Read Karang Mbete Matiye 5 Bible Online

Mbete Matiye 5 - Karang bible

Mbete Matiye 5

¹Zezu ko daɓa nzukri-aw, mí ke hil si tul kasaw dale, ke kaɓ. Mí nzuk-dih fal yeri gi mbu̧h hani ké ta̧w ye ƴo lah fe firma ye.

²Ke firma niri ɓay kandɔkay :

³« Nzukri ké ko ɔkna woyri ɓa fe ya, ku ɓa gun pol tehnari ɓay fe le, lák mbay a nunmbam na ɓay woyri.

⁴Nzukri ké rew mbaŋ law woyri, ku ɓa gun pol tehnari ɓay fe le, Ŋgerzah ɓay hew niri[23].

⁵Nzukri ké hi̧ law woyri voh lɔm, ku ɓa gun pol tehnari ɓay fe le, ku ɓay ya̧ fe baah ké ɓa tusiɓa gbam.

⁶Nzukri ké ɗaka-tu Ŋgerzah ɓa záh woyri i niri, ku ɓa gun pol tehnari ɓay fe le, Ŋgerzah ɓay hi̧ kú tu sal in ké-e ŋga̧h ziŋ niri mah gel ɗaka woyri.

⁷Nzukri ké ƴo laɓ law in ziŋ nzuk sehri, ku ɓa gun pol tehnari ɓay fe le, Ŋgerzah ɓay laɓ law in ziŋ niri.

⁸Nzukri ké law woyri te-teh, ku ɓa gun pol tehnari ɓay fe le, ku ɓay ko Ŋgerzah.

⁹Nzukri ké ƴo hi̧ ɗeŋ ɓá gi haŋsekle woyri ke nzukri, nzukuri ɓa gun pol tehnari ɓay fe le, riŋ “gun Ŋgerzah” ɓay ɗi tul woyri.

¹⁰Nzukri ké tu Ŋgerzah ɓa záh woyri, mí nzukri laɓ niri koseh ɓayu, ku ɓa gun pol tehnari ɓay fe le, lák mbay a nunmbam na ɓay woyri.

¹¹Pol tehna Ŋgerzah teh tul woiri, gelke nzukri ɓal riŋ woiri, ku laɓ wuri koseh, ku ɓah kuŋɓay a pipiri-uri ɓoɗ ɓoɗ ke riŋ woiri ɓayu ké i ƴo ziŋ mi.

¹²Í laɓ wuri law rihna, í zay mun ɓay fe le, kpaŋndɔk woiri a ŋgeru ƴo nunmbam. Kosehri-aw ké nzukri laɓ ziŋ wuri ra, zih woyri laɓ ziŋ gun nzak pihna Ŋgerzah a lewsa̧ri kaŋ pi.

¹³A woiri i ɓa tom ké tusiɓa. Tom nuŋ mba le, a fe mí ɓay laɓ hi̧ tomu ɓá el nuŋ ɓáy le ? Ŋgerna tomu ta mba. Ɓa fer ku̧ kpah hi̧ nzukri ɓá ndakla.

¹⁴A woiri i ɓa hɔrɔ-teh tukala. I na kandɔk puh kú-u mboh ké tul kasaw, gel-mu̧h puh-u ta-a.

¹⁵Nzuk oh hɔrɔ ta lampe ɓay el mbi mbɔhrɔ guɓ ri ya. Wara le nzuk oh hɔrɔ ta lampe ɓay mbi kan síɓa mí hi̧ teh gel hi̧ nzukri gbam ké kaɓ vulu.

¹⁶Kaŋaw mí í hi̧ gel tehna[24] woiri ɓá teh ké pol nzukri hi̧ kú ko fe laɓna sukiri dale, ku pír bah woiri a ye ké ƴo nunmbam.

¹⁷Í poŋ kerɓay ké i ƴo ker ɓahri, mi gi ɓay i ŋgerna bolkusol Ŋgerzah ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri. Mi gi ɓay i ŋgerna bolkusol Ŋgerzah ya. Wara le mi gi ɓay mbi bolkusolu laɓ ɔh ke gelu gelu.

¹⁸Ɓa ketina, mi ƴo ɓah hi̧ wuri ɓahri se, nunmbam ke tusiɓa ɓay ka-kal, mí gun fe vbehna a ndi̧ kú-u zel ɓil mbete bolkusol Ŋgerzah ta kal ya. Fe vbehna-uri ɓay ti̧-ti̧h ka̧h nam ké fe vbehna-uri gbam ɓay laɓ ɔh.

¹⁹Kaŋaw mí nzuk ké poŋ gun ɓay a mah gelu ké na ɓil fe vbehna-u, mí ke firma nzukri hi̧ kú poŋ pi le, nzukri ké hi̧ nzuk nunmbam lak mbay tul woyri ɓay ɗi nzuku-aw ɓa “sar gun”. Mí nzuk a a̧y ké ƴo tul bolkusol Ŋgerzah, ke firma nzukri hi̧ kú ƴo tulu pi le, nzukri ké hi̧ nzuk nunmbam lak mbay tul woyri ɓay ɗi nzuku-aw ɓa “baw nzuk”.

²⁰Mi ƴo ɓah hi̧ wuri ɓahri se, gelke i ƴo tul bolkusol Ŋgerzah kal tul nzuk-sɔk mbete bolkusol Ŋgerzahri ke fariziri ya le, i ta rih ɓil lák mbay a nzuk nunmbam ya.

²¹Ku hi̧ wuri i lah bolkusol Ŋgerzah ké Moyiz hi̧ ziihri lewsa̧ ɓahri : “Mu í hul ya[25]. Gelke nzuk i hul le, salɓay suya-aw ɓay mgba tul nzuk-i hul ké gel-kuŋ salɓay.”

²²A bi le mi ƴo ɓah hi̧ wuri ɓahri, law nzuk a suŋ suŋ ké fa̧h tul yi̧n ye le, salɓayu ɓay mgba tul nzuku ké gel-kuŋ salɓay. Gelke-e ɗi yi̧n ye ɓa kɔkɔ le, salɓayu ɓay mgba tul nzuku ké ndiseŋe. Gelke-e ɗi yi̧n ye dahdi̧hze le, salɓayu ɓay mgba tul nzuku mí ƴo si ziŋ ni ɓil hɔrɔ.

²³Kaŋ dale gelke mu mbi fe puhna si keni ma gel fe puhna Ŋgerzah, mú-u ker si tul yi̧n wo ké ƴo ke ɓay ziŋ mu le,

²⁴mú poŋ fe puhna wo kan ké gel fe puhna. Mú el si ziŋ yi̧n wo. Mú mgba nzak nzaw ziŋ ni dara mú el si puh fe wo ra hi̧ Ŋgerzah ɓáy.

²⁵Mú takra ɓay ziŋ nzuk ké ɓay sek mu, mú lek ɓay ziŋ ni dara ké ka̧h gel-kuŋ salɓay. I lek ɓay ya le, nzuk-sek mu ɓay si ziŋ mu ɓay ndoh mu ndɔk nzuk-kuŋ salɓay Nzuk-kuŋ salɓay ba, ɓay ndoh mu ndɔk soze-kɔr mgbalri bale, ke vbú mu ɓu vul mgbal.

²⁶Ɓa ketina. Mi ƴo ɓah ɓayay hi̧ mu, mu ta ti̧h ke vul mgbal ra ya. Tere gursu mbew ta toŋ ya. Mu púh-u ɔh ke gelu dara kú poŋ mu ɓáy.

²⁷Nzuk-sɔk mbete bolkusol Ŋgerzahri ke fariziri hi̧ wuri i lah bolkusol Ŋgerzah ké Moyiz vbeh hi̧ ziihri lewsa̧ ɓahri : “Mu mbí wu̧y mbaŋ wo ya[26].”

²⁸A bi le, mi ƴo ɓah hi̧ wuri ɓahri se, nzuk a suŋ suŋ ké nun ye pu tul tikla mini wu̧y wo̧ro le, ke mbi ni ké ɓil law ye da.

²⁹Dale nun wo mí ɓa ndaw lihna hi̧ mu saŋ ɓay bi le, mú lur ku̧ kpah[27]. Hú ɓa ra̧w su mba hú ke nun wo seɗe mbɔk hi̧ mun wo gbam ɓá kaɓ ɓil hɔrɔ ké ri-rimna ya.

³⁰Ndɔk lakna wo mí ɓa ndaw lihna hi̧ mu le, mú kuŋ mbiɗ vbu kpah. Hú ɓa kpere su mba hú ke ndɔk wo seɗe mbɔk hi̧ mun wo gbam ɓá kaɓ ɓil hɔrɔ ké ri-rimna ya.

³¹Ku hi̧ wuri i lah ɓahri, nzuk a suŋ ké ni̧h wu̧y ye le, ké vbeh mbete-ni̧h wu̧y ndoh ndɔk wu̧yu dara ké ni̧h ni ɓáy.

³²A bi le, mi ƴo ɓah hi̧ wuri ɓahri, nzuk a suŋ suŋ gbam ké wu̧y ye ti̧h si mbi wo̧ro a ɓoru ya, mí ke ni̧h wu̧yu le, a ye mí ke laɓ hi̧ wu̧y ye ya̧ wo̧ro. Gelke nzuk ya̧ wu̧y ké wah ye ni̧h ni le, salɓay-mbi wu̧y wo̧ro ta tul nzuku.

³³Nzuk-sɔk mbete bolkusol Ŋgerzahri ke fariziri hi̧ wuri i lah ɓay a mbaŋu ké na ɓil mbete bolkusol Ŋgerzah ké Moyiz vbeh hi̧ ziihri lewsa̧ ɓahri : “Mu vbír wahɓay wo ya. Gelke mu lu nzak wo ké pol Ŋgerzah le, mú laɓ fe-u.”

³⁴A bi le, mi ƴo ɓah ɓayay hi̧ wuri, nzak wo ɓá ti̧h ke fe hahna ya. Mú hah mbam ya ɓay fe le, nunmbam ɓa bohro mbay Ŋgerzah.

³⁵Mú mgba tusiɓa hah keni fe ya pi ɓay fe le, tusiɓa ɓa gel-ku̧ bɔk Ŋgerzah. Mú hah mun wo ke riŋ gel kani Ŋgerzah ké na Zurusalem ya[28] ɓay fe le, Zurusalem ɓa puh Mbay a luki.

³⁶Mú hah hul ku̧ tul wo kara ya pi ɓay fe le, ŋgerna-sɔɓ pirmatul wo mbew ɓá ti̧h ɓa puki mini ɓa piri-u ta-a.

³⁷Kaŋ dale nzak wo ɓá na ɓa mbew yaŋ. Nzak wo ɓahri, “yi̧h” le, ɓay wo ɓá na ɓa “yi̧h”. Nzak wo ɓahri, “u̧h-u” le, ɓay wo ɓá na ɓa “u̧h-u”. Nzak ɓa seɗe le, sa̧wu ɓa záh law a pipiri-u munu.

³⁸Nzuk-sɔk mbete bolkusol Ŋgerzahri ke fariziri hi̧ wuri i lah bolkusol Ŋgerzah ké Moyiz vbeh hi̧ ziihri lewsa̧ ɓahri : “Nzuk guh nun mbaŋ ye le, kú guh nun ye pi. Nzuk haw sel mbaŋ ye le, kú haw sel ye pi.”

³⁹A bi le, mi ƴo ɓah ɓayay hi̧ wuri, mú dal baa mgbɔrna ké nzuk laɓ ziŋ mu ya. Wara le nzuk vba̧ gam wo a lakna[29] le, mú sɔɓ fál a ɓoru hi̧ ni ké vba̧ pi.

⁴⁰Nzuk yih sek mu ɓay nah gar wo a ɓilu le, mu poŋ mah gar wo hi̧ ni pi.

⁴¹Nzuk hah mu ɓay mú suk sukna ye ɓaŋ ni mah salful mbew le, mú suk sukna-u ɓaŋ ni mah salful seɗe.

⁴²Nzuk goŋ mu fe le, mú hi̧ ni. Ke yih ɓay ta fe wo le, mú laɓ law kpuhna ziŋ ni ya.

⁴³Nzuk-sɔk mbete bolkusol Ŋgerzahri ke fariziri hi̧ wuri i lah bolkusol Ŋgerzah ké Moyiz vbeh hi̧ ziihri lewsa̧ ɓahri : “Mu sá nzuk mbaŋ wo.” Ku el ɓahri se, “mú fu̧y nzukbaa wo.”

⁴⁴A bi le, mi ƴo ɓah ɓayay hi̧ wuri, í sa nzukbaa woiri. Í goŋ Ŋgerzah ɓá laɓ suki hi̧ nzukri ké laɓ wuri koseh kaŋ,

⁴⁵le í na kandɔk bah woiri a nunmbam ɓay fe le, ke hi̧ seh ye ti̧h mí teh gel ké tul nzuk law a pipiri-uri ke nzuk law sukiri. Ke hi̧ mbam to tul nzukri ké tu ni ɓa záh woyri ke nzukri ké saŋ ni pi.

⁴⁶Gelke i sa nzukri ké sa wuri kaŋto ra wa, fe laɓna-aw mah ziŋ kpaŋndɔk gaŋ lo ? Nzuk-mbu̧h lampohri ƴo laɓ kaŋ pi wa, ani le ?

⁴⁷Gelke mu vah yi̧n wo kaŋto ra wa, fe laɓna-aw ɓa fe saŋ lo ? Sa̧wnzuk a ɓoruri ƴo laɓ kaŋ pi wa, ani le ?

⁴⁸Kandɔkaw le bah woiri a nunmbam ké ɓa nzuk gama lawsuki, a woiri kara í eŋ ni ɓa nzuk gama lawsuki kaŋ pi.