Read Karang Mbete Marki 3 Bible Online

Mbete Marki 3 - Karang bible

Mbete Marki 3

¹Zezu el si vul misoŋ. Nzuk mbew ké ndɔk ye hu yɔh kaɓ ri.

²Nzukri ko kona yi̧m ma tul Zezu ɓay ko-u. Ke gah nzuk ke nam ɔkna dale, ku láɓ ɓay kan tul ye.

³Mí Zezu ɓah hi̧ nzuk ké ndɔk ye hu yɔh ra ɓahri : « Ur síɓa. Mú ƴo. »

⁴Mí ke ɓahri : « Bolkusol Ŋgerzah hi̧ nzukri ful ɓay laɓ suki ke nam ɔkna mini ɓay laɓ suya ke nam ɔkna le ? Ɓay ya̧ nzuk mini ɓay i nzuk le ? » Mí ku kaɓ silili.

⁵Ke ko gel ma tul woyri ke nun a si̧h-u. Law ye sa̧h ɓay tul law kpuhna woyri. Mí ke ɓah hi̧ nzuk ké ndɔk ye hu yɔh ra ɓahri : « Mú ndar ndɔk wo. » Nzuk ra ndar ndɔk ba, ndɔk ye el kpuh kpaŋ ƴo gelu.

⁶Sa gelaw mí fariziri ti̧h ke ɓil vul misoŋ si mbu̧h nzak mbew ke nzuk mbay Eroɗri. Ku lek ɓay i Zezu.

⁷Zezu fa̧h nzuk-dih fal yeri, mí ku tɔr ziŋ ni si ɓel mahmbih Galile poŋ nzuk a ɓoruri. Mí daɓa nzukri ɓa ŋgi̧-u ur ke gelri ɓoɗ ɓoɗ dih fal ye. Daɓa nzukri ur ke tusiɓa Galile, tusiɓa Zude ke Zurusalem pi. Daɓa nzuk a ɓoruri ur ke tusiɓa Idume ke tusiɓa ké na kala mbih Zurdeŋ. Ku ur ke puh a lukiri Tir ke Sidoŋ ke gun puh a ɓoruri ké ɗoŋ ri-aw pi. Nzukri-aw lah ɓay fe laɓna Zezu mí ku gim ma ta̧w ye.

⁹Mí ke ɓah hi̧ nzuk-dih fal yeri ɓahri, kú loh kumbon ma ta̧w ye ɓay rɔkɔ daɓa nzukri ɓá ndakla ni, ɓayu ké Zezu gah senari ɓa ŋgi̧-u. Kaŋ mí nzuk senari nzu̧h ni ɓay za ni.

¹¹Gelke záhri ké ƴo tul nzukri ko Zezu dale, ku gi fal hani fal hani guɓ siɓa ké pol ye. Ku vba̧ nzak ɓahri : « A wo, mu ɓa gun Ŋgerzah. »

¹²Mí Zezu hah niri ɓa kpuh-u, kú hi̧ nzukri ɓá tu ni ya.

¹³Zezu tɔr si tul kpar. Ke ɗi nzukri ké-e yih ɓay woyri, mí ku gi ta̧w ye.

¹⁴Ke lu gun nzak pihnari ɓa boh falu seɗe ɓay hi̧ kú ƴo ziŋ ni dale, ké pih niri si ka-kah ɓay lák mbay Ŋgerzah hi̧ nzukri.

¹⁵Ke hi̧ niri ŋgerna-ni̧h záhri.

¹⁶Riŋ gun nzak pihnari ké boh falu seɗe ra mí na-ay : Simu ké Zezu tu riŋ ye ɓa Piyer,

¹⁷Zak gun Zebede ke yi̧n ye Za̧h. A woyri ra Zezu ɗi niri ɓa Bowaneze. Riŋu yih ɓahri, pomna mbam[9]. Tɔr gun nzak pihna a ɓoruri ɓa Andere, Filiɓ, Bartelemi, Matiye, Toma, Zak gun Alfe, Tade, Simu ké ɓa nzuk-ri̧h si̧w ɓay tusiɓa woyri, Zudas Isikariyoɗ a ye ké-e te Zezu ra pi.

²⁰Zezu ke nzuk-dih fal yeri si rih vul bale, daɓa nzukri el mbu̧h hani ké ta̧w ye ɓáy. Kaŋ mí Zezu ke nzuk-dih fal yeri ziŋ ful-su̧ fe ya.

²¹Nzuk in Zezuri ɓá lah ɓayu le, ku ur si ɓay kɔklɔ ni. Ku ƴo ker ɓahri, tul ye sɔ-sɔɓ.

²²Nzuk-sɔk mbete bolkusol Ŋgerzahri ké ur ke Zurusalem ba, ƴo ɓahri : « Mbay záh tukala a ye Belzebul ra ƴo tul ye ɓay fe le, ke ŋgerna záh-aw mí ke ƴo ni̧h záhri ké tul nzukri-aw. »

²³Zezu ɗi niri mí ɓah lawɓay ɓahri : « Mbay záh tukala ɓay ni̧h záh yeri ani le ?

²⁴Puh lakna a suŋ suŋ ké nzukuri kehr hani le, ta kaɓ ya.

²⁵Kerpuh ké nzukuri kehr hani le, ta kaɓ ya.

²⁶Mbay záh tukala ur ra ruh ziŋ záh yeri mí kehr hani le, puh lakna ye ta kaɓ ya. Ké puh lakna ye kehr ya-aw kara puh lakna ye ƴo ɔh-u.

²⁷Ɓay fe le se-se ɓay nzuk ɓá rih puh nzuk huhrumun ɓay fa̧h fe yeri. Wara le nzuk ra ɓay ŋga̧h nzuk puh-u pol dara mí ke fá̧h fe yeri riw ɓáy[10].

²⁸Ɓa ketina. Mi ƴo ɓah hi̧ wuri ɓahri, mahful ɓay lu salɓay suya gbam ké tul nzuk pirmatulri ƴo ri. Ɓay a suya-uri ké nzukri ɓeɓ keni riŋ gun nzuk pirmatul kara mahful-lu ƴo ri pi.

²⁹Mí nzuk a a̧y ké fah Tem lawpuki le, salɓay suya ye ɓay lu ké tul ye ya wu̧m. Wara le salɓay suya ye na tul ye ɓa ŋgɔh. »

³⁰Zezu ɓah ɓayay ɓay fe le, nzuk-sɔk mbete bolkusol Ŋgerzahri ɓahri se, záh tukala ƴo tul ye.

³¹Mah Zezu ke yi̧n yeri gi ka̧h mí ƴo kala. Ku ɗi ni.

³²Daɓa nzukri kaɓ ɗoŋ ni, mí ku ɓahri : « Zezu, mah wo ke yi̧n wori ke manah wori ƴo kala. Ku yih ɓay ko mu. »

³³Zezu ba, ɓahri : « A ge mí ɓa mah bi ke yi̧n biri le ? »

³⁴Ke ko gel ma tul nzukri ké ɗoŋ ni, ke ɓahri se : « Í ko mah bi ke yi̧n biri ké ƴo-ay,

³⁵ɓayu ké nzuk a a̧yri ké laɓ fe ké Ŋgerzah yih le, a woyri mí ku ɓa mah bi, yi̧n bi, manah biri. »