Read Karang Mbete Marki 9 Bible Online

Mbete Marki 9 - Karang bible

Mbete Marki 9

¹Zezu el ɓahri : « Ɓa ketina gaŋ. Mi ƴo ɓah hi̧ wuri, nzuk a haniri ké sakra wah-ay hul ɗi riŋ woyri ya ɓáy, mí ku kó lák mbay Ŋgerzah ké gi ke ŋgerna ke nun. »

²Falu laɓ nam tɔtɔklɔ bale, Zezu fa̧h Piyer, Zak, Za̧h. Ku si ziŋ ni, ku laɓ niŋ. Ku hil kasaw ké gaŋ zeŋleŋleŋ ke hȩk woyri. Ké nun Piyer-ri mí mun Zezu sɔɓ na ɓoɗ.

³Gar ye su nda̧w nda̧w el pu rak rak. Nzuk mbew ké tusiɓa ta hi̧ gar ɓá pu kandɔkaw ya.

⁴Eli ke Moyiz gun nzak pihna Ŋgerzah a lewsa̧ri ti̧h nun woyri gi ziŋ Zezu. Ku ƴo lu mberem ziŋ ni.

⁵Piyer ba, ɓah hi̧ Zezu ɓahri : « Metere, gel ké nah ƴo ri-ay su-su. Nah yih pɔr vul ɓa say hi̧ wuri. A mbewu ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. »

⁶Ɓayaw, Piyer ɓah va̧h ɓay hȩkme ké se niri mbamba.

⁷Mí ɗikmambam gi guɓ tul woyri gbukru bale, kusol ti̧h ke ɓilu ɓahri : « A ye-ay, ke ɓa gun sana bi. Í lah nzak ye. »

⁸Mí ku ko kona ɗoŋ niri gbuk ɓay ko nzuk ɓah ɓayaw, mí ku ko nzuku ya. Sa ɓa Zezu ke hȩk ye mí toŋ ké ta̧w woyri.

⁹Ɗerna woyri ke tul kasaw ra, Zezu hah niri ɓáh ɓay fe kú-u ko hi̧ nzuk. Ke ɓahri, gun nzuk pirmatul ɓá ti̧h ke puh záh ke pa̧ymun a foyu dara kú ɓah ɓayu ɓáy.

¹⁰Kandɔkaw ku ŋga̧h ɓayu ké ɓil law woyri. Ké haŋsekle woyri ku fakla ɓay tu sa̧wɓay ti̧hna gun nzuk pirmatul ke puh záh ke pa̧ymun a foyu ra wa, ɓayu yih ɓah ani munu le ?

¹¹Mí nzuk-dih fal yeri ké sayaw vbi ni ɓahri : « Nzuk-sɔk mbete bolkusol Ŋgerzahri ɓahri, Eli a lewsa̧ ɓay gi pol dara Ŋgermbay ɓay gi ɓáy ra wa, ani le ? »

¹²Mí Zezu ɓah ɓay ɓahri : « Eli ɓá gi pol ɓay lek gel ɓá ƴo gelu hi̧ Ŋgermbay. Mí kaŋaw ba, ani mí mbete Ŋgerzah ɓah ɓay tul gun nzuk pirmatul ɓahri, ku ɓay saŋ ni, ku ɓay laɓ ni koseh mbamba pi ra wa, i lah wuri ya le ?

¹³Mi ƴo ɓah hi̧ wuri ɓahri, Eli gi da, mí nzukri laɓ ni kandɔk kú-u yih. Fe-u laɓ kandɔk kú-u vbeh si tul ye ké ɓil mbete lewsa̧. »

¹⁴Zezuri ka̧h ɗih ya ké ta̧w nzuk-dih fal ye a ɓoruri ké toŋ fal, mí ku ko daɓa nzukri ɓa ŋgi̧-u ké ɗoŋ niri. Nzuk-sɔk mbete bolkusol Ŋgerzah a haniri ƴo fah ɓay ziŋ niri.

¹⁵Daɓa nzukri-aw gbam ɓá ko Zezu ké ƴo gina le, sa gelaw mí law woyri lu ba̧y ba̧y, mí ku ur ke ɗukna si vah ni.

¹⁶Zezu vbi niri ɓahri : « Ɓay tul fe mí i fah ɓay le ? »

¹⁷Mí nzuk a hani ké sakra daɓa nzukri-aw gi ɓahri : « Metere, mi gi ke gun bi ma ta̧w wo. Záh ƴo tul ye. Ke hi̧ ni ke ɓah ɓay ya.

¹⁸Gelke záh ra mgba ni dale, vbu ni siɓa gbirik. Mbihsam ye fur tuka tuka. Ke su̧ sel ye ŋger ŋger. Mun ye kpo-kpoŋ pi. Mi ɓah ɓayu hi̧ nzuk-dih fal wori ɓay kú ni̧h záh ra, mí ku ta̧h va̧na ni̧h-u kpu̧y. »

¹⁹Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Í gi ke gun ra hi̧ mi. »

²⁰Ku si gi ke gun ra hi̧ ni. Záh ɓá ko Zezu le, sa gelaw mí ke mgba gun ra, ke laŋ ni yik yik, ke ndih ni vbu siɓa hi̧ ni ke ta kpeleŋ kpeleŋ. Mbihsam ye fur tuka tuka.

²¹Zezu vbi bah gun ra : « Ke seh suŋ mí záh titil laɓ ni le ? » Ke ɓahri : « Fe-u titilu ke lele ye kaŋ.

²²Kpatara, záh ra ƴo mgba ni vbu hɔrɔ. A hani le, ƴo mbi ni vbu mbih ɓay zi tul ye, mí ŋgerna wo ƴo ra ri le, mú so na, mú ya̧ ta̧hna wah ge. »

²³Bale Zezu ɓah hi̧ bah gun ra ɓahri : « Mu ɓahri, ŋgerna bi ƴo ra ri le ley ? Ké ta̧w nzuk ké kan law tul bi le, ŋgerna ƴo ri ɓay laɓ feri gbam. »

²⁴Sa gelaw mí bah gun ra vba̧ nzak ɓahri : « Mi kan law bi tul wo. Mú so law bi ɓá te sa tul wo. »

²⁵Zezu ɓá ko daɓa nzukri ké mbu̧h hani yir ɗoŋ tul ye le, ke hah záh tukala ra ɓahri : « A wo záh ké mu gboh gunay gel-ɓah ɓay pi gel-lah ɓay pi ra, mi ƴo ɓah ɓayay hi̧ mu, mú ti̧h ke tul gunay. Mú el gi tul ye mba. »

²⁶Záh ra vba̧ nzak. Ke laŋ mun gun ra yik yik, mí ke ti̧h poŋ gun ra na siɓa zarak eŋ hul kaŋ hi̧ nzukri ɓahri, gunaw hu-hu.

²⁷Mí Zezu mgba ndɔk gun ra, mí ke ɔr ni ƴo síɓa zekre.

²⁸Zezu ke nzuk-dih fal yeri tɔr si rih vul ke hȩk woyri. Ku vbi ni ɓahri : « Ɓay fe mí ŋgerna wah mah ni̧h záh ra ya le ? »

²⁹Mí ke ɓahri : « Nzuk ta ni̧h záh a kandɔkaw ke ŋgerna ye ya, ŋgerna-u ɓa góŋ Ŋgerzah mbew yaŋ. »

³⁰Ku ti̧h poŋ gelaw si kal tusiɓa Galile. Mí Zezu sa ɓay hi̧ nzuk ɓá tu gel kaɓna woyri ya,

³¹ɓayu ké-e ƴo firma ɓayay hi̧ nzuk-dih fal yeri ɓahri, ku ɓay ndoh ni ye gun nzuk pirmatul ndɔk nzukri. Ku í ni. Nam a sayu le, ke tí̧h ke puh záh ke pa̧ymun a foyu.

³²Mí ɓayu guh law woyri ya. Hȩkme vbí sa̧wɓayu se niri pi.

³³Zezu ke nzuk-dih fal yeri ka̧h Kapernayum. Ku si kaɓ ɓil vul mí Zezu vbi nzuk-dih fal yeri ɓahri : « Ɓay fe mí i fah ɓay ké mahfulaw le wo ? »

³⁴Bale ku kaɓ silili ɓayu ké ku fah ɓay ziŋ hani ké mahfulaw ɓay tu a ge mí ɓa ŋgernzuk ké haŋsekle woyri le.

³⁵Wara mí Zezu el kaɓ siɓa. Ke mbu̧h nzuk-dih fal ye a boh falu seɗeri ma ta̧w ye, ke ɓahri : « Nzuk a suŋ suŋ ké yih na ɓa ŋgernzuk le, ke láɓ mun ye ɓa gun. Ke ná ɓa gun-laɓ pihna hi̧ mbaŋ yeri. »

³⁶Mí Zezu mbi gun a lele gi ƴo keni haŋsekle woyri. Ke hu̧hru ni, mí ke ɓahri :

³⁷« Gelke nzuk mgba gun a kandɔkayri ma law ye ɓay tul riŋ bi le, a bi mí ke mgba mi-aw. Nzuk a suŋ suŋ ké mgba mi ma law ye le, ɓa a bi ya wara le, ɓa nzuk-pih mi mí ke mgba ni-aw. »

³⁸Kandɔkaw mí Za̧h mbi ɓay ɓahri : « Metere, nah ziŋ nzuk a hani-u ƴo ni̧h záhri ke riŋ wo, mí nah gboh ni ɓay fe le, ke ɓa bɔh sina wah ya. »

³⁹Mí Zezu ɓahri : « Í gboh ni ya ɓayu ké nzuk laɓ fe saŋ hi̧ riŋ bi kan ri le, ta el mbi riŋ bi ɓah keni suya ya,

⁴⁰ɓayu ké-e ɓa nzukbaa wah ya. Ke ɓa nzuk fal ŋgaŋ wah munu.

⁴¹Nzuk a a̧y ké ƴo ke Ŋgermbay mí ke kah mbih hi̧ wuri i nzo ɓay fe le, i ɓa nzuku a Ŋgermbay le, ɓa ketina, mi ƴo ɓah hi̧ wuri ɓahri se, kpaŋndɔk nzuku ta zi ya.

⁴²Mí nzuk a a̧y ké hɔl ndaw lihna le, ŋgá̧h baw kasaw ké sol ye mbi ni vbu ɓil mahmbih mí su, koseh ye-aw su mba poŋ ni ké mgba gun a mah gelu ké kan law tul bi ɓá saŋ riŋ bi.

⁴³Ndɔk wo ɓa ndaw lihna hi̧ mu saŋ riŋ bi le, mú kuŋ vbu kpah. Hú ɓa kpere si kaɓ ke ɔkna su mba hú ke ndɔk wo seɗe mbɔk si kaɓ ɓil hɔrɔ ké ri-rimna ya.

⁴⁴[17]

⁴⁵Bɔk wo ɓa ndaw lihna hi̧ mu le, mú kuŋ vbu kpah. Hú ɓa kpere si kaɓ ke ɔkna su mba hú ke bɔk wo seɗe mbɔk si kaɓ ɓil hɔrɔ ké ri-rimna ya.

⁴⁶[18]

⁴⁷Nun wo mí ɓa ndaw lihna hi̧ mu le, mú lur ku̧ kpah. Ríh ɓil lák mbay Ŋgerzah ɓa ra̧w su mba káɓ ɓil hɔrɔ ké ri-rimna ya ke nun wo seɗe mbɔk.

⁴⁸Gel hɔrɔ ra ɓa gel ké kay hu hul ya mí su̧ záhri, hɔrɔ-u ri-rimna ya pi.

⁴⁹Í gboh nzuk ké laɓ fe hi̧ riŋ bi kan ri ra ya ɓayu ké nzuk a suŋ suŋ gbam, tom ɓay ku̧ tul ye hi̧ ni ke ɓa fe puhna kú-u kan tul hɔrɔ hi̧ Ŋgerzah[19].

⁵⁰Tom ra ɓa fe a suki, mí tomu nuŋ mba le, a fe mí ɓay laɓ hi̧ tom ɓá el nuŋ ɓáy le ? Í hi̧ tom ɓá ku̧ tul woiri, í hi̧ ɗeŋ ɓá ƴo ziŋ wuri. »