Read Karang Mbete Marki 15 Bible Online

Mbete Marki 15 - Karang bible

Mbete Marki 15

¹Tipele za̧y, ŋgernzuk fe puhna Ŋgerzahri ke ŋgernzuk gun Izarayelri ke nzuk-sɔk mbete bolkusol Ŋgerzahri, a woyri gbam nzuk-kuŋ salɓayri-aw ŋga̧h tul ɓay woyri ɓay i Zezu. Sa gelaw mí ku ŋga̧h ni si keni ndoh ndɔk guvener Pilaɗ.

²Mí Pilaɗ vbi ni ɓay ɓahri : « A wo mú-u ɓa mbay ziɓri ra le ? » Zezu ba, yih nzak ye ɓahri : « Nzak wo mí ɓah-aw. »

³Ŋgernzuk fe puhna Ŋgerzahri dir ɓay ku̧ tul Zezu.

⁴Mí Pilaɗ el vbi Zezu ɓay ɓahri : « Mu fér ɓay woyri ya le ? Daɓa ɓayri kú-u goh mu keni-ay ra wa, mu lah ya lo ? »

⁵Zezu ba, fer ɓay a hani ndi̧ kari ya. Fe-u hi̧ Pilaɗ kaɓ yer.

⁶Gelke ti̧hmbih-i guy buma ka̧h le, Pilaɗ ƴo sel mgbal ké ziɓri yih ɓayu mbew.

⁷Nzukbaa ŋgomna a hani mbew na vul mgbal ke nzuk yeri. Riŋ ye ɓa Bar-Abba. A ye ke nzuk yeri ra ku ruh ŋgermu ke ŋgomna. Ku i hul pi.

⁸Dale daɓa nzukri gi goŋ Pilaɗ ɓay ké sel mgbal kandɔk ké ɓa fe laɓna ye ke nam ti̧hmbih-i guy buma woyri.

⁹Bale Pilaɗ vbi niri ɓahri : « I yih ɓay mí sel mbay ziɓri ra le wo ? »

¹⁰Ke tu ɓahri se, ɓa sere mí hi̧ ŋgernzuk fe puhna Ŋgerzahri ndoh Zezu ndɔk ye.

¹¹Mí ŋgernzuk fe puhna Ŋgerzahri zukru law daɓa nzukri hi̧ kú sɔk Pilaɗ ɓá sel Bar-Abba poŋ Zezu.

¹²Mí Pilaɗ ba, el vbi niri ɓahri : « A a̧w ba, a fe mí-i láɓ ziŋ nzukay ké i ɗi ni ɓa mbay ziɓri ra le ? »

¹³Bale ku ur ke ɓay ra ɓáy ɓahri : « Ɓar ni ɓar gaŋ. »

¹⁴Mí Pilaɗ ɓahri : « Suya fe gaŋ mí ke laɓ mah ziŋ hul ké tul kpuh vbatay le wo ? » Bale ku vba̧ nzak ɓa mgbe-u gurum gurum : « Ɓar ni ɓar gaŋ. »

¹⁵Bale Pilaɗ sel Bar-Abba ɓay voh law nzukri. Ke el ndoh Zezu ndɔk soze yeri. Ku zɔr ni ke ndehdɔŋ dara kú ɓar ni ɓáy.

¹⁶Mí sozeri maŋ Zezu tɔr si rih kerpuh Pilaɗ bale, ku ɗi tɔr soze a ɓoruri gbam gi mbu̧h tul ye.

¹⁷Ku ndoh ni mah gar ké si̧h ɓa mah gar mbay. Ku kaŋ ŋgatukru ɓa guɓatul mbay ndoh tul ye pi.

¹⁸Dale ku ku̧ vah ni ɓahri : « Soko woiri wo, mbay ziɓri. »

¹⁹Ku vba̧ tul ye ke ka̧wkpuh kɔy kɔy. Ku sa-sam ku̧ nun ye, mí ku el huk pol ye dim ni kandɔk mbayri kú-u ƴo dimu kaŋ.

²⁰Ku sak ni mah niri bale, ku lu mah gar mbay ra el ndoh ni gar ye, mí ku si ziŋ ni ɓay ɓar ni ké tul kpuh vbatay.

²¹Simu ké Siren a ye bah Aleksander ke Rufus, ke ur ke kala gi ma Zurusalem. Sozeri ɓá ko ni ƴo kalna, mí ku hah ni suk kpuh vbatay hul Zezu.

²²Ku ɓaŋ Zezu si ka̧h Golgota. Golgota sɔk ɓahri, gbogbotul.

²³Ku hi̧ ni yim kú-u zukru ke sa̧wkpuh mir[42]. Mí ke sa-a.

²⁴Sa̧wseh toŋndɔk mbew bale ku ɓar Zezu ké tul kpuh vbatay. Mí ku fa̧h gar ye kehr ku̧ ke gelu gelu, ku nda ɓele keni. A ge ge le i nzuku a ye, nzuku a ye.

²⁵

²⁶Ku vbeh fe salɓay hul ye kan gbekre, mí ku ɓar fál síɓa tul ye. Salɓayu vbeh kandɔkay : « Mbay ziɓri. »

²⁷Ku ɓar nzukbaa ŋgomnari seɗe ké ta̧w ye. Nzuk a mbewu ké fál ndɔk lakna ye, nzuk a seɗe-u ba, ké fál ndɔk kperu ye.

²⁸[43]

²⁹Nzukri ké ƴo kalna te tul woyri ɓoko ɓoko ƴo far ni keni ɓahri : « A ha̧h, a wo ké mu ɓahri, mu háw vul kani Ŋgerzah, mí mu él mboh ƴo gelu ɓil nam say ra, mú ya̧ mun wo, mú ɗer ke tul kpuh-ay. »

³⁰

³¹Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴo sak ni. Ku ƴo ɓahri : « Ke ya̧ nzuk a ɓoruri mí ke mah ya̧ mun ye ya dih.

³²A ye Ŋgermbay mbay gun Izarayelri ra, ké ɗer ke tul kpuh-ay hi̧ náh ko. Le náh kan law tul ye. » Nzukbaa ŋgomnari kú-u ɓar niri ké ta̧w Zezu ƴo far ni pi.

³³Seh ƴo tul puh bale, tirim ya̧ gel ké tusiɓa gbam kpu̧ru ka̧h sa̧wseh say bɔklew.

³⁴Sa̧wseh say ka̧h, Zezu ɗi fe ɓeleŋ ɓahri : « Eloyi Eloyi lema sabaktani. » Ɓayu yih ɓahri : « Ŋgerzah bi, Ŋgerzah bi wo, ɓay fe mú-u poŋ mi diw le[44] ? »

³⁵Nzuk a haniri ƴo ɓel ye ɗih ya, ku lah fe ɗina ye ra, ku ɓahri : « Í ko. Ke ƴo ɗi Eli gun nzak pihna Ŋgerzah a lewsa̧. »

³⁶Bale nzuk mbew ur ke ɗukna si mbi sifoŋ ŋga̧h ké nzak ka̧wkpuh, ke ɓaŋ ndoh yim a su̧h-u, mí ke ndar si tuŋ nzak Zezu ɓay ké ƴo̧k. Ku ɓahri : « Í poŋ. Náh ko wuri, Eli gun nzak pihna Ŋgerzah ra ɓay gi ɗer ni mini ani le ? »

³⁷Bale Zezu vba̧ nzak ɓeleŋ, ke ɗer haŋ fo̧h mí hi̧ law ye toh.

³⁸Baw gar a yih-u ké kuŋ gel ƴona Ŋgerzah ke gel ƴona nzukri ké ɓil vul kani gɔh tir ke síɓa ka̧h siɓa[45].

³⁹Kumandah ƴo ɗih ya ko kona ma tul Zezu. Ke ko ɔ́h tɔr ɔkna Zezu bale, ke ɓahri : « Nzukay, ke ɓa gun Ŋgerzah gaŋ. »

⁴⁰Wu̧yri ƴo ri pi. Ku ƴo ɓa ɗih-u ké sar gel ké gel-ɓar Zezu ƴo ko kona. Ké sakra wu̧yri-aw, Mari ké Makdala ƴo ri, Mari ké ɓa mah Zoze ke toŋnafal ye Zak ra ƴo ri, Salome ƴo ri pi.

⁴¹Wu̧yri-aw, Zezu ƴo Galile le, ku dih fal ye ƴo so ni. Daɓa wu̧y a ɓoruri ké ɓaŋ Zezu si ka̧h Zurusalem ƴo gel-ɓar ni ra pi.

⁴²Seh na nzȩh. Sa̧wseh ka̧h ɓay lek feri dara nam a seɗe-u ɓil nam ti̧hmbih-i guy buma ɓá ka̧h. Nam a seɗe-u ɓa baw nam ɔkna ké sakra nam ti̧hmbih-uri.

⁴³Nzuk a luki ké sakra ŋgernzuk-kuŋ salɓayri mbew ƴo ri. Riŋ ye ɓa Zezeɓ ké Arimate. A ye ra ke ɓaŋ law ye te tul lák mbay Ŋgerzah. Ke su̧h law. Ke si ta̧w Pilaɗ, mí ke vbi ni hul Zezu.

⁴⁴Pilaɗ lah Zezu hu da. Le ɓayu na ni yer. Ke ɗi kumandah ra, mí ke vbi ni ɓayu, Zezu hu-hu gaŋ mini ani le ?

⁴⁵Ke lah ké ta̧w kumandah ɓahri, Zezu hu-hu bale, ke poŋ ful hi̧ Zezeɓ si ɗer hul Zezu ra.

⁴⁶Zezeɓ yeh ladara a taŋ fi̧nak fi̧nak. Ke ɗer hul Zezu, mí ke kuh hulu keni si mbek ɓil hoh kasaw kú-u fel lewsa̧ ɓay mbek hulri ɓilu[46]. Ku kikri mah kasaw mbih nzaku.

⁴⁷Mari ké Makdala ke Mari mah Zoze ko gel kú-u mbek ri hul ra.