Read Karang Mbete Marki 7 Bible Online

Mbete Marki 7 - Karang bible

Mbete Marki 7

¹Fariziri ke nzuk-sɔk mbete bolkusol Ŋgerzah a haniri ur ke Zurusalem mí mbu̧h hani gi ta̧w Zezu.

²Ku ko nzuk-dih fal Zezu a haniri ƴo su̧ fe dan wɔ́k ndɔk hi̧ suya tukala sih law woyri ké nun Ŋgerzah.

³(Fariziri ke ziɓ a garuri gbam wɔk ndɔk ɓay lu keni suya tukala. Ndɔk wɔk ya le, sú̧ fe ta-a. Ku ƴo tul fe laɓna sa̧w zih woyri.

⁴A woyri-aw, ku ur ke lumu le, ku wɔk mun woyri ya le, ku su̧ fe ya. Fe laɓna woyri a ɓoruri ba, ɓa wɔ́k koɓ, mbɔhrɔ, ŋgoro.)

⁵Mí fariziri ke nzuk-sɔk mbete bolkusol Ŋgerzahri vbi Zezu ɓahri : « Ɓay fe mí nzuk-dih fal wori sa mbi fe laɓna sa̧w ziihri ya le ? Mí ku toŋ su̧ fe dan wɔ́k ndɔk hi̧ ku teh ya. Lú suya dara kú su̧ fe ɓáy ra, ɓayu ko niri ya ley ? »

⁶Bale Zezu ɓahri : « A woiri nzuk-mu̧h ketinari, ɓay ké Ŋgerzah ndoh ké nzak Ezay gun nzak pihna ye lewsa̧ mgba tul woiri ɓa ketina. Gun Izarayelri-ay, ku hȩk mi ke nzak. Law woyri le ɗi-ɗih ziŋ mi. Ku dim mi gɔr. Fe firma kú-u firma nzukri le, ɓa kerɓay nzuk pirmatulri [12]. »

⁸A woiri ra i poŋ ɓay Ŋgerzah ɓay ƴo tul fe laɓna sa̧w nzuk pirmatulri.

⁹Zezu el ɓahri se : « Kaŋ gaŋ mí i poŋ ɓay Ŋgerzah ma fal ɓay í ƴo tul sa̧w fe woiri.

¹⁰Moyiz ba, vbeh bolkusol Ŋgerzah ɓahri : Mú hȩk bah wo ke mah wo. Nzuk ɓah ɓay a suya-u ziŋ bah ye mini mah ye le, kú i ni.

¹¹Mí a woiri le, i ɓahri, gelke gun ɓah hi̧ mah ye mini bah ye ɓahri : “Fe ziŋna ké mi ɓay so wuri keni ra ɓa kɔrban wara.” (Kɔrban yih ɓahri, fe hi̧na ɓay Ŋgerzah.)

¹²Mí i gboh nzuku ful-so mah ye ke bah ye keni.

¹³Kaŋ mí i mbi bolkusol Ŋgerzah sɔɓ ɓa fe a kɔku ɓay tul fe sa̧w woiri ké i ƴo tulu kpatara. I ƴo sɔɓ tul ɓay Ŋgerzah a ɓoruri ɓa ŋgi̧-u kaŋ pi. »

¹⁴Zezu el ɗi daɓa nzukri gi ta̧w ye. Ke ɓahri : « Í lah mi ɓa teh-u, í hi̧ ɓayu ɓá guh law woiri.

¹⁵Fe a kala ké nzuk su̧ si rih ɓil ye ta sih law nzuku ké nun Ŋgerzah ya. Wara le ɓay ké nzuk ɓah ke nzak ye mí hi̧ Ŋgerzah ko ni ɓa fe a kala. »

¹⁶[Nzuk ké ƴo ke suk-lah ɓay le, ké lah.]

¹⁷Zezu poŋ daɓa nzukri ra, ke rih vul, nzuk-dih fal yeri ƴo vbi ni ɓay ké ten sa̧w lawɓay ra, kú lah.

¹⁸Ke ɓahri : « A woiri kara ɓayay guh law woiri ya pi le ? I tu ya lo ?

¹⁹Fe su̧na a suŋ suŋ gbam na kala mun nzuk, mí nzuk su̧ kal rih ɓil ye. Fe su̧na sih law nzuk ké nun Ŋgerzah ya ɓay fe le, fe su̧na rih ɓil law ye ya wara le, rih ɓil nzuk mí kal ti̧h ɓa vbi̧ri ku̧ kpah. » (Ɓayu sɔk ɓahri, fe su̧na gbam mah nun Ŋgerzah ma-mah mí na ɓa suki ɓay nzukri.)

²⁰Zezu el ɓahri se : « Ɓay ké ti̧h ke nzak nzuk ba, sa̧wu ur ke law nzuk. Kaŋ mí suya ké nzuk ɓah mí hi̧ Ŋgerzah ko nzuku ɓa fe a kala.

²¹Ɓayu ké sa̧w kerɓay a suya-uri ti̧h ke ɓil law kandɔk láɓ nunpuki, ríh riɓa, í nzuk, mbí wu̧y wo̧ro, ɓáŋ nun te tul fe, láɓ law a pipiri-u, ɓáh nzak pa̧na, láɓ fe si wɔrɔk, láɓ law sihna, ɓáh suya ke riŋ nzuk, hú̧h tul, mbí kɔk.

²³Feri-aw riw ɓa sam fe a pipiri-uri mí ti̧h ke ɓil law nzuk hi̧ Ŋgerzah ko nzuku ɓa fe a kala. »

²⁴Zezu ur ke gelaw tɔr ma fál Tir. Ke si kaɓ ɓil vul a hani. Ke sa ɓay hi̧ nzuk ɓá tu gel kaɓna ye ya, mí mahful mu̧h mun ye ta-a.

²⁵Wara le wu̧y a hani ƴo ké tusiɓa-aw ra. Wu̧yu ƴo ke gun wu̧ynzuk ké záh ƴo tul ye. Wu̧y ra lah ɓay Zezu. Sa gelaw mí ke si huk pol ye.

²⁶Wu̧yaw ɓa gun Izarayel ya. Sa̧w ye ɓa Sirofonizi. Ke ɓah nzak gerek. Ke gi goŋ Zezu ɓá ni̧h záh ké tul gun ye.

²⁷Mí Zezu ɓahri : « Mú poŋ gunri ɓá su̧ fe mbah ɓil woyri dara. Ɓayu ké mbí fe su̧na gunri vbu siɓa hi̧ gun gayri suya. »

²⁸Bale wu̧y ra yih nzak ye kandɔkay : « Gaŋ a luki, gun gayri kara dam bukma fe su̧na ké ga̧y ku̧ siɓa ké gel fe su̧na gun puhri pi. »

²⁹Mí Zezu pir ni ɓahri : « Mú si puh. Ke tul ɓay ké nzak wo ɓah-aw, záh ti̧h ke tul gun wo ti̧-ti̧h. »

³⁰Wu̧y ra el ka̧h puh ba, ke ko gun ye ra na hih ɓa suki. Záh ra ti̧h ke tul ye ti̧h gaŋ.

³¹Zezu tɔr ke tusiɓa Tir el kal tusiɓa Sidon si ɓel mahmbih Galile mí ka̧h tusiɓa Dekapol[13].

³²Nzukri maŋ mbiki a hani gi keni. Ku goŋ Zezu ɓá ɓaŋ ndɔk kan tul ye.

³³Zezu ten mbiki ké sakra nzukri si ƴo nzak gakra. Ke laɓ gundɔk ndoh suk ye seɗe mbɔk. Ke sa sam ku̧ rim mbiki ra.

³⁴Ke el ɔr nun ye ma nunmbam. Ke ɔ-ɔkna fo̧h mí ke ɓahri : « Efata. » Efata yih ɓahri, suk ye ɓá mgbur.

³⁵Mí suk ye guh, rim ye sel hi̧ ni ke ɓah ɓay yororo yororo.

³⁶Zezu ɓah hi̧ nzukri ké ƴo gelu-aw ɓa teh-u ɓahri, kú ɓah ɓayu hi̧ nzuk ya. Ke ɓah hi̧ niri le, ke ɓah ra ɓáy mí ku toŋ ka-kah ɓayu ma pol pol.

³⁷Fe-u na niri ɓa saŋ mah ɓahna ya, ku ɓahri, ke laɓ feri riw su ɓa suki. Ke hi̧ mbikiri lah ɓay pi, ku ɓah ɓay pi.