Read Karang Mbete Luk 10 Bible Online

Mbete Luk 10 - Karang bible

Mbete Luk 10

¹Fá-falu-aw Gaŋ tul feri riw san nzukri ɓa bon toŋndɔk say[43]. Ke mgba niri seɗe seɗe el pih niri si pol ye ma puhri gbam ke gelri riw ké-e ɓay si ri.

²Ke ɓah hi̧ niri ɓahri se : « Naŋ na ndekle ké waka mah vbehna, mí nzuk-vbeh naŋuri ŋgi̧ ya. Dale í goŋ nzuk waka ɓá pih nzuk-vbeh naŋ a ɓoruri gi dɔm tul nzuk a polri ɓáy.

³Í si wuri. Mí í lah, mi ƴo pih wuri ɓa samiri ma sakra gaykoyri.

⁴Í mgba ɓɔl lari ya, ɓɔl ɓay goŋ fe ya, sabɔk a ɓoru ya. Í ta̧h ké mahful ɓay vah nzuk ya pi.

⁵Kerpuh a a̧y ké mgba wuri gahru le, í ɓah kandɔkay : “Ɗeŋ ɓá ƴo ziŋ wuri.”

⁶Nzuk law ɗeŋ ƴo ra ri le, mgbɔkɔ ɗeŋ woiri ɓay kaɓ ziŋ nzuku. Nzuk law ɗeŋ ta-a le, ɗeŋ ra ɓay el ziŋ wuri.

⁷Í na kerpuh ye. Í na puh gahru seɗe ya. Fe su̧na kerpuh-aw, i ɓay su̧-u. Mbih kerpuh-aw, i ɓay nzo-u, ɓayu ké gun ké laɓ pihna le, kpaŋndɔk ye mah pihna ye.

⁸Gelke i ka̧h puh mbew, mí puh-u mgba wuri le, fe su̧na kú-u hi̧ wuri, í su̧.

⁹Í gah senari ké puh-aw. Í ɓah hi̧ niri kandɔkay : “Lák mbay Ŋgerzah gi ka̧h ta̧w woiri.”

¹⁰Gelke i ka̧h puh a ɓoru, mí puh a a̧w sa mgba wuri gahru ya le, í ti̧h wuri mahful mboŋ, í ɓah ɓay ɓahri se : “Kasal puh-ay ké mgbahla bɔk wah-ay, nah ƴo tak ma fal. Mí í ko wuri nzuk puh-ayri, lák mbay Ŋgerzah ka̧h ta̧w woiri.” »

¹²Zezu el ɓah hi̧ gun nzak pihnari-aw ɓáy ɓahri se : « Nam ké ɓay gi-u-aw le, salɓay suya ké ku̧ tul nzukri ké puh-aw ɓay kpuh mba salɓay suya ké ku̧ tul nzuk a lewsa̧ri ké Sɔdɔm mba-mba.

¹³Kúy, gun Izarayelri a woiri ziɓri ké Korazin ke Beɗsayda, koseh ƴo geŋ wuri ɓay fe le, sa̧wnzuk a ɓoruri ké Tir ke Sidoŋ a lewsa̧ ku ko ra fe saŋri ké laɓ ké ɓil Korazin ke Beɗsayda le, nzuk Tir-ri ke Sidoŋri-aw ɓay ndoh gar seh, ku ɓay buklu mun woyri ɓil seh hɔrɔ, ku mbí law ké tul tukala ma fal el kan law tul bi.

¹⁴Keni-aw gaŋ kara salɓay suya ké ku̧ tul woiri nzuk Korazinri ke nzuk Beɗsaydari ra ɓay kpuh mba salɓay suya ké ku̧ tul nzuk Tir-ri ke Sidoŋri mba-mba.

¹⁵A woiri nzuk Kapernayumri, i ker ɓahri, tul woiri ɓay gaŋ kal tul a ɓoruri si ka̧h nunmbam ley ? Hay. Tul woiri ɓay gɔr malak ma puh Hul.

¹⁶Nzuk ké lah ɓay woiri gun nzak pihna biri le, lah ɓay bi. Nzuk ké ko wuri ɓa kɔkɔ le, ko mi ɓa kɔkɔ. Nzuk ko mi ɓa kɔkɔ le, ko nzuk ké pih mi ɓa kɔkɔ munu. » Kandɔkaw mí Gaŋ tul feri riw pih gun nzak pihnari ké bon toŋndɔk say.

¹⁷Elna gun nzak pihnari ké bon toŋndɔk say ra[44], ku ɓah ke law rihna ɓahri : « Ŋgernzuk, nah haw ŋgerna záhri ke riŋ wo. »

¹⁸Mí Zezu ɓahri : « Mi ko-ko. Mbay záh tukala ɗer ke gel kaɓna ye vbu siɓa gbim kandɔk mbam ké sak yela.

¹⁹Í lah. Mi hi̧ wuri ŋgerna hi̧, ŋgerna-nda tul soyri ke tul ndáyri, ŋgerna tul nzukbaa a ye satan pi. Ŋgerna fe mbew ta ik tul woiri ya.

²⁰Keni-aw kara law woiri ɓá rih wuri ɓay haw ŋgerna záhri ya. Law woiri ɓá rih wuri ɓay fe le, riŋ woiri vbeh ké sakra riŋ gunri kú-u ki̧ ké nunmbam ma[45]. »

²¹Sa̧wseh-u bale, Tempuki laŋ law Zezu wa̧y wa̧y, mí ke ɓahri : « Baah, a wo ké mu ɓa Gaŋ tul feri gbam ké nunmbam pi, ké tusiɓa pi riŋ ɗina wo mgbe ké nzak bi ɓay fe le, mu mu̧h ru̧na wo ké nun nzuk ru̧nari, ké nun nzuk kerlawri pi. Gunri ba, mu hi̧ ku tu sa̧wu. Riŋ ɗina wo mgbe ké nzak bi gaŋ ɓay fe le, baah, mu ko fe laɓna-u su-su ké nun wo.

²²Bah bi ndoh feri riw ɓil ndɔk bi. Nzuk mbew ké tu gun tu ta-a, sa ɓa baah mí tu gun ye. Nzuk ké tu baah tu ta-a. Sa ɓa gun ye mí tu ni. Nzukri ké gun ƴo ke law rihna ɓay kú tu baah, mí ku tu ni. »

²³Zezu el ko kona ma tul nzuk-dih fal yeri mbew mbew gbam, mí ke ɓah hi̧ niri ɓahri : « Pol tehna Ŋgerzah teh tul nzukri ké ko fe ké i ƴo ko-u.

²⁴Mi ɓahri se, gun nzak pihna a lewsa̧ri ke mbay a lewsa̧ri ɓa daɓa ku taw ɓay ko fe ké i ko-ay, mí nun woyri ko ya. Ku taw ɓay lah ɓay ké i lah-ay, mí suk woyri lah ya. »

²⁵Nzuk goso fe tuna mbete bolkusol Ŋgerzah a hani-u ƴo ri. Ke ur síɓa. Ke leh law Zezu ke ɓay ɓahri : « Metere, a fe mí-i láɓ ɓay ya̧ puh a a̧y ké ɓay mí kaɓ sew ke sew ɓa ŋgɔh le ? »

²⁶Zezu ɓah hi̧ ni ɓahri : « Mbete bolkusol Ŋgerzah ɓah ani le ? Mu lah ɓayu na ani le ? »

²⁷Ke yih nzak ye ɓahri : « Miƴori ɓa Ŋgerzah wo, mu sá ni ke law wo gbam ke mun wo gbam ke huhrumun wo gbam ke kerɓay wo gbam, mu él sa nzuk mbaŋ wo eŋ mun wo kaŋ pi[46]. »

²⁸Zezu el ɓahri : « Gelu gaŋ mú-u yih vbiɓayaw. Mu laɓ kandɔkaw le, mu ɔ́-ɔkna. »

²⁹Nzuk-sɔk mbete bolkusol Ŋgerzah ra yih ɓay sɔk mun ye ɓa nzuk ké ƴo mbew ziŋ Ŋgerzah ɓa záh ye, mí ke el vbi Zezu ɓahri : « Mí-aw ba, nzuk mbaŋ bi ɓa sam nzuk a suŋ le ? »

³⁰Zezu yih vbiɓay nzuk-sɔk mbete bolkusol Ŋgerzah ra kandɔkay : « Gun Izarayel mbew ur ke Zurusalem, mí ke ɗer ke mahful-si ma Zeriko dale, kuper-ri ti̧h tul ye kpah. Ku fa̧h fe ye poŋ ni diŋ ndikpo. Ku el ndakla ni mo̧r mo̧r, mí ku tɔr poŋ ni vbu nun hul.

³¹Gun Izarayel mbew, nzuku ɓa nzuk-fe puhna Ŋgerzah. Ke ɗer si ke fulaw pi bale, ke ti̧h tul ye, mí ke gȩn geɗeɗe mí ke kal.

³²Gun Izarayel a fál ndɔk Levi a ɓoru ka̧h gel ké nzuk ra na tul mun. Ke ko ni bale, ke gȩn geɗeɗe mí ke kal.

³³Nzuk a sa̧w Samari mbew si ke fulaw. Ke ti̧h tul ye. Ke ko ni bale, law ye sa̧h.

³⁴Mí ke fer yim wɔk keni no̧k ra, ke fer num ku̧ ri pi, mí ke ŋga̧h bale, ke mbi ni kan tul bamnde ye suk ni keni si ka̧h vul nam gahru kú-u ƴo puh ke lari, mí ke mgba sa̧w ye.

³⁵Tipele-u, ke ten lari mah mgba sa̧w sena namri ɓa ŋgi̧-u[47], mí ke ndoh ndɔk nzuk vul gahru ɓahri : “Ya̧h, mú mgba sa̧w sena ke lari-ay. Mu ɓeɓ ra lari a ɓoru kal tulu le, mi púh mu seh elna bi ɓáy.”

³⁶Aŋay, a wo ba, mu ko ani le ? Ké haŋsekle nzukri-aw wa, nzuk a suŋ mí mgba nzuk ké kuper-ri vba̧ ni ra ɓa nzuk mbaŋ ye le ? »

³⁷Nzuk-sɔk mbete bolkusol Ŋgerzah ɓahri : « Nzuk ké mgba in ziŋ ni mí sa ni ɓa nzuk mbaŋ ye. » Mí Zezu ɓah hi̧ ni ɓahri se : « Mú si. Mú laɓ kaŋ pi. »

³⁸Zezuri ƴo tul ful-si ma Zurusalem ra, mí ku ka̧h puh a hani. Ku si kerpuh wu̧y a hani mbew. Riŋ ye ɓa Marta. Marta ra ta̧h ké tul woyri mí ƴo mgba niri gahru.

³⁹Yi̧n ye Mari ba, kaɓ ké bɔk Gaŋ tul feri riw. Ke ƴo lah ɓay ye.

⁴⁰Marta le pihna ƴo zaŋ tul ye lɔɗ ké tul pihna ɓoɗ ɓoɗ ɓa ŋgi̧-u. Dale ke ta̧h ƴo ké ta̧w Zezu, mí ke ɓahri se : « Ŋgernzuk, yi̧n bi-ay poŋ mi diw ke ta̧hma-ay wa, ɓayu ko mu ya ley ? Mú ɓah hi̧ ni, ké gi ya̧ ndɔk bi. »

⁴¹Mí Gaŋ tul feri riw yih nzak ye ɓahri : « Marta, Marta wo, mu ƴo yɔklɔ mun wo ke kerɓay ɓa ŋgi̧-u.

⁴²Fe mbew yaŋ mah nzuk pirmatul seeh, ɓayu ké Mari mbi suki ɓa fe ye. Suki ye-ay ra nzuk ké ɓay nah ké ndɔk ye ta-a. »