Read Karang Mbete Matiye 8 Bible Online

Mbete Matiye 8 - Karang bible

Mbete Matiye 8

¹Zezu ur, ke ɗer ké tul kasawaw. Daɓa nzukri ɓa ŋgi̧-u dih fal ye.

²Í ko. Nzuk ndɔɓe a hani gi huk siɓa ké pol ye ɓahri : « Ŋgernzuk, ŋgerna woiri mah gah ndɔɓe bi-ay hi̧ mun bi teh[32]. Le saŋna-si gel kani Ŋgerzah ɓay lu ké tul bi. »

³Zezu ndar ndɔk mí za nzuk ndɔɓe ra, ke ɓahri : « Mi yih. Ful-si gel kani Ŋgerzah ɓay dim ni ɓá ƴo ri. Mú teh wara. » Sa gelaw mí mun ye teh peɗeɗe.

⁴Zezu el ɓah hi̧ ni ɓahri : « Ko-ko mú ɓah ɓayu hi̧ nzuk. Wara le mú si gel kani Ŋgerzah sɔk mun wo hi̧ nzuk fe puhna ɓá ko. Mú si ke fe puhna kandɔk ké Moyiz vbeh ɓil mbete bolkusol Ŋgerzah ɓay hi̧ kú te-teh ɓayu ɓahri, ndɔɓe wo ɔh ɓa ketina. »

⁵Zezu ba, el si Kapernayum. Kumandah mbew nzɔh nun ye. Ké ɓa mbay tul sozeri sɔɗ, sa̧w ye ɓa gun Izarayel ya.

⁶Ke ɓah hi̧ Zezu ɓahri : « Ŋgernzuk, gun bi mbew na sena. Mun ye hu yɔh. Sena-u ŋger mbamba. »

⁷Zezu ɓahri : « Mi si-u, mi gáh ni. »

⁸Mí kumandah yih nzak ye ɓahri : « Ŋgernzuk, mi mah ɓay í rih ɓil kerpuh bi-ay ya. Wara le í ɓah ɓay kaŋto kara mun gun bi ra ɓay gah-u.

⁹A bi ra mi ƴo lah nzak ŋgernzuk biri. Mi ɓa mbay tul sozeri pi. Gelke mi ɗi soze ɓahri, ké gi le, ke gi gaŋ ba. Mi ɓah hi̧ soze a ɓoru ɓahri, ké tɔr le, ke tɔr gaŋ ba. Mi ɓah hi̧ mgbal bi ɓahri, ké laɓ fe-ay le, ke laɓ fe-u laɓ gaŋ ba. »

¹⁰Zezu ɓá lah ɓay ké kumandah ɓah ra bale, na ni yer, mí ke el ɓah hi̧ nzukri ké dih fal ye ɓahri : « Ɓay ké kumandah ɓah-ay ɓa ketina. Mi ƴo ɓah hi̧ wuri, ké sakra wah gun Izarayelri mi ko nzuk mbew ké kan law ye sa tul bi mah ke nzukay ké sa̧w ye na ɓoɗay ya.

¹¹Mi ƴo ɓah hi̧ wuri ɓahri se, daɓa nzuk a ɓoruri ké fál tí̧h seh ke fál ríŋ seh ɓay gi rih ɓil lák mbay a nzuk nunmbam. Ku káɓ nzak fe su̧na ziŋ Abaraham, Isak, Zakoɓ.

¹²Mí gun a puh lakna-uri ba, Mbay puh-u ɓay vbuk niri ku̧ kala ɓil tirima nduŋ. Gelaw ra ku ɓay vuh rew ke mbihnun woyri darara darara, ku sú̧ sel woyri ŋger ŋger. »

¹³Mí Zezu ɓah hi̧ kumandah ra ɓahri : « Mú si puh. Mun gahna gun wo ɓá laɓ kandɔk ké mu kan law wo ké tul bi kaŋ. » Kandɔkaw mí mun gun ye ra gah ke sa̧wseh-u-aw.

¹⁴Zezu kal si kerpuh Piyer dale, ke ziŋ mahfay Piyer na ɓa sena. Mun ye zaŋ biɗ biɗ.

¹⁵Mí ke ndar ndɔk za mun mahfay Piyer ra, mí mun zaŋna ye voh, mí ke ur mgba niri gahru.

¹⁶Seh ƴo riŋna bale, nzukri fa̧h daɓa nzukri ké záh ƴo tul woyri gi keni ku̧ ta̧w Zezu. Zezu ba, ɓah ɓay mbew mí ni̧h keni záhri ké tul nzukri-aw. Nzuk senari ba, ke gah niri mbew mbew gbam.

¹⁷Fe laɓna-u hi̧ ɓay ké Ezay gun nzak pihna Ŋgerzah a lewsa̧ ɓah ra laɓ ƴo gelu. Ɓayu ɓahri, a ye ra ke fa̧h ɓeɓna wah kan tul ye, ke lu sena wah ku̧ kpah[33].

¹⁸Zezu ko daɓa nzukri ké ɗoŋ ni, mí ke ɓah ɓay hi̧ nzuk-dih fal yeri ɓahri, kú tɔr si kala mahmbih fál sa̧.

¹⁹Bale nzuk-sɔk mbete bolkusol Ŋgerzah mbew gi ta̧w Zezu. Ke ɓahri : « Metere, mi díh fal wo ndeŋ ndeŋ. »

²⁰Zezu ba, ɓahri : « Nzi̧wri ƴo ke lɔkɔ nam. Gundoyri ƴo ke vul nam. Mí gun nzuk pirmatulay ba, gel-eh tul kara ke ta keni ya. »

²¹Nzuk-dih fal Zezu a ɓoru ba, ɓahri : « Ŋgernzuk, mú poŋ mi mí el si puh. Seh hul bah bi le, mí gɔr hulu dara mí dih fal wo ɓáy. »

²²Bale Zezu ɓah ɓayay hi̧ ni : « Mú dih fal bi-ay. Mú poŋ hulri ɓá gɔr hul mbaŋ woyri. »

²³Bale Zezu rih kaɓ ɓil kumbon[34] ɓay si kala mahmbih, nzuk-dih fal yeri kaɓ ziŋ ni.

²⁴Ku ɗi-ɗih ke ɓel sew mahmbih ra dale, í ko, mahmbam to, kuna ku fa̧h mbih mbah ɓil kumbon. Zezu ba, toŋ na nam ɓil kumbon.

²⁵Mí nzuk-dih fal yeri tom ni ɓahri : « Ŋgernzuk, nah ɓay hu wuri. Mú ya̧ na wo. »

²⁶Mí Zezu ɓahri : « Uwa. Nzuk law hȩkmeri, law woiri kehr seɗe ɓáy le ? » Wara mí ke ur, ke hah kuna ke mbih, mí kuna ke mbih tuk kelek hi̧ gel na ɗeŋ gaŋ ba.

²⁷Nzuk-dih fal yeri ba, kaɓ yer na niri ɓa saŋ. Ku ɓahri : « Nzukay na ani mí mbih ke kuna kara lah nzak ye-ay le ? »

²⁸Ku ka̧h kala mbih ké fál tusiɓa nzuk Gadarari bale, nzukri seɗe ké záhri ƴo tul woyri ti̧h ke gel-gɔr hulri gi nzɔh nun Zezu. Ku mgbɔr mbamba. Mahful kalna nzukri ta-a.

²⁹Í ko. Ku vba̧ nzak ɓeleŋ ɓeleŋ ɓahri : « Gun Ŋgerzah, ɓay wo ɓa fe mí ziŋ na le ? Nam wah ka̧h ya ɓáy ba, mu gi ɓay laɓ na koseh mgbum ley ? »

³⁰Ké ɓel woyri ɓa ɗih-u ndi̧ mí daɓa kɔsɔŋri ƴo ƴah ri lakna.

³¹Mí záhri ra vuh hi̧ ni ɓahri : « Mu ní̧h na le, mú pih na si rih tul kɔsɔŋri-aw. »

³²Mí ke ɓahri : « Í ti̧h, í si rih tul kɔsɔŋri ra. » Mí ku ti̧h si rih tul kɔsɔŋri ra gaŋ ba. Í ko. Kɔsɔŋri riw kpa̧h ke ɗukna si ka̧h nzak hereŋ lih ku̧ mahmbih kirim kirim, mí mbih kal niri ndu̧y.

³³Nzuk-kɔr kɔsɔŋri ra su ɗukna si ka̧h ɓil puh. Ku si ndazi ɓay feri riw ké kal hi̧ nzukri lah. Ku sɔk ɓay nzukri ké záhri ti̧h ke tul woyri ra.

³⁴Í ko. Nzuk puhri gbam ti̧h yir mbu̧h ké ta̧w Zezu. Ku ko ni, mí ku laɓ kɔkrɔya hi̧ ni ɓay ké ti̧h ke tusiɓa woyri poŋ niri.