Read Karang Mbete Matiye 28 Bible Online

Mbete Matiye 28 - Karang bible

Mbete Matiye 28

¹Nam a seɗe-u ɓil nam ti̧hmbih-i guy buma ɓa baw nam ɔkna kal. Nam ti̧hmbih a sayu ka̧h da. Namu ɓa nam a titilu ɓil dimasi. Gel pele, Mari ké Makdala ke Mari a ɓoru, ku ti̧h ɓay si ko tupal Zezu.

²Ɓil namaw mí tem nzak pihna Gaŋ tul feri riw ɗer ke nunmbam gi. Í ko, tusiɓa laŋ yik yik kikri mah kasawaw vbu fál mbew, mí tem nzak pihna-aw kaɓ tulu.

³Mun ye ndu̧y kandɔk sakna mbam. Gar ye pu kpa̧h kpa̧h[139].

⁴Sozeri ké kɔr tupal ra, mun woyri to kpak kpak ɓa hȩkme. Ku lih siɓa kandɔk hulri kaŋ. Bol falu wu̧yri ka̧h tupal.

⁵Tem nzak pihna ra ko wu̧yri ra bale, ke ɓahri : « Í laɓ wuri hȩkme ya. Mi tu ɓahri se, i ƴo ƴah hul Zezu kú-u ɓar ni ké tul kpuh munu.

⁶Hul ye ta gelay ya ɓayu ké-e ti̧h ke puh záh ke pa̧ymun a foyu kandɔk ké-e ɓah ɓayu pol ra. Í gi wuri ko gel-mbek hul ra ké na-ay.

⁷Í si gah, í ɓah hi̧ nzuk-dih fal yeri ɓahri, Zezu ti̧h ke puh záh ke pa̧ymun a foyu. Í lah wuri, ke tɔr pol hi̧ wuri ma Galile. Ku zíŋ ni ké ri. Í lah, mi ɓah hi̧ wuri da. »

⁸Wu̧yri ra el ti̧h ke ɓil hoh kasaw-mbek hul ra ke hȩkme pi ke law rihna a luki pi. Mí ku ti̧h ɓa gah-u ke ɗukna si ɓah ɓayu hi̧ nzuk-dih fal Zezuri lah.

⁹Wu̧yri si mahful kɔɓ ɓáy, mí í ko, ɓa Zezu mí nzɔh nun woyri. Ke ɓahri : « Soko woiri wo. » Ku gi ta̧w Zezu, mí ku huk pol ye. Ku mgba bɔk ye, mí ku dim ni.

¹⁰Wara mí Zezu ɓahri : « Í laɓ hȩkme ya. Í si ɓah hi̧ yi̧n biri ɓahri se, kú si Galile le, ku zíŋ mi ké ri. »

¹¹Wu̧yri-aw tɔr, mí í ko, soze-kɔr tupal a haniri ra el si ɓil puh mí ndazi ɓay feri ké kal ke gelu gelu hi̧ ŋgernzuk fe puhna Ŋgerzahri lah.

¹²Ŋgernzuk fe puhna Ŋgerzahri mbu̧h hani ke ŋgernzuk gun Izarayelri, mí ku mbu̧h nzak mbew. Ku fa̧h lari mah fe, mí ku hi̧ sozeri ɓahri se,

¹³sozeri ɓá ɓahri, ku na nam, mí nzuk-dih fal yeri gi mbi hul ke suŋ, mí ku tɔr keni.

¹⁴Ɓayu toh ra suk guvener le, ŋgernzuk fe puhna Ŋgerzahri ke ŋgernzuk gun Izarayelri ɓay voh law ye rɔkɔ ké laɓ fe a se-u ziŋ niri soze-kɔr hulri.

¹⁵Sozeri ya̧ lari ra, mí ku ɓah ɓayu kandɔk kú-u sɔk niri. Ɓayaw ra mí ziɓri ƴo tulu kpu̧ru ka̧h guri-ay.

¹⁶Nzuk-dih fal Zezu a boh falu mbewri tɔr si tusiɓa Galile. Ku si tul kasaw a a̧y ké Zezu sɔk niri pol ra.

¹⁷Ku ko Zezu, ku huk siɓa ké pol ye mí ku dim ni. Keni-aw kara kerɓay zukru niri.

¹⁸Zezu loh ma ta̧w woyri, mí ke ɓah ɓayay hi̧ niri ɓahri : « Mi ziŋ huhrumun-lak mbay tul feri gbam ké nunmbam pi ké tusiɓa pi.

¹⁹Kaŋ dale í si wuri. Sina woiri le í hi̧ sa̧wnzukri gbam ɓá ti̧h ɓa nzuk-dih fal biri, kú ti̧h ɓil batem mbu̧h ziŋ Ŋgerzah ɓa sa̧w ye a ye Gaŋ tul feri riw ké riŋ ye mbew yaŋ, a ye, baah, gun, Tempuki.

²⁰Í firma niri kú ƴo tul ɓay biri ké mi ɓah hi̧ wuri. Í ko, mi ƴo ziŋ wuri nam ke nam ka̧h sew a ɔh tɔr sewri. »