Read Karang Mbete Matiye 27 Bible Online

Mbete Matiye 27 - Karang bible

Mbete Matiye 27

¹Tipele za̧y bale ŋgernzuk fe puhna Ŋgerzahri ke ŋgernzuk gun Izarayelri ŋga̧h tul ɓay woyri ɓay i Zezu.

²Ku ŋga̧h ni si keni ndoh ndɔk Pilaɗ ké sezar pih ni ɓa guvener tusiɓa Zude.

³Wara mí Zudas nzuk-te Zezu ra ko ŋgernzukri kuŋ salɓay hul kan tul Zezu bale, law ye se ni ɗɔk ɗɔk, mí ke el si ke lari ké bon say ra hi̧ ŋgernzuk fe puhna Ŋgerzahri ke ŋgernzuk gun Izarayelri.

⁴Ke ɓahri : « Mi laɓ suya. Mi te nzuk law a teh-u. » Mí ku ɓahri : « Ɓay wah ta-a. Ɓay wo sa̧ munu. »

⁵Zudas ba, mȩk lari ra wa̧y ku̧ siɓa ké vul kani Ŋgerzah, mí ke tɔr si tasol[127] i tul ye.

⁶Ŋgernzuk fe puhna Ŋgerzahri fa̧h lari ra, mí ku ɓahri : « Lari-ay ɓa lari sem. Suya ɓay ɓaŋ fe-u mbu̧h ke lari fe hi̧na Ŋgerzah. »

⁷Bale ku lek ɓay ké haŋsekle woyri, mí ku si yeh keni waka nzuk-mboh iri laɓ gelu ɓa gel-gɔr hul sa̧wnzuk a ɓoruri.

⁸Sa̧wu mí nzukri ƴo ɗi waka-aw ɓa Waka Sem ka̧h guri-ay.

⁹Wara mí ɓay ké Zeremi gun nzak pihna Ŋgerzah a lewsa̧ vbeh ra laɓ ƴo gelu. Ɓayu ɓahri, gun Izarayelri mgba tul nzuk-hɔl sami mah ke lari bon say.

¹⁰Mí ku ya̧ lari-u si yeh keni waka nzuk-mboh iri. Fe-u laɓ kandɔk ké Ŋgerzah ɓah hi̧ gun nzak pihna[128].

¹¹Mí Zezu ƴo pol guvener. Guvener vbi ni ɓahri : « A wo mú-u ɓa mbay ziɓri ra le ? » Zezu ba, yih nzak ye ɓahri : « Nzak wo mí ɓah-aw. »

¹²Ŋgernzuk fe puhna Ŋgerzahri ke ŋgernzuk gun Izarayelri dir ɓay ku̧ tul Zezu, mí ke fer ɓay ya.

¹³Wara mí Pilaɗ ɓahri : « Daɓa ɓayri kú-u goh mu keni-ay ra wa, mu lah ya lo ? »

¹⁴Mí Zezu fer ɓay mbew ya. Fe-u na guvener Pilaɗ ɓa saŋ hi̧ ni ke kaɓ yer.

¹⁵Gelke ti̧hmbih-i guy buma ka̧h le, guvener ƴo sel mgbal mbew ɓa fe laɓna ye. Ke ƴo sel mgbal a a̧y ké ziɓri yih ɓayu.

¹⁶Ké mbihmbamu-aw, mgbal a hani mbew ƴo ri. Riŋ ye ɓa Bar-Abba. Ɓay fe laɓna ye ya̧ gelri gbam.

¹⁷Mí gun Izarayelri mbu̧h ké ndiseŋe bale, guvener vbi niri ɓahri : « Mí sel nzuk a suŋ le ? Ké sel Bar-Abba mini Zezu ké i ɗi ɓa Ŋgermbay ra le ? »

¹⁸Pilaɗ tu ɓahri se, ɓa sere mí ku ndoh Zezu ndɔk ye.

¹⁹Pilaɗ kaɓ ndiseŋe tul arŋgaw mbay, mí wu̧y ye pih nzak pihna si ka̧h ni ɓahri se : « Mú lu mun wo ke ɓil ɓay nzuk law a teh-u-aw ma fal. Kerɓay zɔklɔ mi ɓay lɔlɔ a suya-u ké mi lɔl ziŋ ni ke suŋay. »

²⁰Ŋgernzuk fe puhna Ŋgerzahri ke ŋgernzuk gun Izarayelri ndoh ɓay ɓil law daɓa nzukri hi̧ kú sɔk Pilaɗ ɓá sel Bar-Abba. Zezu le kú i ni i.

²¹Pilaɗ vbi ɓay ra ɓáy ɓahri : « Ké sakra nzukri ké seɗe ra wa, a ge mí i yih ɓay mí sel ni le ? » Mí ku ɓahri : « Bar-Abba mí mú sel ni. »

²²Pilaɗ ɓahri : « Mí-aw ba, a fe mí-i láɓ ziŋ Zezu ké i ɗi ni ɓa Ŋgermbay ra le ? » Gbam woyri ɓahri : « Ɓar ni ɓar gaŋ. »

²³Pilaɗ ba, ɓahri : « Suya fe gaŋ mí ke laɓ mah ziŋ hul ké tul kpuh vbatay le wo ? » Bale ku vba̧ nzak ɓa mgbe-u gurum gurum : « Ɓar ni ɓar gaŋ. »

²⁴Pilaɗ ko ɓahri, gosoɓay mba ni. Su̧hɓay gun Izarayelri mgbe goɗoɗo goɗoɗo le, el mgbe ra ɓáy bale, Pilaɗ ya̧ mbih, mí ke wɔk ndɔk ye ké nun nzukri gbam. Ke ɓahri se : « Mi ta ɓil ɓay hul nzuk law a teh-u-ay ya. Ɓa ɓay woiri sa̧. »

²⁵Bale gun Izarayelri gbam el ke ɓayu ɓahri : « Ɓay hul ye-aw le, nah ya̧ ku̧ tul wah ke tul gun wah pi. »

²⁶Wara mí Pilaɗ sel Bar-Abba. Zezu ba, ke ndoh ni ndɔk soze yeri. Ku zɔr ni ke ndehdɔŋ dara kú ɓar ni ɓáy.

²⁷Wara mí sozeri kal ziŋ ni rih ɓil kerpuh guvener, mí ku ɗi tɔr soze a ɓoruri gbam gi mbu̧h tul ye.

²⁸Ku lu gar ye, ku el ndoh ni mah gar mbay ké si̧h hola hola.

²⁹Ku kaŋ ŋgatukru ɓa guɓatul mbay ndoh tul ye. Ku ndoh ka̧wkpuh ɓa mahwu̧y mbay ké ndɔk lakna ye. Ku huk pol ye, mí ku sak ni kandɔkay : « Soko woiri wo, mbay ziɓri. »

³⁰Ku sa-sam ku̧ nun ye, mí ku nah ka̧wkpuh ké ndɔk ye ra vba̧ tul ye keni kɔy kɔy.

³¹Ku sak ni mah niri bale, ku lu mah gar mbay ra el ndoh ni gar ye, mí ku si ziŋ ni ma gel-ɓar nzukri ké tul kpuh vbatay.

³²Sina woyri ku ko nzuk Siren[129] a hani ƴo kalna. Riŋ ye ɓa Simu. Sozeri hah ni suk kpuh vbatay hul Zezu.

³³Ku ka̧h gel kú-u ɗi ɓa Golgota. Golgota sɔk ɓahri, gbogbotul.

³⁴Ku hi̧ ni yim kú-u zukru ke sa̧wkpuh mir[130]. Zezu pu̧h ruɓ, mí ke sa nzo ya.

³⁵Ku ɓar ni ké tul kpuh vbatay bale, ku fa̧h gar ye kehr ku̧ ke gelu gelu, ku nda ɓele keni[131].

³⁶Ku kaɓ ƴo kɔr ni.

³⁷Gbekre kú-u vbeh fe salɓay hul ye kan ri, ku ɓar fál síɓa tul ye. Salɓayu vbeh kandɔkay : « Zezu mí na-ay mbay ziɓri. »

³⁸Wara mí ku ɓar nzukbaa ŋgomnari seɗe ké ta̧w ye[132], nzuk a mbewu ké fál ndɔk lakna ye, nzuk a seɗe-u ba, ké fál ndɔk kperu ye.

³⁹Nzukri ké ƴo kalna le te tul woyri ɓoko ɓoko ƴo far ni keni[133].

⁴⁰Ku ɓahri : « A wo ké mu ɓahri, mu háw vul kani Ŋgerzah, mí ɓil nam say le, mu él mboh ƴo gelu ra, mú ya̧ mun wo. Ké mu ɓa gun Ŋgerzah ra, mú ɗer ke tul kpuh-ay. »

⁴¹Kaŋ pi mí ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk gun Izarayelri ƴo sak ni.

⁴²Ku ƴo ɓahri : « Ke ya̧ nzuk a ɓoruri, mí ke mah ya̧ mun ye ya dih. Mbay gun Izarayelri ra ké ɗer ke tul kpuh-ay hi̧ na náh ko dara náh kán law wah tul ye ɓáy.

⁴³A ye ké-e poŋ mun ye hi̧ Ŋgerzah ra, Ŋgerzah yih ɓay ye le, ké ten ni ke ɓil ɓayay, ɓayu ké-e ɓahri se, Ŋgerzah mí ɓa bah ye. »

⁴⁴Nzukbaa ŋgomnari kú-u ɓar niri ké ta̧w ye kara ƴo far ni pi.

⁴⁵Seh ƴo tul puh bale tirim ya̧ gel kpu̧ru ka̧h sa̧wseh say bɔklew.

⁴⁶Sa̧wseh say ka̧h, mí Zezu ɗi fe ɓeleŋ ɓahri : Eli, Eli lema sabaktani ? Ɓayu yih ɓahri, Ŋgerzah bi, Ŋgerzah bi wo, ɓay fe mú-u poŋ mi diw le[134] ?

⁴⁷Nzuk a haniri ké ƴo ɗih ya ɓá lah fe ɗina ye ra bale, ku ɓahri : « Nzuk ra ɗi Eli gun nzak pihna Ŋgerzah a lewsa̧. »

⁴⁸Nzuk mbew ké sakra woyri ba, ur ke ɗukna si mbi sifoŋ ŋga̧h ké nzak ka̧wkpuh mí sa̧h ke yim a su̧h-u[135]. Ke ndar si tuŋ nzak Zezu ɓay ké ƴo̧k.

⁴⁹Nzuk a ɓoruri ƴo ɓah hi̧ nzuk ra ɓahri, ké poŋ, kú ko, Eli gun nzak pihna ra ɓay gi ya̧ ni mini ani le ?

⁵⁰Zezu el vba̧ nzak ɓeleŋ ɓáy bale, ke poŋ tem mun ye tɔr si záh.

⁵¹Mí í ko, baw gar a yih-u ké kuŋ gel ƴona Ŋgerzah ke gel ƴona nzukri ké ɓil vul kani[136] gɔh tir ke síɓa ka̧h siɓa poŋ gel ƴona Ŋgerzah na ŋgah. Tusiɓa laŋ yik yik. Fihriri sak ɓukuku ɓukuku pi.

⁵²Tupalri mgbur na ŋgah ŋgah hi̧ sa̧w nzuk Ŋgerzahri kú-u poŋ tukala lewsa̧ ra, ku ti̧h ke pa̧ymun a foyu.

⁵³Ku ti̧h ke lɔkɔ hul woyri fal ti̧hna Zezu ke pa̧ymun a foyu, mí ku si rih ɓil puh ké law Ŋgerzah te sa sari[137] hi̧ daɓa nzukri ko niri ko-ko.

⁵⁴Kumandah ke soze yeri ké ƴo kɔr gel-ɓar Zezu ra ko tusiɓa ké laŋ pi, ku ko fe a ɓoruri ké kal kaŋ pi, mí tem mun woyri ti̧h kereŋ kereŋ. Ku ɓahri se : « Nzukay, ke ɓa gun Ŋgerzah gaŋ. »

⁵⁵Daɓa wu̧yri ƴo ri. Ku ƴo ɓa ɗih-u ké sar gel ké gel-ɓar ni ƴo ko kona.

⁵⁶Wu̧y a hani-uri ur ke tusiɓa Galile ƴo dih fal Zezu, ku so ni. Ké sakra wu̧yri ra Mari ké Makdala, Mari mah Zak ke Zezeɓ, wu̧y Zebede pi.

⁵⁷Nzuk fe ziŋna a hani mbew ƴo ri[138]. Riŋ ye ɓa Zezeɓ ké Arimate. Ke dih fal Zezu pi. Seh na nzȩh bale, ke si ta̧w Pilaɗ vbi ni hul Zezu. Wara mí Pilaɗ pih bolnzak hi̧ soze yeri ɓay kú poŋ ful hi̧ Zezeɓ ɓá ɗer hul Zezu.

⁵⁸

⁵⁹Ke ɗer hul Zezu, mí ke kuh hulu ke ladara a puki ké taŋ fi̧nak fi̧nak.

⁶⁰Ke mbi si mbek ké ɓil hoh kasaw kú-u fel lewsa̧ ɓay mbek hulri ɓilu. Hoh-u ku mbek ri hul mbew ya ɓáy. Ku kikri mah kasaw mbih nzaku, mí ku tɔr.

⁶¹Mari ké Makdala ke Mari a ɓoru ƴo ri. Ku kaɓ ƴo ko kona ma hoh kasaw ra.

⁶²Tipele-u ké nam a seɗe-u ɓil nam ti̧hmbih-i guy buma, ŋgernzuk fe puhna Ŋgerzahri ke fariziri si ta̧w Pilaɗ.

⁶³Ku ɓahri : « Mbay, nah ker ɓay si tul ɓay ké nzuk nzak rɔkna ɓah ra. Seh ké-e ƴo ke nun ɓáyaw, ke ɓahri se, nam a sayu fal hul ye le, ke él kaɓ ke nun.

⁶⁴Kaŋaw mí mú pih bolnzak hi̧ sozeri ɓá kɔr tupal ye ra ka̧h nam a sayu rɔkɔ nzuk-dih fal yeri ɓá gi rih hul ye, mí ku él ɓah hi̧ gun Izarayelri ɓahri, nzukaw ti̧h ke puh záh el kaɓ ke nun. Dale ɓay fe rɔkna woyri-aw ɓay suya kal fe rɔkna a pol ka-kal. »

⁶⁵Pilaɗ yih nzak woyri ɓahri : « Sozeri ra mí kaɓaw. Í hi̧ niri kú si kɔr tupal ra kandɔk ké i tu-tu ra. »

⁶⁶Kandɔkaw mí ku si, ku ri̧h nzak tupal ra el laɓ zezele fe guvener kan ri dara ku hi̧ sozeri ra kɔr ɓáy.