Read Karang Mbete Marki 5 Bible Online

Mbete Marki 5 - Karang bible

Mbete Marki 5

¹Ku ka̧h kala mahmbih Galile ké tusiɓa nzuk Geraziri.

²Zezu ɗer ke kumbon. Sa gelaw mí nzuk a hani ti̧h ke gel-gɔr hulri gi nzɔh nun ye. Nzuku, záh ƴo tul ye.

³Gel nam ye ɓa gel-gɔr hulri. Mahful-ŋga̧h ni ta-a. Sal lari kara mah ɓay ŋgah ni ya pi.

⁴Kpatara ku ƴo ŋga̧h ndɔk ye ke sal lari. Bɔk ye ba, ku mgba ke ɗah. Ke ɗɔr sal lari ké ndɔk ye. Ke el nduk ɗah haw. Nzuk mbew ké mah ɓay mgba ni kaɓ ɗeŋ ta-a.

⁵Suŋ ke seh ke ƴo ha̧rma si tupal ke tupal ké tul kasaw. Ke vba̧ nzak ziriri ziriri. Ke ƴo kpa̧r mun ye ke kasaw.

⁶Nzuku ɓá ko Zezu ɓa ɗih-u bale, ke ɗuk si huk pol ye.

⁷Kusol nzuku ahla rew. Ke vba̧ nzak ɓeleŋ : « Zezu, gun Ŋgerzah ké deɓ ye ta-a, ɓay wo ɓa fe mí ziŋ mi le ? Mi hah fe ke riŋ Ŋgerzah, mú laɓ mi koseh ya. »

⁸Záh tukala-aw ɓah kaŋ ɓayu ké Zezu ƴo ɓah hi̧ ni ɓahri se, ké ti̧h ke tul nzuk ra.

⁹Mí Zezu vbi záh ra riŋ ye. Záh ɓahri : « Riŋ bi ɓa Ŋgi̧ŋgi̧ ɓay fe le, nah sɔɗ sɔɗ boh gel ŋgi̧-ŋgi̧. »

¹⁰Ke el vuh hi̧ Zezu ke kɔkrɔya, ké ni̧h niri ɓa ɗih-u ké tusiɓa ya.

¹¹Ké haŋ kasaw ké na ɓel woyri mí daɓa kɔsɔŋri ƴo ƴah ri lakna.

¹²Mí záhri ra vuh hi̧ Zezu ɓá hi̧ niri kú si rih tul kɔsɔŋri-aw.

¹³Kaŋ mí Zezu poŋ ful hi̧ niri, mí záhri ti̧h si rih tul kɔsɔŋri-aw. Kɔsɔŋri ra laɓ sɔɗ sɔɗ boh gel seɗe (2.000) mí kpa̧h ke ɗukna si ka̧h nzak hereŋ lih ku̧ mahmbih kirim kirim mí mbih kal niri ndu̧y.

¹⁴Nzuk-kɔr kɔsɔŋri ba, su ɗukna si puh, mí ku ndazi ɓay feri ké kal hi̧ ɓayu ya̧ puh a luki ke gun puh a ɓeluri, mí nzukri ti̧h yir gi.

¹⁵Ku ka̧h ta̧w Zezu. Mí ku ko nzuk ké Ŋgi̧ŋgi̧ri ti̧h ke tul ye ra kaɓ ɗeŋ ɓa nzuk wara. Ke ndoh gar ɓa suki. Kerɓay ye na ɓa suki. Mí hȩkme el se niri.

¹⁶Nzuk-kɔr kɔsɔŋri ki̧ fal fe kú-u ko ke nun woyri hi̧ nzukri, ɓay nzuk ké záh ti̧h ke tul ye, ɓay kɔsɔŋri ra pi.

¹⁷Wara mí nzukri laɓ kɔkrɔya hi̧ Zezu ɓay ké tɔr ke tusiɓa woyri.

¹⁸Zezu hil kumbon ɓay tɔrna le, nzuk ké záhri ti̧h ke tul ye ra vbi ni ɓay si ziŋ ni pi.

¹⁹Mí Zezu sa-a. Wara le ke ɓahri se : « Mú el si puh ké ta̧w nzuk wori. Mú ki̧ fal fe sukiri riw ké Gaŋ tul feri riw laɓ ziŋ mu hi̧ kú lah. Mú ndazi ɓay in ké-e mgba ziŋ mu pi. »

²⁰Kaŋaw mí nzuk ra tɔr si ka-kah ɓay sukiri gbam ké Zezu laɓ ziŋ ni hi̧ nzukri ké tusiɓa Dekapol lah mí na nzukri riw ɓa saŋ hi̧ ku kaɓ yer ɓayu.

²¹Zezu el ke kala mahmbih. Daɓa nzukri ɓa ŋgi̧-u geŋ ni ƴo ɓel mahmbih, mí ku mbu̧h ké ta̧w ye.

²²Ŋgernzuk vul misoŋ a hani-u mbew gi. Riŋ ye ɓa Zayrus. Zayrus ɓá ko Zezu le, ke huk siɓa pol ye.

²³Ke vuh seh ɓahri, gun ye a wu̧yu na nun hul. Zezu ɓá si ɓaŋ ndɔk kan tul ye ɓay ya̧ ni le, ke káɓ ɓa suki.

²⁴Mí Zezu si ziŋ Zayrus. Daɓa nzukri ɓa ŋgi̧-u dih fal ye. Nzukri nzu̧h hani nzuturu ké ta̧w Zezu.

²⁵Wu̧y a hani-u ƴo sakra daɓa nzukri-aw. Sem ƴo ti̧h ke ɓil ye laɓ mbihmbam boh falu seɗe kari da.

²⁶Ke ko seh ɓa ŋgi̧-u ké ta̧w dɔktari. Ke ɔh ŋgerna ye gbam ɓay ziŋ mun gahna, mí ke ziŋ ya dih. Wara le sena-u el su ya ma pol pol.

²⁷Wu̧y ra lah mberem fe laɓna Zezu, ke rih sakra daɓa nzukri-aw, mí ke si ke fal Zezu za nzak gar ye.

²⁸Ke ɓahri se : « Gel ké mi za ké mun ye, ɓa ra nzak gar ye kara mi tí̧h ke ndɔk hul. »

²⁹Sa gelaw mí ke gi za nzak gar Zezu ba, sem ké ti̧h ke ɓil ye ra kuŋ nzeɗ ba. Wu̧y ra tu ɓahri se, sena ye ɔh da.

³⁰Sa gelaw mí Zezu tu ɓahri, ŋgerna ti̧h ke mun ye. Ke sɔɓ nun ye ké haŋsekle daɓari. Ke ɓahri : « A ge mí za gar bi-ay le ? »

³¹Nzuk-dih fal yeri ɓahri : « Daɓa nzukri ké nzu̧h hani ta̧w wo-ay, mu ko ya wa, ani mú-u ɓahri, a ge mí za mu le ? »

³²Zezu ko gel ɗoŋ ɓa koro koro ɓay ko nzuku.

³³Hȩkme laɓ wu̧y ra, mun ye to kpak kpak. Ke tu mun gahna ké-e ziŋ bale, ke ti̧h gi huk pol Zezu. Ke ɓah ketina ye gbam.

³⁴Zezu ba, ɓahri : « Gun bi, law wo ké te sa tul bi-ay ya̧ mu ke ndɔk hul ya̧-ya̧. Mú si ke ɗeŋ. Mú ƴo ke mun gahna kew kew. »

³⁵Zezu ƴo ɓah ɓay kɔɓ ɓáy bale, nzukri gi sɔk Zayrus ŋgernzuk vul misoŋ ra ɓahri, gun ye hu da. Ké zɔklɔ metere ra mba.

³⁶Ɓayri kú-u ɓah ɓá toh suk Zezu bale, ke ɓah hi̧ Zayrus ɓahri : « Law wo ɓá lu ya. Law wo ɓá ƴo mbew ɓa kpuh-u. »

³⁷Zezu gboh nzukri sí ziŋ ni. Sa ɓa Piyer ke Zak ke yi̧n ye Za̧h mí ke hi̧ niri si ziŋ ni ke bah gun ra.

³⁸Ku ka̧h kerpuh ŋgernzuk vul misoŋ ra. Ku lah fe haŋnari, rewri, vbá̧ nzakri ɗik ɗik. Mí Zezu ɓah hi̧ nzukri-aw ɓahri : « Ɓay fe mí i vuh rew, i vba̧ nzak kari-ay le ? Gun ra hu ya. Wara le ke na nam kaŋto. »

⁴⁰Mí ku sak ni gbaw. Zezu ba, ni̧h niri riw ti̧h kala. Bah gun ke mah gun ke nzuk-dih fal yeri ké say ra, mí ke hi̧ niri rih ziŋ ni ɓil vul ké hul ra ɓu ri.

⁴¹Ke mgba ndɔk hul ɓahri : « Talita kumi. » Ɓayaw yih ɓahri : « Gun tikla-ay, mú el gi, mú ur síɓa. »

⁴²Sa gelaw mí tem gun tikla ra el gi gaŋ ba, mí ke ur síɓa. Ke si sina. Mbihmbam gun tikla ra laɓ boh falu seɗe. Mí kerɓay nzukri ké ƴo vulaw laɓ niri ɓa fe saŋ.

⁴³Mí Zezu ɓah ɓa teh-u le, el ɓah ra ɓáy hi̧ niri ɓahri, kú ɓah ɓayu hi̧ nzuk ya. Ke el ɓahri, kú hi̧ gun tikla ra fe su̧na, ké su̧.