Read Karang Mbete Marki 8 Bible Online

Mbete Marki 8 - Karang bible

Mbete Marki 8

¹Ɓil namuri-aw daɓa nzukri ɓa ŋgi̧-u mbu̧h hani ké ta̧w Zezu ɓáy. Ku su̧ fe ya, mí ke ɗi nzuk-dih fal yeri gi, ke ɓahri :

²« Law bi sa̧h mi ɓay tul daɓa nzukri-ay ɓay fe le, laɓ nam say wara kú-u ƴo ziŋ mi dan sú̧ fe.

³Mi poŋ nzukri-ay el si puh dan sú̧ fe le, ku ɓay lih ɗaka ké mahful. Nzuk a haniri ké sakra woyri ur ɓa ɗih-u. »

⁴Nzuk-dih fal yeri ba, ɓahri : « Gelay ɓa ɓil suy. Ké fál suŋ mí nzuk ɓay ziŋ ri fe su̧na ɓay hi̧ daɓa nzukri-ay ɓá su̧ mah gel ɗaka woyri le ? »

⁵Ke vbi niri ɓahri : « I ƴo ke peŋ ka̧h ani le ? » Bale ku ɓahri : « Peŋ ɓa toŋndɔk say. »

⁶Zezu hi̧ nzukri kaɓ siɓa. Ke ya̧ peŋ ké toŋndɔk say. Ke el ke tumbɔl hi̧ Ŋgerzah, ke haw, mí ke hi̧ nzuk-dih fal yeri ɓay kú wal daɓa nzukri-aw. Mí ku wal hi̧ nzukri ra ba.

⁷Nzuy ndi̧ na ri pi. Mí Zezu lu mgbɔkɔ ku̧ tulu. Mí ke ɓahri, kú wal hi̧ nzukri ɓá su̧ pi.

⁸Ku su̧ mbah ɓil woyri el poŋ tɔru. Ku mbu̧h tɔr fe su̧na ké toŋ ra mbah tɔlɔ a baw baw ɓa toŋndɔk say.

⁹Nzukri ké su̧ peŋ ra tul woyri ɓa sɔɗ sɔɗ boh gel niŋ (4.000). Kandɔkaw mí ke poŋ niri tɔr si puh.

¹⁰Sa gelaw mí Zezu ke nzuk-dih fal yeri rih kaɓ ɓil kumbon tɔr si ka̧h tusiɓa Dalmanuta[14]. Fariziri gi ta̧w ye. Wara mí ku nzah nzak ye ke ɓay, ku fah ni ɓay ké laɓ fe saŋ hi̧ niri kú ko, sa̧wu ɓa nunmbam le ?

¹²Zezu ɗer haŋ fo̧h mí ke ɓahri : « Ani mí gun tukala-ayri nzah ɓay ko fe saŋ le ? Ɓa ketina, mí-i ƴo ɓah ɓayay hi̧ niri : hul bi dara ku kó fe saŋ ɓáy. »

¹³Mí Zezu poŋ niri el si rih ɓil kumbon tɔr si ma kala mbih ra ɓáy.

¹⁴Nzuk-dih fal yeri yȩkre peŋ. Peŋ mbew yaŋ mí na ɓil kumbon.

¹⁵Zezu ɓah hi̧ niri ɓa teh-u ɓahri : « Í ru̧ ke mun woiri. Í ko-ko ɓay is fariziri ke ɓay is nzuk Eroɗri. »

¹⁶Mí nzuk-dih fal yeri fah ɓay ké haŋsekle woyri ɓahri, ɓay tul peŋ kú-u fa̧h ya, mí ke ɓah ɓayaw.

¹⁷Zezu tu kerɓay woyri, mí ke ɓahri : « Ani mí i ƴo fah ɓay tul peŋ ké ta-a le ? I tu ya ɓáy lo ? Law woiri guh ya ɓáy le ? Kandɔk ké i lah ya ra, law woiri kpuh.

¹⁸Nun woiri ko fe mí i ko ya. Suk woiri lah ɓay, mí i lah ya. Law woiri ker ɓay ya le wo ?

¹⁹Peŋ ndiɓi ké mi haw hi̧ nzukri sɔɗ sɔɗ boh gel ndiɓi (5.000) su̧ ra wa, i fa̧h tɔru mbah tɔlɔ ka̧h ani le ? » Ku ɓahri : « Nah mbu̧h tɔlɔ boh falu seɗe. »

²⁰Ke el ɓahri : « Peŋ toŋndɔk say ké mi hi̧ nzukri sɔɗ sɔɗ boh gel niŋ (4.000) su̧ ra wa, i fa̧h tɔru mbah tɔlɔ ka̧h ani le ? » Mí ku ɓahri : « Tɔlɔ a bawuri ɓa toŋndɔk say. »

²¹Mí Zezu ɓahri : « Ɓayu guh law woiri ya ɓáy ley ? »

²²Zezu ke nzuk-dih fal yeri ka̧h Beɗsayda. Mí nzukri maŋ ra̧w a hani gi keni hi̧ Zezu. Ku goŋ ni ɓay ké za ra̧w ra ɓo ké gah ni.

²³Zezu mgba ndɔk ra̧w ra ten ni ke ɓil puh si ƴo nzak gakra. Mí ke sa sam ku̧ nun ye. Ke ɓaŋ ndɔk kan tul ye ƴo vbi ni ɓahri : « Mu ko fe le ? »

²⁴Ra̧w ra mgbur nun. Ke ko gel, ke ɓahri : « Mi ko nzukri eŋ kpuh ké ti̧h bɔk ƴo si sina. »

²⁵Zezu el za nun ra̧w ra ɓáy ba, nun ye mgbur, ke ko gel ɓa teh-u kaɗ kaɗ. Ke ko feri riw teh gberere.

²⁶Zezu pih ni el si puh ye ɓahri : « Ko-ko ɓay mú si ɓil puh. » Kandɔkaw mí ke poŋ ni el si puh.

²⁷Zezu ke nzuk-dih fal yeri ur tɔr ke Beɗsayda. Ku kal puhri ké na fál kɔr Sezareh-Filiɓ. Ku ƴo tul ful kɔɓ ɓáy bale, Zezu vbi niri ɓayay : « Nzukri ɗi mi ɓa sam nzuk a suŋ le ? »

²⁸Bale ku ɓahri : « Nzukri ɗi mu ɓa Za̧h batisi. Nzuk a haniri ɗi mu ɓa Eli gun nzak pihna Ŋgerzah a lewsa̧. Nzuk a ɓoruri ba, ɗi mu ɓa gun nzak pihna Ŋgerzah a hani ké ti̧h ke záh. »

²⁹Mí ke el vbi niri ɓahri : « A woiri ba, i ɗi mi ɓa sam nzuk a suŋ le ? » Piyer yih nzak ye ɓahri : « A wo mú-u ɓa Ŋgermbay[15]. »

³⁰Mí Zezu hah niri ɓáh ɓay riŋ ɗina Ŋgermbay ye ra hi̧ nzuk.

³¹Wara mí Zezu ti firma niri ɓay ɓahri se : « Na ani ani gaŋ kara a ye gun nzuk pirmatul ɓay ko seh kal ŋgɔŋ. Ŋgernzuk puh wah gun Izarayelri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri, ku ɓay ko ni ye ɓa kɔk fe, ke hú hul. Nam say falu le, ke tí̧h ke puh záh ke pa̧ymun a foyu. »

³²Zezu ɓah ɓay ye ɓa teh-u hi̧ niri. Mí Piyer ten Zezu bale, ke hah Zezu ɓáh ɓayaw.

³³Zezu sɔɓ fal hi̧ Piyer, ke ko kona ma tul nzuk-dih fal yeri, mí ke ɓah hi̧ Piyer ɓa teh-u ɓahri : « Satan a wo nzukbaa, mú el ké ta̧w bi ma fal ɓay fe le, law wo mbi kerɓay Ŋgerzah ya wara le, ɓa kerɓay nzukri. »

³⁴Zezu ɗi nzukri ɓa ŋgi̧-u ke nzuk-dih fal yeri. Ke ɓah hi̧ niri ɓahri se : « Nzuk yih dih fal bi le, ké poŋ kerɓay tul ye ma fal. Ké mbi kpuh vbatay hul ye, ké suk, ké dih keni fal bi,

³⁵ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi ke ɓay tul ɓaysuki bi[16] le, ke ɓay ti̧h ke ndɔk hul.

³⁶Fe ziŋna fe mí ɓay ti̧h suk hi̧ nzuk a a̧y ké su̧ tukala hu̧m hu̧m mí ɔ́h ɓay ye ɓa kɔk fe le ?

³⁷Uwa. Fe ziŋna fe mí nzuku ɓay mbi soh keni tul ye le wo ?

³⁸Nzuk a a̧y ké ko riŋ bi ɓa fe su̧hru ye ké pol gun tukala-ayri nzukri ké pihna woyri ɓa láɓ suya, ɓa póŋ Ŋgerzah el ti̧h kala si mbi záh a ɓoru le, gun nzuk pirmatul ɓay tu nzuku-aw ɓa fe-se su̧hru ké nun ye ke seh ké tem nzak pihna Ŋgerzahri ɓay ɓaŋ ni gi ɓil riŋ ɗina bah ye. »