Read Karang Mbete Matiye 9 Bible Online

Mbete Matiye 9 - Karang bible

Mbete Matiye 9

¹Kaŋ mí Zezuri poŋ nzuk Gadarari. Ku hil ɓil kumbon el gi fál gini, mí ke si puh[35].

²Í ko. Nzukri suk nzuk sena ke hih nam ye gi keni hi̧ Zezu. Mun nzuk ra hu yɔh. Zezu ɓá ko law woyri kú-u kan tul ye bale, ke ɓah hi̧ nzuk ké mun ye hu yɔh ra ɓahri : « Gun bi, mú su̧h law. Salɓay suya lu ké tul wo. »

³Nzuk-sɔk mbete bolkusol Ŋgerzah a haniri ƴo gelu pi. Ku lah ɓay ké Zezu ɓah ra bale, í ko, ku ŋgu̧hru ɓay ɓahri : « Gunwo̧ro-ay leh tul ye ke Ŋgerzah. »

⁴Zezu tu kerɓay woyri tu-tu, mí ke ɓahri : « Sa̧w ɓay fe mí na kerɓay woiri nduŋ le ?

⁵Sakra ɓáh hi̧ nzuk ɓahri, ké ur si sina ke ɓáh hi̧ nzuk ɓahri, salɓay suya ye lu, a suŋ mí kpuh le ?

⁶Mí ɓay í tu ɓahri se, gun nzuk pirmatul ɓa mbay mí ƴo ke ŋgerna ké tusiɓa ɓay lu salɓay suya ké tul nzukri le ... » Zezu poŋ nzak ɓay ye, ke el sɔɓ nun ma tul nzuk ké mun ye hu yɔh ra bale, ke ɓahri : « Mú ur síɓa, mú mbi hih wo, mú el si puh. »

⁷Nzuk ra ur, mí ke mbi hih nam ye el si puh.

⁸Daɓa nzukri ko fe ké-e laɓ, mí hȩkme se niri. Ku el dim Ŋgerzah záh ké ndoh ŋgerna mbay a kandɔkaw ndɔk nzuk pirmatulri.

⁹Zezu ba, kal ma pol bale, ke ko Matiye[36] nzuk-mbu̧h lampoh ké gel pihna ye. Mí Zezu ɗi ni : « Mú dih fal bi-ay. » Matiye ur ba, mí ke dih fal ye.

¹⁰Seh a hani Zezu kaɓ nzak fe su̧na ké puh Matiye. Í ko. Daɓa nzuk-mbu̧h lampohri ke nzuk suya a ɓoruri ti̧h gi kaɓ nzak fe su̧na ziŋ Zezu ke nzuk-dih fal yeri pi.

¹¹Fariziri ɓá ko fe-u kaŋ dale, ku ɓah ɓay hi̧ nzuk-dih fal yeri kandɔkay : « Ɓay fe mí metere woiri ƴo su̧ fe ziŋ nzuk-mbu̧h lampohri ke sam nzuk suya a ɓoruri-aw le ? »

¹²Zezu lah ɓay kú-u ɓah ra bale, ke ɓahri : « Nzuk mun gahnari si seh dɔkta ya. Nzuk senari mí si seh dɔkta.

¹³Í si likɔl, í hi̧ tul woiri ɓay tu ɓayay ké Ŋgerzah ɓah, láɓ law in mí ke yih ɓayu, Láɓ pihna hi̧ ni ndikpoh le, ke sa-a[37][38]. Kandɔkaw mí-i gi ɓay ɗi nzukri ké ƴo tul mbete bolkusol Ŋgerzah ya. Wara le mi gi ɓay ɗi nzuk suyari. »

¹⁴Wara mí nzuk-dih fal Za̧h batisiri gi ta̧w Zezu ɓahri : « A wah ke fariziri nah toŋ saŋ mbih ba, ɓay fe mí nzuk-dih fal wori, saŋ mbih ya le ? »

¹⁵Zezu ɓah hi̧ niri ɓahri : « Nzukri ké gi gel ti̧hmbih nzuk-ya̧ wu̧y a foyu[39] ɓay laɓ mun ɓa seh lo ? Mí nam ƴo gina ɓay hi̧ nzuk wu̧y a foyu ra ɓá ta-a. Namuri-aw dara ku sáŋ mbih ɓáy.

¹⁶Nzuk ké ɓay mbi nzak gar a foyu sa̧h keni nun ta̧w gar ta-a. Gar a foyu-aw ɓay gɔh ta̧w gar ra tir ma pol hi̧ garu suya mba a pol.

¹⁷Nzuk ta aŋ yim a pa̧wu ku̧ ta̧w ɓɔl ho̧ko ya. Yimu yi̧ŋ le, ɓɔl ho̧ko ra ɓay fur kpum dale, yim a pa̧wu ra ɓay ku̧ kpah. Ta̧w ɓɔlu kara ɓay ɓe-ɓeɓ pi. Kaŋ dale ku aŋ yim a pa̧wu ku̧ ɓil ɓɔl ho̧ko a foyu ma. Mí yim ke ɓɔl ho̧ko seɗe mbɔk ɓay na ɓa suki. »

¹⁸Zezu ƴo ɓah ɓay ra ɓáy bale, í ko, ŋgernzuk mbew gi ta̧w ye. Ke huk siɓa goŋ ni ɓahri : « Gun bi a wu̧yu hu aŋay. Keni-aw kara mu si ɓaŋ ndɔk kan tul ye le, ke él kaɓ ke nun ɓáy. »

¹⁹Zezu mbi mahful ƴo sina fal ŋgernzuk ra. Nzuk-dih fal yeri si pi.

²⁰Mí í ko, wu̧y si ke fal Zezu mí za nzak gar ye. Wu̧y ra, sem ƴo ti̧h ke ɓil ye laɓ mbihmbam boh falu seɗe kari da[40].

²¹Ke ɓahri se : « Ɓa ra nzak gar ye kaŋto mí-i za kara mi tí̧h ke ndɔk hul. »

²²Zezu sɔɓ nun, ke ko wu̧y ra dale, ke ɓahri : « Gun bi, mú su̧h law. Law wo ké te sa tul bi-ay ya̧ mu ke ndɔk hul ya̧-ya̧. » Kaŋaw mí wu̧y ra ziŋ mun gahna ke sa̧wseh-u-aw.

²³Zezu ka̧h kerpuh ŋgernzuk ra. Ke ko nzuk-ɗi siŋ rew hulri ke nzuk-vba̧ munri, mí ke ɓah hi̧ niri ɓahri : « Í el wuri ma puh wara. Gun tikla-ay hu ya. Wara le ke na nam kaŋto. » Mí ku sak ni gbaw.

²⁵Ke ni̧h nzukri-aw bale, ke rih ɓil vul. Ke mgba ndɔk hul ra, ke tom ni. Tem gun tikla ra el gi, ke ur síɓa.

²⁶Kandɔkaw mí mberem ɓayu ya̧ gelri riw ké tusiɓa-aw.

²⁷Zezu poŋ kerpuh ŋgernzuk ra ƴo tɔrna. Ra̧wri seɗe dih bol ye ƴo vba̧ nzak ɓeleŋ ɓeleŋ. Ku ƴo ɓahri : « Gun zih ŋgermbay Daviɗ, mú laɓ law in ziŋ na ge. »

²⁸Zezu rih vul, mí ra̧wri ké seɗe ra rih si tul ye. Zezu vbi niri ɓahri : « Law woiri te tul bi ɓahri, ŋgerna bi mah so wuri le ? » Ku ɓahri : « Kandɔkaw. Ŋgermbay, mu ma-mah. »

²⁹Wara mí ke ndar ndɔk za nun woyri, ke ɓahri : « Nun woiri ɓá mgbur mah ke kanlaw woiri. »

³⁰Kaŋ mí nun woyri mgbur, mí Zezu bak niri ɓahri : « Ko-ko í ɓah ɓayu hi̧ nzuk mbew. »

³¹Ti̧hna woyri ke vul bale, ku si ɓah ɓayu par par hi̧ mberemu ya̧ gelri riw ké tusiɓa-aw.

³²Zezu ke nzuk-dih fal yeri ti̧h ke vul ƴo tɔrna bale, í ko, nzukri maŋ mbiki ké záh mbih kusol ye gi keni hi̧ Zezu.

³³Zezu ni̧h záh ké tul mbiki ra, mí mbiki-u el ɓah ɓay. Fe-u na daɓa nzukri yer. Ku ɓahri : « Fe saŋ a kandɔkaw ti̧h nun gun Izarayelri bɔk mbew ya ɓáy. »

³⁴Fariziri ba, ƴo ɓahri : « Ke ŋgerna mbay záh tukala mí ke ƴo ni̧h záhri ké tul nzukri-aw. »

³⁵Zezu si ke puh puh, puh a lukiri ke gun puhri pi. Ke ƴo firma ziɓri ɓay lák mbay Ŋgerzah ɓil vul misoŋ woyri. Ke ka-kah ɓaysuki lák mbay a nunmbam. Ke gah sam senari ɓoɗ ɓoɗ.

³⁶Ké-e ko daɓa nzukri-aw dale, ku baseh ké nun ye ɓay fe le, fe zɔklɔ kal tul woyri pi, kal law woyri pi. Ke ko niri kandɔk sami ké nzuk-kɔr niri ta-a.

³⁷Wara mí Zezu ɓah ɓayay hi̧ nzuk-dih fal yeri : « Naŋ na ndekle ké waka mah vbehna, mí nzuk-vbeh naŋuri ŋgi̧ ya.

³⁸Dale í goŋ nzuk waka ɓá pih nzuk-vbeh naŋ a ɓoruri gi dɔm tul nzuk a polri ɓáy. »