Read Karang Mbete Luk 1 Bible Online

Mbete Luk 1 - Karang bible

Mbete Luk 1

¹Soko woiri Diyofil nzuk a luki, Nah tu ɓahri, daɓa nzukri hi̧ tul woyri ki̧ fal feri ké kal ké sakra wah-ay ɔh ke gelu gelu mí ku̧ ɓil mbete.

²Ku mbi ɓayuri ké nzak nzukri ké ƴo gelu ke titilu ké ɓa nzuk-mgba sa̧w ɓayu kú-u ko ke nun woyri, kú-u lah ke suk woyri, mí ku hi̧ na, nah lah.

³A bi kara mi fakla sa̧wɓay fe-uri ké kal ur ke titilu da̧y ka̧h ɔh tɔru dara mí-i vbeh mbete-ay hi̧ mu ɓay mú tu te-teh ɓahri, sa̧wɓayuri kú-u ten hi̧ mu pol ra ɓa ketina gaŋ.

⁴

⁵Sew ké mbay Eroɗ a ye ŋgermbay gun Izarayelri lak mbay ké Zude tusiɓa ziɓri, nzuk fe puhna Ŋgerzah a hani mbew ƴo ri[1]. Riŋ ye ɓa Zakari. Ke ɓa mi̧hri Aroŋ ŋgernzuk fe puhna a titilu, ke ɓa gun zih a fál nzak ndɔk Abiyah. Wu̧y ye Elizabeɗ kara ɓa mi̧hri Aroŋ pi.

⁶Ŋgerzah ké ɓa Gaŋ tul feri riw ko niri seɗe mbɔk ɓa sa̧w nzuk ye. Ku ƴo tul bolkusol Ŋgerzah, ku mbi sa̧w fe laɓna ye si keni sina. Zɔmna ta-a.

⁷Mí ku mbuŋ gun ya. Elizabeɗ ɓa tuh. Seɗe mbɔk woyri ku kpɔkrɔ da.

⁸Sew a hani mbew bale, pihna-puh fe ké ɓil vul kani Ŋgerzah toh tul gun zih Abiyahri ké Zakari ƴo ɓilu.

⁹Kandɔk ké ɓa fe laɓna nzuk fe puhnari, ku laɓ fe eŋ ɓele[2] ɓay tu nzuk kú-u ɓay ndoh pihna-rih ɓil vul kani Gaŋ tul feri riw. Nzuku ɓá si nzuh rekna kpuh ké ba̧ri-u fu̧ Ŋgerzah buy buy ké ri. Ɓele-u mgba tul Zakari.

¹⁰Zakari rih vul kani Ŋgerzah. Daɓa gun Izarayelri ɓa ŋgi̧-u ƴo kala ƴo goŋ Ŋgerzah ba[3].

¹¹Mí Zakari ƴo nzuh rekna kpuh dale, tem nzak pihna Gaŋ tul feri riw ké ƴo fál ndɔk lakna gel-nzuh rekna kpuh ra ten mun hi̧ Zakari ko ni.

¹²Zakari ko ni ba, tul ye fa̧h zikiki zikiki. Hȩkme se ni mbamba.

¹³Mí tem nzak pihna ra ɓah hi̧ Zakari ɓahri : « Zakari, mú laɓ hȩkme ya ɓay fe le, Ŋgerzah lah goŋna wo lah. Wu̧y wo Elizabeɗ ɓay mbuŋ gun wo̧ronzuk hi̧ mu. Mu tú riŋ gunu ɓa Za̧h.

¹⁴A wo ke daɓa nzukri, i záy mun woiri ɓay law rihna mbuŋna gun ra.

¹⁵Ɓayu ké-e ná ɓa nzuk a luki ké nun Gaŋ tul feri riw. Ke ta nzo yim a rih-u ya. Yim a yi̧ŋu kara ke nzó ya pi[4]. Sa ɓil mah ye sa̧ kaŋ mí Tempuki ɓay ya̧ mun ye gbam.

¹⁶Gun Izarayelri ɓa ŋgi̧-u ɓay el gi ta̧w Ŋgerzah woyri a ye Gaŋ tul feri riw.

¹⁷Gun ra, ke sí pol Gaŋ tul feri riw ke ŋgerna Tempuki kandɔk ŋgerna huhrumun Eli gun nzak pihna Ŋgerzah a lewsa̧ ɓay hi̧ law bah gunri ɓá el gi tasa̧y gun woyri, ɓay hi̧ kerɓay nzukri ké poŋ ɓay Ŋgerzah ɓá ru̧ ɓa sa̧w Ŋgerzah. Ke sí pol ɓay hi̧ gun Izarayelri ɓá lek law woyri geŋ gina Gaŋ tul feri riw. »

¹⁸Mí Zakari ɓah hi̧ tem nzak pihna Ŋgerzah ra ɓahri : « Ké a bi ke wu̧y bi, nah kpɔkrɔ da-ay wa, ani mí-i tu ɓahri, fe-u ɓay laɓu le ? »

¹⁹Tem nzak pihna ra ɓah hi̧ ni ɓahri : « A bi mi ɓa Gabiriyel, mi ƴo pol Ŋgerzah. Ke pih mi ɓay sɔk ɓay a suki-ay hi̧ mu, mú lah.

²⁰Elizabeɗ ɓay mbuŋ gun ra gaŋ. Mí mu sa ya̧ ɓayu ya. Mí le kusol wo ɓay mbih-u. Mu káɓ ɓa mbiki. Mu ɓah ɓay ya kpu̧ru ka̧h nam mbuŋna gunu. »

²¹Gun Izarayelri ƴo kala vul kani Ŋgerzah ra ɓáy. Ku geŋ Zakari ra nda̧w. Law woyri na niri ɓa saŋ ɓayu ké Zakari ƴo ɓil vul kani Ŋgerzah sal sal.

²²Ke ti̧h bale, ke ziŋ ful ɓáh ɓay mba. Ke na ɓa mbiki. Mí nzukri tu ɓahri se, fe saŋ ti̧h nun ye ké ɓil vul kani Ŋgerzah, mí ke ti̧h ɓa mbiki-aw. Ke ka ɓa ndɔk wara.

²³Nam gun zih Abiyahri ɓay laɓ pihna-puh fe hi̧ Ŋgerzah ɔh ba, Zakari el si puh ye.

²⁴Mí wu̧y ye Elizabeɗ ya̧ ɓil. Elizabeɗ mu̧h mun ye few ndiɓi, ke ɓahri se :

²⁵« Gaŋ tul feri riw ko gel ma tul bi ké ɓil namri-ay mí lu su̧hru nun bi. »

²⁶Ɓil Elizabeɗ laɓ few tɔtɔklɔ. Ŋgerzah pih Gabiriyel tem nzak pihna ye si puh a hani ké tusiɓa Galile. Puh-u ɓa Nasareɗ.

²⁷Ke si ta̧w wu̧y tikla a hani mbew. Riŋ ye ɓa Mari, ke ɓa mbana Zezeɓ. Zezeɓ ra ɓa gun zih Daviɗ mbay a luki a lewsa̧.

²⁸Gabiriyel gi ta̧w Mari, mí ke vah ni kandɔkay : « Soko wo. Law Gaŋ tul feri riw rih ni ɓay tul wo. Ke ƴo ziŋ mu. »

²⁹Law Mari lu ni gba̧y ɓay tul ɓay ké-e lah. Ke ɓahri se, a a̧w wa, ɓa sam vahna a ani mí kaŋ le ?

³⁰Gabiriyel el ɓah ra ɓáy ɓahri : « Mari, mú laɓ hȩkme ya. Lawsuki Ŋgerzah ƴo ziŋ mu.

³¹Mú lah, mu yá̧ ɓil. Mu ɓay mbuŋ gun wo̧ronzuk. Mu tú riŋ gunu ɓa Zezu.

³²A ye ra ke ná ɓa nzuk a luki. Riŋ ɗina gun Ŋgerzah ké deɓ ye ta-a ɓay ɗi tul ye. Ŋgerzah a ye Gaŋ tul feri riw ke mbi ni ɓa mbay hi̧ ke kaɓ tul arŋgaw zih ye ŋgermbay Daviɗ.

³³Ke lák mbay tul gun Zakoɓri, a ye ké Ŋgerzah tu ni ɓa Izarayel, ka̧h sew ké tusiɓa ke nunmbam ɓay laɓ ɓa foyu. Lák mbay ye ta gbu̧h ya ɓa ŋgɔh. »

³⁴Mari vbi Gabiriyel ɓahri : « Mi tu wo̧ronzuk ya ɓáy. Ani mí-i yá̧ ɓil le ? »

³⁵Gabiriyel yih nzak ye ɓahri : « Tempuki ɓay ɗer gi pɔ́r tul wo. Ŋgerna Tem Ŋgerzah ké deɓ ye ta-a ɓay pɔr mu gbukru ɓay fe le, gun ké mu mbuŋu-aw ɓa Nzuk lawpuki. Ku ɓay ɗi ni ɓa gun Ŋgerzah.

³⁶Mú lah ɓayay : Yi̧n wo Elizabeɗ a ye ké nzukri ɗi ni mahtuh, ke ƴo ke ɓil ké tul kpɔkrɔ ye, ɓilu laɓ few tɔtɔklɔ mí aŋay.

³⁷Ɓay fe le fe ké mba Ŋgerzah mbew ta-a. »

³⁸Mí Mari yih nzak ye kandɔkay : « Mi ɓa gun-laɓ pihna hi̧ Gaŋ tul feri riw. Ké laɓ kandɔk ké mu ɓah-aw. » Kandɔkaw mí tem nzak pihna ra tɔr poŋ ni.

³⁹Ké ɓil namu-aw mí Mari ur kalaŋ mbi mahful hil ma puh Zakari ɓay ko Elizabeɗ. Puh-u na tusiɓa Zude. Ke ka̧h, mí ke vah Elizabeɗ.

⁴⁰

⁴¹Elizabeɗ ɓá lah vahna Mari bale, gun zay mun ké ɓil ye, mí Tempuki el ya̧ mun Elizabeɗ gbam pi.

⁴²Elizabeɗ ɓah ɓay ɓeleŋ ɓahri : « Ŋgerzah san mu ké sakra wu̧ynzukri gbam mí lu mgbɔkɔ ku̧ tul wo. Mgbɔkɔ ye ku̧ tul gun ké na ɓil wo pi.

⁴³Mi ɓa ge gaŋ mí mah Gaŋ bi gi ta̧w bi le ?

⁴⁴Suk bi lah vahna wo, mí gun ké na ɓil bi el zay mun ke law rihna.

⁴⁵Pol tehna Gaŋ tul feri riw ƴo ziŋ mu a wo ké law wo te sa tul ye ɓay fe le, ɓayaw ké-e pih hi̧ mu lah ra ɓay laɓ ɔh. »

⁴⁶Mari ba, ɓahri se : « Ɔkna bi gbam ƴo pir Gaŋ tul feri riw pi-pir.

⁴⁷Tem bi zo zakra zakra ɓay tul Ŋgerzah nzuk-ya̧ mi

⁴⁸ɓay fe le, ke ko kona ma tul gun-laɓ pihna ye a mah gelu-ay. Ur ke aŋay si ka̧h sew ke sew, nzukri ɓay ɗi mi ɓa gun pol tehna ye

⁴⁹ɓay fe le, Ŋgerzah nzuk huhrumun mí laɓ fe a luki hi̧ mi-ay. Riŋ ye mbew yaŋ mí mgbe ɓa Nzuk lawpuki.

⁵⁰Law in ye na sew ke sew ké tul nzukri ké hȩk ni.

⁵¹Ndɔk ye sɔk ŋgerna ye. Ke zi̧rma nzuk-hu̧h tulri ke kerɓay woyri.

⁵²Mbayri, ke ɗer niri ke gel kaɓna mbay woyri. Ko̧hkori ba, ke ɔr tul woyri.

⁵³Ke hi̧ suki mbah ɓil nzuk ɗakari tuɓ tuɓ. Nzuk fe ziŋnari le, ke ni̧h niri ndɔk zolom.

⁵⁴Ke mgba sa̧w gun Izarayelri, in ké-e mgba ziŋ niri ra na law ye

⁵⁵kandɔk ké-e wahɓayu ziŋ ziih Abaraham ke mi̧hri ye lewsa̧, mí ke ƴo tulu kpatara. »

⁵⁶Mari kaɓ ziŋ Elizabeɗ few say dara mí ke el si puh ɓáy.

⁵⁷Nam-kaɓ peŋe Elizabeɗ ka̧h bale, ke mbuŋ gun wo̧ronzuk.

⁵⁸Bɔh puh Elizabeɗri ke yi̧n yeri lah ɓahri, Gaŋ tul feri riw mgba in ziŋ ni ɓa bawu, mí ku laɓ mun rihna ziŋ ni.

⁵⁹Nam toŋndɔk seɗe-u ka̧h ɓa nam-kuŋ ndi̧w gun ba, nzukri gi mbu̧h hani ɓayu, mí ku yih ɓay tu riŋ gunu ke riŋ bah ye Zakari.

⁶⁰Mí mah gun sa-a. Ke ɓahri : « Riŋ gunay ɓá tu kaŋ ya. Riŋ ye ɓa Za̧h. »

⁶¹Ku ɓahri : « Riŋ nzuk a suŋ ké sakra in woiri mí ɓa Za̧h lo ? »

⁶²Bale ku laɓ ndɔk vbi bah gunu ɓay ɓahri, riŋ gun ra ɓá tu ɓa fe le ?

⁶³Ke vbi gbekre fe vbehna, mí ke vbeh kandɔkay : « Za̧h mí ɓa riŋ gun ra. » Nzukri gbam kaɓ silili.

⁶⁴Sa gelu-aw mí nzak Zakari mgbur, mí ke ɓah ɓay yororo yororo el ke tumbɔl hi̧ Ŋgerzah.

⁶⁵Hȩkme se bɔh puh yeri gbam. Mberem fe ké kal ra ya̧ gelri ké tusiɓa Zude ya̧h ya̧h.

⁶⁶Nzukri gbam vbi law woyri ɓah se : « Mí-aw ba, Gaŋ tul feri riw ɓaŋ ndɔk ye kan tul gun ra wa, gunu ɓay na ani munu le ? »

⁶⁷Ké nzak Zakari mgbur ra, Tempuki ya̧ mun ye gbam hi̧ ni a ye bah gunu ɓah ɓay kandɔkay :

⁶⁸« Tumbɔl hi̧ Ŋgerzah a ye Gaŋ tul feri riw, záh gun Izarayelri ɓay fe le, ke ɗer gi ko gun yeri, mí ke puh mbɔl hul soh tul sa̧w nzuk yeri.

⁶⁹Ke mbi gun mbew ké haŋsekle gun zih Daviɗ mbay a luki a ye ké-e ɓa gun-laɓ pihna Ŋgerzah. Gunu ɓa huhrumun ye Ŋgerzah ɓay ya̧ na kandɔk ké-e pih gun nzak pihna yeri sɔk ɓayu ke titilu da̧y ra.

⁷⁰

⁷¹Ke yá̧ na ké ndɔk nzukbaari, ke yá̧ na ké ndɔk nzuk-fu̧y nari, sɔk keni law in ké-e mgba ziŋ ziihri, ke ker ɓay si tul sal in ké-e ŋga̧h ziŋ zih wahri.

⁷²

⁷³Salɓay ké-e wah ké-e hah mun ye gbaɗ gbaɗ hi̧ ziih Abaraham ra, ke yȩkre ya. Mí ke ƴo tulu ziŋ na.

⁷⁴Ke ya̧ na ké ndɔk nzukbaa wahri dan hȩkme, ɓay náh dim ni ɓa nzuk kani ye,

⁷⁵ɓay náh dim ni ke law a teh-u, ɓay náh dim ni ɓa záh wah, ɓay náh dim ni ké ta̧w ye ɓa ŋgɔh.

⁷⁶A wo gun bi ba, nzukri ɓay tu mu ɓa gun nzak pihna Ŋgerzah ké deɓ ye ta-a ɓayu ké mu sí pol hi̧ Gaŋ tul feri riw ɓay hi̧ nzukri ɓá geŋ gina ye.

⁷⁷Mu hí̧ sa̧w nzuk yeri tu ɓahri, suya lu ké tul woyri, Ŋgerzah gi sel niri ké ndɔk hul tumbɔl law in ké-e ker seh woyri keni. Ke ɗer gi ko niri, ke ɓa gel tehna ké ti̧h ke síɓa.

⁷⁸

⁷⁹Ndu̧yna mun ye teh gel hi̧ sa̧w nzuk yeri, ku ƴo ɓil tirima, ku kaɓ huh tem hul, ke hí̧ ku mbí mahful sina ké ɓil ɗeŋ. »

⁸⁰Gun Zakari ra hu̧h. Tem mun ye ŋger ma pol pol. Ke kaɓ ɓil lawkɔr kpu̧ru ka̧h nam ké-e sɔk mun ye hi̧ gun Izarayelri.