Read Karang Mbete Marki 6 Bible Online

Mbete Marki 6 - Karang bible

Mbete Marki 6

¹Zezu tɔr ke puh-aw el si puh ké-e hu̧h ké ri. Nzuk-dih fal yeri si ziŋ ni pi.

²Nam ɔkna ka̧h bale, Zezu titil firma nzuk puh yeri ɓay lák mbay Ŋgerzah ké vul misoŋ. Fe firma ye na daɓa nzukri yer. Ku ɓahri : « Sa̧w fe firma ye-ay ur ke fál suŋ le ? Ke ziŋ sam ru̧na ye ké tul ge le ? Ŋgerna-laɓ fe saŋ ye-aw ba, sa̧wu ɓa fe le ?

³A ye ke ɓa nzuk-ɓar kpuh ra ya le ? Ke ɓa gun Mari ya le ? Zak, Zoze[11], Zuda, Simu, ku ɓa yi̧n yeri ya le wo ? Manah yeri ƴo ziŋ na-ay pi ya le ? » Kandɔkaw mí ɓay Zezu zɔr law woyri.

⁴Mí Zezu ɓahri : « Gelri ɓoɗ ɓoɗ ku ƴo hȩk gun nzak pihna Ŋgerzah. Sa ɓa nzukri ké puh ye, nzuk in yeri, nzuk kerpuh yeri mí ku hȩk ni ya. »

⁵Kandɔkaw mí Zezu ziŋ ful-laɓ fe saŋri ké puh hu̧hna ye ra ya. Sa ɓa nzuk sena a haniri mí ke ɓaŋ ndɔk kan tul woyri gah niri.

⁶Gelɓay mba ni ɓay tul nzuk puh yeri kú-u ta ziŋ ni ya. Mí ke tɔr si puh a ɓoruri ké ɗoŋ Nasareɗ ƴo firma nzukri ɓay lák mbay Ŋgerzah ké ri.

⁷Zezu ɗi nzuk-dih fal ye a boh falu seɗeri gi ta̧w ye. Wara mí ke pih niri seɗe seɗe. Ke hi̧ niri ŋgerna ɓay mba tul záh tukalari.

⁸Zezu ɓah hi̧ niri ɓa teh-u ɓahri, kú fa̧h fe-si gahru woyri ya. Sa ɓa ka̧wkpuh sina mí kú si keni. Kú si ke fe su̧na ya, ɓɔl ɓay goŋ fe ya, lari ya.

⁹Wara le sabɔk ké bɔk woyri mí kú si keni. Gar a ɓoru ɓá dɔm tul gar ndohna woyri ya pi.

¹⁰Ke el ɓahri se : « Kerpuh ké mgba wuri gahru le, í na kerpuh-u ka̧h nam tɔrna woiri. Í ti̧h si ɓil puh-aw ka-kah ɓay lák mbay Ŋgerzah.

¹¹Puh a a̧y ké sa mgba wuri gahru ya, ké sa lah nzak pihna woiri ya le, tɔrna woiri ke puh-aw, í kpoh kasal bɔk woiri sɔk keni tehɓay ɓahri, salɓay suya woyri mgbahla wuri ya. »

¹²Kaŋ mí nzuk-dih fal yeri tɔr si ka-kah ɓay hi̧ nzukri ɓahri, kú mbi law woyri ké tul suya ma fal el kan law tul Ŋgerzah.

¹³Nzuk-dih fal yeri ra ni̧h záh ké tul nzukri ɓa ŋgi̧-u. Ku suh num ku̧ tul daɓa nzuk senari mí gah niri keni pi.

¹⁴Riŋ Zezu ya̧ gelri hi̧ ɓayu toh suk mbay Eroɗ, mí ke ɓahri, Za̧h batisi mí ti̧h ke puh záh. Sa̧wu mí ke ƴo ke ŋgerna-laɓ fe saŋri-aw.

¹⁵Nzuk a ɓoruri ba, ɓahri, ɓa Eli gun nzak pihna Ŋgerzah a lewsa̧. Nzuk a ɓoruri ɓáy ɓahri, ke ɓa gun nzak pihna Ŋgerzah kandɔk gun nzak pihna Ŋgerzah a lewsa̧ri kaŋ.

¹⁶Mí Eroɗ lah ɓayu bale, ke ɓah ɓay ye ɓahri : « Za̧h ké mi hi̧ ku kuŋ tul ye mí záh ye ti̧h-aw. »

¹⁷Fe ké hi̧ Eroɗ kuŋ tul Za̧h ra mí na-ay : Eroɗ ya̧ Herodiya wu̧y yi̧n ye Filiɓ ké ƴo ke nun ɓáy. Mí Za̧h toŋ ɓah hi̧ Eroɗ ɓahri : « Bolkusol Ŋgerzah hah yá̧ wu̧y yi̧n wo ké hu ya ɓáy. » Sa̧wu mí Eroɗ mgba Za̧h ŋga̧h ni si mbih ɓil vul mgbal.

¹⁸

¹⁹Herodiya ba, mgba Za̧h ɓu law ye. Ke yih ɓay i ni, mí ke ziŋ ful ya

²⁰ɓayu ké Eroɗ laɓ hȩkme Za̧h. Ke tu ni ɓa nzuk-ƴo ziŋ Ŋgerzah. Ke tu ni ɓa nzuk lawpuki. Kandɔkaw mí ke kɔr ni ke nun. Gelke-e lah ɓay ké Za̧h ɓah le, ɓayu kpu-kpuh kara ke lah ɓayu ke law rihna.

²¹Nam a hani-u mbew dale ɓa nam pol tehna Herodiya. Namu-aw Eroɗ lek yi̧hna a bawu ɓay nam mbuŋna ye. Ke ɗi ŋgernzuk a lukiri, kumandahri, nzuk riŋ ɗinari ké tusiɓa-lak mbay ye ké Galile gi su̧ fe su̧na ti̧hmbih ziŋ ni.

²²Gun Herodiya ké ɓa tikla gi nda nday ké pol Eroɗ ke gahru yeri ra bale, ndayu ndɔh nun ye ke nun gahru yeri mbamba, mí mbay Eroɗ ɓah hi̧ tikla ra ɓahri : « Fe a suŋ suŋ ké law wo yih, mú vbi mi, mi hí̧ mu. »

²³Eroɗ el hah mun ye gbaɗ gbaɗ ra ɓáy ɓahri : « Fe a suŋ suŋ, mú vbi le, mi láɓ fe-u hi̧ mu. Ɓa ra puh lakna bi kara mi kéhr ke haŋsekle hi̧ mu hi̧ gaŋ. »

²⁴Tikla ra ti̧h kala si ta̧w mah ye vbi ni ɓay fe mí ké vbi le ? Bale mah ye ɓahri, ké vbi tul Za̧h batisi.

²⁵Tikla ra el ke ɗukna kiriŋ gi vbi mbay Eroɗ. Sa gelaw mí ke goŋ ni ɓahri : « Mi yih ɓay í hi̧ mi tul Za̧h kan pala aŋay. »

²⁶Law Eroɗ rih mba. Ɓay tul fe hahna ké-e hah ké pol gahruri mí ke sa vbir ɓay ye hi̧ tikla ra ya.

²⁷Sa gelaw mí Eroɗ pih bolnzak hi̧ kú kuŋ tul Za̧h. Mí ku si kuŋ tul ye ké vul mgbal.

²⁸Ku ɓaŋ tul Za̧h kan pala gi keni hi̧ tikla ra. A ye ba, ke ya̧ si hi̧ mah ye.

²⁹Nzuk-dih fal Za̧hri lah ɓayu, mí ku si mbi hulu gɔr.

³⁰Gun nzak pihna Zezu a boh falu seɗeri el ke gel ka-kah ɓay lák mbay Ŋgerzah gi mbu̧h hani ké ta̧w Zezu. Ku ki̧ fal ɓayri gbam hi̧ ni, ɓay fe laɓna woyri ke fe firma ɓay Ŋgerzah kú-u firma nzukri pi.

³¹Ké gelaw nzukri ɓa ŋgi̧-u toŋ gi fal hani fal hani ma ta̧w woyri. Nzuk ginari, nzuk elnari ƴo gi-u hi̧ Zezu ke nzuk yeri ziŋ ful-su̧ fe ya. Mí Zezu ɓah hi̧ niri ɓahri : « Náh tɔr wuri si gel ké nzukri ta-a le, í ɔk mun woiri ndi̧. »

³²Mí ku hil kumbon, ku tɔr si gel a ɓoru ké nzukri ta ri ya.

³³Daɓa nzukri ko tɔrna woyri. Ku tu niri, mí ku ur ke ɗukna ɗukna ke puhri ɓoɗ ɓoɗ si ka̧h gelu pol.

³⁴Zezu ke nzuk-dih fal yeri ba, ka̧h. Ti̧hna woyri ke ɓil kumbon, Zezu ko daɓa nzukri ké ŋgi̧ mbamba-aw. Mí ku baseh ké nun ye ɓay fe le, ku na kandɔk sami ké nzuk-kɔr niri ta-a. Wara mí ke firma niri ɓay lák mbay Ŋgerzah ɓa ŋgi̧-u.

³⁵Seh yekre bale, nzuk-dih fal yeri loh ma ta̧w ye ɓahri : « Gelay ɓa ɓil suy. Seh ƴo riŋna.

³⁶Mú sel nzukri-ay ɓá tɔr si puhri ké ɗoŋ niri-ay, kú yeh fe su̧na, kú su̧. »

³⁷Bale Zezu ɓahri : « A woiri gaŋ, í hi̧ niri fe su̧na, kú su̧. » Nzuk-dih fal yeri ɓahri : « Náh fa̧h ra sak sɔɗ sɔɗ seɗe si yeh keni fe su̧na wal niri ndi̧ ndi̧ kara ta mah niri ya. »

³⁸Bale Zezu ɓahri : « Peŋ ka̧h ani mí na ta̧w woiri le ? Í si ko. » Ku si ko peŋ ɓa ndiɓi, nzuy ba, ɓa seɗe, mí ku sɔk Zezu.

³⁹Zezu hi̧ bolnzak hi̧ nzuk-dih fal yeri ɓahri, kú hi̧ nzukri ɓá mgba hani kaɓ siɓa zuɓ zuɓ. Ké gelaw suy loŋ ri mbula su kaɓna.

⁴⁰Nzuk-dih fal yeri hi̧ nzukri kaɓ siɓa zuɓ zuɓ, nzuk a sɔɗri ke nzuk a bon ndiɓiri.

⁴¹Zezu ya̧ peŋ ké ndiɓi ke nzuy ké seɗe ra, ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra hi̧ nzuk-dih fal yeri wal hi̧ nzukri su̧. Ke wal nzuy ké seɗe ra hi̧ nzukri riw pi.

⁴²Nzukri riw su̧ fe mbah ɓil woyri poŋ tɔru.

⁴³Ku mbu̧h tɔr peŋ ké toŋ ke tɔr nzuy ra mbah tɔlɔ ɓa boh falu seɗe.

⁴⁴Nzukri ké su̧ fe ra, ku ki̧ wo̧rori ɓa sɔɗ sɔɗ boh gel ndiɓi (5.000).

⁴⁵Ku mbu̧h tɔr fe su̧na. Sa gelaw mí Zezu hi̧ bolnzak hi̧ nzuk-dih fal yeri ɓahri, kú rih ɓil kumbon, kú tɔr pol ma kala mahmbih ké Beɗsayda. A ye ba, ke toŋ fal ƴo vbar nzukri ɓá tɔr.

⁴⁶Ke vbar niri, mí ke tɔr si tul kasaw ƴo ɓah ɓay ziŋ Ŋgerzah.

⁴⁷Seh riŋ, mí kumbon ƴo ɓa ɗih-u ka̧h haŋsekle mahmbih. A ye Zezu ra, ke ƴo fal ke hȩk ye.

⁴⁸Zezu ko nzuk-dih fal yeri ta̧h hehre kumbon ma pol kpu̧y ɓayu ké kuna nzɔh nun woyri mí fa̧h mbih vba̧ kumbon gbɔksɔ gbɔksɔ. Tipele toŋ ɗih ya mí ke si sina tul mbih ma ta̧w woyri. Ke si, mí ke yih ɓay ka-kal.

⁴⁹Nzuk-dih fal yeri ɓá ko ni, ké-e si sina tul mbih le, ku ker ɓahri se, záh mbih munu. Mí gbam woyri vba̧ nzak kululu kululu ɓayu kú-u ko ni, mí tul woyri fa̧h zikiki zikiki. Sa gelaw mí Zezu ɓah hi̧ niri ɓahri : « Í su̧h law. A bi munu. Í laɓ hȩkme ya. »

⁵⁰

⁵¹Zezu hil kaɓ ɓil kumbon ziŋ niri. Kuna tuk, mí gosoɓay zi nzuk-dih fal yeri zi-zi.

⁵²Law woyri kpuh mbamba. Ku tu sa̧wɓay peŋ ké nzukri su̧ ra ya.

⁵³Ku ka̧h kala mbih ké tusiɓa Genesareɗ. Ku ŋga̧h kumbon ké ɓel sew.

⁵⁴Ku ti̧h ke ɓil kumbon. Sa gelaw mí nzukri ko ni ɓa a ye Zezu.

⁵⁵Mí ku ur ke ɗukna si ka-kah ɓay gina ye ɓil puhri gbam ké ɗoŋ niri. Wara mí nzukri suk nzuk senari gi gel ké-e ƴo ri.

⁵⁶Gelri riw ké-e si ri, ɓa ra puh a lukiri mini gun puhri kara nzukri suk nzuk senari si ku̧ ndiseŋe, mí ku ɗi Zezu ɓá gi ɓay hi̧ nzuk senari ɓá za nzak gar ye ndi̧ le, kú ziŋ mun gahna. Nzuk sena a suŋ suŋ ké za nzak gar ye le, ti̧h ke ndɔk hul ti̧-ti̧h.