Read Karang Mbete Matiye 3 Bible Online

Mbete Matiye 3 - Karang bible

Mbete Matiye 3

¹Sew a hani Za̧h ti̧h ɓil lawkɔr ké tusiɓa Zude. Ke namuri-aw, ke ƴo hi̧ nzukri ti̧h ɓil batem a mbih. Ke ƴo ka-kah ɓay ɓahri se : « Lák mbay a nunmbam gi ka̧h da, í mbi law woiri ké tul suya ma fal el kan law tul Ŋgerzah. »

³Za̧h ra ɓa nzuk ké Ezay, gun nzak pihna Ŋgerzah a lewsa̧ ɓah ɓay tul ye ɓahri, kusol nzuk mgbe ɓil lawkɔr ɓahri, í lek wuri mahful geŋ Miƴori[12]. Í lek wuri fulu ɓá na kparak kparak.

⁴Za̧h ra ndoh gar kú-u kaŋ ke pirma zɔŋzɔŋ[13]. Ke ŋga̧h si̧h ye ke sal ho̧ko. Fe su̧na ye ɓa zele ke num zuhru.

⁵Wara mí ziɓ a Zurusalemri ke ziɓ a ɓoruri ké tusiɓa Zude ke ziɓ a a̧yri ké puh woyri ɗoŋ ɓel mbih Zurdeŋ gbam gim ma ta̧w ye.

⁶Ku hi̧ Za̧h soh niri mbih batem ɓil mahmbih Zurdeŋ. Nzak woyri ƴo ten ɓay suya woyri.

⁷Za̧h ko daɓa fariziri ke sadusiri ƴo gi ma gel ké-e ƴo hi̧ ziɓri ti̧h ɓil batem a mbih ra bale, ke ɓah hi̧ niri ɓahri : « A woiri, mi̧hri soy, a ge mí sɔk wuri í ɗuk haŋ fa̧hna Ŋgerzah ké ƴo gina le ?

⁸Í hi̧ mi̧hri mbilaw woiri ké i ruh ɓá ti̧h, ɓá leh lehna siŋ sina a suki ké mah ke kanlaw tul Ŋgerzah.

⁹Kerɓay woiri ké i ɓahri, i ɓay ya̧ mun woiri ke riŋ ziih Abaraham le, í lu kerɓayu ma fal. Mi ƴo ɓah hi̧ wuri ɓahri se, Ŋgerzah ƴo ke ŋgerna-sɔɓ kasawri-aw ti̧h ɓa gun zih Abarahamri.

¹⁰Tena ƴo ɗih ya ké sa̧w kpuh ɓay te-u wara. Kpuh a suŋ suŋ gbam ké leh lehna a suki ya dale, ke ɓay te ku̧ ɓil hɔrɔ.

¹¹A bi ra, mi hi̧ nzukri ti̧h ɓil batem a mbih ké ɓa batem a mbilaw ɓay law woyri kú-u mbi ké tul suya ma fal el kan tul Ŋgerzah. Mí nzuk a luki ƴo gina. Ŋgerna ye mba tul bi mba-mba. Ɗíŋ tul ɓay sel sal sabɔk ye kara mi mah ya. A ye mí ke ɓay hi̧ nzukri ti̧h ɓil batem a Tempuki ké ɓa batem a hɔrɔ.

¹²Ŋgoro-zo naŋ na ndɔk ye. Ke ɓay kehr keni mbu̧y naŋ ke ti̧hri naŋ. Ke ɓay fa̧h ti̧hri naŋ ku̧ ɓil pul. Mbu̧y naŋ ba, ke ɓay nzuh ke hɔrɔ ké ri-rimna ya. »

¹³Wara mí Zezu ur ke tusiɓa Galile gi ka̧h ta̧w Za̧h ké ɓel sew Zurdeŋ ɓay hi̧ Za̧h ɓá soh ni mbih batem.

¹⁴Mí Za̧h sa-a. Ke ɓahri : « A bi mí-i yih ɓay mú soh mi mbih batem wa, ani mú-u gi ta̧w bi ɓay mí soh mu mbih batem le ? »

¹⁵Dale Zezu yih nzak ye ɓahri : « Mú poŋ hi̧ batemu ɓá laɓ. Su-su ɓay mú soh mi batemay ɓay hi̧ sal in ké Ŋgerzah lek ɓay mí ŋga̧h ɓá laɓ ƴo gelu. » Wara mí Za̧h soh ni mbih batem[14].

¹⁶Zezu ɓá ti̧h ɓil mbih bale, í ko, nunmbam mgbur hi̧ nzukri ko, mí Zezu ko Tem Ŋgerzah ɗer kandɔk mbɔre gi kaɓ tul ye.

¹⁷Mí í ko, kusol ti̧h ke nunmbam ɓahri : « A ye-ay, ke ɓa gun sana bi. Law bi na sa tul ye. »