Read Karang Mbete Matiye 26 Bible Online

Mbete Matiye 26 - Karang bible

Mbete Matiye 26

¹Zezu ɓah ɓayri-aw ɔh ba, ke ɓah hi̧ nzuk-dih fal yeri ɓahri se : « A woiri i tu da. Toŋ nam seɗe ɓay ti̧hmbih-i guy buma ɓá ti, mí ku ndóh gun nzuk pirmatul ndɔk Rɔmri hi̧ kú ɓar ni ké tul kpuh vbatay. »

³Ɓil sa̧wseh-u-aw ŋgernzuk fe puhna Ŋgerzahri ke ŋgernzuk puh woyri gun Izarayelri, ku mbu̧h haniri ké kerpuh ŋgernzuk fe puhna, a ye Kayif.

⁴Ku lek ɓay mgba ni ke kuŋɓay, le kú i ni.

⁵Ku ɓahri se, ku ta mgba ni ke nam ti̧hmbih ya rɔkɔ nzukri ɓá ur ŋgermu.

⁶Zezu si Beɗtani ké kerpuh Simu ké ndɔɓe nzom ké mun ye. Ku kaɓ nzak fe su̧na bale, wu̧y a hani rih si tul Zezu ke kuh num ba̧ri a suki ké lari-u ŋger mbamba, mí ke fer numu ku̧ tul Zezu.

⁷

⁸Nzuk-dih fal yeri ko fe ké wu̧yaw laɓ, mí nun woyri si̧h. Ku ɓahri, sam fe ɓeɓna fe mí kaŋ le ?

⁹Numay ɗam le, ɓay ziŋ lari ɓa ŋgi̧-u mah so keni ko̧hkori.

¹⁰Zezu tu su̧hɓay woyri, mí ke ɓahri : « Ɓay fe mí i ƴo law wu̧yay ke ɓay le ? Fe ké-e laɓ ziŋ mi-ay na ɓa suki.

¹¹Ko̧hkori ƴo ziŋ wuri kpatara. A bi ba, mi káɓ ziŋ wuri kpatara ya.

¹²Num ké wu̧yay fer ku̧ mun bi-ay, ɓa num-gɔr mi munu.

¹³Ɓa ketina, mi ƴo ɓah ɓayay hi̧ wuri, gelri riw kú-u ka-kah ɓaysuki hul bi ké ri le, ku hí̧ riŋ ɗina wu̧yay mgbe pi. »

¹⁴Wara mí Zudas Isikariyoɗ nzuk-dih fal ye mbew ké sakra nzuk-dih fal ye a boh falu seɗeri si ta̧w ŋgernzuk fe puhna Ŋgerzahri.

¹⁵Ke ɓahri : « A fe mí i hí̧ mi ɓay mí ndoh ni ndɔk woiri le ? » Mí ku ten lari ɓa bon say hi̧ ni[117].

¹⁶Ur ke seh-u mí ke mu̧h kpɔl ƴo geŋ sa̧wseh a a̧y ké-e ɓay ndoh Zezu ké ndɔk woyri.

¹⁷Nam a titilu ɓil nam ti̧hmbih-su̧ peŋ dan is ka̧h. Nzuk-dih fal Zezuri vbi ni ɓahri : « Fál suŋ mú-u yih ɓay náh lek gel fe su̧na ti̧hmbih-i guy buma wahri ké ri ɓay náh su̧ fe le ? »

¹⁸Mí ke ɓahri : « Í si wuri ɓil puh-aw[118] ké ta̧w nzuk mbew. Í ɓah hi̧ ni ɓahri, metere ɓahri, nam ye ka̧h da. Ké kerpuh wo mí metere ƴo gi ɓay su̧ fe su̧na ti̧hmbih ke nzuk-dih fal yeri ké ri. »

¹⁹Nzuk-dih fal Zezuri ra laɓ kandɔk ké-e pih niri, mí ku lek fe su̧na ti̧hmbih-i guy buma ra.

²⁰Seh riŋ bale, Zezu kaɓ nzak fe su̧na ke nzuk-dih fal ye a boh falu seɗeri.

²¹Ku ƴo su̧ fe, mí Zezu ɓahri : « Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. »

²²Nzuk-dih fal yeri lah ɓayu kaŋ ba, law woyri rih niri mba. A ge ge le ɓah hi̧ Zezu ɓahri : « Gaŋ bi, a bi ya, ra ma ? »

²³Mí ke yih nzak woyri ɓahri : « Nzuk ké kaɓ nzak fe su̧na-ay ziŋ mi[119], a ye mí ke ɓay te mi.

²⁴Gun nzuk pirmatul ɓá hu kandɔk ɓay gun nzak pihna Ŋgerzah a lewsa̧ri vbeh kaŋ. Kúy. Koseh ƴo geŋ nzuk ké te ni. Koseh ké ƴo geŋ nzuku-aw, mah le, mbuŋ ni ya mí su. »

²⁵Bale Zudas nzuk-te ni ra ɓah ɓay ra ɓahri : « Metere, a bi ya, ra ma ? » Zezu ɓahri : « Ɓayu ti̧h ke nzak wo da. »

²⁶Zezu ke nzuk-dih fal ye a boh fal seɗeri ƴo su̧ fe, ke mbi peŋ, ke el ke tumbɔl hi̧ Ŋgerzah, mí ke gɔh. Ke wal hi̧ nzuk-dih fal yeri ɓahri : « Í ya̧, í su̧. Peŋay ɓa mun bi. »

²⁷Ke mbi koɓ a ŋga̧h sal in[120]. Mí ke el ke tumbɔl hi̧ Ŋgerzah, ke ndar hi̧ niri. Ke ɓahri : « Í nzo ndi̧ ndi̧ gbam woiri.

²⁸Yimay ɓa sem bi ké Ŋgerzah ŋga̧h sal in ziŋ daɓa nzukri. Semu fer ku̧ siɓa ɓa sem ké lu salɓay suya ké tul woyri.

²⁹Mi ƴo ɓah ɓayay hi̧ wuri, mi ta nzo mbih lehna kpuh viyȩh ti̧hmbih-ay mba ur ke aŋay. Namu ké mi ɓay mbi koɓ a a̧y ɓa a foyu ɓa nam ké mi ɓay nzo mbih lehna kpuh viyȩh-ay ziŋ wuri ké puh lakna bah bi[121]. »

³⁰Kandɔkaw ku ɗi siŋ pirna hi̧ Ŋgerzah fal fe su̧na ti̧hmbih, mí ku ti̧h si tul kasaw Oliveh.

³¹Wara mí Zezu ɓah hi̧ niri ɓahri : « Riŋ bi ɓay ti̧h ɓa ndaw lihna hi̧ wuri gbam ke suŋay. I ɗúk poŋ mi kandɔk ɓay ké mbete bolkusol Ŋgerzah ɓah lewsa̧ ɓahri, ke ɓay i nzuk-hɔl sami le, samiri ɓay zikri kparki kparki[122].

³²Fal ti̧hna bi ke puh záh ke pa̧ymun a foyu dale, mi sí pol hi̧ wuri ma tusiɓa Galile. »

³³Mí Piyer el ke ɓay ɓahri : « Nzukri gbam poŋ mu kara a bi mi ta poŋ mu ya gaŋ. »

³⁴Zezu ba, el ɓah ra ɓáy ɓahri : « Mu ɓay poŋ mi ɓa ketina. Mi ƴo ɓah hi̧ mu ɓahri se, suŋay gaŋ dara tuhndoy mgbal ɓá kah le, mu má̧y ɓay tul bi bɔk say ɓahri, mu tu mi ya. »

³⁵Piyer ɓahri : « Ɓa ra hul gaŋ kara mi hú ziŋ mu. Mi má̧y ɓay tul wo ya. » Tɔr nzuk-dih fal ye a ɓoruri gbam ɓah kaŋ pi.

³⁶Wara mí Zezu ke nzuk-dih fal yeri si ka̧h gel a hani ké tul kasaw Oliveh. Riŋ gelu ɓa Gesemani. Ke ɓah hi̧ nzuk-dih fal yeri ɓahri : « Í kaɓ gelay geŋ mi. Mí si ɓah ɓay ziŋ Ŋgerzah ké sa̧-aw. »

³⁷Ke fa̧h Piyer ke gun Zebederi ké seɗe si ziŋ ni. Law ye se ni kal ŋgɔŋ, law ye titil kuŋna.

³⁸Wara mí ke ɓah hi̧ Piyer-ri ɓahri : « Law sena mbaŋ law bi mah hul. Í kaɓ ke nun geŋ mi. »

³⁹Ke loh tɔɓ ké ta̧w woyri, mí ke guɓ siɓa ke nzaklaw ye ƴo goŋ Ŋgerzah. Ke ɓahri : « Baah, ful a ɓoru ƴo ra ri ɓay hi̧ koɓ haŋ fa̧hna wo ké tul suya nzukri ɓá kal le, mú loh ma fal hi̧ mí nzo ya[123]. Keni-aw kara mú laɓ fe ké law bi yih ya. Mú laɓ fe ké mu yih ma. »

⁴⁰Zezu ur el si ta̧w nzuk-dih fal yeri ké say ra, mí ke ziŋ niri ké tul nam. Ke ɓah hi̧ Piyer ɓahri : « Ŋgerna-kaɓ ke nun geŋ mi sa̧wseh mbew mba mu ley ?

⁴¹Í ƴo tul bɔk. Í goŋ Ŋgerzah rɔkɔ fe-leh law ɓá ndih wuri. Tem nzuk yih ɓay laɓ suki, mí huhrumun nzuk mah ya. »

⁴²Ke el si gel goŋ bah ye ra ɓáy. Ke ɓah ra ɓáy : « Baah, ful a ɓoru ɓay hi̧ koɓ haŋ fa̧hna wo ké tul suya nzukri ɓá kal ra ta-a, mah ɓay mí nzo le, mú hi̧ fe-u ti̧h kandɔk ké mu yih. »

⁴³Ke el gi ta̧w nzuk-dih fal yeri ké sayaw, mí ke ziŋ niri tul nam. Nam laɓ niri ro̧ko ro̧ko.

⁴⁴Ke poŋ niri na nam, ke el a bɔk sayu si gel-ɓah ɓay ziŋ bah ye. Ke el ɓah ra ɓáy.

⁴⁵Wara mí ke el si ta̧w nzuk-dih fal yeri. Ke ɓahri : « I toŋ ɔk mun woiri ɓil nam ɓáy le ? Í ko, sa̧wseh gun nzuk pirmatul ka̧h da. Ku gi ɓay ndoh ni ndɔk nzuk suyari.

⁴⁶Ur síɓa, náh si nzɔh nun woyri. Í ko nzuk-te mi ké gi-aw. »

⁴⁷Ke ƴo ɓah ɓay kɔɓ ɓáy bale, í ko, Zudas ké ƴo sakra nzuk-dih fal ye a boh falu seɗeri ra nda pol daɓa nzukri ɓa ŋgi̧-u gi ti̧h tul ye. Nzukuri mgba mahwu̧yri ke kpuhri ké ndɔk woyri gbiri gbiri. Ŋgernzuk fe puhna Ŋgerzahri ke ŋgernzuk gun Izarayelri mí pih niri.

⁴⁸Nzuk-te Zezu ra sɔk niri fe kú-u ɓay tu ni keni. Ke ɓahri se : « Nzuk a a̧y ké mi hu̧hru ma law bi le, ɓa a ye munu. Í mgba ni. »

⁴⁹Zudas ɓá ka̧h ké ta̧w Zezu bale, ke hu̧hru ni ma law ye ɓahri se : « Soko woiri metere bi. »

⁵⁰Mí Zezu ɓah hi̧ ni ɓahri : « Ya̧h, mu gi da. » Wara mí ku mgba ni.

⁵¹Í ko. Nzuk mbew ké sakra nzuk-dih fal Zezuri lu mahwu̧y, mí ke te gaysuk gun-laɓ pihna ŋgernzuk fe puhna Ŋgerzah fekeɗ kuŋ.

⁵²Wara mí Zezu ɓahri : « El ke mahwu̧y wo ndoh vulu. Nzuk ké i hul ke mahwu̧y le, ke hu hul mahwu̧y pi.

⁵³Uwa, mu tu ya le wo ? Mi goŋ ra bah bi Ŋgerzah sona le, ke píh tem nzak pihna ye a ŋgermuri ho̧k ho̧k[124] hi̧ mi ya le ?

⁵⁴Mí-aw ra wa, ɓay ké na ɓil mbete Ŋgerzah ra ɓay laɓ ƴo gelu ani ɓáy le ? Ɓay fe le ɓa ra fe fe gaŋ kara ɓay Ŋgerzah ɓay laɓ kandɔk ké-e ɓah. »

⁵⁵Sa̧wseh-u, Zezu ɓah hi̧ daɓa nzukri ra ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ? Nam ke nam mi kaɓ ɓil ila vul kani Ŋgerzah ƴo firma nzukri ɓay ye, mí i mgba mi ya.

⁵⁶Mí fe-ay gbam ti̧h da hi̧ ɓay ké na ɓil mbete vbehna gun nzak pihna Ŋgerzahri laɓ ƴo gelu. » Wara mí nzuk-dih fal yeri ɗuk poŋ ni.

⁵⁷Nzukri ra mgba Zezu mí maŋ ni si ka̧h kerpuh Kayif ŋgernzuk fe puhna Ŋgerzah. Nzuk-sɔk mbete bolkusol Ŋgerzahri ke ŋgernzuk gun Izarayelri mbu̧h ri hani geŋ ni.

⁵⁸Piyer ba, mbehle sina fal woyri si ka̧h kerpuh ŋgernzuk fe puhna Ŋgerzah ra. Ke rih, mí ke kaɓ ziŋ gun-laɓ pihna ŋgernzuk fe puhna Ŋgerzahri ɓay ko ani mí ɓayu ɓay ɔh le.

⁵⁹Ŋgernzuk fe puhna Ŋgerzahri ke ŋgernzuk-kuŋ salɓay a ɓoruri gbam ba[125], ku ƴah nzukri ké ɓay kuŋ ɓay ku̧ nzak Zezu ɓo ŋgernzukri ɓá kuŋ salɓay hul kan tul Zezu.

⁶⁰Daɓa nzukri gi kuŋ ɓayri ɓoɗ ɓoɗ ku̧ nzak ye, mí ɓay woyri-aw mgba tul ye mbew ya. Ɔh tɔru bale, nzukri seɗe gi.

⁶¹Ku ɓahri : « Gunwo̧ro-ay ɓahri se, ke mah ɓay haw vul kani Ŋgerzah. Ɓil nam say mí ke él mboh ƴo gelu. »

⁶²Mí ŋgernzuk fe puhna Ŋgerzah ur síɓa wuɗ. Ke ɓahri : « Ɓay ké nzukri laɓ kan tul wo-ay ra wa, mu fer ɓayu ya le wo ? »

⁶³Zezu ƴo ɗeŋ. Mí ŋgernzuk fe puhna Ŋgerzah ra el ɓahri : « Mú hah mun wo ke riŋ Ŋgerzah a ye Ŋgɔhnzuk, mú ɓah nzak wo hi̧ náh lah, mu ɓa Ŋgermbay, gun Ŋgerzah ra le ? »

⁶⁴Zezu ɓahri : « Ɓayu ti̧h ke nzak wo. Ɓay a ɓoru-ay ƴo ri. Mi ƴo ɓah ɓayay hi̧ wuri, ur ke guri-ay, i ɓay ko gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye. I kó gina ye ɓil ɗikmambam ur ke nunmbam[126]. »

⁶⁵Wara mí ŋgernzuk fe puhna Ŋgerzah gɔh gar mun ye tir. Ke ɓahri se : « Nzukay fah Ŋgerzah munu. Nah zɔklɔ mun wahri ɓay tul ɓay a lah-u ɓáy le ? A woiri i lah nzak ye ké fah Ŋgerzah.

⁶⁶Kerɓay woiri na ani ké tul ye le ? » Ŋgernzuk-kuŋ salɓayri yih nzak ŋgernzuk fe puhna Ŋgerzah ra ɓahri : « Ke mah hul gaŋ. »

⁶⁷Wara mí ku sa-sam ku̧ nun ye. Ku ɗur ni, ku mbal ni.

⁶⁸Ku ɓahri : « A wo Ŋgermbay, Ŋgerzah ɓá ndoh riŋ nzukri ké vba̧ mu-ay ké nzak wo, mú ten hi̧ na. »

⁶⁹Piyer ba, kaɓ ɓil kerpuh ŋgernzuk fe puhna Ŋgerzah ra bale, gun kaɓna a wu̧yu gi ta̧w Piyer. Ke ɓahri : « A wo ra mu ɓa bɔh sina Zezu ké Galile ra pi. »

⁷⁰Mí Piyer ma̧y ɓay ké pol daɓa nzukri ɓahri : « Mi tu sam ɓay wo ké mu ɓayay ya. »

⁷¹Bale Piyer loh si ƴo nzak ila, mí wu̧y a ɓoru ɓa gun kaɓna ko ni, mí ke ɓah hi̧ nzukri ké ƴo ri-aw ɓahri : « Gunwo̧ro-aw ɓa bɔh sina Zezu ké Nasareɗ ra. »

⁷²Piyer ma̧y ɓay ra ɓáy. Ke hah mun ye ɓahri se : « Bɔk mbew bi gel-tu nzuk ra ya. »

⁷³Bol falu ndi̧ bale nzukri ké ƴo ri-aw loh si ta̧w ye, mí ku ɓahri : « Ketina. A wo-ay, mu ƴo sakra nzuk yeri ɓayu ké sam ɓay ɓahna wo-ay mí ten mu ɓa ziɓ a tusiɓa Galile. »

⁷⁴Wara mí Piyer hah hul ɓahri : « Bɔk mbew bi gel-tu nzuk ra ya. » Sa gelaw mí tuhndoy mgbal kah koŋroŋ.

⁷⁵Mí Piyer ker si tul ɓay ké Zezu ɓahri, dara tuhndoy mgbal ɓá kah le, a ye ke má̧y ɓay tul Zezu bɔk say ɓahri, ke tu ni ya. Kandɔkaw Piyer ti̧h kala mí nduh mahrew. Ke vuh ke mbihnun vɔh vɔh.