Read Karang Mbete Marki 1 Bible Online

Mbete Marki 1 - Karang bible

Mbete Marki 1

¹Ɓaysuki hul Zezu ké ɓa Ŋgermbay gun Ŋgerzah titil kandɔkay.

²Ɓaysuki ra ti kandɔk ké Ezay gun nzak pihna Ŋgerzah a lewsa̧ vbeh ɓayu. Ŋgerzah pih ɓahri se : Í ko, mi pih gun nzak pihna bi ƴo pol wo[1] ɓay lek ful geŋ mu[2].

³Kusol ye mgbe ɓil lawkɔr ɓahri, í lek wuri mahful geŋ Miƴori, fulu sa gelaw mí í lek ɓá na kparak kparak[3].

⁴Kandɔkaw mí Za̧h ti̧h ɓil lawkɔr, ke ƴo hi̧ nzukri ti̧h ɓil batem a mbih. Ke ƴo ka-kah ɓay batem a mbilaw, kú mbi law woyri ké tul suya ma fal el kan law tul Ŋgerzah ɓay hi̧ salɓay suya ɓá lu ké tul woyri.

⁵Ziɓri ur ke tusiɓa Zude gbam mbu̧h ma ta̧w Za̧h. Ziɓri riw ké Zurusalem kara pi. Ku hi̧ Za̧h soh niri mbih batem ɓil mahmbih Zurdeŋ. Nzak woyri ƴo ten ɓay suya woyri.

⁶Za̧h ra ndoh gar kú-u kaŋ ke pirma zɔŋzɔŋ[4]. Ke ŋga̧h si̧h ye ke sal ho̧ko. Fe su̧na ye ɓa zele ke num zuhru.

⁷Ke ka-kah ɓahri : « Nzuk a luki ƴo gina. Ɗíŋ tul ɓay sel sal sabɔk ye kara mi mah ya.

⁸A bi, mi hi̧ wuri ti̧h ɓil batem a mbih. A ye le ke ɓay hi̧ wuri ti̧h ɓil batem a Tempuki. »

⁹Ké ɓil namuri-aw Zezu ur ke Nasareɗ ké tusiɓa Galile gi ka̧h ta̧w Za̧h, mí ke hi̧ Za̧h soh ni mbih batem ɓil mahmbih Zurdeŋ.

¹⁰Zezu ƴo ti̧h ke ɓil mbih, sa gelaw mí ke ko nunmbam mgbur ɓoloŋ, mí ke ko Tempuki ɗer kandɔk mbɔre gi kaɓ tul ye.

¹¹Kusol ba, ti̧h ke nunmbam ɓahri : « A wo mú-u ɓa gun sana bi. Law bi na sa tul wo. »

¹²Sa gelaw mí Tempuki sɔkrɔ ni si ɓil lawkɔr. Ke laɓ nam bon niŋ ké ɓilu.

¹³Nam bon niŋaw, nzukbaa a ye mbay záh tukala ƴo ndoh law Zezu ke ɓay. Zezu kaɓ gel ƴona nayri. Tem nzak pihnari ƴo so ni.

¹⁴Seh kú-u mgba Za̧h mbih vul mgbal ra, Zezu si tusiɓa Galile. Ke ka-kah ɓahri : « Lák mbay Ŋgerzah gi ka̧h da. Le í mbi law woiri ké tul suya ma fal el kan law woiri tul Ŋgerzah. Í ya̧ ɓaysuki lák mbay ye ma law woiri. »

¹⁶Zezu si sina ke ɓel mahmbih Galile, ke ko nzukri seɗe ɓa Simu ke yi̧n ye Andere. Ku ƴo vbu kȩke woyri ɓayu kú-u ɓa nzuk-mgba nzuyri.

¹⁷Zezu ɓah hi̧ niri ɓahri : « Í gi fal bi. Mi ɓay sɔɓ wuri ti̧h ɓa nzuk-mgba nzukri hi̧ mi. »

¹⁸Ku poŋ kȩke woyri. Sa gelaw mí ku dih fal ye.

¹⁹Zezu loh tɔɓ, mí ke el ko nzuk a ɓoruri seɗe ɓa Zak ke yi̧n ye Za̧h. Bah woyri ɓa Zebede. Ku kaɓ ɓil kumbon ƴo lek nun kȩke.

²⁰Sa gelaw mí Zezu ɗi niri. Gun Zebederi ba, ku poŋ bah woyri ke nzuk pihnari ké ɓil kumbon, mí ku si fal ye.

²¹Zezu ke nzuk-dih fal yeri si ka̧h Kapernayum. Nam ɔknari, Zezu ƴo si vul misoŋ. Sa gelaw mí ke firma nzukri ɓay Ŋgerzah.

²²Gosoɓay zi nzukri ɓay tul fe firma ye, ɓayu ké fe firma ye na kandɔk fe firma nzuk-sɔk mbete bolkusol Ŋgerzahri ya. Ku ƴo mbi ɓay Ŋgerzah firma nzukri keni. A ye ba, ke ɓah ɓayuri kandɔk a ye mí ke ɓa mbay bolkusolu.

²³Záh ƴo tul nzuk a hani ké kaɓ ɓil vul misoŋaw.

²⁴Sa gelaw mí ke vba̧ nzak ɓahri : « Zezu ké Nasareɗ, a fe wo mí ƴo sakra wah le ? Mu gi ɓay ɓeɓ na wa ? Mi tu mu tu-tu. Mu ɓa nzuk lawpuki Ŋgerzah. »

²⁵Mí Zezu hah záh ɓahri : « Poŋ nzak wo-aw. Mú ti̧h ke tul nzukay. »

²⁶Záh ra laŋ nzuk ra yik yik, ke vba̧ nzak ɓeleŋ, mí ke ti̧h ke tul nzuku poŋ ni gaŋ ba.

²⁷Nzukri riw kaɓ yer. Fe-u na niri ɓa saŋ hi̧ ku fah ɓay ké sakra haniri. Ku ƴo ɓahri, sam fe firma fe mí kari le ? Ke firma ɓay Ŋgerzah ɓa foyu ke kusol mbay. Ke hah záh tukalari mí ku hȩk ni.

²⁸Kandɔkaw mí riŋ ɗina Zezu mgbe ké tusiɓa Galile riw. Sa gelaw mí mberem ye ya̧ tusiɓa-aw ya̧h ya̧h.

²⁹Zezu ti̧h ke vul misoŋ. Sa gelaw mí ke si kerpuh Simu ke Andere. Zak ke Za̧h mí si ziŋ niri pi.

³⁰Mahfay Simu na sena. Mun ye zaŋ biɗ biɗ. Sa gelaw mí ku ɓah ɓayu hi̧ ni.

³¹Zezu si ta̧w mahfay ye ra ɓay ɔr ni. Zezu ɓá mgba ndɔk ye le, mun mahfay ra voh, mí ke ur mgba niri gahru.

³²Bɔklew, seh ƴo riŋna bale, nzukri fa̧h nzuk senari riw gi keni ku̧ ta̧w Zezu[5]. Ku fa̧h nzukri ké záh ƴo tul woyri gi keni pi.

³³Nzukri riw ké ɓil puh-aw mbu̧h hani ké nzak vul mer mer.

³⁴Zezu gah daɓa nzukri ké gi ke sena woyri ɓoɗ ɓoɗ. Ke ni̧h záhri ɓa ŋgi̧-u pi. Ke hah niri ɓáh ɓay ɓay fe le, ku tu ni tu-tu.

³⁵Tipele teh ɔh ya ɓáy, mí Zezu ur tɔr si gel ké nzukri ta ri ya. Ke kaɓ ri ƴo ɓah ɓay ke Ŋgerzah.

³⁶Simu ke mbaŋ yeri faŋ bol ye.

³⁷Ku ziŋ ni, mí ku ɓahri se : « Nzukri ƴo ƴah mu wa, ani le ? »

³⁸Ke ɓahri : « Náh si wuri ma puh a ɓoruri ɓay mí ka-kah ɓay lák mbay Ŋgerzah ké ri. Sa̧wɓay gina bi munu. »

³⁹Kandɔkaw mí ke si ke vul misoŋ vul misoŋ ké tusiɓa Galile gbam, ke ƴo ka-kah ɓay lák mbay Ŋgerzah. Mí ke ni̧h záhri hi̧ ti̧h ke tul nzukri.

⁴⁰Nzuk ndɔɓe gi ta̧w Zezu. Ke huk siɓa ké pol ye ɓahri : « Ŋgerna woiri mah gah ndɔɓe bi-ay hi̧ mun bi teh. Le saŋna-si gel kani Ŋgerzah ɓay lu ké tul bi. »

⁴¹Law Zezu sa̧h. Ke ndar ndɔk mí za nzuk ndɔɓe ra ɓahri : « Mi yih. Ful-si gel kani Ŋgerzah ɓay dim ni ɓá ƴo ri. Mú teh wara. »

⁴²Sa gelaw mí ndɔɓe ra ɔh, mí ke teh.

⁴³Sa gelaw mí Zezu pih ni si gel kani Ŋgerzah. Ke bak nzuk ra ɓahri se : « Ko-ko mú ɓah ɓayu hi̧ nzuk. Wara le mú si gel kani Ŋgerzah sɔk mun wo hi̧ nzuk fe puhna Ŋgerzah ɓá ko. Mú si ke puhna ɓay mun tehna wo kandɔk ké Moyiz vbeh ɓil mbete bolkusol Ŋgerzah ɓay hi̧ kú te-teh ɓayu ɓahri, ndɔɓe wo ɔh ɓa ketina[6]. »

⁴⁵Bale nzuk ra tɔr si ka-kah ɓayu hi̧ daɓa nzukri lah. Ɓayu seh par par. Kaŋ mí Zezu ziŋ ful-ka̧h puh ɗeŋ ya. Wara le ke si nzak gakra. Dale nzukri ur ke gelri ɓoɗ ɓoɗ gi ma ta̧w ye.