. Keni-aw kara sew a ɔh tɔr sewri ta-a ɓáy.

⁷Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi. Ɗaka ɓay lih puhri, tusiɓa ɓay laŋ yik yik ke gelri ɓoɗ ɓoɗ.

⁸Kosehri-aw ɓa titil fe munu ɓay na kandɔk mahɓil ké kaɓ peŋe ɓay mbuŋna kaŋ.

⁹A woiri ba, ku mgbá wuri ɓay laɓ wuri koseh. Ku í wuri. Sa̧wnzuk a ɓoruri ɓay fu̧y wuri ɓayu ké i ƴo tul riŋ bi.

¹⁰Riŋ bi ba, ɓay na ɓa fe zi̧rma daɓa nzukri. Ku ɓay te haniri, ku ɓay fu̧y haniri.

¹¹Daɓa nzukri ɓay sɔk mun woyri ɓa gun nzak pihna Ŋgerzahri, mí ku ɓa gun nzak pihna Ŋgerzah a fohri, ku hí̧ daɓa nzukri reh ful.

¹²Ɓay tul fe laɓna-saŋ Ŋgerzahri ké ɓay ya̧ gel ya̧h ya̧h, mí law sana daɓa nzukri ɓay el voh ɗeŋ ɗeŋ.

¹³Mí nzukay ké su̧h law ye ké tul riŋ bi si ka̧h hul ye le, ke ti̧h ke ndɔk hul.

¹⁴Kandɔkaw mí ɓaysuki lák mbay Ŋgerzah ɓay seh hi̧ sa̧wnzukri riw ké gelri gbam ɓá lah ɓayu dara mí sew a ɔh tɔr tukala ɓá ka̧h ɓáy.

¹⁵Kaŋ dale nam ké i ko fe ra̧m[111] ké mah kona ya mí nzukri si kan ɓil vul kani ké gel ƴona Ŋgerzah kandɔk ké Danyel gun nzak pihna Ŋgerzah vbeh ɓayu lewsa̧ ra le, nzuk ké ƴo ki̧ mbete-ay ɓá tu ɓa teh-u,

¹⁶nzukri ké ƴo tusiɓa Zude[112] ɓá ɗuk ma tul kasawri wara.

¹⁷Nzuk ké ƴo tul vul ɓá ɗuk fe ye kiriŋ[113]. Ké lu kerɓay-fa̧h fe yeri ké ɓil vul.

¹⁸Nzuk ké ƴo waka ba, ɓá el gi puh ɓay mbi mah gar ye ya.

¹⁹Kúy. Namaw ra mah ɓilri ke mah gun nzak pamri ɓay ko seh mbamba.

²⁰Kaŋ le í goŋ Ŋgerzah ɓay rɔkɔ fe-u ɓá laɓ ke ɓil belem, ɓay rɔkɔ fe-u ɓá laɓ ke nam ɔkna pi[114],

²¹ɓayu ké koseh ɓay kal ŋgɔŋ. Ur ke titilu ké Ŋgerzah laɓ nunmbam ke tusiɓa gi ka̧h guri-ay, sam koseh a kandɔkaw laɓ nzukri bɔk mbew ya ɓáy, mí ta laɓ nam a ɓoru mba wu̧m wara.

²²Ŋgerzah hi̧ nam koseh-awri el fal ya le, nzuk mbew ta tí̧h ke ndɔk hul ya. Mí ɓay tul nzukri ké Ŋgerzah lu ɓa sa̧w ye le, ke ɓay hi̧ namuri el fal.

²³Wara mí nzuk a suŋ suŋ ké ɓahri, í ko, Ŋgermbay mí ƴo-ay, mini, ke ƴo sa̧-aw, le, í ya̧ ɓay ye ya,

²⁴ɓayu ké nzuk nzak rɔknari ɓay sɔk mun woyri ɓa Ŋgermbay ya le, ɓa gun nzak pihna Ŋgerzah. Ku ɓay laɓ fe saŋ a bawu bawuri ke feri ké mah kona ya hi̧ nzukri reh ful. Ku ɓay leh ŋgerna woyri ɓay hi̧ nzukri ké Ŋgerzah lu niri ɓa sa̧w ye ɓá reh ful.

²⁵Í ko, mi ɓah ɓayu hi̧ wuri i lah pol da.

²⁶Kaŋaw ba, gelke nzuk gi ɓah hi̧ wuri ɓahri, í ko, Ŋgermbay ti̧h ƴo ɓil lawkɔr le, í si ri ya. Ku ɓah hi̧ wuri ɓahri, ke kaɓ ɓil vul ké gbu̧h gel sa̧-aw kara í ya̧ ɓayu ya pi,

²⁷ɓayu ké gina gun nzuk pirmatul ké tul nzukri ra ɓay na kandɔk mbam. Mbam sak yela ké fál tí̧h seh kpu̧ru ka̧h fál ríŋ seh hi̧ nzukri riw ko.

²⁸Gel ké hul ɓu ri, sa gelaw mí tamiri mbu̧h ri hani.

²⁹Fal koseh-awri le, seh ɓay sih nduŋ. Few ta teh gel mba pi. Gunwu̧y nunmbamri ɓay ga̧y ku̧ siɓa. Ŋgerna fe nunmbamri[115] ɓay laŋ yik yik.

³⁰Wara mí fe ké sɔk ɓay tul gun nzuk pirmatul ɓay ti̧h ké nunmbam hi̧ nzukri ko dale, sa̧wnzuk tusiɓari gbam, ku vbá̧ haŋ woyri zaɗ zaɗ vuh rew keni. Ku kó gina gun nzuk pirmatul ɓil ɗikmambam ke ŋgerna mbay ye ɓil riŋ ɗina a luki.

³¹Ke píh tem nzak pihna yeri ul baw ti̧w ké mgbe. Ku mbú̧h nzukri ké-e lu ɓa sa̧w ye ke ti̧w tusiɓa ké niŋay gbam ur ke fál tí̧h seh si ka̧h fál ríŋ seh. Ku mbú̧h niri ur ke tusiɓa gbam si ka̧h gel a gbu̧h-u ké nunmbam sa̧.

³²Í ko kpuh nzu̧y, kpuh nzu̧y ƴo sɔk fe ɓay í tu. Gelke kpuh nzu̧y tuŋ mí el loŋ gay dale, i tu ɓahri se, nzak mbam ka̧h da.

³³Kaŋ pi mí gelke i ko feri-aw riw ti̧h le, í tu ɓahri, gun nzuk pirmatul ka̧h nzakful da.

³⁴Ɓa ketina. Mi ƴo ɓah hi̧ wuri ɓahri, gun tukala-ayri ta kal ya, feri-aw gbam ɓá ti̧h dara ɓáy.

³⁵Nunmbam ke tusiɓa ɓay ka-kal, mí ɓay biri ba, ɓay na kpatara.

³⁶Ɓay tu ɓay nam gina gun nzuk pirmatul mini sa̧wseh-u, nzuk mbew ta tu ya. Tem nzak pihna Ŋgerzahri ké ƴo nunmbam kara ta tu ya, gun kara ta tu ya pi. Ɓa baah ke hȩk mí tu,

³⁷ɓayu ké fe ké laɓ ke sew Nuwe ra ɓay laɓ seh-aw ké gun nzuk pirmatul ɓay ti̧h tul nzukri kaŋ pi.

³⁸Dara mbih ɓá ya̧ tusiɓa ra, nzukri toŋ su̧ fe, toŋ nzo fe, wo̧rori ƴo ya̧ wu̧y, bah gunri ƴo hi̧ gun woyri ya̧ wo̧ro, mí fe-u laɓ kaŋ kaŋ si ka̧h nam ké Nuwe rih vul tul mbih.

³⁹Mí ku tu ya kpu̧ru ka̧h nam ké mbih ya̧ niri. Seh ti̧hna gun nzuk pirmatul ké tul nzukri kara ɓay na kaŋ pi.

⁴⁰Wara mí nzukri seɗe ɓay ƴo waka. Ku mbí nzuk a mbewu ba, poŋ nzuk a mbewu ba.

⁴¹Wu̧yri seɗe ɓay ƴo gel-naŋ fe. Ku mbí wu̧y a mbewu ba, poŋ wu̧y a mbewu ba.

⁴²Kaŋaw mí í ƴo tul bɔk ɓay fe le, i tu nam ké Gaŋ woiri ɓay el gi keni ya.

⁴³I tu ɓahri, nzuk puh tu ra sa̧wseh ké riɓa ɓay gi rih fe ye le, ke ta na nam ya. Se-se ɓay ké hi̧ riɓa ɓá haw vul ye.

⁴⁴Sa̧wu mí a woiri kara í ƴo tul bɔk ɓay fe le, i ta tu sa̧wseh ké gun nzuk pirmatul ɓay gi keni ya.

⁴⁵Mí-aw le gun-laɓ pihna ké ker law, ké law ye ƴo mbew ke bahgaŋ ye, ke na ani le ? Bahgaŋ ye hi̧ ni ke ko tul bɔh-laɓ pihna yeri, mí ke wal fe su̧na hi̧ niri ke sa̧wseh-uri gbam.

⁴⁶Pol tehna ɓay na tul ye, a ye ké bahgaŋ ye el gi ziŋ ni ké tul pihna.

⁴⁷Ɓa ketina. Mi ƴo ɓah hi̧ wuri ɓahri se, bahgaŋ ye ɓay el ndoh fe ziŋna yeri gbam ku̧ ndɔk ye.

⁴⁸Gun-laɓ pihna a suya-u ba, ker ɓahri, bahgaŋ ye ra doro-u ɓay ɗih sal sal.

⁴⁹Mí ke ti vba̧ bɔh-laɓ pihna yeri pi, su̧ ɓil ye pi, toŋ nzo yim ziŋ nzuk-ta yimri pi.

⁵⁰Bahgaŋ ye ɓay ti̧h tul ye kpur ke nam ké-e tu ya.

⁵¹Bahgaŋ ye ra ɓay vba̧ ni nun hul, ke mbú̧h ni ziŋ nzuk-mu̧h ketinari ma kala. Gelaw mí ke vúh rew ke mbihnun darara darara. Ke sú̧ sel ye ŋger ŋger.