Read Karang Mbete Matiye 4 Bible Online

Mbete Matiye 4 - Karang bible

Mbete Matiye 4

¹Wara mí Tempuki maŋ Zezu si ɓil lawkɔr. Ke poŋ diyabolo a ye mbay záh tukala ndoh law Zezu ke ɓay.

²Zezu su̧ fe ya nam bon niŋ ke suŋ bon niŋ dale, ɗaka i ni i-i.

³Mí mbay záh tukala nzuk-ndoh law nzukri ke ɓay gi ta̧w ye. Ke ɓahri : « Ké mu ɓa gun Ŋgerzah ra[15], mú ɓah hi̧ kasawayri[16] ɓá ti̧h ɓa fe su̧na hi̧ mu, mú su̧. »

⁴Bale Zezu el ke ɓay ɓahri : « Mbete Ŋgerzah ɓahri, ɔkna nzuk na ɓay fe su̧na kaŋto ya. Wara le ɔkna na ɓay ɓayri gbam ké Ŋgerzah[17]ɓah[18]. »

⁵Wara mí diyabolo ra mbi ni si Zurusalem puh a luki ké law Ŋgerzah te sa sari. Ke hi̧ ni ke ƴo ti̧w gel a gaŋu zeŋleŋleŋ ké tul vul kani Ŋgerzah.

⁶Mí ke ɓahri : « Ké mu ɓa gun Ŋgerzah ra, mú zo vbu siɓa. Mbete ye ɓahri se, ke ɓay pih tem nzak pihna yeri ɓay tul wo. Ku héh mu rɔkɔ bɔk wo ɓá ɓe kasaw[19]. »

⁷Zezu fer nzak ye ɓahri : « Mbete Ŋgerzah ɓah ra ɓáy ɓahri, Miƴori mí ɓa Ŋgerzah wo, mu fáh ni ya[20]. »

⁸Diyabolo el mbi ni si ƴo tul kasaw a gaŋu zeŋleŋleŋ, mí ke hi̧ ni ko tul puh laknari mbew mbew gbam ke fe riŋ ɗina woyri-aw pi.

⁹Mí ke el ɓah hi̧ ni ɓahri : « Mú huk siɓa, mú dim mi le, gbamaw, mi kú̧ ké ndɔk wo. »

¹⁰Wara mí Zezu ɓahri : « Nzukbaa, mú tɔr ma sa̧. Mbete Ŋgerzah ɓahri, Miƴori mí ɓa Ŋgerzah wo, a ye mbew yaŋ mú-u húk siɓa ké pol ye, mu dím ni mbew yaŋ[21]. »

¹¹Kandɔkaw mí diyabolo poŋ Zezu. Ke tɔr bale, í ko, tem nzak pihna Ŋgerzahri gi ta̧w Zezu mí so ni.

¹²Zezu lah ɓahri, ku mgba Za̧h batisi mbih vul mgbal dale, ke poŋ tusiɓa Zude el si tusiɓa Galile.

¹³Ke loh ke Nasareɗ si kaɓ Kapernayum. Kapernayum ra na ɓel mahmbih Galile. Puh-u na fál kɔr a a̧y ké gun Izarayelri ɗi ɓa tusiɓa Zabuloŋ ke tusiɓa Naɓtali.

¹⁴Fe laɓna-u hi̧ ɓay ké Ezay gun nzak pihna Ŋgerzah a lewsa̧ ɓah ra laɓ ƴo gelu.

¹⁵Ɓayu ɓahri, tusiɓa Zabuloŋ, tusiɓa Naɓtali, tusiɓari ké ful-si ma mahmbih Medeterani sak ti̧h ri, ké na kala mahmbih Zurdeŋ, ké na tusiɓa Galile, tusiɓa a a̧y ké sa̧wnzuk a ɓoruri na ri, gun Izarayelri kaɓ ri ɓil tirima. Mí aŋay gel tehna ti̧h tul woyri. A woyri gun tusiɓa Zabuloŋri ke Naɓtalri kú-u kaɓ huh tem hul nduŋ, mí aŋay gel tehna teh tul woyri gberere[22].

¹⁷Ur ke sew ké Zezu titil ka-kah ɓay lák mbay Ŋgerzah, ke ɓahri : « Í mbi law woiri ké tul suya ma fal, í el kan law tul Ŋgerzah ɓayu ké lák mbay a nunmbam gi ka̧h da. »

¹⁸Zezu ƴo ha̧rma ɓel mahmbih Galile dale, ke ko nzukri seɗe ɓa gun ɓil mahri, Simu kú-u ɗi ni ɓa Piyer ke yi̧n ye Andere. Ku ƴo vbu kȩke woyri ɓayu kú-u ɓa nzuk-mgba nzuyri.

¹⁹Mí Zezu ɓah hi̧ niri ɓahri : « Í gi fal bi. Mi ɓay sɔɓ wuri ti̧h ɓa nzuk-mgba nzukri hi̧ mi. »

²⁰Sa gelu-aw mí ku poŋ kȩke woyri, mí ku dih fal ye.

²¹Ke kal ma pol, mí ke el ko gun ɓil mah a ɓoruri seɗe, Zak ke yi̧n ye Za̧h. Bah woyri ɓa Zebede. Ku kaɓ ɓil kumbon ke bah woyri ƴo lek nun kȩke. Mí ke ɗi niri.

²²Sa gelu-aw mí ku poŋ kumbon, ku poŋ bah woyri, mí ku dih fal ye.

²³Ke ha̧rma tusiɓa Galile gbam, ke ƴo firma gun Izarayelri ɓil vul misoŋ woyri ziɓri, ke ƴo ka-kah ɓaysuki lák mbay Ŋgerzah hi̧ niri, mí ke gah sam senari ɓoɗ ɓoɗ gbam.

²⁴Riŋ ye ya̧ gelri hi̧ mberemu si ka̧h tusiɓa Siri gbam pi, mí ku fa̧h daɓa senari ɓoɗ ɓoɗ gbam gi keni ta̧w ye. Nzukri ké mun woyri hu yɔh, nzukri ké záh ƴo tul woyri, nzukri ké tul woyri la-laŋ, kpereri pi, mí ke gah niri.

²⁵Daɓa nzukri ɓa ŋgi̧-u dih fal ye. Nzukuri-aw ur ke tusiɓa Galile ke tusiɓa Dekapol. Ku ur ke Zurusalem ke puh a ɓoruri ké tusiɓa Zude. Ku ur ke kala mbih Zurdeŋ pi.