Read Karang Mbete Marki 16 Bible Online

Mbete Marki 16 - Karang bible

Mbete Marki 16

¹Nam ɔkna a bawu ɓil nam ti̧hmbih-i guy buma kal. Nam ti̧hmbih a sayu ka̧h da. Namu ɓa nam a titilu ɓil dimasi. Mari ké Makdala ke Salome ke Mari mah Zak, ku yeh sa̧wkpuh ɓay si nu̧h hul Zezu.

²Gel pele, ku ti̧h, ku mbi ful si ma tupal. Tipele teh niri.

³Ku toŋ vbi haniri ɓay ɓahri : « A geri mí ɓay kikri kasaw ké mbih nzak hoh kasaw-mbek hul ra hi̧ na le ? » Ku ɓah kaŋ ɓayu ké kasaw ra yih mbamba.

⁴Ku toŋ ɗih ya ke tupal, ku ɔr nun woyri mí ku ko kasaw ké mbih nzak hoh kasaw ra na fál mbew poŋ nzaku na ŋgah. Mí ku ka̧h ri.

⁵Ku rih si ɓil hoh kasaw-mbek hul le, ku ko seke mí kaɓ gel kan hul ra ké fál ndɔk lakna. Gar ye pu kpa̧h kpa̧h. Mí law wu̧yri ra lu niri gba̧y gba̧y.

⁶Bale seke ra ɓah hi̧ niri ɓahri : « Law woiri ɓá lu ya. I ƴo ƴah hul Zezu, nzuk Nasareɗ kú-u ɓar ni ké tul kpuh vbatay. Ke ti̧h ke puh záh ke pa̧ymun a foyu. Hul ye ta gelay ya. Í gi wuri ko gel-mbek hul ra ké na-ay.

⁷Wara le í si ɓah ɓayu hi̧ nzuk-dih fal yeri. Í ɓah hi̧ Piyer pi ɓahri, Zezu tɔr pol hi̧ niri ma Galile. Ku zíŋ ni ké ri kandɔk ké-e ɓah ɓayu hi̧ niri lewsa̧. »

⁸Mí ku el ti̧h ke ɓil hoh kasaw-mbek hul ra ke ɗukna ɓayu ké fe-u tɔkrɔ tem mun woyri tɔ-tɔkrɔ hi̧ mun woyri el to kpak kpak. Ku ɓah ɓay mbew hi̧ nzuk ya ɓayu ké hȩkme se niri.

⁹Mí ku si ɓa gah-u ɓah nzak pihna ye hi̧ Piyer ke nzuk-dih fal a ɓoruri. Fá-falu-aw dale, ɓay Zezu ké suya ta ri ya, ké ka-kalna ya mí ɓa ɔkna ké na ɓa ŋgɔh ra, ke hi̧ ɓayu ti̧h ke nzak nzuk-dih fal yeri hi̧ nzukri gbam lah, ur ke fál tí̧h seh kpu̧ru ka̧h fál ríŋ seh. 9 Nam a titilu ɓil dimasi ke tipele za̧y, Zezu ti̧h ke puh záh ke pa̧ymun a foyu, mí ke ti̧h tul Mari ké Makdala a ye ké Zezu ni̧h záhri toŋndɔk say ké tul ye lewsa̧.

¹⁰Mari ra tɔr si ɓah hi̧ nzuk-dih fal Zezuri lah. Ku ƴo vuh rew, ku laɓ mun woyri ɓa seh.

¹¹Ku lah ke nzak wu̧y ra ɓahri, a ye ke ko Zezu ke nun ye, Zezu ƴo ri gaŋ bale, ku ya̧ ɓay wu̧y ra ya.

¹²Fá-falu Zezu ti̧h tul nzuk-dih fal yeri seɗe. Ku ƴo si ma gun puh a hani. Mun ye na ɓoɗ.

¹³Mí ku el si ɓah ɓayu hi̧ tɔr nzuk-dih fal ye a ɓoruri lah, mí ku sa ya̧ ɓay woyri ya pi.

¹⁴Bol falu, nzuk-dih fal ye a boh falu mbewri kaɓ nzak fe su̧na, mí Zezu ti̧h tul woyri. Ke zɔm niri ɓay tul law kpuhna woyri kú-u to suyɓay nzuk a ɓoruri-aw ma kpah ɓay fe le, ku sa ya̧ ɓay nzukri ké ko ni ke nun woyri ya.

¹⁵Mí ke ɓah hi̧ niri ɓahri : « Í si wuri ké tusiɓa gbam. Sina woiri, í ka-kah ɓaysuki hul bi hi̧ nzukri riw ɓá lah.

¹⁶Nzuk ké kan law ye tulu, mí ke el ti̧h ɓil batem le, mi yá̧ ni ke ndɔk hul. Nzuk ké kan law ye tul bi ya le, salɓay hul ɓay ƴo tul ye.

¹⁷Nzuk ké law ye ƴo mbew ziŋ mi le, fe saŋri ké-e ɓay laɓu mí na-ay : Ke riŋ ɗina bi, ke ɓay ni̧h záhri. Ke ɓay ɓah nzak ɓay a ɓoru ké-e tu pol ya.

¹⁸Ke ɓay mgba soy vbeɓ ke ndɔk ye. Ke ɓay nzo sa̧wkpuh hul kara ɓay ta i ni ya. Ke ɓay ɓaŋ ndɔk ye kan tul nzuk senari mí ku ɓay ziŋ mun gahna pi. »

¹⁹Zezu Gaŋ tul feri riw ɓah ɓayaw hi̧ niri bale, ke tɔr ma nunmbam. Ke kaɓ ɓa ndɔk lakna Ŋgerzah.

²⁰A woyri ba, ku ti̧h si ka-kah ɓaysuki hul Gaŋ tul feri riw a ye Ŋgermbay Zezu ké gelri gbam ké tusiɓa hi̧ nzukri lah. Gaŋ tul feri riw ƴo ziŋ niri mí ke ŋger niri hi̧ ketina ye kú-u ɓah laɓ pihna. Ke hi̧ ku laɓ fe saŋri sɔk keni munɓayu.