Read Karang Mbete Marki 11 Bible Online

Mbete Marki 11 - Karang bible

Mbete Marki 11

¹Zezu ke nzuk-dih fal yeri ka̧h Beɗfaze ke Beɗtani. Puh-uri ɗih ya ke Zurusalem mí na fál kasaw ké kpuh Olivehri na ri. Dale Zezu pih nzuk-dih fal yeri seɗe si pol.

²Ke ɓahri : « Í si puh ké na pol woiri sa̧-aw. Ka̧hna woiri, sa gelaw mí i ɓay ko gun bamnde kú-u ŋga̧h ƴo. Gun bamnde ra nzuk kaɓ tulu bɔk mbew ya ɓáy. Í sel bamnde-aw, í gi keni hi̧ mi.

³Nzuk vbi wuri ɓahri, ɓay fe mí i sel bamnde-aw le, í ɓahri, gaŋ bamnde-u mí yih ɓayu. Sa gelaw mí ke ɓay poŋ hi̧ wuri í gi keni. »

⁴Nzuk-dih fal yeri ké seɗe-aw tɔr. Ku ka̧h, ku ko gun bamnde ra, kú-u ŋga̧h ɗih ya ke ɓel nzakful-rih ɓil puh, mí ku sel.

⁵Nzuk a hani-uri ké ƴo gelu-aw vbi niri ɓahri : « Ɓay fe mí i sel bamnde-ay le ? »

⁶Bale ku ɓah ɓay ké Zezu ɓaŋ ndoh nzak woyri ra, mí ku poŋ gun bamnde-u hi̧ niri ku tɔr keni.

⁷Ku gi ke gun bamnde ra hi̧ Zezu. Ku mbala gar woyri ku̧ tul bamnde ra, mí Zezu kaɓ ri[23].

⁸Daɓa nzukri fih gar woyri ku̧ ke ful ful. Nzuk a ɓoruri ba, haw gay kpuhri ké waka, mí fih ku̧ mahful pi.

⁹Nzuk a haniri si pol. Nzuk a ɓoruri ba, si fal. Ku vba̧ nzak le, ku vba̧ ra ɓáy ɓahri : « Nzuk-ya̧ na, mú ya̧ na. Mgbɔkɔ Gaŋ tul feri riw ku̧ tul wo ké mu gi ke riŋ ɗina ye.

¹⁰Mgbɔkɔ-u na tul lák mbay ziih ŋgermbay Daviɗ ké gi-ay. Riŋ ɗina Nzuk-ya̧ na mgbe si ka̧h nunmbam a síɓa sa̧. »

¹¹Ku ka̧h Zurusalem. Ke kal si rih ɓil ila vul kani Ŋgerzah. Ke ko kona ɗoŋ ri gbuk. Gel ƴo sihna wara mí ke ti̧h tɔr ke nzuk-dih fal ye a boh falu seɗeri el si na Beɗtani.

¹²Tipele-u, ku ti̧h ke Beɗtani el ma Zurusalem, mí ɗaka i Zezu.

¹³Ke ko kpuh nzu̧y ké mbaŋ riɗiɗi ƴo ɓa ɗih-u. Mí Zezu reh si bɔk nzu̧y ra ɓay ko lehna-u ƴo ri mini ta-a le ? Ka̧hna ye le ke ziŋ ɓa gayuri. Lehna-u ta-a[24] ɓayu ké few lehna-u ka̧h ya ɓáy.

¹⁴Bale Zezu ɓah hi̧ kpuh nzu̧y ra ɓahri : « Nzuk ta su̧ lehna wo mba wu̧m wara. » Nzuk-dih fal yeri lah ɓay ké-e ɓah ra.

¹⁵Kandɔkaw mí ku ka̧h Zurusalem. Zezu si rih ɓil ila vul kani Ŋgerzah, wara mí ke ni̧h nzukri ké kaɓ ke fe hɔlnari ɓay hi̧ nzukri ɓá yeh ɓa fe puhna woyri, ke ni̧h nzukri ké ƴo yeh fe hɔlnari-aw kara pi. Ke ziŋ nzukri ké kom lari ŋgomna ke lari misoŋ ké nzak tabele woyri,[25] ke ziŋ nzuk-yeh ndoy mbɔreri[26] ké tul fe kaɓna woyri mí ke sɔkrɔ fe-uri mgborvboŋ mgborvboŋ ku̧ siɓa.

¹⁶Ke hah nzuk-suk fe yehnari kalna si ɓil ila vul kani Ŋgerzah.

¹⁷Mí ke ƴo firma nzukri ɓahri : « Ŋgerzah ɓah ɓil mbete ye ɓahri, vul ye ɓa vul-ɓah ɓay ziŋ ni hi̧ sa̧wnzukri riw. A woiri ba, i sɔɓ gelu ɓa hoh nam riɓari. »

¹⁸Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri lah fe ké Zezu firma daɓa nzukri ra, mí ku ƴah ful ɓay i ni, ɓayu ké hȩkme ye laɓ niri. Ku ɓahri se, fe firma ye-aw na nzukri yer.

¹⁹Gel sih bale, Zezu ke nzuk-dih fal yeri ti̧h ke Zurusalem tɔr.

²⁰Tipele-u Zezu ke nzuk-dih fal yeri el si ma Zurusalem, mí ku ko kpuh nzu̧y ra hu yɔh ka̧h sa̧wu.

²¹Piyer ker si tul haɓna ké Zezu ɓah ra, mí ke ɓahri : « Metere, mú ko, kpuh nzu̧y ké mu haɓ fe ku̧ tulu ra ho̧k wɔh ka̧h sa̧wu. »

²²Bale Zezu ɓahri : « Law woiri ƴo mbew ke law Ŋgerzah gaŋ le, mi ƴo ɓah hi̧ wuri ɓahri se, nzuk a suŋ suŋ ké ɓah hi̧ baw kasaw ké na-aw ɓahri, kasaw ɓá loh ke gelaw si vbu ɓil mahmbih-aw, mí law nzuku na mbew ke law Ŋgerzah, fahɓay ta law ye ya le, fe-u ɓay laɓ kandɔk ké-e ɓah gaŋ ba.

²⁴Sa̧wu mí-i ƴo ɓah ɓayay hi̧ wuri, ɓay feri gbam ké i ƴo ɓah ɓayu ziŋ Ŋgerzah mí i ƴo vbi ni le, law woiri ké ƴo mbew ziŋ ni gi tu ɓahri, i ziŋ fe-u da, le Ŋgerzah ɓay laɓ fe-u hi̧ wuri.

²⁵Gelke i ƴo ɓah ɓay ziŋ Ŋgerzah mí i ƴo ke ɓay ziŋ nzuk le, í sel nzuk ké laɓ wuri suya hi̧ bah woiri ké ƴo nunmbam ɓá lu salɓay-mba nzak ye ké tul woiri. »

²⁷Ku ka̧h Zurusalem ra ɓáy, mí Zezu si rih ɓil ila vul kani Ŋgerzah. Ke ha̧rma ri, mí ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk puh woyri gun Izarayelri gi ta̧w ye.

²⁸Ku ɓahri : « Ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »

²⁹Bale Zezu ɓahri : « A bi kara mi vbi wuri ɓay mbew. Í yih vbiɓayu hi̧ mi, mí lah dara mí-i sɔ́k wuri ke bolkusol ge mí-i ƴo laɓ pihna biri-ay ɓáy.

³⁰Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatulri le ? Í yih nzak bi, mí lah. »

³¹Ku fah ɓay ké sakra woyri ɓahri : « Nah ɓah ra ri se, sa̧wu ɓa nunmbam le, ke él vbi na ɓay fe mí nah sa ya̧ ɓay ké Za̧h ɓah ra ya.

³²Mí náh ɓahri, sa̧wu ɓa nzuk pirmatulri le, nzukayri riw ɓay i na. » Hȩkme nun nzukri tuh nzak ŋgernzukri-aw ɓayu ké daɓa nzukri riw tu Za̧h ɓa gun nzak pihna Ŋgerzah.

³³Mí ku yih nzak Zezu ɓahri : « Nah tu sa̧wu ya. » Le Zezu el ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi. »