Read Karang Mbete Matiye 7 Bible Online

Mbete Matiye 7 - Karang bible

Mbete Matiye 7

¹Í kehr nzukri ɓa nzuk a sukiri, ɓa nzuk a suya-uri ya rɔkɔ kehrna-u ké i kehr nzukri ɓá el mbu̧h wuri ɓa nzuk suyari.

²Suya fe fe ké i kehr nzuk a ɓoruri keni-aw ra, suya-aw gaŋ mí ɓay si ziŋ wuri gel-kuŋ salɓay. Ɓay ké i kan tul nzuk a ɓoru le, ɓay ra ɓay el kan tul woiri.

³Ɓay fe mú-u ko suy ké na nun mbaŋ wo, mí sa̧w nun wo ké baw kpuh tik ri mú-u ko ya le ?

⁴Uwa, ani mú-u ɓah hi̧ nzuk a ɓoru ɓahri : “Ya̧h, mú hi̧ mi mí lu suy ké ɓu nun wo-aw” le ? Mí í ko, kpuh ké tih sa̧w nun wo, mu ko ya lo ?

⁵Nzuk-mu̧h ketina, mú ten kpuh ké tik sa̧w nun wo dara mú-u kó gel ɓa teh-u ɓay el lu suy ké nun mbaŋ wo ɓáy.

⁶Í mbi fe puki Ŋgerzah hi̧ gayri ya, í mbi zaw lari mbayri ɓu siɓa ké pol kɔsɔŋri[30] ya rɔkɔ kú ndakla duŋa duŋa dale, ku él sɔɓ mun nuŋ wuri.

⁷Í vbi Ŋgerzah, ke ɓay lah wuri. Í taw ni, ke ɓay hi̧ í tu ni. Í vba̧ nzak vul ye ŋguŋ ŋguŋ, ke ɓay mgbur nzak vulu hi̧ wuri.

⁸Ɓayu ké nzuk a suŋ suŋ ké vbi Ŋgerzah le, nzuku ƴo ya̧-ya̧. Nzuk ké taw ni le, ke ƴo hi̧ nzuku tu ni. Nzuk ké vba̧ nzak vul ye le, ke ɓay mgbur nzak vulu hi̧ ni.

⁹Uwa, ké sakra woiri nzukri ra wa, gun vbi bah ye huru le, bah ye ɓay mbi kasaw hi̧ gun ye ra le wo ?

¹⁰Gun ye vbi ni nzuy le, ke ɓay mbi soy hi̧ gun ye le wo ?

¹¹Mí kaŋaw ba, a woiri nzuk law a pipiri-uri, i tu hi̧ fe a suki hi̧ gun woiri ra wa, ɓay laɓ ani ɓáy mí bah woiri a ye ké nunmbam ba, ɓay hi̧ suki hi̧ nzukri ké ƴo vbi ni, ya le wo ?

¹²Kaŋaw ba, lawsuki a suŋ suŋ gbam ké i yih ɓay hi̧ nzuk a ɓoruri ɓá laɓ ziŋ wuri ra, a woiri kara í laɓ lawsuki-u ziŋ niri pi. Kandɔkaw mí ɓa bolkusol Ŋgerzah ké na ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri.

¹³Í mbi ful a ah ya-u ɓay fe le, mgboŋ a ah-u ra ah borovboŋ, fulu si ziŋ nzukri ɓa zina. Daɓa nzukri mí si keni sina.

¹⁴Ful a ah ya-u ra, ah ya gaŋ ba. Fulu-aw si ziŋ nzukri si ka̧h ɔkna, nzukri ŋgi̧ ya mí ziŋ fulu.

¹⁵Í ru̧ ke mun woiri ɓay tul gun nzak pihna Ŋgerzah a fohri. Ŋgerzah pih niri ya, mí ku laɓ mun eŋ sami, mí ku ɓa gaykoy ɓay su̧ wuri.

¹⁶I tú niri ɓay fe laɓna woyri kandɔk i tu kpuh ɓay lehna kpuh-u kaŋ. Nzuk ɓay hal nzu̧y ké tul ŋgatukru lo ? Ke ɓay hal vo̧ko[31] ké tul ŋgatukru gun gay le wo ?

¹⁷Kpuh a suki le, leh lehna a suki, kpuh a suya-u, leh lehna a suya-u gaŋ ba.

¹⁸Kpuh a suki ta leh lehna a suya-u ya. Kpuh a suya-u ba, leh lehna a suki ya.

¹⁹Kpuh a suŋ suŋ gbam ké leh lehna a suki ya le, ku ɓay te ke sa̧wu ku̧ hɔrɔ.

²⁰Mi ɓahri se, i ɓay tu niri ɓay fe laɓna woyri kandɔk i tu kpuh ɓay lehna kpuh-u kaŋ.

²¹Ta ɓa nzukri gbam kú-u ɗi mi, “ŋgernzuk, ŋgernzuk” mí ɓay rih ɓil lák mbay a nzuk nunmbam ya. Wara le nzuk a a̧y ké laɓ fe ké bah bi ké nunmbam yih ɓayu mí ɓay rih ɓilu.

²²Daɓa nzukri ɓay ɓah hi̧ mi ké namu-aw kandɔkay : “ŋgernzuk, ŋgernzuk, nah ten ɓay nzak pihna Ŋgerzah hi̧ nzukri lah ke riŋ wo, nah ni̧h záhri ké tul nzukri ke riŋ wo, nah laɓ ŋgi̧na fe saŋri ke riŋ wo, kaŋ ya le ?”

²³Wara mí-i ɓáh ketina-ay hi̧ niri ɓahri : “Bɔk mbew bi gel-tu wuri ya. Í tɔr wuri ke nzak bi ma sa̧, a woiri nzukri ké i poŋ ɓay Ŋgerzah.”

²⁴Kaŋaw ba, nzuk a suŋ suŋ gbam ké lah ɓay bi, mí ke ƴo tulu le, nzuku ɓa nzuk a ru̧-u. Ke mboh vul ye ké gel ké kasaw na diŋu.

²⁵Mbam to, mbih-u haw gi vba̧ bɔk vul ra gbɔh gbɔh. Kuna ba, ku bivbiɗ bivbiɗ, mí vulu haw ya ɓayu ké-e mboh vulu gel ké kasaw na diŋu.

²⁶Nzuk a suŋ suŋ gbam ké lah ɓay bi, mí ke poŋ le, nzuku ɓa kɔk nzuk, ke mboh vul ye ké gel sikɔkre.

²⁷Mbam to, mbih-u haw gi vba̧ bɔk vul ra gbɔh gbɔh. Kuna ba, ku bivbiɗ bivbiɗ, mí vulu dir wuruk. Dirna-u ti̧h ɓa baw ɓeɓna. »

²⁸Kandɔkaw mí Zezu ɔh fe firma ké-e firma nzukri bale, gosoɓay zi nzukri ɓay tul fe firma ye.

²⁹Fe firma ye na kandɔk fe firma nzuk-sɔk mbete bolkusol Ŋgerzahri ya. Ku ƴo mbi ɓay Ŋgerzah firma nzukri keni. A ye ba, ke ɓah ɓayuri kandɔk a ye mí ke ɓa mbay bolkusolu.