Read Karang Mbete Marki 10 Bible Online

Mbete Marki 10 - Karang bible

Mbete Marki 10

¹Zezu ur ke gelaw si tusiɓa Zude ké na fál kala mbih Zurdeŋ[20]. Daɓa ziɓri el gi mbu̧h ké ta̧w ye. Kandɔk ké ɓa fe laɓna ye, ke firma nzukri ɓay lák mbay Ŋgerzah.

²Mí fariziri gi ta̧w Zezu. Ku ƴo ndoh law ye ke ɓay. Ku vbiɓay ɓahri : « Bolkusol Ŋgerzah ké Moyiz vbeh hi̧ nzuk ful-ni̧h wu̧y ye le[21] ? »

³Zezu el vbi niri ɓahri : « Moyiz ɓah hi̧ wuri ani le ? »

⁴Bale ku ɓahri : « Moyiz hi̧ na ful ɓahri, nzuk ɓá vbeh mbete-ni̧h wu̧y ndoh ndɔk wu̧yu dara ké ni̧h ni ɓáy. »

⁵Mí Zezu ɓahri : « Ɓay law kpuhna woiri mí Moyiz hi̧ wuri bolkusol-vbeh mbete ɓay ni̧h wu̧y.

⁶Ke titilu da̧y ké Ŋgerzah laɓ nunmbam ke tusiɓa ra, ke laɓ nzuk pirmatul ɓa wo̧ronzuk ke wu̧ynzuk.

⁷Sa̧wu mí wo̧ronzuk ɓay poŋ bah ye ke mah ye. Ku yá̧ hani ke wu̧y ye.

⁸Ku ɓa nzuk ké mbew, ku ɓa nzukri seɗe mba. Wara le ku ɓa nzuk ké mbew yaŋ.

⁹A a̧w ké Ŋgerzah mbu̧h niri ɓa nzuk pirmatul mbew ra nzuk ɓá kehr niri ya. »

¹⁰Zezu rih ɓil vul ɓáy ba, nzuk-dih fal yeri vbi ni ɓay tul ɓay ké-e ɓah ra.

¹¹Ke ɓahri : « Nzuk a suŋ suŋ ké ni̧h wu̧y ye, mí el ya̧ wu̧y a ɓoru soh gelu le, salɓay nunpuki ta tul nzuku.

¹²Gelke wu̧y ti̧h ke vul wah ye si ya̧ wo̧ro a ɓoru le, salɓay nunpuki ta tul wu̧yu. »

¹³Nzukri ƴo gi ke gunri ma ta̧w Zezu ɓay ké lu mgbɔkɔ ku̧ tul gunuri, mí nzuk-dih fal yeri hah gina woyri.

¹⁴Zezu ɓá ko niri kaŋ le, ke ziŋ law fa̧hna, ke el ɓahri : « Í poŋ gunri ɓá gi ta̧w bi. Í gboh niri ya ɓayu ké lák mbay Ŋgerzah na ɓay sam gun a kandɔkawri.

¹⁵Gelu munu. Mi ƴo ɓah ɓayay hi̧ wuri, nzuk a suŋ suŋ ké ya̧ lák mbay Ŋgerzah ma law ye kandɔk gun ya le, ke ta rih ɓilu ya gaŋ. »

¹⁶Mí ke el mgba gunri ra ma haŋ ye ɓaŋ ndɔk kan tul woyri. Kandɔkaw mí ke lu mgbɔkɔ ku̧ tul woyri.

¹⁷Zezu ke nzuk-dih fal yeri mbi mahful ƴo tɔrna bale, nzuk mbew ti̧h ke ɗukna gi huk pol ye. Ke vbi Zezu ɓay ɓahri : « Metere, nzuk a suki, a fe mí-i láɓ ɓay ya̧ puh a a̧y ké ɓay mí kaɓ sew ke sew ɓa ŋgɔh le ? »

¹⁸Bale Zezu ɓahri : « Ani mú-u ɗi mi ɓa nzuk a suki le ? Nzuk pirmatul a suki mbew ta-a. Ŋgerzah mbew yaŋ mí ɓa nzuk a suki.

¹⁹Mu tu ɓayri ké na ɓil bolkusol Ŋgerzah tu-tu pi. Mú i hul ya, mú mbi wu̧y nzuk mbaŋ wo ya, mú ri-riɓa ya, mú kuŋ ɓay ku̧ nzak nzuk ya, mú gɔɓrɔ nzuk ya, mú hȩk bah wo ke mah wo. »

²⁰Kandɔkaw mí nzuk ra ɓah ɓay ɓahri : « Metere, mi ƴo tul ɓayawri gbam ke seke bi ka̧h guri-ay. »

²¹Bale Zezu hekre ni zi̧h ke law sana. Mí ke ɓah hi̧ ni ɓahri : « Ɓay mbew toŋ mu ɓáy. Mú si fa̧h fe ziŋna wori yeh riw, mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi-ay. »

²²Ke lah ɓay ké Zezu ɓah bale, mun ye voh, law ye rih ni mba, mí ke tɔr ɓayu ké ndɔk ye ah mbamba.

²³Zezu ko kona ma tul nzuk-dih fal yeri ɗoŋ gbuk, ke ɓahri : « Kpuh mbamba ɓay nzukri ké ƴo ke fe ziŋna ɓá hi̧ Ŋgerzah lak mbay ké tul woyri. »

²⁴Nzuk-dih fal yeri ɓá lah ɓay ra le, ɓayu na niri yer. Zezu ba, el ɓahri : « Gun biri, kpuh mbamba ɓay nzuk ɓá hi̧ Ŋgerzah lak mbay ké tul ye.

²⁵Ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay hi̧ nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »

²⁶Gosoɓay zi nzuk-dih fal yeri zi-zi. Ku el ɓah ɓay ké haŋsekle woyri ɓahri : « Mí kaŋaw ba, nzuk a suŋ mí mah kaɓ ke ɔkna le ? »

²⁷Zezu ko niri zi̧h, ke ɓahri : « Káɓ ke ɔkna le, mba nzuk pirmatul. Wara le Ŋgerzah mah ɓay hi̧ nzuk kaɓ ke ɔkna ɓayu ké fe-mba Ŋgerzah ta-a. »

²⁸Wara mí Piyer ɓahri : « Mú ko, a wah ba, nah poŋ feri riw, mí nah dih fal wo-ay. »

²⁹Kandɔkaw mí Zezu ɓahri : « Ɓa ketina. Mi ƴo ɓah hi̧ wuri ɓahri, nzuk ké poŋ sa̧w ye, yi̧n yeri, in yeri, bah ye ke mah ye, gun yeri, waka yeri ɓay tul bi ke ɓay tul ɓaysuki bi [22]le, fe ziŋna ye ɓay ro sɔɗ kal nzuku a pol. Ke zíŋ sa̧w puh, ke zíŋ yi̧n yeri ke mah yeri ke gun yeri ke waka yeri ɓil koseh sew a tukala-ay. Sew a gi-u ba, ke káɓ ɓil ɔkna.

³⁰

³¹Kandɔkaw mí daɓa nzukri ké ƴo pol ɓay el si sar fal mgbaɗ. Nzukri ké ƴo sar fal ba, ɓay kal ma pol. »

³²Ku ƴo tul mahful ƴo hil ma Zurusalem. A ye ke si pol. Law nzuk-dih fal yeri lu ɗuŋ ɗuŋ. Hȩkme se niri. Zezu mbu̧h nzuk-dih fal ye a boh falu seɗeri bale, ke ɓah ɓay fe ké ɓay ziŋ ni hi̧ niri.

³³Ke ɓahri : « Í lah, nah ƴo hil wuri ma Zurusalem, mí nzuk ɓay ndoh gun nzuk pirmatulay ndɔk ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri. Ku ɓay kuŋ salɓay hul kan tul ye. Mí ku él ndoh ni ndɔk sa̧wnzuk a ɓoruri.

³⁴Nzukawri-aw ɓay sak ni. Ku ɓay sa-sam ku̧ tul ye. Ku ɓay vba̧ ni dara mí ku í ni. Nam say falu le, ke tí̧h ke puh záh ke pa̧ymun a foyu. »

³⁵Mí Zak ke Za̧h gun Zebederi loh ma ta̧w Zezu ɓahri : « Metere, nah yih goŋ mu fe ɓay mú laɓ fe-u hi̧ na. »

³⁶Mí ke ɓahri : « A fe mí i yih ɓay mí laɓ hi̧ wuri le ? »

³⁷Mí ku ɓahri : « Mú hi̧ na náh kaɓ ɓil riŋ ɗina wo ziŋ mu. Nzuk a mbewu ɓá kaɓ ndɔk lakna wo, nzuk a ɓoru ba, ɓá kaɓ ndɔk kperu wo. »

³⁸Mí Zezu ɓah hi̧ niri ɓahri : « Fe ké i goŋaw, i tu ya. Koɓ koseh ké mi nzo-u ra wa i mah ɓay nzo pi le ? Batem koseh ké mi rih ɓilu ra ba wa, i mah ɓay rih ɓilu pi gaŋ le ? »

³⁹Mí ku ɓahri : « Nah ma-mah. » Zezu el ɓahri se : « Koɓ koseh ké mi nzo-u ra i ɓay nzo-u gaŋ. Batem koseh kú-u ndoh mi ɓilu ra, i ɓay rih ɓilu pi.

⁴⁰Mí ɓay hi̧ nzukri ɓá kaɓ ndɔk lakna ke ndɔk kperu bi ra, ɓa fe bi ya wara le, ɓa fe bah bi ké lek gel kaɓna-aw ɓay hi̧ niri. »

⁴¹Tɔr nzuk-dih fal Zezu ké boh ɓá lah goŋna Zak ke Za̧h bale, haŋ woyri fa̧h niri ké tul Zak ke Za̧h ra.

⁴²Mí Zezu ɗi niri gi ma ta̧w ye. Ke ɓahri : « A woiri i tu-tu, nzukri kú-u tu niri ɓa mbay tusiɓari ƴo lak mbay tul nzuk woyri ke ŋgerna. Nzuk a lukiri ƴo pih bolnzak woyri hi̧ nzukri laɓ.

⁴³Mí a woiri le i na kandɔk nzuk riŋ ɗinari-aw ya. Wara le nzuk a a̧y ké yih ti̧h ɓa ŋgernzuk tul mbaŋ yeri le, ke ná ɓa gun-laɓ pihna hi̧ mbaŋ yeri.

⁴⁴Nzuk a suŋ suŋ ké yih na ɓa tul ké sakra mbaŋ yeri le, ke ná ɓa mgbal mbaŋ yeri gbam.

⁴⁵Ɓayu ké gun nzuk pirmatul gi tusiɓa ɓay hi̧ nzukri ɓá laɓ pihna hi̧ ni ya. Wara le ke gi ɓay laɓ pihna hi̧ nzuk mbaŋ yeri. Ke gi ɓay poŋ mun ye ɓa fe puhna ɓay sel daɓa nzukri ke ndɔk hul. »

⁴⁶Sina woyri ma Zurusalem, ku si ka̧h Zeriko. Zezu ƴo ti̧h ke puh-aw ke nzuk-dih fal yeri ke daɓa nzukri mah fe bale, ra̧w a hani kaɓ ɓel mahful ƴo rah ndɔk goŋ fe. Riŋ ye ɓa Bartime. Ke ɓa gun Time.

⁴⁷Ke lah ɓahri, Zezu ké Nasareɗ ƴo kalna dale, ke vba̧ nzak ɓeleŋ ɓahri : « Gun zih ŋgermbay Daviɗ, Zezu wo, mú laɓ law in ziŋ mi ge. »

⁴⁸Mí daɓa nzukri pom ni ɓay ké tuh nzak ye, mí ke toŋ vba̧ nzak ɓa mgbe-u ma síɓa síɓa ɓahri : « Gun zih ŋgermbay Daviɗ, mú laɓ law in ziŋ mi ge. »

⁴⁹Zezu ta̧h ƴo, mí ke ɓahri, kú ɗi ra̧w ra ɓá gi. Nzukri ɗi ni. Ku ɓahri : « Mú su̧h law. Mú ur si ta̧w ye. Ke ɗi mu. »

⁵⁰Bale ra̧w ra poŋ gar ye vbu biŋ, ke ur ɓa gah-u, mí ke si ta̧w Zezu.

⁵¹Zezu ba, ɓahri : « A fe mú-u yih ɓay mí laɓ hi̧ mu le ? » Ra̧w ra yih nzak ye ɓahri : « Metere, mi yih ɓay ko gel. »

⁵²Kandɔkaw mí Zezu ɓahri : « Mú si ɓa suki. Law wo ké te tul bi lu salɓay suya ké tul wo lu-lu. » Sa gelaw mí nun ye teh, mí ke dih fal Zezu.