Read Karang Mbete Luk 13 Bible Online

Mbete Luk 13 - Karang bible

Mbete Luk 13

¹Bale nzuk a haniri ndazi fe ké laɓ nzuk Galile a haniri hi̧ Zezu lah. Nzuk Galileri ra ƴo puh fe ké gel fe puhna Ŋgerzah dale, guvener Pilaɗ i niri hi̧ sem woyri zukru ke sem fe puhnari ké gel fe puhna Ŋgerzah.

²Zezu ba, el ke ɓay hi̧ nzukri ɓahri : « A woiri i ker ɓahri, suya nzuk Galileri-aw mba suya tɔr nzuk Galile a ɓoruri riw mí ku ziŋ hul ɓayu wa ?

³Kaŋ ya. Mi ƴo ɓah hi̧ wuri ɓahri, í lu kerɓayu ma fal. I sa mbi law woiri ké tul suya woiri el kan law tul Ŋgerzah ya le, gbam woiri i zi-u pi.

⁴Nzukri ké boh falu toŋndɔk seɗe ké baw vul a gaŋu ké Silowa haw nde niri ra ba, i ker ɓahri, mbɔl suya ké tul woyri-aw mba tul mbɔl ké na tul tɔr nzuk a ɓoruri ké kaɓ Zurusalemaw wa ?

⁵Kaŋ ya. Mi ƴo ɓah hi̧ wuri ɓahri se, í lu kerɓayu ma fal. I sa mbi law woiri ké tul suya woiri ma fal el kan law tul Ŋgerzah ya le, gbam woiri i zi-u pi. »

⁶Zezu el ɓah ɓay ra ke lawɓay ɓahri se : « Nzuk a hani mbew ma̧ kpuh nzu̧y ké ɓil waka viyȩh ye laɓ mbihmbam ŋgi̧-ŋgi̧ da[57]. Ke gi ɓay hal lehna-u, mí kpuh-u leh ya.

⁷Bale ke si ɓah hi̧ nzuk-kɔr waka-u ɓahri : “Mú ko. Laɓ mbihmbam say mí na-ay mí-i gi ɓay hal lehna nzu̧yay, mí kpuh-u leh ya. Mú lu ke sa̧wu kan kpah. Kpuh ra gboh gel ndikpo.”

⁸Nzuk-kɔr waka ra yih nzak ye ɓahri : “Mbay, law woiri ɓá voh. Í poŋ kpuh ra seway ɓáy. Mi ɗéh siɓa ɗoŋ bɔku. Mi kú̧ ri vbi̧ri feri.

⁹Ko ya le, kpuh-u ɓay leh sew a ɓoru ɓáy. Kpuh-u leh ya gaŋ le, mi té kan kpah ɓáy.” »

¹⁰Zezu ƴo firma nzukri ɓay lák mbay Ŋgerzah ɓil vul misoŋ a hani. Namu ɓa nam ɔkna.

¹¹Wu̧y a hani mbew ƴo ri. Wu̧y ra, záh mgba ni laɓ mun ye ɓa sena mah mbihmbam boh falu toŋndɔk seɗe. Záh ra ra̧h tak ye ŋgole. Mahful ɓay ndar mun ye ta-a.

¹²Zezu ɓá ko wu̧yaw kaŋ bale, ke ɗi ni, ke ɓahri : « Wu̧y, sena wo-aw lu ké tul wo lu-lu. »

¹³Mí ke ndar ndɔk kan tul wu̧y ra ba, tak wu̧yu ndar kparak hi̧ ni ke pir Ŋgerzah ba.

¹⁴Mí mbay vul misoŋ ziŋ law fa̧hna ɓay fe le, Zezu gah sena ra ke nam ɔkna. Ke ɓah ɓay le, el ɓah ra ɓáy hi̧ daɓa nzukri ɓahri se : « Nam-laɓ pihna ɓa namri ké tɔtɔklɔ, í gi ɓil namri-aw gah sena woiri ma. Í gah sena ke nam ɔkna ya. »

¹⁵Gaŋ tul feri riw ba, fer nzak mbay ra kandɔkay : « A woiri nzuk-mu̧h ketinari, ké sakra woiri-ay ra wa, a ge mí sel nday ye mini bamnde ye ke nam ɔkna si nzo mbih ya lo ?

¹⁶Wu̧yay, ke ɓa gun zih Abaraham. Mbay záh tukala ŋga̧h ni, í ko, laɓ mbihmbam boh falu toŋndɔk seɗe da. Su-su ɓay hi̧ selna ye ɓá laɓ ke nam ɔkna kaŋ ya le wo ? »

¹⁷Ɓay ɓahna Zezu hi̧ su̧hru se nzukbaa yeri. Nzuk a ɓoruri gbam ba, ziŋ law rihna ɓay fe laɓna a ŋgeruri ké-e laɓ.

¹⁸Zezu el ɓah ra ɓáy ɓahri se : « A fe mí-i mgba tuh ke lák mbay Ŋgerzah le ? Lák mbay ye na ani le ?

¹⁹Lák mbay Ŋgerzah na kandɔk mi̧hri fe pay a mah gelu kalak kalak ké nzuk mi̧h ké waka. Fe payu ti̧h mí hu̧h dale laɓ kpuh hi̧ ndɔkuri vba gbah gbah, mí gundoyri gi laɓ ri vul. »

²⁰Zezu el ɓahri : « A fe mí-i mgba tuh ke lák mbay Ŋgerzah ɓáy le ?

²¹Lák mbay Ŋgerzah na kandɔk is ké wu̧ynzuk wa̧h ɓil som kilo bon seɗe[58]. Is ra, rih ɓil som ya̧h ya̧h mí ur som mbah fe ɓaɗ ɓaɗ. »

²²Sina Zezu ma Zurusalem, ke kal puh a lukiri ke gun puhri ƴo firma nzukri ɓay lák mbay Ŋgerzah.

²³Bale nzuk mbew vbi ni ɓahri : « Ŋgernzuk, tul nzukri ké ɓay ti̧h ke ndɔk hul mí ŋgi̧ ya le ? » Mí Zezu ɓahri :

²⁴« Í ruh mun woiri ɓay rih puh ke nzakful a ah ya-u ɓay fe le, mi ƴo sɔk wuri, nzukri ɓa ŋgi̧-u ƴo ƴah ɓay rih keni, mí ku ziŋ mahful rih-u ya.

²⁵Ur ke nam ké nzuk puh-u ɓay ur dar nzakful gbik dale, i ti vba̧ tuhru nzak vul ɓahri : “Nzuk puh, í mgbur ful hi̧ na” bale, ke ɓáh hi̧ wuri ɓahri : “Mi tu sa̧w woiri ya. Puh-ay ta ɓa sa̧w puh woiri ya.”

²⁶Wara mí i él ɓah ɓay ra ɓáy ɓahri : “Nah lak huru ziŋ wuri, nah nzo fe ziŋ wuri, nah ƴo sɔk fe firma woiri ké fál kɔr wah-ay ra ba wa, ani le ?”

²⁷Kandɔkaw mí nzuk puh-u ɓay el ɓah ɓay ra hi̧ wuri ɓahri se : “Mi tu sa̧w woiri ya. Í tɔr wuri gbam ké ta̧w bi ma sa̧, pihna woiri ɓa sél ɓay Ŋgerzah.”

²⁸Namu-aw a woiri kú-u vbuk wuri ku̧ kala-aw, i ɓay ko Abaraham, Isak, Zakoɓ, gun nzak pihna Ŋgerzahri riw kaɓ ɓil puh lakna Ŋgerzah le, i ɓay vuh rew ke mbihnun darara darara, i sú̧ sel ŋger ŋger.

²⁹Sa̧wnzuk a ɓoruri ɓáy ɓay mbu̧h haniri ke Abarahamri mí kaɓ nzak fe su̧na ké puh lakna Ŋgerzah. Ku úr ke fál tí̧h seh ke fál ríŋ seh, fál ndɔk lakna ke fál ndɔk kperu pi.

³⁰Í ko, nzukri ké ƴo sar fal ɓay kal ma pol. Nzukri ké ƴo pol ba, ɓay el si sar fal mgbaɗ. »

³¹Ké sa̧wseh-u, farizi a haniri gi ta̧w Zezu ɓahri : « Mú ɗuk ma gel a ɓoru ɓay fe le, mbay Eroɗ yih ɓay i mu. »

³²Mí Zezu ɓahri : « Í si ɓah ɓayay hi̧ suhze ra, ké lah, mi ƴo ni̧h záhri ké tul nzukri, nzuk senari kara mi ƴo gah niri guri ke pele. Nam a sayu ba, mi ɔh gbam ke gelu.

³³Ɓa ra fe fe gaŋ kara guri, pele, pelah, mi ɓa sina ma Zurusalem ɓay fe le, gun nzak pihna Ŋgerzah ta hu kala Zurusalem ya.

³⁴Zurusalem, Zurusalem wo, a wo puh ké Ŋgerzah hi̧ vul ye kan ri, gun wori ƴo i gun nzak pihnari ké Ŋgerzah pih niri. Ku vbuk nzuk a ɓoruri ké Ŋgerzah pih niri ke kasaw i pi. Bɔk ka̧h ani mí-i yih ɓay mbu̧h gun wori kandɔk mah ndoy ké ƴo mbu̧h gun yeri el pɔr tulu, mí ku sa-a.

³⁵Í ko. Ŋgerzah poŋ gel kani ye hi̧ wuri wara. Mi ɓahri se, i ta ko mi mba kpu̧ru ka̧h seh ké i tú mi ɓahri se : “Mgbɔkɔ Gaŋ tul feri riw ku̧ tul wo ké mu gi-aw ke riŋ ɗina ye[59].” »