Read Karang Mbete Luk 14 Bible Online

Mbete Luk 14 - Karang bible

Mbete Luk 14

¹Zezu rih ɓil kerpuh ŋgernzuk fariziri a hani ɓay su̧ fe dale, namu ɓa nam ɔkna. Ku ko kona ma tul Zezu yi̧m.

²Nzuk a hani mbew ƴo ri. Mun ye he-hew. Ke ƴo pol Zezu.

³Bale Zezu vbi nzuk goso fe tuna mbete bolkusol Ŋgerzahri ke fariziri ɓahri : « Mbete bolkusol Ŋgerzah hi̧ nzukri ful ɓay gah sena ke nam ɔkna mini ani le ? »

⁴Mí ku kaɓ silili, ku fer nzak ye ya. Zezu ba, mgba nzuk sena ra el gah ni mí poŋ ni tɔr.

⁵Zezu el ɓah hi̧ niri ɓahri : « Ké sakra woiri-ay, a ge mí gun ye mini nday ye lih ɓu lɔkɔ mbih ke nam ɔkna le, ke ten ɓa gah-u ya le wo ? »

⁶Nzuk ké ziŋ nzak él ke ɓay ɓoɗ ta-a.

⁷Mí Zezu el ɓah hi̧ gahru a ɓoruri ké ŋgernzuk fariziri ɗi niri kaɓ nzak fe su̧na-aw pi. Ke ko gahruri ƴo mbi gel kaɓna a suki suki, mí ke ɓah lawɓayay ɓahri :

⁸« Gelke nzuk ɗi mu si su̧ fe ké gel ti̧hmbih-ya̧ hani le, mú mgba gel kaɓna riŋ ɗina ya. Ko ya le, nzuk ti̧hmbih ɗi nzuk a ɓoru ké riŋ ɗina ye mgbe mba riŋ ɗina a wo.

⁹Dale nzuk ti̧hmbih ɓay gi ta̧w wo ɓahri : “Mú poŋ gel kaɓna-ay hi̧ ŋgernzuk.” Bale su̧hru ɓay se mu. Mu úr si kaɓ gel kaɓna ke sar fal mgbaɗ.

¹⁰Mí gelke nzuk ɗi mu si su̧ fe le, mú mgba gel kaɓna a gunri. Nzuk-ɗi mu gi ka̧h dale, ke ɗí mu ɓahri : “Ya̧h, mú si kaɓ gel kaɓna ŋgernzuk ké na polaw.” Kaŋ dale nzukri ké kaɓ nzak fe su̧na ziŋ mu, ku tú mu ɓa nzuk riŋ ɗina.

¹¹Nzuk a suŋ suŋ gbam ké ɔr tul ye le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa. »

¹²Mí Zezu el ɓah hi̧ ŋgernzuk fariziri ké ɗi niri gi su̧ fe ra ɓahri : « Gelke mu ɗi nzukri gi su̧ fe, ɓa ra fe su̧na a garu mini fe su̧na ti̧hmbih le, mú ɗi ya̧h wori ya, yi̧n wori ya, in wori ya, mbaŋ wori nzuk fe ziŋna kara ya pi rɔkɔ kú soh ɗi mu si su̧ fe puh keni mbɔl fe su̧na wo.

¹³Gelke mu ɗi nzukri gi su̧ fe le, mú ɗi ko̧hkori, nzukri ké mun woyri hu yɔh, kpereri, ra̧wri ma.

¹⁴Ku ta puh mbɔl fe su̧na wo ra ya. Mí pol tehna Ŋgerzah ɓay teh tul wo ɓayu ké a ye mí ke ɓay puh mbɔlu ke nam ké nzukri ké tu ni ɓa záh woyri ziŋ pa̧ymun a foyu. »

¹⁵Bale nzuk a hani mbew ké kaɓ nzak fe su̧na ziŋ Zezu ra el ke ɓay ɓahri : « Pol tehna Ŋgerzah ƴo tul nzuk ké ɓay kaɓ nzak fe su̧na ké puh lakna ye. »

¹⁶Mí Zezu el ɓahri : « Nzuk a hani-u mbew wahɓay laɓ baw ti̧hmbih. Ke ɗi daɓa nzukri ɓá gi su̧ fe.

¹⁷Fe ti̧hmbih lek ɔh dale, ke pih gun nzak pihna ye si ɗi nzukuri-aw ɓahri : “Ti̧hmbih lek ɔh da. Í gi wuri su̧ fe wara.”

¹⁸Mí a ge ge le, ɓah lakna ɓay ye ɓay ye. Nzuk a titilu ɓahri se, ke yeh waka. Ɓay si ko waka-u zaŋ law ye. A ye ra ke goŋ law vohna.

¹⁹Nzuk a ɓoru ɓahri se, ke yeh ndayri seɗe seɗe gel ndiɓi. Ke ƴo tɔrna ɓay leh ndayuri ɓay ko-u. A ye ra ke goŋ law vohna.

²⁰Nzuk a ɓoru ɓáy ɓahri se, ke ya̧ wu̧y ɓa foyu. Sa̧wu mí a ye ra ke sí ya.

²¹Gun nzak pihna el ndazi ɓayri hi̧ bahgaŋ ye lah bale, haŋ nzuk puh-aw fa̧h ni fa̧-fa̧h, mí ke ɓah hi̧ gun nzak pihna ra ɓahri : “Mú si ɓa gah-u ke mahful mgboŋri ke zelfulri. Mú ɗi ko̧hkori, nzukri ké mun woyri hu yɔh, ra̧wri, kpereri. Mú ɓaŋ niri, kú gi, kú su̧ fe ti̧hmbih bi.”

²²Gun nzak pihna ra ur si. Ke el gi, mí ke ɓahri : “Mbay, bolkusol woiri ra, mi laɓ ɔh da. Wara mí gel kaɓnari toŋ ɓáy.”

²³Bahgaŋ ye el ɓah hi̧ ni ɓahri : “Mú mbi mahful si puh a ɓoruri : puh a lukiri ke puh a ɓil suyri. Mú ɗi nzuk puh-awri, kú gi ti̧hmbih bi-ay. Kú mbah puh bi nzuturu.

²⁴Mi ƴo ɓah hi̧ wuri ɓahri se, ké sakra nzukri ké mi ɗi niri polaw, nzak rim nzuk mbew woyri ta leh fe su̧na ti̧hmbih bi-ay ya.” »

²⁵Daɓa nzukri ɓa ŋgi̧-u ƴo mbu̧h hani ké ta̧w Zezu, mí ke ɓah ɓay hi̧ niri ɓahri : « Nzuk gi ta̧w bi, mí law ye lu ké tul bah ye ya, tul mah ye ya, tul wu̧y ye ya, tul gun yeri ya, tul yi̧n yeri ya, tul manah yeri ya, dara mí mun ye ya le, nzuku mah dih fal bi ya.

²⁷Nzuk a a̧y ké sa mbi kpuh vbatay hul ye suk toŋ fal bi keni ya le, nzuku mah dih fal bi ya pi.

²⁸Ɓayu ké a ge mí ké sakra woiri-ay ɓay mboh vul a bawu dan kí̧ lari mboh-u le ? Ke ɓay ko ŋgerna ye mah ɔh pihna-u dara ɓáy ya le ?

²⁹Ŋgerna ye mah ɔh mboh-u ya le, ke ta titil pihna-aw ya rɔkɔ nzukri ɓá mbi riŋ ye ɗi keni siŋ sakna kandɔkay :

³⁰“Fenaze ti mboh vul ye, mí ŋgerna ɔh-u ta-a wo.”

³¹Dara mbay ɓá ur ɓay ruh ŋgermu ziŋ mbay a ɓoru le, ke ɓay ko ŋgerna ye dara ɓáy ya le ? Ke vbi law ye, tul soze yeri ké laɓ sɔɗ sɔɗ boh gel boh-aw (10.000) mah haw ŋgermu tul mbaŋ ye mbay ké ƴo gi ke soze yeri sɔɗ sɔɗ boh gel bon seɗe (20.000) ma-mah mini ani le ?

³²Ŋgerna mbayu mah ya le, ke píh nzuk ye si pol ka̧h ta̧w mbaŋ ye mbay ɓay goŋ ni lekɓay ɓá na sakra woyri.

³³Kaŋ pi mí nzuk a suŋ suŋ ké sakra woiri-ay, ke lu kerɓay ye tul fe yeri riw ma fal ya le, ke mah dih fal bi ya.

³⁴Tom ɓa fe a suki, mí tom nuŋ mba le, a fe mí ɓay laɓ hi̧ tomu ɓá el nuŋ ɓáy le ?

³⁵Tom ra ti̧h suk ya. Tomu mah hi̧ tusiɓa ŋgerna ya, mah ná ɓa aŋgere ya pi. Tom ra ku fer ku̧ kpah. Nzuk ké ƴo ke suk ɓay lah ɓay le, ké lah. »