Read Karang Mbete Marki 2 Bible Online

Mbete Marki 2 - Karang bible

Mbete Marki 2

¹Zezu el si Kapernayum. Nam kal ndi̧ dara nzukri lah ɓahri, ke ƴo puh.

²Daɓa nzukri gi mbu̧h ké ta̧w ye. Ku mbah ɓil kerpuh hi̧ gel ƴona nzuk ké pol kɔkɔ kara ta-a. Zezu ƴo ɓah ɓay lák mbay Ŋgerzah hi̧ niri.

³Nzukri niŋ suk nzuk ké mun ye hu yɔh gi keni ma ta̧w Zezu.

⁴Mí ku ziŋ ful ka̧h keni ta̧w ye ya ɓay tul daɓa nzukri. Ku hil si tul vul ké síɓa, ku ziŋ gel ké Zezu kaɓ ri ké siɓa, mí ku nzohlo tul vul ra ɗer nzuk ké mun ye hu yɔh ra ke hih nam ye.

⁵Zezu ɓá ko law woyri kú-u kan tul ye bale, ke ɓah hi̧ nzuk ké mun ye hu yɔh ra ɓahri : « Gun bi, salɓay suya lu ké tul wo. »

⁶Nzuk-sɔk mbete bolkusol Ŋgerzah a haniri kaɓ vulaw pi. Ku lah ɓay ké Zezu ɓah ra bale, ku ŋgu̧hru ɓay ma law woyri ɓahri : « Ani mí ke ɓah kaŋay le ? Gunwo̧ro-ay leh tul ye ke Ŋgerzah. Ŋgerzah mbew yaŋ mí mah lu salɓay suya ké tul nzuk. Nzuk a ɓoru ta-a. »

⁸Zezu tu fahɓay woyri ké tem ye. Sa gelaw mí ke ɓahri : « Ɓay fe mí fahɓay ƴo law woiri kaŋay le ?

⁹Sakra ɓáh hi̧ nzuk ɓahri, ké ur mbi hih nam ye, ké si sina ke ɓáh hi̧ nzuk ɓahri, salɓay suya ye lu, a suŋ mí kpuh le ?

¹⁰Mí ɓay í tu ɓahri se, gun nzuk pirmatul ɓa mbay mí ƴo ke ŋgerna ké tusiɓa ɓay lu salɓay suya ké tul nzukri le ... » Zezu poŋ nzak ɓay ye, ke el sɔɓ nun ma tul nzuk ké mun ye hu yɔh ra, ke ɓahri :

¹¹« A wo mí-i ƴo ɓah hi̧ mu, mú ur síɓa, mú mbi hih nam wo. Mú el si puh. »

¹²Nzuk ra ur gaŋ ba. Sa gelaw mí ke mbi hih nam ye, mí ke ti̧h tɔr ké nun daɓa nzukri. Kaŋ mí nzukri kaɓ yer, ku el dim Ŋgerzah ɓahri : « Nah ko fe a kandɔkay bɔk mbew ya ɓáy. »

¹³Zezu el si ɓel mahmbih Galile. Daɓa nzukri gi ndur ndur ma ta̧w ye, mí ke firma niri ɓay lák mbay Ŋgerzah.

¹⁴Ke kal ma pol bale, ke ko Levi, gun Alfe. Ke kaɓ gel pihna ye ƴo mbu̧h lampoh. Mí Zezu ɗi ni : « Mú dih fal bi-ay. » Levi ur ba, mí ke dih fal Zezu.

¹⁵Seh a hani Zezu kaɓ nzak fe su̧na ké puh Levi. Daɓa nzuk-mbu̧h lampohri ke nzuk suya a ɓoruri kaɓ nzak fe su̧na ziŋ Zezu ke nzuk-dih fal yeri, ɓayu ké daɓa nzukri-aw ƴo dih fal Zezu.

¹⁶Nzuk-sɔk mbete bolkusol Ŋgerzah a haniri ké ɓa fariziri ɓá ko Zezu ƴo su̧ fe ziŋ nzuk suyari-aw le, ku ɓah hi̧ nzuk-dih fal yeri ɓahri : « Metere woiri ƴo su̧ fe ziŋ nzuk-mbu̧h lampohri ke sam nzuk suya a ɓoruri-aw ley ? »

¹⁷Zezu ɓá lah ɓay kú-u ɓah ra, mí ke ɓah hi̧ niri ɓahri : « Nzuk mun gahnari si seh dɔkta ya. Nzuk senari mí si seh dɔkta. Mi gi ɓay nzukri ké ƴo tul mbete bolkusol Ŋgerzah ya. Wara le mi gi ɓay nzuk suyari. »

¹⁸Nzuk-dih fal Za̧h batisiri ke nzuk-dih fal fariziri ƴo tul saŋ mbih woyri, mí ku gi ɓah hi̧ Zezu ɓahri : « Nzuk-dih fal Za̧hri ke nzuk-dih fal fariziri toŋ saŋ mbih ba, ɓay fe mí nzuk-dih fal wori saŋ mbih ya le ? »

¹⁹Zezu ɓah hi̧ niri ɓahri : « Nzukri ké gi gel ti̧hmbih nzuk-ya̧ wu̧y a foyu ɓay saŋ fe su̧na ani lo ? Ke ƴo haŋsekle woyri ɓáy le, ku su̧ fe, ku nzo fe ɓáy.

²⁰Mí nam ƴo gina ɓay hi̧ nzuk wu̧y a foyu ɓá ta-a. Namu-aw dara ku sáŋ mbih ɓáy.

²¹Nzuk ké ɓay mbi nzak gar a foyu sa̧h keni nun ta̧w gar ta-a rɔkɔ gar a foyu-aw ɓá el gɔh ta̧w gar ra tir ma pol hi̧ garu suya mba a pol.

²²Nzuk ta aŋ yim a pa̧wu ku̧ ta̧w ɓɔl ho̧ko ya. Yimu yi̧ŋ le, ta̧w ɓɔl ra ɓay fur dale, yim a pa̧wu ɓay ku̧ kpah. Ta̧w ɓɔl kara ɓay ɓe-ɓeɓ pi. Kaŋ dale nzukri aŋ yim a pa̧wu ku̧ ɓil ɓɔl ho̧ko a foyu. »

²³Nam ɔkna a hani bale, Zezu ke nzuk-dih fal yeri si ke mahful sekle waka fe pay, wara mí nzuk-dih fal yeri ƴo haw tul fe pay o̧kro su̧[7].

²⁴Fariziri ɓah ɓay hi̧ Zezu ɓahri : « Mú ko nzuk-dih fal wori. Ku ƴo laɓ fe ké bolkusol Ŋgerzah hah laɓu ke nam ɔkna. »

²⁵Mí Zezu ɓahri : « I ki̧ ɓay fe laɓna Daviɗ a lewsa̧ ké gel ki̧na a a̧y ké fe su̧na poh ni, kaŋ ya le[8] ? Ɗaka i ni ke bɔh sina yeri.

²⁶Ke si vul kani Ŋgerzah ké ta̧w Abiyatar ŋgernzuk fe puhna. Peŋ ké nzuk fe puhnari puh hi̧ Ŋgerzah, bolkusol Ŋgerzah hah nzuk a garuri sú̧-u. Nzuk fe puhnari kaŋto mí ƴo ke ful ɓay su̧-u. Mí a ye Daviɗ ke su̧, ke el wal hi̧ bɔh sina yeri su̧ pi ra wa, ani le ? »

²⁷Zezu el ɓahri : « Ŋgerzah hi̧ nam ɔkna ɓay tul nzuk, ke laɓ nzuk ɓay tul nam ɔkna ya.

²⁸Kaŋ mí gun nzuk pirmatul ɓa mbay ké tul nam ɔkna kara pi. »