Read Karang Mbete Marki 13 Bible Online

Mbete Marki 13 - Karang bible

Mbete Marki 13

¹Zezu ƴo ti̧h ke ɓil ila vul kani Ŋgerzah ke nzuk-dih fal yeri dale, nzuk-dih fal ye mbew ɓahri : « Metere, mú ko sam kasaw a feluri kú-u mboh keni vulri ɓil ila vul kani Ŋgerzah ké su kona luki-aw. »

²Mí Zezu ɓahri : « Kasaw a bawu bawuri kú-u mboh keni vuluri ké mu ko-aw, nzukri ɓay haw riw ku̧ siɓa[36]. Kasaw mbew ké ɓay toŋ síɓa ta-a. »

³Zezu ka̧h tul kasaw Oliveh ke nzuk-dih fal yeri. Ku kaɓ, nun woyri ko kona ma tul vul kani Ŋgerzah, mí Piyer, Zak, Za̧h, Andere, ku vbi ni ɓay ké-e ɓah ra ɓahri :

⁴« Mú ɓah tehɓayu hi̧ na, náh lah. Seh suŋ mí vulri-aw ɓay ɓeɓu le ? Fe sɔkna fe mí ɓay sɔk na nam ké ɓeɓna-aw ɓay ti̧h-u le ? »

⁵Dale Zezu ɓahri : « Í ko-ko rɔkɔ nzuk ɓá hi̧ wuri í reh ful.

⁶Nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Mí ku ɓay ra̧h keni daɓa nzukri.

⁷Gelke i lah ɓay ŋgermuri ma gini ma sa̧ le, í hi̧ law woiri ɓá lu ya. Na ani ani gaŋ kara ŋgermu ɓay laɓu. Keni-aw kara sew a ɔh tɔr sewri ta-a ɓáy.

⁸Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi. Tusiɓa ɓay laŋ yik yik ke gelri ɓoɗ ɓoɗ. Ɗaka ɓay lih puhri. Kosehri-aw ɓa titil fe munu ɓay na kandɔk mahɓil ké kaɓ peŋe ɓay mbuŋna kaŋ.

⁹Í ko tul woiri ger. Ku ɓay mgba wuri si pol ŋgernzuk vul misoŋri hi̧ ku kuŋ salɓay ku̧ tul woiri. Ké vul misoŋ ku zɔ́r wuri ke ndehdɔŋ. Ku ɓay si ziŋ wuri pol guvener-ri ke mbay tusiɓari ɓayu ké i ƴo tul riŋ bi. Fe-u ɓay laɓ hi̧ wuri í te-teh ɓay bi hi̧ niri ku lah.

¹⁰Na ani ani gaŋ kara sa̧wnzukri gbam ɓá lah ɓaysuki bi[37].

¹¹Gelku-u kɔklɔ wuri si ndoh ndɔk nzukri le, í hi̧ law woiri ɓá lu ya. Law woiri ɓá nzah ɓay ké i ɓah-u ké pol nzukri ra ya. Wara le ɓay ké Tempuki hi̧ wuri ke sa̧wseh-u le, í ɓah. Ɓayu ké ta ɓa ɓay woiri mí i ƴo ɓah-u ya. Wara le ɓa ɓay Tem lawpuki mí i ɓah hi̧ nzukri-aw.

¹²Nzukri gbam ɓay fu̧y wuri ɓayu ké i ƴo tul riŋ bi. Nzuk ɓay te yi̧n ye hi̧ kú i. Bah gun ɓay te gun ye hi̧ kú i. Gun ɓay ur ziŋ nzukri ké mbuŋ ni ɓay i niri. Mí nzuk ké su̧h law ye tul riŋ bi kpu̧ru ka̧h hul ye le, ke ɓay ti̧h ke ndɔk hul.

¹⁴Kaŋ dale nam ké i ko fe ra̧m ké mah kona ya mí nzukri si kan ɓil vul kani Ŋgerzah le, nzuk ké ƴo ki̧ mbete-ay ɓá tu ɓa teh-u, nzukri ké ƴo tusiɓa Zude ɓá ɗuk ma tul kasawri wara.

¹⁵Nzuk ké ƴo tul vul ɓá ɗuk fe ye kiriŋ. Ké lu kerɓay-fa̧h fe yeri ké ɓil vul.

¹⁶Nzuk ké ƴo waka ba, ɓá el gi puh ɓay mbi mah gar ye ya.

¹⁷Kúy. Namaw ra mah ɓilri ke mah gun nzak pamri ɓay ko seh mbamba.

¹⁸Kaŋ le í goŋ Ŋgerzah ɓay rɔkɔ fe-u ɓá laɓ ke ɓil belem[38]

¹⁹ɓayu ké koseh ɓay kpuh mbamba ke namuri-aw. Ur ke titilu ké Ŋgerzah laɓ nunmbam ke tusiɓa gi ka̧h guri-ay, sam koseh a kandɔkaw laɓ nzukri bɔk mbew ya ɓáy, mí ta laɓ nam a ɓoru mba wu̧m wara.

²⁰Gaŋ tul feri riw hi̧ nam koseh-aw el fal ya le, nzuk mbew ta tí̧h ke ndɔk hul ya. Mí ɓay tul nzukri ké Ŋgerzah lu ɓa sa̧w ye le, ke ɓay hi̧ namu el fal.

²¹Wara mí nzuk a suŋ suŋ ké ɓahri, Ŋgermbay mí ƴo-ay, mini, ke ƴo sa̧-aw le, í ya̧ ɓay ye ya ɓayu ké nzuk nzak rɔknari ɓay sɔk mun woyri ɓa Ŋgermbay ya le, ɓa gun nzak pihna Ŋgerzah. Ku ɓay laɓ fe saŋri ke feri ké mah kona ya ɓay hi̧ nzukri reh ful. Ku ɓay leh ŋgerna woyri ɓay hi̧ nzukri ké Ŋgerzah lu niri ɓa sa̧w ye ɓá reh ful.

²³A woiri le í ko ger, mi ɓah gbam hi̧ wuri i lah pol da.

²⁴Aŋay dale fal kosehri-aw, seh ɓay sih nduŋ. Few ta teh gel mba pi.

²⁵Gunwu̧y nunmbamri ɓay ga̧y ku̧ siɓa. Ŋgerna fe nunmbamri ɓay laŋ yik yik.

²⁶Wara mí gun nzuk pirmatul ɓay ti̧h nun nzukri, ke ƴo gina ɓil ɗikmambam ke ŋgerna a luki ɓil riŋ ɗina mbay ye.

²⁷Wara mí ke píh tem nzak pihna yeri ɓay mbu̧h nzukri ké-e lu ɓa sa̧w ye ke ti̧w tusiɓa ké niŋay gbam ur ke fál tí̧h seh si ka̧h fál ríŋ seh. Ku mbú̧h niri ur ke tusiɓa gbam si ka̧h gel a gbu̧h-u ké nunmbam sa̧.

²⁸Í ko kpuh nzu̧y, kpuh nzu̧y ƴo sɔk fe ɓay í tu. Gelke kpuh nzu̧y tuŋ mí el loŋ gay dale, i tu ɓahri se, nzak mbam ka̧h da.

²⁹Kaŋ pi mí gelke i ko feri-aw ti̧h le, í tu ɓahri, gun nzuk pirmatul ka̧h nzakful da.

³⁰Ɓa ketina. Mi ƴo ɓah hi̧ wuri ɓahri, dara gun tukala-ayri ɓá kal le feri-aw gbam ɓay ti̧h-u.

³¹Nunmbam ke tusiɓa ɓay ka-kal, mí ɓay biri ba, ɓay na kpatara.

³²Ɓay tu ɓay nam gina gun nzuk pirmatul mini sa̧wseh-u ra, nzuk mbew ta tu ya. Tem nzak pihna Ŋgerzahri ké ƴo nunmbam kara ta tu ya, gun kara ta tu ya pi. Ɓa baah ke hȩk mí tu.

³³Í ko ger. Í ƴo tul bɔk woiri ɓayu ké i tu nam ké gun nzuk pirmatul ɓay el gi keni ya.

³⁴Gina gun nzuk pirmatul na kandɔk nzuk mbew ké poŋ kerpuh ye tɔr si gahru ɓa ɗih-u. Ke hi̧ gun-laɓ pihna yeri pihna woyri ke gelu gelu. Ke ɓah ɓa teh-u hi̧ gun-kɔr nzak vul ɓahri, gunu ɓá ƴo tul bɔk.

³⁵Kaŋaw mí í ƴo tul bɔk ɓayu ké i tu nam ké nzuk puh ɓay el gi keni ya. Ke él ke bɔklew mini ke haŋgel mini ke káh tuhndoy mini ke tipele kara i tu ya pi.

³⁶Í ƴo tul bɔk ɓay rɔkɔ ké gi ti̧h tul woiri kpur ké tul nam.

³⁷Ɓayay ké mi ƴo ɓah hi̧ wuri-ay, mi ƴo ɓah hi̧ nzuk a ɓoruri gbam : Í ƴo wuri tul bɔk.