Read Karang Mbete Marki 14 Bible Online

Mbete Marki 14 - Karang bible

Mbete Marki 14

¹Toŋ nam seɗe ɓay hi̧ nam ti̧hmbih-i guy buma kú-u tɔk keni peŋ dan is ɓá ka̧h. Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴah kuŋɓay ɓay mgba Zezu le, kú i ni.

²Ku ɓahri se, kú mgba ni ke nam ti̧hmbih ya rɔkɔ gun Izarayelri ɓá ur ŋgermu. »

³Zezu ƴo Beɗtani ké kerpuh Simu ké ndɔɓe nzom ké mun ye. Ku kaɓ nzak fe su̧na dale, wu̧y a hani rih si tul Zezu. Ke mbi kuh num ba̧ri kú-u zuh ke sa̧wkpuh nar. Numu ɓa num a kpakpaŋu, lari-u ŋger mbamba. Ke haw nzak kuh num ra mí ke fer ku̧ tul Zezu.

⁴Bale nun nzuk a haniri ké haŋsekle woyri-aw si̧h. Ku su̧h ɓay ɓahri, sam fe ɓeɓna fe mí ke ɓeɓ kaŋ le ?

⁵Numay ɗam le ɓay ziŋ lari mah lari pihna mbihmbam mbew mah so keni ko̧hkori. Mí ku ƴo law wu̧y ra ke ɓay.

⁶Bale Zezu ɓahri : « Í poŋ wu̧yay ɗeŋ. Ɓay fe mí i ƴo law wu̧yay ke ɓay le ? Fe ké-e laɓ ziŋ mi-ay na ɓa suki. Ko̧hkori ƴo ziŋ wuri kpatara. Gelke i yih le, i mah laɓ niri suki. Mí a bi ba, mi káɓ ziŋ wuri kpatara ya.

⁷

⁸Fe ké-e mah laɓu mí ke laɓaw. Ke fer numay ku̧ mun bi ɓa num-gɔr mi munu.

⁹Ɓa ketina, mi ƴo ɓah ɓayay hi̧ wuri, gelri riw kú-u ka-kah ɓaysuki hul bi ké ri le, ku hí̧ riŋ ɗina wu̧yay mgbe pi. »

¹⁰Zudas Isikariyoɗ nzuk-dih fal Zezu mbew ké sakra nzuk-dih fal ye a boh falu seɗeri ba, si ta̧w ŋgernzuk fe puhna Ŋgerzahri ɓay ndoh Zezu ndɔk woyri.

¹¹Ku lah kerɓay Zudas kaŋ bale, law woyri rih niri, mí ku wahɓay hi̧ ni lari ɓa bon say. Kandɔkaw mí Zudas mu̧h kpɔl ƴo geŋ sa̧wseh a a̧y ké-e ɓay ndoh Zezu ndɔk woyri.

¹²Nam a titilu ɓil nam ti̧hmbih-su̧ peŋ dan is ɓa nam kú-u vbeh guy buma. Nzuk-dih fal Zezuri vbi ni ɓahri : « Fál suŋ mú-u yih ɓay náh lek gel fe su̧na ti̧hmbih-i guy buma wahri ké ri ɓay náh su̧ fe le ? »

¹³Mí Zezu pih nzuk-dih fal yeri seɗe ɓahri : « Í si wuri ɓil puh-aw. Ka̧hna woiri le, i ɓay ko nzuk ké suk mbih kal keni. Í dih fal ye si ka̧h kerpuh ye, í ɓah hi̧ nzuk puh-u ɓahri, metere ɓahri, vul a suŋ mí a ye ke nzuk-dih fal yeri, ku sú̧ fe su̧na ti̧hmbih-i guy buma ké ri le ?

¹⁴

¹⁵Le nzuk puh ra ɓay sɔk wuri vul a fál síɓa ké ɓa bawu. Fe kaɓnari ku̧ ri da. Ké gelaw mí í lek ri fe su̧na ti̧hmbih wahri. »

¹⁶Nzuk-dih fal yeri ra tɔr si ka̧h ɓil puh a luki-aw, mí ku ziŋ fe-uri ke gelu gelu kandɔk ké-e ɓah. Mí ku lek fe su̧na ti̧hmbih-i guy buma ra.

¹⁷Seh riŋ. Zezu gi ke nzuk-dih fal ye a boh falu seɗeri, ku kaɓ nzak fe su̧na ti̧hmbih.

¹⁸Ku ƴo su̧ fe, mí Zezu ɓah hi̧ nzuk-dih fal yeri ɓahri : « Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. Nzuku kaɓ ziŋ mi ké nzak fe su̧na-ay »

¹⁹Nzuk-dih fal yeri lah ɓayu kaŋ dale, law woyri rih niri mba. A ge ge le ɓah hi̧ Zezu ɓahri « A bi ya, ra ma. »

²⁰Bale ke ɓahri : « Nzuk mbew ké sakra woiri ké boh falu seɗe-ay, a ye ké kaɓ ziŋ mi ké nzak fe su̧na-ay, a ye mí ke ɓay te mi.

²¹Ɓay fe le gun nzuk pirmatul ɓá hu kandɔk ɓay gun nzak pihna Ŋgerzah a lewsa̧ri vbeh kaŋ. Kúy. Koseh ƴo geŋ nzuk ké te ni. Koseh ké ƴo geŋ nzuku-aw, mah le, mbuŋ ni ya mí su. »

²²Zezu ke nzuk-dih fal ye a boh fal seɗeri ƴo su̧ fe, ke mbi peŋ, ke el ke tumbɔl hi̧ Ŋgerzah nzuk sa̧w mgbɔkɔ, mí ke gɔh wal hi̧ nzuk-dih fal yeri. Ke ɓahri : « Í ya̧, í su̧. Peŋay ɓa mun bi. »

²³Mí ke mbi koɓ a ŋga̧h sal in[39]. Ke yih soko hi̧ Ŋgerzah, mí ke ndar hi̧ niri, ku nzo ndi̧ ndi̧ gbam woyri.

²⁴Mí ke ɓah hi̧ niri ɓahri : « Yimay ɓa sem bi ké Ŋgerzah ŋga̧h keni sal in. Semu fer ku̧ siɓa ɓay tul daɓa nzukri.

²⁵Ɓa ketina. Mi ƴo ɓah hi̧ wuri ɓahri, mi ta nzo mbih lehna kpuh viyȩh ti̧hmbih-ay mba. Namu ké mi ɓay mbi koɓ a a̧y ɓa a foyu ɓa nam ké mi ɓay nzo mbih lehna kpuh viyȩh-ay ziŋ wuri ké puh lakna Ŋgerzah. »

²⁶Kandɔkaw ku ɗi siŋ pirna hi̧ Ŋgerzah fal fe su̧na ti̧hmbih, mí ku ti̧h si tul kasaw Oliveh.

²⁷Zezu ɓahri : « Riŋ bi ɓay ti̧h ɓa ndaw lihna hi̧ wuri gbam ɓay fe le, mbete bolkusol Ŋgerzah ɓahri se, ke ɓay i nzuk-hɔl sami le, samiri ɓay zikri kparki kparki.

²⁸Keni-aw gaŋ kara fal ti̧hna bi ke puh záh ke pa̧ymun a foyu dale, mi sí pol hi̧ wuri ma tusiɓa Galile. »

²⁹Kandɔkaw mí Piyer ɓahri : « Nzukri gbam poŋ mu kara a bi mi ta poŋ mu ya. »

³⁰Zezu ɓahri : « Mu ɓay poŋ mi ɓa ketina. Mi ƴo ɓah hi̧ mu ɓahri se, suŋay gaŋ tuhndoy mgbal ta ka-kah bɔk seɗe ya dih mí mu má̧y ɓay tul bi ɓa bɔk say ɓahri, mu tu mi ya. »

³¹Bale Piyer ger tul ɓay ye ɓahri : « Ɓa ra hul gaŋ kara mi hú ziŋ mu. Mi má̧y ɓay tul wo ya. » Tɔr nzuk-dih fal ye a ɓoruri gbam ɓah kaŋ pi.

³²Ku si ka̧h gel a hani ké tul kasaw Oliveh. Riŋ gelu ɓa Gesemani. Zezu ɓah hi̧ nzuk-dih fal yeri ɓahri : « Í kaɓ gelay geŋ mi. Mí si ɓah ɓay ziŋ Ŋgerzah dara ɓáy. »

³³Mí ke fa̧h Piyer ke Zak ke Za̧h si ziŋ ni. Law ye titil luna kandɔk fe ké ɓay ku-kuŋ kaŋ.

³⁴Mí ke ɓah hi̧ Piyer-ri ɓahri : « Law sena mbaŋ law bi mah hul. Í kaɓ ke nun geŋ mi. »

³⁵Ke loh tɔɓ ké ta̧w woyri, mí ke guɓ siɓa. Ke goŋ Ŋgerzah. Ko ya le, ful ƴo ra ri le, namay ɓá ziŋ ni ya.

³⁶Ke ɓahri : « Baah, babah wo, feri riw na ndɔk wo. Mú lu koɓ haŋ fa̧hna wo ké tul bi ɓay tul suya nzukri ma fal hi̧ mí nzo ya. Wara le mú laɓ fe ké law bi yih ya. Mú laɓ fe ké mu yih ma. »

³⁷Zezu ur el si ta̧w nzuk-dih fal yeri ké say ra, mí ke ziŋ niri ké tul nam. Ke ɓah hi̧ Piyer ɓahri : « Simu mu na-nam ley ? Ŋgerna-kaɓ ke nun sa̧wseh mbew mba mu ley ?

³⁸Í ƴo tul bɔk. Í goŋ Ŋgerzah rɔkɔ fe-leh law ɓá ndih wuri. Tem nzuk yih ɓay laɓ suki, mí huhrumun nzuk mah ya. »

³⁹Ke poŋ niri el si goŋ Ŋgerzah kandɔk ké-e goŋ pol ra ɓáy.

⁴⁰Ke el gi ta̧w nzuk-dih fal yeri ké sayaw, mí ke ziŋ niri tul nam. Nam laɓ niri ro̧ko ro̧ko. Nzak-el ke ɓay zi niri.

⁴¹Elna ye a bɔk sayu, ke ɓahri : « I toŋ ɔk mun woiri ɓil nam ɓáy le ? Sa̧wseh ka̧h da. Í ko, ku gi ɓay ndoh gun nzuk pirmatul ndɔk nzuk suyari.

⁴²Ur síɓa, náh si nzɔh nun woyri. Í ko nzuk-te mi ké gi-aw. »

⁴³Zezu ƴo ɓah ɓay kɔɓ ɓáy, sa gelaw mí Zudas ké ƴo sakra nzuk-dih fal ye a boh falu seɗeri ra, nda pol daɓa nzukri gi ti̧h tul ye. Nzukuri mgba mahwu̧yri ke kpuhri ké ndɔk woyri gbiri gbiri. Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk puh woyri gun Izarayelri mí pih niri.

⁴⁴Nzuk-te Zezu ra sɔk niri fe kú-u ɓay tu ni keni[40]. Ke ɓahri se : « Nzuk a a̧y ké mi hu̧hru ma law bi le, ɓa a ye munu. Í mgba ni kpu-kpuh tɔr keni. »

⁴⁵Zudas ɓá ka̧h, sa gelaw mí ke loh si ta̧w Zezu, ke ɓahri : « Metere bi. » Mí ke el hu̧hru ni ma law ye.

⁴⁶Bale ku mgba ni.

⁴⁷Nzuk a hani ké ƴo ziŋ Zezu lu mahwu̧y, mí ke te gaysuk gun-laɓ pihna ŋgernzuk fe puhna Ŋgerzah fekeɗ kuŋ.

⁴⁸Zezu ba, ɓah ɓay hi̧ niri ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ?

⁴⁹Nam ke nam mi ƴo ziŋ wuri ɓil ila vul kani Ŋgerzah ƴo firma nzukri ɓay ye, mí i mgba mi ya. Wara le guri i mgba mi hi̧ ɓay ké na ɓil mbete Ŋgerzah laɓ ƴo gelu. »

⁵⁰Kaŋ mí nzuk-dih fal yeri gbam ɗuk poŋ ni.

⁵¹Seke a hani si fal Zezu[41]. Ke pɔr mun ye ke ladara. Ku mgba ni.

⁵²Mí ke poŋ ladara ra ma ndɔk woyri ɗuk fe ye mun ndikpo.

⁵³Mí ku maŋ Zezu si pol ŋgernzuk fe puhna Ŋgerzah. Ŋgernzuk fe puhna Ŋgerzahri ke ŋgernzuk gun Izarayelri ke nzuk-sɔk mbete bolkusol Ŋgerzahri gbam mbu̧h hani.

⁵⁴Piyer ba, mbehle sina fal woyri si rih ɓil kerpuh ŋgernzuk fe puhna Ŋgerzah. Ke kaɓ ziŋ gun-laɓ pihna ŋgernzuk fe puhna Ŋgerzahri mí ƴo nu̧h hɔrɔ.

⁵⁵Ŋgernzuk fe puhna Ŋgerzahri ke ŋgernzuk-kuŋ salɓay a ɓoruri gbam ba, ku ƴah nzukri ké ɓay goh Zezu ke ɓay le, ŋgernzukri ɓá kuŋ salɓay hul kan tul ye. Mí ku ziŋ ful ya, ɓayu ké daɓa nzukri gi kuŋ ɓay ku̧ nzak ye kara ɓay woyri si mah hani ya.

⁵⁶

⁵⁷Mí nzuk a haniri ur kuŋ ɓay ku̧ nzak ye ɓahri se : « Nah lah ɓay ké ti̧h ké nzak ye ɓahri, a ye ke ɓay haw vul kani Ŋgerzah ké nzukri mboh-aw. Ɓil nam say mí ke él mboh vul a ɓoru ké nzukri mboh ya ƴo gelu. »

⁵⁸

⁵⁹Mí keni-aw kara ɓay woyri mah hani ya pi.

⁶⁰Ŋgernzuk fe puhna Ŋgerzah ur síɓa ké sakra ŋgernzuk-kuŋ salɓayri. Ke vbi Zezu ɓahri : « Ɓay ké nzukri laɓ kan tul wo-ay ra wa, mu fér nzak woyri ya le wo ? »

⁶¹Zezu ƴo ɗeŋ. Ŋgernzuk fe puhna Ŋgerzah el vbi ni ɓay a ɓoru ɓáy ɓahri : « A wo mú-u ɓa Ŋgermbay, gun Ŋgerzah a ye ké nah ƴo dim ni ra le ? »

⁶²Bale Zezu ɓahri : « Miƴori-ay. I ɓay ko gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye. I kó gina ye ɓil ɗikmambam ur ke nunmbam. »

⁶³Bale ŋgernzuk fe puhna Ŋgerzah gɔh gar mun ye tir. Ke ɓahri se : « Nah zɔklɔ mun wahri ɓay tul ɓay a lah-u ɓáy le ?

⁶⁴I lah nzak ye, ke fah Ŋgerzah. I kúŋ salɓay ani le ? » Bale riw woyri ku kuŋ salɓay hul kan tul ye.

⁶⁵Nzuk a haniri titil sa-sam ku̧ nun ye. Ku ŋga̧h nun ye, ku mbal ni, mí ku el ɓahri : « Gun nzak pihna Ŋgerzah, mú ɓah ɓay ké-e ndoh ké nzak wo hi̧ náh lah. » Gun-laɓ pihna ŋgernzuk fe puhna Ŋgerzahri kara vah ni ke vba̧na pi.

⁶⁶Piyer ba, ke kaɓ fál siɓa ɓil kerpuh ŋgernzuk fe puhna Ŋgerzah ra bale, gun kaɓna a wu̧yu mbew gi. Ke ko Piyer ké ƴo nu̧h hɔrɔ zi̧h, mí ke ɓahri : « A wo ra mu ɓa bɔh sina nzuk Nasareɗ, a ye Zezu ra pi. »

⁶⁷

⁶⁸Mí Piyer ma̧y ɓay ɓahri : « Mi tu ɓay ké mu ɓah-ay ya. » Mí ke loh si ƴo nzak ila [ba, mí tuhndoy ka-kah].

⁶⁹Gun kaɓna a wu̧yu ko Piyer, mí ke el ɓah ra ɓáy hi̧ nzukri ké ƴo ri-aw ɓahri : « Gunwo̧ro-aw ƴo sakra nzukawri pi. »

⁷⁰Bale ke ma̧y ɓay ra ɓáy. Bol falu ndi̧ nzukri ké ƴo ta̧w Piyer ra ɓahri : « A wo mu ƴo ke nzukaw gaŋ ɓayu ké tusiɓa wo ɓa Galile. »

⁷¹Dale ke hah hul ɓahri : « Bɔk mbew bi gel-tu nzuk ra ya. »

⁷²Sa gelaw mí tuhndoy mgbal el ka-kah a bɔk seɗe-u, mí Piyer ker si tul ɓay ké Zezu ɓahri, tuhndoy mgbal ta ka-kah bɔk seɗe ya dih, mí a ye ke má̧y ɓay tul Zezu bɔk say ɓahri, ke tu ni ya. Piyer ker ɓayu kaŋ, mí ke ɗer rew.