Read Karang Mbete Matiye 25 Bible Online

Mbete Matiye 25 - Karang bible

Mbete Matiye 25

¹Wara mí lák mbay a nunmbam ɓay na kandɔk wu̧y tiklari boh. Ku fa̧h lampe woyri mí ti̧h ɓay nzɔh nun nzuk mbana[116] ké ƴo gina ɓay ya̧ wu̧y mbana ye, ɓay kú ɓaŋ niri ma gel ti̧hmbih-ya̧ wu̧y.

²Ké sakra wu̧y tiklari-aw, wu̧y a ndiɓi-uri ɓa kɔkɔ. Wu̧y a ndiɓi-uri ba, ru̧-ru̧.

³Kɔkɔri ra ɓaŋ hɔrɔ ɓu lampe woyri, mí ku ti̧h dan num a ɓoru.

⁴Ru̧nari ba, ɓaŋ hɔrɔ ɓu lampe woyri, mí ku ti̧h ke num a ɓoru ké ndɔk woyri.

⁵Nzuk mbana ra gi gah ya gah ya bale, ku duk nam mgbu̧ra mgbu̧ra, mí nam kal niri gba̧y.

⁶Haŋgel bale, ku lah kusol nzuk mgbe ɓeleŋ ɓahri : “Nzuk mbana ra ƴo gina. Í si nzɔh nun ye.”

⁷Wu̧y tiklari ra tom ke nam wuɗ wuɗ, mí ku lek lampe woyri.

⁸Dale kɔkɔri ké ndiɓi ra ku goŋ num ké ta̧w wu̧y tikla a ru̧nari ɓahri : “Í suh num woiri ndi̧ hi̧ na ɓay fe le, hɔrɔ wah ƴo gel rimna.”

⁹Mí ru̧nari ra yih nzak woyri ɓahri : “Nah ta suh-u hi̧ wuri ya. Numu mah lampe wah ke lampe woiri mbɔk ya. Su-su ɓay í tɔr wuri si gel-yeh num. Í yeh num nzuku a woiri.”

¹⁰Ku tɔr si yéh num ra bale, nzuk mbana ka̧h ba. Wu̧y ru̧nari ké lek mun woyri geŋ ni ba, ku si ziŋ ni rih gel ti̧hmbih-ya̧ wu̧y, mí ku tuh ful gbukru kan tul woyri.

¹¹Bol falu bale, kɔkɔri ké ndiɓi ra gi ka̧h gel ti̧hmbih, mí ku vba̧ nzakful ɓay rih ɓil puh-u ɓahri se : “Mbay, mbay wo, í mgbur ful hi̧ na.”

¹²Bale mbay ɓay ɓahri : “Mí mgbur ful hi̧ wuri ley ? Mi tu wuri ya.”

¹³Kandɔkaw mí-i ƴo ɓah hi̧ wuri ɓahri, í ƴo tul bɔk woiri ɓay fe le, i tu nam gina gun nzuk pirmatul ya. Sa̧wseh-u kara i tu ya pi.

¹⁴Ɓayu ké gina gun nzuk pirmatul na kandɔk nzuk mbew ké tɔr si gahru ɓa ɗih-u. Ke ɗi gun-laɓ pihna yeri dale, ke wal fe ziŋna ye ku̧ ndɔk woyri ke gelu gelu.

¹⁵Gun a titilu, ke hi̧ ni lari lɔr ɓa ndiɓi. Gun a seɗe-u, ke hi̧ ni lari lɔr ɓa seɗe. Gun a sayu ba, ke hi̧ ni lari lɔr ɓa mbew. A ge ge le ke hi̧ ni lari mah ŋgerna ye ŋgerna ye, mí ke tɔr si gahru ye ra.

¹⁶Gun-ya̧ lari lɔr ndiɓi ra ti̧h za̧y si yeh fe. Ke ɗam el ziŋ lari lɔr a ɓoru ndiɓi dɔm tulu.

¹⁷Gun-ya̧ lari lɔr seɗe ra laɓ kaŋ pi. Ke tɔr si yeh fe, ke ɗam el ziŋ lari lɔr a ɓoru seɗe dɔm tulu.

¹⁸Gun ké ya̧ lari lɔr mbew ra ba, ke tɔr si ɗeh lɔkɔ, mí ke gɔr lari bahgaŋ ye ra ké ri.

¹⁹Nam kal mah fe dara mí bahgaŋ woyri el ke gel gahru gi ɓáy. Ke hi̧ ku ki̧ fal lari ye ra hi̧ ni.

²⁰Gun ké ya̧ lari lɔr ndiɓi ɓah hi̧ bahgaŋ ye : “Gaŋ bi, i hi̧ mi lari lɔr ɓa ndiɓi, mí-i ziŋ a mbaŋu ɓa ndiɓi dɔm ri ɓa boh mí na-ay.”

²¹Bale bahgaŋ ye ɓah hi̧ ni ɓahri : “Su-su. Mu ɓa gun-laɓ pihna a suki. Law wo ƴo mbew ziŋ mi. Ké mu mgba sa̧w fe bi a ndi̧ ɓa suki-ay le, fe bi a ŋgi̧-u, mi kú̧ ndɔk wo. Mú gi kaɓ ɓil law rihna bahgaŋ wo-ay.”

²²Gun a seɗe-u gi. Ke ɓah hi̧ bahgaŋ ye ɓahri : “Gaŋ bi, i hi̧ mi lari lɔr ɓa seɗe, mí-i ziŋ a ɓoru seɗe dɔm ri ɓa niŋ mí na-ay.”

²³Bale bahgaŋ ye ɓah hi̧ ni ɓahri : “Su-su. Mu ɓa gun-laɓ pihna a suki. Law wo ƴo mbew ziŋ mi. Ké mu mgba sa̧w fe bi a ndi̧ ɓa suki-ay le, fe bi a ŋgi̧-u, mi kú̧ ndɔk wo. Mú gi kaɓ ɓil law rihna bahgaŋ wo-ay.”

²⁴Bale gun-laɓ pihna a a̧y ké ya̧ lari lɔr mbew ra gi. Ke ɓahri : “Gaŋ bi, mi tu ɓahri se, a woiri ra, i kpuh mbamba. Waka ké i pah pay ya mí i ziŋ ri fe pay. Waka ké i mi̧h mi̧hri ku̧ ri ya kara i mbu̧h fe payu mbah pul pi.

²⁵Hȩkme laɓ mi. Mí-i ɗeh lɔkɔ, mi mbek ri lari woiri ra. Fe woiri mí na-ay.”

²⁶Mí bahgaŋ ye fer nzak ye ɓahri : “A wo gun-laɓ pihna-ay law wo ɓa law a pipiri-u, mu ɓa nzuk law hȩkme. Mu tu ɓahri se, waka ké mi pah pay ya, mí-i ziŋ ri fe pay. Waka ké mi mi̧h mi̧hri ku̧ ri ya kara mi mbu̧h fe payu mbah pul pi ra wa,

²⁷ani mú-u poŋ lari bi-ay hi̧ nzuk a ɓoru sɔɓ nunu ɓay mí ziŋ mbihlari a ɓoru dɔm tulu ke elna bi ya le ?

²⁸Kaŋ dale í mgba ni. Í nah lari lɔr ké mbew ra hi̧ nzuk ké ƴo ke lari lɔr ɓa boh-aw.

²⁹Nzuk a suŋ suŋ gbam ké ko fal fe ké bahgaŋ ye ndoh ndɔk ye ɓa suki le, bahgaŋ ye ɓay hi̧ ni a ɓoru dɔm ri hi̧ ŋgi̧na-aw ɓay na hɔtɔk hɔtɔk kal a pol ra ɓáy. Mí nzuk a a̧y ké hi̧ fe bahgaŋ ye ti̧h suk ya bale, fe a ndi̧ ké na ndɔk ye ra ku nah-u kpɔɗ.

³⁰Kandɔkaw mí gun-laɓ pihna a a̧y ké ti̧h suk ya ra, í mgba ni, í vbu ni ɓu kala ɓil tirim. Gelu-aw mí ke vúh rew ke mbihnun darara darara. Ke sú̧ sel ye ŋger ŋger.”

³¹Nam ké gun nzuk pirmatul ɓay el gi ɓil riŋ ɗina ye ke tem nzak pihna yeri gbam le, namu-aw mí ke káɓ ké ndiseŋe tul arŋgaw mbay.

³²Ke ɗí sa̧wnzukri gbam gi pol ye. Ke kéhr nzukri gel seɗe kandɔk nzuk fe hɔlna ké kehr samiri ke guyri kaŋ.

³³Ke mbú̧h samiri ku̧ fál ndɔk lakna ye. Guyri ba, ke kú̧ fál ndɔk kperu ye.

³⁴Wara mí mbay ra ɓay ɓah hi̧ nzukri ké ƴo fál ndɔk lakna ye ɓahri : “Í gi wuri, a woiri ké mgbɔkɔ bah bi ku̧ tul woiri, í ya̧ wuri fe baah ké ɓa lák mbay ye ké-e lek geŋ wuri ke titilu da̧y ké-e ti sa̧w laɓ nunmbam ke tusiɓa.

³⁵Ɓayu ké ɗaka i mi, mí i hi̧ mi fe su̧na, mi su̧. Kɔkmbih i mi, mí i hi̧ mi mbih, mi nzo. Mi gi ɓa gahru, mí i mgba in ziŋ mi.

³⁶Mi ta ke gar ya, mí i ndoh mi gar. Mi na ɓa sena, mí i gi so mi. Ku mgba mi na vul mgbal, mí i gi mgba sa̧w bi pi.”

³⁷Wara mí a woyri sa̧w Ŋgerzah ku ɓay el vbi ni ɓahri : “Gaŋ wah, seh a suŋ mí ɗaka i mu, mí nah hi̧ mu fe su̧na, kɔkmbih i mu, mí nah hi̧ mu mbih nzona le ?

³⁸Seh a suŋ mí mu gi ɓa gahru, mí nah mgba in ziŋ mu le ? Seh a suŋ mí mu ta ke gar ya, mí nah ndoh mu gar le ?

³⁹Seh a suŋ mí mu na ɓa sena, mu na vul mgbal, mí nah mgba sa̧w wo le ?”

⁴⁰Mí Mbay ɓay yih nzak woyri ɓahri : “Ɓa ketina, i ƴo ziŋ mi gaŋ. Mi ƴo ɓah ɓayay hi̧ wuri, suki a suŋ ké i laɓ ziŋ gun bah bi mbew, a ye ké nzukri ko ni ɓa nzuk ya ra, ɓa a bi gaŋ, mí i laɓ ziŋ mi-aw.”

⁴¹Wara mí Mbay ɓay ɓah hi̧ nzukri ké ƴo fál ndɔk kperu ye ɓahri : “Í tɔr wuri ma sa̧, nazi ta wuri. Í si wuri kaɓ ɓil hɔrɔ ké na sew ke sew ɓa ŋgɔh. Hɔrɔ ra lek lewsa̧ ɓa fe mbay záh tukala ke záh nzak pihna yeri.

⁴²Ɓayu ké ɗaka i mi, mí i hi̧ mi fe su̧na ya. Kɔkmbih i mi, mí i hi̧ mi mbih nzona ya.

⁴³Mi gi ɓa gahru, mí i mgba mi gahru ya. Mi ta ke gar ya, mí i hi̧ mi gar ndohna ya. Mi na ɓa sena, mi na vul mgbal, mí i si so mi ya.”

⁴⁴Wara mí ku ɓay el ɓah hi̧ Mbay ɓahri : “Gaŋ wah, seh suŋ mí ɗaka i wuri, kɔkmbih i wuri, i gi ɓa gahru, i si diŋ ndikpo, i na ɓa sena, i na vul mgbal, mí nah so wuri ya le ?”

⁴⁵Wara mí Mbay ɓay el ɓahri : “Ɓa ketina, i saŋ mi gaŋ. Mi ƴo ɓah ɓayay hi̧ wuri, fe ké i poŋ laɓ ziŋ gun bah bi, a ye ké nzukri ko ni ɓa nzuk ya-aw, ɓa a bi gaŋ, mí i poŋ laɓ ziŋ mi-aw.”

⁴⁶Nzukri ké ƴo fál ndɔk kperu ye-aw, ku ɓay tɔr si gel ké vba̧na kal law nzukri sew ke sew ɓa ŋgɔh. Nzukri ké tu Ŋgerzah ɓa záh woyri ba, ku káɓ ke ɔkna sew ke sew ɓa ŋgɔh. »